Umwaume no Mwanakashi Bapangilwe Ukulabombela Pamo

LYONSE umwaume no mwanakashi balafwaisha sana ukuba pamo pantu e fyo Lesa atupangile. Yehova alimwene ukuti tacali bwino kuli Adamu ukutwalilila ukuba eka. Eco ‘amucitile uwa kumwafwa, uwayana nankwe.’

Yehova alaliike Adamu utulo twamfwa, kabili abulileko ulubafu lwakwe lumo na mu ‘lubafu ulo . . . alengelemo umwanakashi, amutwele na ku muntu.’ Adamu alitemenwe nga nshi ukumona ici cibumbwa Yehova abumbile ica kuti atile: “Nomba uyu e fupa lya mu mafupa yandi, kabili munofu wa mu munofu wandi.” Apo Efa ali uwapwililika, imibele akwete yalengele ukuti atemwikwe. Kabili ilyo Adamu ali uwapwililika, alicindeme kabili alingile ukupeelwa umucinshi. Bonse bapangilwe ukuti balebombela pamo. Baibolo itila: “Ni pali ici umwaume alekela wishi na nyina, alambatila na ku mukashi wakwe, na bo babo mubili umo.”—Ukutendeka 2:18-24.

Nangu cibe fyo, pali lelo indupwa shilepatukana, kabili ilingi line abaume na banakashi balapumana no kubomfya amashiwi ya musaalula nelyo balaba na kaso. Ukucimfyanya kwaba pa baume na banakashi kwalenga kube ukukanaumfwana. Fyonse ifi fyalipusaninina fye na fintu Lesa afwaile umwaume no mwanakashi ukulaikala. Umwaume apangilwe ukuti alebomba umulimo uwacindama pano isonde. Umwanakashi na o apeelwe umulimo uwaibela kabili uwacindama uwakwafwa umwaume. Bali no kulabombela capamo. Ukutula fye apo abantunse babumbilwe, abaume na banakashi abacindika ifyo Lesa ateyanya balabombesha pa kufikilisha imilimo Yehova afwaile ukuti balebomba, kabili ici calenga ukuti baleikala bwino mu nsansa. Bushe milimo nshi twapeelwa kabili kuti tuleibomba shani?

[Icikope pe bula 3]

Lesa ateyenye ukuti umwaume no mwanakashi balebomba imilimo iyacindama