Ifyo Mwingatwalilila Abashangila Ilyo Umwana Apondoka

ABANAKASHI abo twalaita ukuti baJoy, balyeseshe ukusambilisha umwana wabo umwaume ukulatemwa Yehova Lesa. Lelo ilyo ali mupepi ne myaka 20 alipondweke no kufuma pa ng’anda. BaJoy batila: “E cintu cankalipapo sana. Umutima walikalipe, nshaishibe ifya kucita, na mano yalipelele.”

Nalimo na imwe mwalyesha ukusambilisha abana benu ukuti baletemwa Lesa no kulamubombela, e lyo mwamona umo nelyo na bambi bapondokela Lesa. Kuti mwashipikisha shani umuseebanya wakule fyo? Cinshi cingamwafwa ukutwalilila abashangila mu kubombela Yehova?

Ilyo Abana ba kwa Yehova Bapondweke

Ica kubalilapo fye ico mufwile ukwishiba ca kuti Yehova alishiba bwino sana ifyo muyumfwa. Pali Esaya 49:15, tubelengapo ukuti: “Bushe umwanakashi engalaba akanya kakwe akoonka, ukukanacitilo mwana wa mwi fumo lyakwe inkumbu? Ukuba kwena aba bengalaba, lelo ine nshakalabe iwe iyo.” Ca cine, Yehova na o alomfwa ifyo abafyashi bomfwa pa bana babo. Afwile alitemenwe sana ukumona bamalaika bonse balemulumbanya no kulamubombela. Ilyo Yehova aleyasuka Yobo “ukufuma mu nkuuka” aibukishe ifyo alesangalala pamo no lupwa lwakwe ulwaikatana ulwa fibumbwa fya ku muulu, atile: “Wali kwi ilyo nashimpile icalo? . . . Ilyo intanda sha lucelo shayawilile utupundu pamo, na bana baume bonse ba kwa Lesa baliweleshe?”—Yobo 38:1, 4, 7.

Ilyo papitile inshita Lesa wa cine amwene uko umwana wakwe umwaume, malaika uwali uwapwililika, amupondokele no kusanguka Satana, icipilibula ukuti “Kakaanya” mu ciHebere. Na kabili Yehova alimwene uko Adamu, ibeli lyakwe mu bantunse, no mukashi wakwe uwapwililika Eva bapondweke. (Ukutendeka 3:1-6; Ukusokolola 12:9) Pa numa bamalaika bambi nabo “bashile ubwikalo bwabo ubwalinga” no kupondokela Lesa.—Yuda 6.

Amalembo tayatweba ifyo Yehova ayumfwile ilyo abana bakwe na bambi abapwililika bamupondokele. Lelo, Baibolo ilalondolola bwino ukutila: ‘Yehova ilyo amwene ukuti bwafulo bubi bwa bantu pano isonde, no kuti ukulinga konse kwa matontonkanyo ya mitima yabo kwabipa fye inshiku shonse, e lyo Yehova aikatwe ukulanguluka ico acitile abantu  mu calo, no kulunguluka ku mutima wakwe.’ (Ukutendeka 6:5, 6) Ilyo abantu bakwe abasalwa abena Israele na bo bamupondokele, Yehova ‘alilungulwike’ no ‘kushikitika.’—Amalumbo 78:40, 41.

Ukwabula no kutwishika Yehova alomfwa ubulanda ilyo abafyashi balelunguluka no kushikitika pa mulandu wa mibele yabipa iya bana babo abapondoka. Mu Cebo cakwe Baibolo, Lesa alafunda abafyashi ba musango yo no kubakoselesha ukushipikisha ubu bwafya. Abakonkomesha ukulapoosa amasakamika yabo pali wena, ukulaicefya, e lyo no kulalwisha Satana Kaseebanya. Natulande pa fyo ukukonka uku kufunda kwingamwafwa ukutwalilila abashangila ilyo umwana wenu apondoka.

Pooseni Amasakamika Yenu Pali Yehova

Yehova alishiba ukuti abafyashi balasakamikwa sana nga bamona abana babo balecita ifingabaletela ubwafya nelyo ukumona abantu bambi balecita ifingonaula abana babo. Umutumwa Petro alandile pa nshila imo iya kushipikishishamo aya masakamika e lyo na mafya yambi. Alemba ukutila: “Mulepoosa amasakamika yenu yonse pali wene, pantu asakamana imwe.” (1 Petro 5:7) Mulandu nshi aya mashiwi ya kukoselesha pamo no bu bwite fibelele ifyalinga ku bafyashi abo mwana apondweke?

Ilyo mwana wenu ali umunono mwalemusakamana sana, ukumucingilila ku masanso, kabili aleumfwila ifyo mwalemweba mu cikuuku. Nomba ilyo aleya alekula, limbi alefwaya ukulaicitila ifintu ukupusanko ne fyo mwalemweba, lelo mwalefwaisha ukumucingilila ku busanso ubwingamucena. Nalimo e lyo mwabikileko na mano sana.

E mulandu wine umwana wenu nga apondokela Yehova, ailetela amafya, nelyo amalangulushi, nalimo kuti mwayumfwa kwati ni mwe mulengele. BaJoy, abo tulandilepo pa kubalilapo e fyo baleyumfwa. Batila: “Cila bushiku, calenkalipa, natwalilile ukulatontonkanya pa fyo nalemusunga pa kuti imone apo nalubile.” Pa nshita sha musango yo epo Yehova afwaya ukuti ‘mupoose amasakamika yenu’ pali ena. Nga mwacite fyo Yehova akamwafwa. Kemba wa malumbo atile, “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.” (Amalumbo 55:22) BaJoy balisansamushiwe kabili balondolola abati: “Nalilandile na Yehova pa fyo naleyumfwa nga filya fine ningalanda ku cibusa.  Nalilandile fyonse ifyali ku mutima ne ci calengele ukuti njilulukwe apakalamba.”

Apo muli bafyashi abashapwililika, nalimo mwalelufyanya ilyo mwalekusha umwana wenu. Lelo mulandu nshi mwingatwalilila ukulatontonkanya pa filubo mwacitile? Yehova tacite fyo, pantu kemba wa malumbo aimbile ukutila: “Amampuulu nga mwayamwensekesha, mwe Yehova, mwe Shikulu, nani uwingeminina?” (Amalumbo 130:3) Nangu nga mwali abafyashi abapwililika, limbi umwana wenu nga alipondweke. E ico kanshi ebeni Yehova ifyo muleyumfwa mwi pepo, kabili akamwafwa ukushipikisha ubu bwafya. Lelo, pa kuti imwe mutwalilile abashangila mu kubombela Yehova no kukanaleka Satana amutitikishe, mufwile ukubombesha sana.

Mufwile Ukuicefya

Petro alembele ukutila: “Iceefyeni mwi samba lya kuboko kwa maka ukwa kwa Lesa, ukuti amusansabike mu nshita yalinga.” (1 Petro 5:6) Mulandu nshi uwa kuicefesha ilyo umwana apondoka? Ukukwata umwana uwapondoka kulalenga umutima wa mufyashi ukukalipa kabili kuti aleyumfwa uwa mulandu, e lyo kulaleta no museebanya. Nalimo kuti mwasakamikwa ukuti ifyo umwana wenu acitile nabifya ishina lya lupwa, sana sana nga ca kutila bamutamfya na mu cilonganino ca Bwina Kristu. Ukuipeela imilandu e lyo no museebanya uuletelwe pali imwe kuti fyamufuupula ukulasangwa ku kulongana kwa Bwina Kristu.

Ilyo cabe fyo mufwile ukubomfya amano. Amapinda 18:1, (NW) yatusoka ukutila: “Uuitalusha ku banankwe afwaya fye ukucita ifyo umwine atemenwe; tafwaya kupandwa amano.” Ukulasangwa mu kulongana lyonse te mulandu ne fyo muli aba bulanda kukalenga mukasange fyebo ifingamukoselesha sana no kumusambilisha. BaJoy batila: “Pa kutendeka fye, nshalefwaya ukumonana no uli onse. Lelo natontonkenye pa fyo ukusangwa ku kulongana lyonse kwacindama. Na kabili nga ca kutila naleikala fye ku ng’anda, amafya yandi nga yalikulileko. Ukulongana kwalinjafwile ukulatontonkanya sana pa fintu ifikosha bucibusa bwandi na Lesa. Ndi uwa nsansa pantu nshalekele ukuba pamo na bamunyinane. Nga ncite fyo nga nshanonkelemo mu kwafwa uko bamunyinane ne nkashi balempeela.”—AbaHebere 10:24, 25.

Na kabili mulingile ukulaibukisha ukuti Umwina Kristu umo na umo mu lupwa afwile “ukusende cipe cakwe umwine.” (Abena Galatia 6:5) Yehova alafwaya abafyashi ukutemwa no kufunda abana babo. Na kabili alafwaya abana ukumfwila no kucindika abafyashi babo. Nga ca kutila abafyashi baesha sana na maka ukukusha abana babo mu “kusalapula no kukonkomesha kwa kwa Yehova,” bakapanga ishina lisuma na Lesa. (Abena Efese 6:1-4) Nga ca kutila umwana taleumfwa ifyo abafyashi balemusalapula mu kutemwa, lishina lyakwe line e likabipa. Amapinda 20:11 yatila: “Umwaice wine aishibikilwa ku micitile yakwe, nge milimo yakwe yabe yawama napamo ya bubifi.” Balya abaishiba bwino ifyacitike tabamona ukupondoka kwa kwa Satana ukuti kwalyonaula ishina lya kwa Yehova.

Kaneeni Kaseebanya

Petro asoka ukuti: “Beni abalola, cenjeleni. Icibambe cenu, Kaseebanya, endauka nge nkalamo iilebuluma, iilefwaya untu ingalya.” (1 Petro 5:8) Ukupala inkalamo, Kaseebanya ilingi line afwaya ukusansa abaice abashaishiba ifingi. Kale, inkalamo shaleendauka mu Israele kabili shalefwaya ukwikata ifitekwa.  Nga ca kutila akana ka mpaanga, kafuma pa shibiye, cilanguka sana ukukekata. Pa kufwaisha ukucingilila abana baiko impaanga nkota kuti nalimo yaibika mu busanso. Lelo, nangu fye ni mpaanga iikalamba te kuti ilwishanye ne nkalamo. Kanshi bakacema bashipa balekabila ukucingilila umukuni.—1 Samwele 17:34, 35.

Pa kucingilila impaanga shakwe isha mampalanya ku “nkalamo ilebuluma,” Yehova alibikako bakacema ba ku mupashi abasakamana umukuni abatungululwa no “mucemi mukalamba,” Yesu Kristu. (1 Petro 5:4) Petro akonkomesha abaume bamusango yo abasontwa ukutila: “Cemeni umukuni wa kwa Lesa uwaseekeshiwa kuli imwe, te ku kupatikishiwa iyo, lelo ku kuitemenwa; te ku kutemwa ubunonshi bwa nsoni, kano ku kucincila.” (1 Petro 5:1, 2) Mwe bafyashi nga mwabombela pamo na bakacema, kuti nalimo mwalenga bayafwa umwana wenu ukuba cibusa wa kwa Lesa na kabili.

Ilyo bakacema ba Bwina Kristu balefwaya ukufunda umwana wenu uulufyenye, nalimo kuti mwafwaya ukumucingilila pa kuti bemusalapula. Lelo, ukucite fyo kulufyanya sana. Petro alanda ukutila: ‘Kaaneni [Kaseebanya],’ taletila kaaneni abacemi ba ku mupashi.—1 Petro 5:9.

Ilyo Basalapula Umwana Icabipisha

Nga ca kutila umwana wenu talapile kabili Mwina Kristu uwabatishiwa, nalimo kuti bamusalapula sana, kuti atamfiwa mu cilonganino. Nga cabe fyo inshita mwakulapoosa pamo no yo mwana ikashintilila pa mushinku wakwe e lyo ne fintu fimbi.

Nga ca kutila acili umwaice kabili ekala pa ng’anda pa mwenu, mu cifyalilwa fye mukatwalilila ukumusakamana mu fyo alekabila ku mubili. Na kabili mulekabila ukumufunda imibele isuma e lyo no kumusalapula, kabili ni ncito yenu ukumusakamana muli ifi fyonse. (Amapinda 1:8-18; 6:20-22; 29:17) Kuti mwamutungulula isambililo lya Baibolo, kabili kuti mwalanshanya sana nankwe pa malembo ayalekanalekana e lyo kuti mwabomfya impapulo isha “umusha wa cishinka kabili uwashilimuka.” (Mateo 24:45) Kuti mwasenda umwana wenu na ku kulongana kwa Bwina Kristu no kwikala pamo nankwe. Ico mwingacitila fyonse fi ni co mulefwaya ifyo mulemufunda ukufuma mu Malembo fimufike pa mutima.

Cilapusanako nga ca kutila umwana uutamfiwe te mwaice kabili tekala na imwe pa ng’anda. Umutumwa Paulo akonkomeshe Abena Kristu mu Korinti “ukukanayampana no muntu onse uwitwa uwa bwananyina uwa bulalelale nelyo umufunushi nelyo uupepo tulubi nelyo uutukana nelyo cakolwa nelyo umupuupu, nangu kulya no wabe fi te kwesha.” (1 Abena Korinti 5:11) Ca cine nalimo ilyo mulebombela pa ficitika mu lupwa limbi kuti mwalalanda no watamfiwa, lelo umufyashi Umwina Kristu afwile ukusengauka ukulalanda no mwana watamfiwa napashilingile.

Nga ca kuti umwana uulufyenye asalapulwa kuli bakacema ba Bwina Kristu, te kuti ciwame imwe mwe bafyashi ukukaana nelyo ukususha ubupingushi bwa mu Malembo. Ukutungilila umwana wenu takwingamucingilila kuli Kaseebanya. Nga mwacita ifyo ninshi mulebika bucibusa bwenu na Lesa mu busanso. Lelo nga mwayafwilisha bakacema mu kusalapula umwana wenu, cikalenga mukatwalilile ukuba “abakosa ndi mu citetekelo” kabili mukafwa bwino umwana wenu.—1 Petro 5:9.

Yehova Akamwafwa

Nga ca kutila umwana wenu apondoka, mukebukishe ukuti te imwe mweka umwana apondoka. Abena Kristu bambi nabo abana babo balipondoka. Te mulandu na mafya tulepitamo, Yehova kuti atwafwa.—Amalumbo 68:19.

Muleshintilila pali Yehova ukupitila mwi pepo. Mulelongana lyonse na Bena Kristu banenu. Tungilileni bakacema basontwa ilyo balesalapula umwana wenu. Nga mwacite fyo mukatwalilila ukuba abashangila. Na kabili ica kumwenako cenu icisuma cikalenga umwana wenu ukwankulako ku bwite bwa kwa Yehova ubwa kuti abwelele kuli Wena.—Malaki 3:6, 7.

[Ifikope pe bula 18]

Ukupepa no kulongana pamo na Bena Kristu banenu kukamukosha