Twalilileni Ukulatasha

“Ifyo yafinisha kuli ine amatontonkanyo yenu, mwe Lesa! Impendwa sha yako ubwingi!”—AMALUMBO 139:17.

1, 2. Mulandu nshi tufwile ukutashisha pa fyo twakwata Icebo ca kwa Lesa, kabili uwaimbile amalumbo atashishe shani?

ALA ico basangile cali ca kupapa. Ilyo balewamya itempele lya kwa Yehova mu Yerusalemu, Shimapepo Mukalamba Hilkia asangile “ibuuku lya malango ya kwa Yehova” ilyo Lesa apeele Mose. Lifwile lyali ni lilya line ibuuku lya kubalilapo ilyo bapwile ukulemba ninshi palipita ne myaka nakalimo 800! Bushe kuti mwaelenganya ifyo Imfumu Yoshia iyali na katiina kuli Lesa yaumfwile ilyo yamwene ili buuku? Yalishibe ukuti lyali ilyacindama kabili palya pene yaebele Shafani kalemba, ukutampa ukuibelengela ibuuku.—2 Imilandu 34:14-18.

² Muno nshiku, abengi balikwata Baibolo, iituntulu nangu iciputulwa fye cimo. Nomba bushe ico calilenga Baibolo ukusaaluka nangu ukukanacindama sana? Awe nakalya! Te kuti cibe fyo pantu muli Baibolo mwaba amano ya kwa Lesa Wa maka yonse umwine, kabili bailembela ukuti tulesambililamo. (2 Timote 3:16) Davidi uwaimbile amalumbo alandile ifyo aleumfwa pa kukwata Icebo ca kwa Lesa, ilyo atile: “Ifyo yafinisha kuli ine amatontonkanyo yenu, mwe Lesa! Impendwa sha yako ubwingi!”—Amalumbo 139:17.

3. Finshi fitulanga ukuti Davidi alibikile sana amano kuli bucibusa bwakwe na Lesa?

³ Davidi tabalile aleka ukutasha Yehova, alemutasha pa Cebo cakwe na pali fyonse ifyo ateyenye mu kupepa kwa cine ifyalengele Davidi ukukosa. Mu malumbo ayengi ayasuma nga nshi ayo Davidi ashikile mwaba amashiwi ayalanga ifyo aleumfwa bwino ukupepa Lesa. Ica kumwenako fye, pa Amalumbo 27:4, alembele ukuti: “Icintu cimo nalomba kuli Yehova, e co ndefwayafwaya; ukwikala mu ng’anda ya kwa Yehova inshiku shonse sha mweo wandi, ku kutambo busuma bwa kwa Yehova, no kubuusha mwi tempele lyakwe.” IciHebere babomfeshe pa kulemba Baibolo, amashiwi ya kuti “ukubuusha,” yalola mu kuti ukutontonkanyapo sana, ukulolekesha, ukukumbwa, ukucankwa nangu ukupapa. Kanshi te kuti tutwishike ukuti Davidi alicindike sana bucibusa bwakwe na Lesa kabili aletasha nga nshi pali fyonse ifyo Yehova ateyenye ifyamulengele ukukosa mu kupepa. Cali kwati aletoola no tubufungau tonse fye utwa Cebo ca kwa Lesa ico bakwete pali ilya nshita. Tufwile ukupashanya Davidi mu fyo aletasha pa kukwata Icebo ca kwa Lesa.—Amalumbo 19:7-11.

Muletasha pe Shuko lya Kwishiba Icine ca mu Baibolo

4. Cinshi calengele Yesu ‘ukusekelela nga nshi mu mupashi wa mushilo’?

⁴ Ukucenjela nangu ukusambilila sana te kuti fitulenge ukwishiba sana Icebo ca kwa Lesa, pantu ilingi line fyena, filenga fye abantu ukuba ne cilumba. Icingatulenga ukwishiba sana ifyaba mu Baibolo, cikuuku ca bupe fye ica kwa Yehova, ico apeela abaiceefya, ababa ne mitima ya bufumacumi kabili abaishiba ukuti balakabila ukwishiba Lesa. (Mateo 5:3; 1 Yohane 5:20) Ilyo Yesu aetetwile pa cishinka ca kuti amashina ya bantu bamo abashapwililika yalilembelwe mu muulu, “alisekelele nga nshi mu mupashi wa mushilo no kusosa ati: ‘Ndemulumbanya pa cintubwingi, mwe Tata, Shikulu wa muulu ne sonde, pantu mwalifishilisha ifi fintu ku ba mano na bacenjela, no kufisokolwela ku tunya.’”—Luka 10:17-21.

5. Mulandu nshi abasambi ba kwa Yesu bashalingiile ukumona kwati icine ca Bufumu ico Yesu asokolwele kuli bena tacacindeme sana?

⁵ Ilyo apwile ukupepa ili pepo lya mweo onse, Yesu apilibukile ku basambi no kubeba ati: “Ya nsansa amenso ayamona ifyo mulemona. Pantu ndemweba, nati, Bakasesema abengi ne shamfumu balefwaisha ukumona ifintu ifyo mulemona lelo tabafimwene, no kuumfwa ifyo muleumfwa lelo tabafyumfwile.” Yesu afundile abasambi bakwe aba cishinka ukulamona ukuti ifishinka fyakumine Ubufumu ifyo asokolwele kuli bena fyalicindeme nga nshi. Ifya Bufumu ifyo asokolwele ku basambi bakwe, tafyaishibikwe ku babomfi ba kwa Lesa aba kale, nangu fye “ba mano na bacenjela” aba mu  nshiku sha kwa Yesu na bo bene tabafishibe!—Luka 10:23, 24.

6, 7. (a) Ni finshi fifwile ukutulenga ukutasha pa fyo twaishiba icine ca kwa Lesa? (b) Bupusano nshi bulemoneka muno nshiku pa kupepa kwa cine no kwa bufi?

⁶ Nga ni muno nshiku mwena, fingi sana fifwile ukutulenga ukutasha pa kwishiba icine ca mu Baibolo, pantu Yehova, ukupitila mu “musha wa cishinka kabili uwashilimuka,” alyafwa abantu bakwe ukwishiba bwino bwino ifintu na fimbi ifingi ifyo Icebo cakwe calanda. (Mateo 24:45; Daniele 12:10) Kasesema Daniele asobele ifikacitika mu nshita ya mpela ilyo atile: “Bakasabanta abengi, no kwishiba kukafula.” (Daniele 12:4) Bushe tamulesumina ukuti muno nshiku, ukwishiba Lesa ‘nakufula’ no kuti ababomfi ba kwa Yehova balaipakisha ifya kwa Lesa ifingi?

⁷ Awe mwandini paliba ubupusano pa fyo abantu ba kwa Lesa baishiba bwino Icebo cakwe no bufwayo bwakwe, ne cimfulumfulu ca mipepele icaba muli Babiloni Mukalamba! Kanshi abengi abomfwo bubi pa ficitika mu mipepele ya bufi kabili abapata ificitikamo, balefumamo no kuya mu kupepa kwa cine. Baba nge mpaanga kabili ‘tabafwaya kukumako ku membu’ sha kwa Babiloni Mukalamba, kabili tabafwaya no “kupokelelako ifinkunka fyakwe.” Yehova na babomfi bakwe baleita bonse ababe fi ukwisa mu cilonganino ca cine ica Bena Kristu.—Ukusokolola 18:2-4; 22:17.

Abengi Abatasha Baleya Kuli Lesa

8, 9. Bushe ubusesemo bwa pali Hagai 2:7 bulefikilishiwa shani muno nshiku?

⁸ Ilyo alelanda pa ng’anda yakwe iya mampalanya iya kupepelamo, Yehova asobele ukuti: “Nkatensha ne nko shonse, fikasuke afiisa ifisuma fya nko shonse, na ine njisusha mu ng’anda iyi ubukata.” (Hagai 2:7) Ubu busesemo bwa kupapa bwafikilishiwe mu nshiku sha kwa Hagai ilyo abantu ba kwa Lesa abashelepo pali balya abo basendele bunkole babwelele ku Yerusalemu no kukuula itempele na kabili. Muno nshiku, ubusesemo bwa kwa Hagai bulefikilishiwa na kabili ukukuma kwi tempele likalamba ilya kwa Yehova ilya mampalanya.

⁹ Abengi nga nshi baliya kale mwi tempele lya mampalanya ku kupepela Lesa “mu mupashi na mu cine,” kabili cila mwaka na bambi abengi nga nshi, abo Baibolo itila “ifisuma fya nko shonse,” bacili baleya. (Yohane 4:23, 24) Ico twingamwenako fye ni lipoti ya fyo twabombele mu calo conse mu 2006, pantu ilelanga ukuti abantu 248,327 balibatishiwe kabili ico cali e cilangililo ca kuipeela kwabo kuli Yehova. Nga kwakanya iyi mpendwa ukulingana ne nshiku shaba mu mwaka uutuntulu, kuti twatila abantu 680 e balebatishiwa cila bushiku! Tatuletwishika ukuti Yehova umwine e wakulile aba bantu, pantu balitemwa icine ca mu Baibolo kabili balafwaya ukubomba umulimo wakwe uwa kubila Ubufumu.—Yohane 6:44, 65.

10, 11. Shimikeni icacitike iciletulanga ifyo ciba ku bantu bamo pa kuti batemwe icine ca mu Baibolo.

¹⁰ Icalengele abengi pali aba bantu ba mitima ya bufumacumi ukwisa mu cine, mulandu wa kuti balimwene ‘apalekanine umulungami no mubifi, apalekanine uubombela Lesa no ushimubombela.’ (Malaki 3:18) Umfweni ifyo cali kuli baWayne na bena myabo baVirginia, abalepepa ku calici limo ifi ilya Protestanti, nomba balikwete ifipusho ifingi ifya mu Baibolo ifyo bafililwe ukubasuka ku calici ku mwabo. Balipatile inkondo, kabili balipelenganishiwe no kumfwa ububi ukumona bashimapepo balepaala abashilika ne fyanso. Ilyo baleya balekula, bamwene ukuti abo balepepa na bo balilekele ukubabikako amano, nangu ca kuti baVirginia bali ni bakafundisha ba ku Sande sukulu imyaka imo. Batile: “Takwali nangu umo uwaletutandalila kabili  takwali no walebikako amano ukumona nga tucili natukosa mu kupepa nelyo iyo. Ico aba ku calici ku mwesu balefwaya fye, ni ndalama shesu. Twaleumfwa ububi icine cine.” Na kabili, balyumfwile sana ububi ilyo icalici lyabo lyatampile no kutekelesha ubulalelale bwa baume beka beka na banakashi beka beka.

¹¹ Ilyo ifi fyonse fyalecitika, umwishikulu wabo umukashana no mwana wabo umwanakashi baishileba Inte sha kwa Yehova. Nangu ca kuti baWayne na baVirginia balikalipe pa kutampa, nomba balitontonkenyepo kabili balisumine ukusambilila Baibolo. BaWayne batile: “Mu myeshi fye itatu, twasambilile ifya mu Baibolo ifingi sana ukucila ifyo twasambilile imyaka 70! Tatwaishibe ukuti ishina lya kwa Lesa ni Yehova, kabili tatwaishibe nangu kamo pa Bufumu bwa kwa Lesa e lyo no kuti cino calo cikaba Paradaise.” Bwangu bwangu, aba balume na bakashi aba mitima ya bufumacumi, batampile ukusangwa ku kulongana kwa Bena Kristu no kushimikila abantu Icebo ca kwa Lesa. BaVirginia batile: “Tulefwaya ukushimikila abantu bonse icine.” Bonse babili bali ne myaka nakalimo 80, kabili balibatishiwe mu 2005. Batile: “Mu cilonganino ca cine ica Bena Kristu, natusanga ulupwa ululetusakamana”

Muletasha pa fyo Lesa ‘Amupangasha ku Kubomba Umulimo Onse Uusuma’

12. Cinshi Yehova lyonse acitila ababomfi bakwe, kabili cinshi tulingile ukucita pa kumwenamo?

¹² Yehova lyonse alasambilisha abantu bakwe ifya kubomba umulimo wakwe. Ica kumwenako fye ni Noa, Lesa alimwebele fyonse ifya kukonka pa kupanga icibwato, kabili umulimo wa kupanga icibwato walefwaikwa ukubombwa bwino lilya line fye! Ifyo fine e fyo Noa abombele. Mulandu nshi? Pantu Noa acitile “umwabelele conse ico Lesa amwebele, e fyo acitile.” (Ukutendeka 6:14-22) Na muno nshiku mwine, Yehova alapangasha bwino ababomfi bakwe ukubomba umulimo wakwe. Kwena, umulimo wesu uukalamba wa kubila imbila nsuma ya Bufumu bwa kwa Lesa ubwatendeka kale ukuteka e lyo no kusambilisha aba mitima ya bufumacumi ukuba abasambi ba kwa Yesu Kristu. Kabili, nga filya fine cali kuli Noa, pa kuti tubombe bwino uyu mulimo, tulingile ukuba ne cumfwila. Tufwile ukuba ne cumfwila ca kukonka ifyo Yehova aletweba ukucita ifyaba mu Cebo cakwe ne fyo atusambilisha ukupitila mu kuteyanya kwakwe.—Mateo 24:14; 28:19, 20.

13. Bushe Yehova atukansha shani?

¹³ Pa kubomba bwino umulimo wa kusambilisha abantu, tulingile ukwishiba ifya ‘kulungika’ ukulondolola ifyaba mu citabo cesu icikalamba, e kuti Baibolo, Icebo ca kwa Lesa, pantu ya “mulimo ku kusambilisha, ku kwebaula, ku kulungika ifintu, ku kusalapula kwa mu bulungami, ukuti umuntu wa kwa Lesa abe uwafikapo bwino bwino, uwaipangasha umupwilapo ku kubomba umulimo onse uusuma.” (2 Timote 2:15; 3:16, 17) Nga filya fine cali mu nshita ya Bena Kristu ba kubalilapo, Yehova ukupitila mu cilonganino ca Bena Kristu alatukansha bwino ifya kubomba umulimo wakwe. Muno nshiku, mu filonganino 99,770 ifya mu calo conse, mulaba ukulongana kwe Sukulu lya Butumikishi Ilya Bulesa no Kulongana kwa Mulimo cila mulungu, kabili muli uku kulongana e mo tusambilila ifya kushimikila. Bushe mulayako lyonse kuli uku kulongana kwacindama kabili bushe mulakonka ifyo musambililako? Nga mulecite fyo, ninshi mulatasha Lesa pali uku kulongana.—AbaHebere 10:24, 25.

14. Bushe ababomfi ba kwa Yehova balanga shani ukutasha pe shuko bakwata ilya kubombela Lesa? (Landeni na pali fimo fimo ifili pali charti pa mabula 27 ukufika ku 30.)

¹⁴ Abantu ba kwa Lesa abengi nga nshi mu calo conse balelanga ukuti balatasha pa fyo Lesa abakansha pantu balabombesha mu mulimo wa kushimikila. Ica kumwenako fye, mu 2006, bakasabankanya ba Bufumu 6,741,444 bapoosele ama-awala yonse pamo 1,333,966,199 mu nshila ishalekanalekana isha kushimikilamo, kabili balitungulwile na masambililo ya Baibolo aya mu ng’anda 6,286,618. Twalandako fye ifisuma fimo fimo ifili muli lipoti ya calo conse iya fyo twabombele mu 2006 iili muli ino magazini. Twamukoselesha ukubebeta bwino sana ifisuma na fimbi ifili muli iyi lipoti, pantu nga mwacite fyo, yalamukosha sana nge fyo na bamunyinefwe mu nshiku sha Bena Kristu ba kubalilapo bakoshiwe pa kumfwa ilyashi lya kuti impendwa ya Bena Kristu banabo pali ilya nshita yaleya ilekula pa mulandu wa mulimo balebomba uwa kushimikila.—Imilimo 1:15; 2:5-11, 41, 47; 4:4; 6:7.

15. Mulandu nshi uo kushilingile ukubela nangu umo uufwile ukulamona kwati umulimo wakwe uwa mweo onse kuli Yehova tawacindama?

¹⁵ Amalumbo ayengi nga nshi ayo balumba Lesa  cila mwaka, cilangililo ca kuti ababomfi ba kwa Yehova balatasha sana pe shuko bakwata ilya kwishiba Yehova na pa mulimo wa kuba Inte shakwe ku bantu. (Esaya 43:10) Ca cine ukuti amalumbo ayo bamo balumbilamo Lesa kuti yaba fye ayanono kwati bupe bwa kwa mukamfwilwa, ifili nga umulimo wa bamunyinefwe na bankashi abakote na balwalilila, e lyo na balemana. Na lyo line, natuleibukisha ukuti Yehova no Mwana wakwe balatasha icine cine pa mulimo wa mweo onse uwa bamunyinefwe bonse, pantu balabomba ukufika apapelele amaka yabo.—Luka 21:1-4; Abena Galatia 6:4.

16. Fitabo nshi ifya kubomfya pa kusambilisha ifyo Lesa atupeela muli iyi myaka?

¹⁶ Yehova alatukansha ifya kubomba umulimo wa kushimikila, e lyo ukupitila mu kuteyanya kwakwe, alatupangasha na pa kutupeela ifitabo ifisuma nga nshi ifya kubomfya. Muli iyi myaka yapita, ukuteyanya kwa kwa Yehova kwalitupeela ifitabo pamo nga Icine Icitungulula ku Bumi bwa Ciyayaya, Kuti Waikala Kuli Pe na pe muli Paradise Pe Sonde, Ukwishiba Uko Kutungulula ku Mweo wa Muyayaya, e lyo pali ino nshita, tukwete icitabo ca kuti Bushe Cinshi Baibolo Isambilisha? Abatasha nga nshi kuli Yehova pa kutupeela ifi fitabo, balafibomfya bwino mu mulimo wa kushimikila.

Bomfyeni Bwino Icitabo ca Kuti Bushe Cinshi Baibolo Isambilisha?

17, 18. (a) Ni finshi fimo fimo ifyaba mu citabo ca kuti Bushe Cinshi Baibolo Isambilisha? ifyo mwatemwa ukulandapo sana ilyo muleshimikila? (b) Cinshi kangalila wa muputule umo alandile pa citabo ca kuti Bushe Cinshi Baibolo Isambilisha?

¹⁷ Icitabo ca kuti Bushe Cinshi Baibolo Isambilisha? cakwata ifipandwa 19, mwaba ne fyebo na fimbi ifilondolola amasambililo yacindama, kabili tacakosa ukumfwa, kanshi cilebomba bwino sana pa kushimikila abantu. Ica kumwenako fye, icipandwa 12 citila: “Ukulacita Ifyo Lesa Afwaya.” Muli ici cipandwa, balilondolola bwino ku ulesambilila ifyo engacita pa kuba cibusa wa kwa Lesa, icintu ico abengi bamona kwati te kuti cicitike, kabili ico bashitontonkanyapo. (Yakobo 2:23) Bushe abantu balelandapo shani pali ici citabo ca kutwaafwa ukusambilila Baibolo?

¹⁸ Kangalila wa muputule uwa ku Australia atile icitabo ca kuti Bushe Cinshi Baibolo Isambilisha? “cisuma sana pantu cilenga abantu ukufwaya ukutendeka ukulanshanya na bo apo pene fye.” Na kabili atile, ici citabo tacayafya ukubomfya pa kushimikila, kanshi “nacilenga bakasabankanya abengi  aba Bufumu ukuleka ukumfwa umwenso no kutemwa sana umulimo wa kushimikila ukucila ne fyo bali kale. E mulandu bamo balelandila ukuti ici citabo cili nga golde waumo mutengo!”

19-21. Shimikeni fimo fimo ifyacitika ifiletulanga ubusuma bwaba mu citabo ca kuti Bushe Cinshi Baibolo Isambilisha?

¹⁹ Umwanakashi umo ku Guyana aebele painiya uwaile pa mwakwe ukuti: “Ala ni Lesa wacimutuma ukwisa pano.” Ilyo uyu painiya atandele, asangile ukuti umwaume uwaupile uyu mwanakashi ukwabula ukukonka ifunde, e lyo fye abutwike no kumusha na bana babili abanono. Painiya abuulile icitabo ca kuti Bushe Cinshi Baibolo Isambilisha? no kumubelengela mu cipandwa 1 paragrafu 11, pa kamutwe katila “Bushe Lesa Omfwa Shani nga Twafyengwa?” Painiya atile: “Ifishinka fyaba palya fyalimufikile pa mutima. Na kuba, palya pene ali-imine, aile ku lukungu lwe tuuka lyakwe no kulila nga nshi.” E fyo asumine no kulasambilila Baibolo lyonse na nkashi uwikala kulya kwine, na nomba acili alasambilila Baibolo.

²⁰ Abakashi ba kwa José uwikala ku Spain balifwile mu busanso bwa pa musebo. Atampile ukunwa imiti imo iya kumusansamushako kabili aile na ku basambilila ifyo amano ya muntu yaba mu kwipushako ifyo engacita. Lelo abasambilila ifyo amano ya muntu yaba tabayaswike icipusho calecusha sana José ica kuti: “Cinshi Lesa alekele umukashi wandi ukufwa?” Kasuba kamo, akumene na Francesc, uwalebomba mu kampani imo ine na José. Francesc aebele José ukutila kuti atemwa basambilila nankwe icipandwa 11 mu citabo ca kuti Bushe Cinshi Baibolo Isambilisha?, icitila “Cinshi Lesa Asuminishisha Ukucula?” José alitemenwe ifyo Baibolo yalondolola uyu mulandu, kabili alitemenwe ne cilangililo cabamo ica kwa kafundisha no mwana we sukulu cintomfwa. Alikosele ukusambilila, kabili aile na ku kulongana kwa muputule, na kabili, nomba alaya na ku kulongana ku Ng’anda ya Bufumu.

²¹ BaRoman, abali ne myaka 40 kabili bashimakwebo ku Poland, balicindika Icebo ca kwa Lesa ukufuma na kale. Nomba pa mulandu wa kuti incito yalebasendela sana inshita, tabalesambilila Baibolo bwino bwino. Na lyo line, balisangilwe ku kulongana kwa citungu kabili balipokeleko ne citabo ca kuti Bushe Cinshi Baibolo Isambilisha? Ukufuma fye apo pene, baRoman balitemenwe sana ukusambilila Baibolo. Abene batile: “Muli ici citabo mwena, amasambililo yacindama aya mu Baibolo yaleumfwika bwangu ica kutila we muntu no mutwe kuti waisuka.” BaRoman nomba balasambilila lyonse Baibolo kabili nabatampa ukukosa mu kupepa.

Twalilileni no Mutima wa Kutasha

22, 23. Kuti twatwalilila shani ukulatasha pa fyo twaba ne subilo lya kulubuka?

²² Nge fyo twasambilile pa Kulongana kwa Citungu ukwaweme nga nshi ukwaleti “Ukulubuka Nakupalama!” Abena Kristu ba cine balolela ukulubuka kwa muyayaya uko Lesa abalaya, kabili balafwaya sana iyo nshita ukufika. Balishiba no kuti icikalenga ukulubuka, mulandu wa kucetekela ilambo lya cilubula ilya mulopa wasuumine uwa kwa Yesu Kristu. Takwaba cimbi ico twingacita pa kulanga ukuti tulatasha ne mitima yesu yonse pali ili subilo lyacindama nga nshi. Ico twingacita fye, kutwalilila ukulaisangulula “ku milimo yafwa ku kuleka tubombe umulimo washila kuli Lesa wa mweo.”—AbaHebere 9:12, 14.

²³ Ala mwandini cipesha mano ukuti bakashimikila ba Bufumu aba cishinka ukucila 6,000,000 baletwalilila ne citetekelo ukubombela Lesa muno nshiku, ilyo abantu abengi nga nshi batemenwe ukucita fye ifyo abene balefwaya. E ciletulanga no kuti ababomfi ba kwa Yehova balatasha nga nshi pa fyo bashuka ukubombela Lesa, kabili balishiba ukuti ‘ukucucutika kwabo te kwa fye muli Shikulu.’ E ico kanshi, natutwalilile ukulatasha Yehova pali fyonse ifyo aatucitila!—1 Abena Korinti 15:58; Amalumbo 110:3.

Kuti Mwatila Shani?

• Bushe uwaimbile amalumbo atusambilisha cinshi pa kutasha Lesa na pali fyonse ifyo atupeela ifitulenga ukukosa ilyo tulemupepa?

• Bushe ubusesemo bwa pali Hagai 2:7 bulefikilishiwa shani muno nshiku?

• Bushe Yehova aapangasha shani abantu bakwe ukulamubombela bwino?

• Cinshi mwingacita pa kulanga ukuti mulatasha Yehova pa busuma bwakwe?

[Amepusho]

 [Charti pe bula 27-30]

2006 SERVICE YEAR REPORT OF JEHOVAH’S WITNESSES WORLDWIDE

 (Moneni muli magazini)

[Ifikope pe bula 25]

Yehova alatupangasha bwino ukubomba umulimo wakwe