Ca Cine Yalyanguka, Nomba Bushe Yalilungama?

MU September mu 2005, ba Church of England balitemenwe sana ukufumya Baibolo wa The 100-Minute Bible (Baibolo ya Kubelenga mu Mamineti 100). Apo iyi Baibolo ipya balemba iya kusupawila fye, kuti mwapwisha ukuibelenga mu mamineti 100, kabili bayakanya Amalembo ya ciHebere mu fiputulwa 17 ifyaba fye pe bula limo limo, e lyo Amalembo ya ciGriki yena bayakanya mu fiputulwa 33. Umo uwasambilila uupita mu fyo bambi balembele, atile balifumyamo “amalyashi yonse ayengakulenga ukushipula pa kubelenga.” Ca cine iyi Baibolo yalyanguka ukubelenga, nomba bushe yalilungama?

Ishina lya kwa Lesa, ilya kuti Yehova, balilifumyamo kabili abasoma sana Baibolo bakasanga no kuti mwaliba ifilubo na fimbi ifikulu. (Amalumbo 83:18) Ukumulangilila fye, iciputulwa 1 citila Lesa “apangile umuulu ne calo mu nshiku mutanda (6).” Nomba Ukutendeka 1:1, kwena kutila fye: “Ku kutendeka Lesa alengele umuulu na pano isonde.” E lyo Baibolo ine ilalondolola na fimbi ifyo Lesa alecita pa kupanga icalo, ifyapangilwe mu “nshiku” 6, nangu inshita imo ifi iyo tatwaishiba bwino bwino ifyo yalepele. Ukutendeka 2:4 (NW) kwalanda fye icishinka pa nshita iyapooselwe pa kubumba, ukutila bwali “bushiku umo Yehova Lesa apangile isonde no muulu.”

Iyi Baibolo na kabili itila, Yobo umuntu wa cishinka, uwamusanshile ni “Satana, umo pa babomfi ba kwa [Lesa]. . . uwakwata umulimo wa kufyenga fye abantunse.” Bushe mwamona ukuti ici na co cilubo? Ishiwi lya kutila “Satana” lipilibula ukuti “Uukanya.” Satana te mubomfi wa kwa Lesa iyo, ena aicita umulwani mukalamba uwa kwa Lesa, kabili umwine fye e watampile ukulafyenga abantunse.—Ukusokolola 12:7-10.

Inga mu ciputulwa ca Amalembo ya Bena Kristu aya ciGriki mwena finshi balandamo? Mu mulumbe uwa mpaanga ne mbushi, iyi Baibolo ipya yena yatila Yesu akapaala abaleyafwilisha “umuntu onse, nangu asuulwa shani,” nomba Yesu umwine atile akapaala abakalacitila abamukonka, nelyo “bamunyina” ifisuma. (Mateo 25:40) Muli iyi Baibolo, ibuuku lya Ukusokolola lyasupawila fye ukweba ulebelenga ukuti “Roma, Babiloni mukalamba, akonaulwa nakalya nakalya.” Abasambilila Baibolo na lyo line balishiba ukuti, ilyo Baibolo lyalembelwe pa kutendeka fye, takwaba apo balanda ifi pali “Babiloni Mukalamba.”—Ukusokolola 17:15–18:24.

Bonse abalefwaya ukwishiba Kabumba wesu no kusambilila ukucita ukufwaya kwakwe, balingile ukubelenga Baibolo yonse. Ca cine, kuti twabelenga Baibolo ukucila pa mamineti 100, lelo nga twabika amano ku kuibelenga yonse, tukasangamo ifisuma ifingi. (Yohane 17:3) Mukwai namukabelenge Baibolo yonse pantu mukasanga ifisuma ifingi ifikamwafwa.—2 Timote 3:16, 17.