Umuntu Umufumacumi

NOMBA line bucishinka bwa baNelma bwalieshiwa. BaNelma Bena Kristu ababomba umulimo wa kuwamya umushishi mu Cruzeiro do Sul, ku Brazil. Ilyo ku ncende bekala kwali ilyeshi, baNelma balibapeele ifya kufwala ku mwanakashi umo uo bawamya umushishi. Ilyo balesalaula mu fya kufwala, basangile indalama mwi tumba lye toloshi ishalingene na madola 1,000 (aya ku Amerika) [mupepi na K4,000,000].

Indalama baNelma basangile shalingene ne sho bengafola pa myeshi 7, kabili balekabila indalama pali iyo nshita. Ilyeshi lyalyonawile ing’anda yabo, kabili ifipe fya bawishi na baice babo fyalyonaike. Isho ndalama nga shalibafwile ukuwamya ing’anda no kushitamo ifyo ulupwa lwalekabila. Lelo, apo baNelma balishibe ifyo Baibolo isambilisha tababomfeshe shilya ndalama.—AbaHebere 13:18.

Ubushiku bwakonkelepo, balibangilile ukuya ku ncito kabili balandile na ulya mwanakashi wa makwebo uwa bapeele ifya kufwala. BaNelma batashishe umwanakashi pa bupe bwakwe kabili bamwebele ukuti tabalefwaya ukusunga ifyo basangile mu fya kufwala. Umwanakashi alitemenwe sana ukumutwalila shilya ndalama pantu shali ni ndalama sha kufolesha ababomfi bwakwe. Ulya mwanakashi atile: “Abantu abafumacumi banono sana.”

Kwena abengi bamona kwati mu bufumacumi tamwaba cilambu. Lelo, ubufumacumi mibele yacindama iyo bonse abateemuna Lesa wa cine, Yehova, balingile ukukwata. (Abena Efese 4:25, 28) BaNelma batile: “Nsenda shilya ndalama no kushibomfya nga nshalele utulo.”