Amepusho Ukufuma ku Babelenga

Bushe “inkondo ya bushiku bukalamba ubwa kwa Lesa Uwa maka yonse” iya Armagedone, ni nkondo ya musango shani, kabili finshi fikafumamo?—Ukusokolola 16:14, 16.

Nga kusupula fye, inkondo ya Armagedone ni nkondo ya calo conse iikabako ilyo Yesu Kristu, Imfumu yasontwa na Yehova, akonaula abalwani ba kwa Lesa. Baibolo itila aba abalwani ba kwa Lesa, e kutila “ishamfumu sha pe sonde lyonse,” bakalongana ku kulwa nankwe pa mulandu wa kuumfwa “ifyebo fyapuutwamo ku fibanda,” kabili bakalongana ku “nkondo ya bushiku bukalamba bwa kwa Lesa Uwa maka yonse. . . . ku cifulo iciitwa mu ciHebere Armagedone.”—Ukusokolola 16:14, 16.

Takwaba icifulo ca cine cine uko abakalwa iyi nkondo bakalongana. Ishiwi lyapilibulwa mu Baibolo ukuti “Armagedone,” lyalola mu kuti “Ulupili lwa Megido.” (Ukusokolola 16:16) Takwatalile akuba ulupili nangu lumo ulwaleitwa ati Megido. Na kabili, “ishamfumu sha pe sonde ne milalo ya shiko” te kuti balongane pa cifulo cimo. (Ukusokolola 19:19) Kanshi pali ili lembo, ishiwi lya kuti “icifulo,” lyalola mu kuti kukaba fimo ifikacitika ifikalenga bakateka ba mu calo conse na bantu babo ukuipangasha ukuya mu kulwa na Yehova ne “milalo ya mu muulu.” Umukalamba wa bashilika abo bakalwa na bo, ni Yesu Kristu “Imfumu ya shamfumu kabili Shikulu wa bashikulu.”—Ukusokolola 19:14, 16.

Na cimbi ico tulingile ukwishiba ca kuti, ifyo ili shiwi lya kuti “Armagedone” lipilibula fyalipalana ne fyalecitika mu musumba wa Megido, uwa kale mu Israele. Umusumba wa Megido wabelele apasuma sana, ku kabanga ka lupili lwa Karmele, kanshi e palepita sana bashimakwebo na bashilika ba nkondo muli shilya nshiku. Na kabili, mwalelwikwa ne nkondo sha kuti ibumba limo ilya bashilika e lyalecimfya abanabo nakalya nakalya. Ica kumwenako fye, “pa menshi ya Megido” e po Umupingushi Baraki acimfiishe umulalo wa maka uwa bena Kaanani uwaletungululwa na Mushika Sisera. (Abapingushi 4:12-24; 5:19, 20) Mupepi na pa Megido pene, e po Umupingushi Gideone acimfiishe abena Midiani nakalya nakalya. (Abapingushi 7:1-22) Kanshi ifi ishiwi lya kuti “Armagedone” lipilibula ukutila “Ulupili lwa Megido,” e kutila ninshi Baibolo itulanga fye ukuti pa nkondo ya kwa Lesa, akabomfya Umwana wakwe ukucimfya abalwani bakwe bonse fye, ukwabula ukushapo nangu umo.

Nomba finshi fikafumamo? Inkondo ya Armagedone ikapwisha ububifi bonse pa calo. Nga yapita, icalo cikawama ifyo cishatala aciwamapo ukufuma apo abantu babelako. (Ukusokolola 21:1-4) Mu Bufumu bwa kwa Lesa ubukatekwa na bakateka ba citemwiko, icalo cikasanguka Paradaise, kabili abalungama e mo bakekala pe na pe.—Amalumbo 37:29.