Ifyo Mwingeshiba Ukupepa Kwa Cine

ABABA mu filonganino fya mapepo ifingi batila ifyo basambilisha fifuma kuli Lesa. Kanshi kuti cawama nga twaumfwa amashiwi yalandile Yohane umutumwa wa kwa Yesu, uwalembele ati: “Mwe batemwikwa, mwisumina icebo conse icapuutwamo, lelo esheni ifyebo fyapuutwamo mumone nga fyafuma kuli Lesa, pantu bakasesema wa bufi abengi nabafumina pano calo.” (1 Yohane 4:1) Nomba kuti twaishiba shani ifyebo ifyafuma kuli Lesa?

Fyonse fye ifyafuma kuli Lesa filalanga imibele yakwe, maka maka imibele yakwe iyapulamo iya kutemwa. Ukulangilila fye, ukununsha ukutulenga ukumfwa bwino amaluba ya cena cisuma, nelyo umukate uo bafuma fye mu kupanga, kutulanga ukuti Lesa alitutemwa. Filya tumona bwino ukuwa kwa kasuba, ubusuma bwa cipelebesha, na filya tutemwa ukumona umwana munono aleseka, fyonse fitulanga ukutila Lesa alitutemwa. Na filya fine tumfwa bwino ulwimbo ulusuma nga lulelila, akoni nga kalelila, nelyo ishiwi lya muntu uo twatemwa, na fyo fine fitulanga ukuti Lesa alitutemwa. Nangu ca kuti tatwapwililika, ifyo twapangwa fitulanga ukuti Lesa alitutemwa. E mulandu wine kanshi tumwena ukuti ilingi line amashiwi yalandile Yesu ya cine ilyo atile: “Mwaba insansa ishingi mu kupeela ukucila ishaba mu kupokelela.” (Imilimo 20:35) Tulomfwa bwino ukutemwa bambi pantu twapangwa “mu cata ca kwa Lesa.” (Ukutendeka 1:27) Nangula Yehova alikwata imibele iingi iisuma, ukutemwa e kwapulamo.

Icitabo icafuma kuli Lesa cilingile ukutulanga ukuti wa citemwiko. Ifilonganino fya mapepo fyalikwata ifitabo fya kale ifingi. Lelo bushe ifyo fitabo filalondolola ukuti Lesa wa citemwiko?

Icishinka ca kuti, ifitabo fya kale ifingi tafilanda sana pa fyo Lesa atutemwa nelyo ifyo twingatemwa Lesa. E ico abantu abengi nga nshi tabasanga icasuko nga baipusha ukuti, “Nga twamona ifyo Lesa abumba fitulanga ukuti alitutemwa, nomba mulandu nshi uo ukucula ne fintu fimbi ifyabipa fishapwila?” Lelo Baibolo yena e citabo fye ceka ica kale sana icilondolola bwino bwino ifyo Lesa atutemwa. Baibolo ilatufunda ne fya kulanga icitemwiko kuli bambi.

Icitabo Icilanda pa Kutemwa

Icebo ca kwa Lesa, Baibolo cilanda ukuti Yehova ni “Lesa wa kutemwa.” (2 Abena Korinti 13:11) Baibolo ilalondolola ifyo ukutemwa kwalengele Yehova ukupeela abantunse ba kubalilapo ubumi busuma ubwabula ukulwala no kufwa. Lelo ukupondokela Lesa e kwalenga abantu ukulacula. (Amalango 32:4, 5; Abena Roma 5:12) Yehova alicitilepo cimo pa kuti ifintu fikawame na kabili. Icebo ca kwa Lesa citila: “Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Amalembo  ya Mushilo yalatulondolwela na fimbi pa fyo icitemwiko ca kwa Lesa caba, yalalondolola ukuti Lesa alibikako ubufumu bwafikapo ne mfumu ya ubu bufumu ni Yesu kabili ubu bwine bufumu bukabwesha umutende ku bantu ba cumfwila.—Daniele 7:13, 14; 2 Petro 3:13.

Baibolo yasupula fyonse ifyo umuntu alingile ukucita mu mashiwi ya kuti: “‘Uletemwa Yehova Lesa obe no mutima obe onse, no mweo obe onse, no kutontonkanya kobe konse.’ Ili e funde likalamba kabili e lya ntanshi. Ilya cibili, ilyapala lyene ni ili, ‘Uletemwo munobe nga we mwine.’ Pali aya mafunde yabili e pashintilila Amafunde yonse.” (Mateo 22:37-40) Baibolo yine itila yalipuutwamo no mupashi wa kwa Lesa. Apo ilatulondolwela bwino imibele ya kwa Lesa, kuti twacetekela ukuti yafuma kuli “Lesa wa kutemwa.”—2 Timote 3:16.

Ukwishiba nampo nga icitabo cilalanda pa kutemwa nelyo iyo, kuti kwatwafwa ukwishiba icitabo ca kale umwaba amashiwi ya cine aya kwa Lesa. Ukutemwa na kabili kulalenga bakapepa ba cine ukwishibikwa, pantu balapashanya Lesa, baliba ne citemwiko.

Ifyo Mwingeshiba Abatemwa Lesa

Abatemwa Lesa icine cine baleshibikwa sana, maka maka muli ino nshita iyo Baibolo ita aiti “inshiku sha kulekelesha.” Abantu nabacilamo ukuba “abaitemwa, abatemwe ndalama, . . . abatemwo kwangala ukucisho kutemwa Lesa.”—2 Timote 3:1-4.

Kuti mwaishiba shani abantu abatemwa Lesa? Baibolo itila: “Uku e kutemwa Lesa, ukuti tubake amafunde yakwe.” (1 Yohane 5:3) Ukutemwa Lesa kulenga abantu ukucindika amafunde ya mu Baibolo aya mibele isuma. Mu Cebo ca kwa Lesa mwaliba na mafunde ayakaanya ubulalelale e lyo na yalanda pa cupo. Ukupanga icupo kwasuminishiwa fye ku baupana kabili tabafwile ukulekana. (Mateo 19:9; AbaHebere 13:4) Ilyo umwanakashi umo uwa ku Spain uwasambilila ifya mapepo asangilwe ku kulongana kwa Nte sha kwa Yehova uko balesambilila amafunde ya mu Baibolo ayalanda pa mibele isuma, atile: “Ilyo nafumine pali kulya kulongana, nalikoseleshiwe ku malyashi ya mu Malembo ayo balandile, nalitemenwe ukumona ifyo baikatana, ifyo bakonka amafunde e lyo ne mibele yabo iisuma.”

Ukulunda pa fyo batemwa Lesa, Abena Kristu ba cine baleshibikwa sana na pa mulandu wa citemwiko balanga kuli bambi. Umulimo wabo uwacindama sana wa kushimikila bambi pa Bufumu bwa kwa Lesa ubwaba e subilo fye lyeka ilya cine ku bantu. (Mateo 24:14) Ukwafwa abantu ukwishiba Lesa e kwingabaletela ifintu ifisuma sana. (Yohane 17:3) Abena Kristu ba cine balalanga icitemwiko mu nshila na shimbi. Balafwilisha abalecula. Cimo icacitike ku Italy, ilyo kwapitile icinkukuma icaonawile ifintu ifingi, inyunshipepala ya muli cilya calo yatile Inte sha kwa Yehova “balafwilisha abantu bambi abali mu bwafya nangu balapepa nabo nelyo iyo.”

Abena Kristu ba cine balitemwa Lesa na bantu banabo, lelo na bene balitemwana. Yesu atile: “Ndemupeele funde lipya, ilya kuti muletemwana; ifyo namutemenwe, e fyo na imwe muletemwana. Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:34, 35.

Bushe na bantu balamona ukuti Abena Kristu ba cine balitemwana sana? BaEma ababomba umulimo wa kusakamana ing’anda e fyo bamwene. Babomba mu musumba wa La Paz, ku Bolivia, umwaba sana akapatulula ka mitundu akalenga paba umusobololo pa bakankaala na bapiina. Batile: “Umuku wa kubalilapo uo naile ku kulongana kwa Nte sha kwa Yehova, namwene umwaume uwacindama sana uwafwele bwino naikala alelanshanya na namayo umwina Bolivia uwalemoneka fye umuntu yaweyawe. Nshatalile mona ica musango yo ukucitika. Palya pene epo nailukiile ukuti aba, e bantu ba kwa Lesa.” Cimo cine na Miriam umukashana umwina Brazil uwatile: “Nshaishibe ifya kucita pa kuba ne nsansa, nangu fye ifya kuba ne nsansa no lupwa lwandi. Ilyo namwene ifyo Inte sha kwa Yehova balelanga ukutemwana mu micitile yabo, e lyo naishibe ukutila kanshi abantu kuti batemwana.” Umukalamba wa milimo  ku mulabasa wa fikope mu United States, alembele ati: “Abantu abengi ababa ne mibele nga ilya aba mu cilonganino cenu bakwata, cino calo nga tacaba nge fi cili ino nshita. Naba pa bantu abaishiba ukuti mu cilonganino cenu mwalitemwana sana kabili mwalicetekela sana Kabumba.”

Fwayeni Ukupepa kwa Cine

Icitemwiko e co umuntu engeshibilako ukupepa kwa cine. Yesu apashenye ukusanga ukupepa kwa cine ku kusanga umusebo waya uko mulungeme no kukonka uyo wine musebo. Ukupepa kwa cine fye e kwingatwala umuntu ku bumi bwa muyayaya. Yesu atile: “Ingileni pa mpongolo ya kamfyemfye, pantu umusebo uutwala ku bonaushi walisaalala kabili walipabuka, kabili bengi abendamo; lelo ya kamfyemfye impongolo, no musebo uutwala ku bumi walifyenenkana kabili banono abausanga.” (Mateo 7:13, 14) Kwaba fye icilonganino ca Bena Kristu ba cine cimo umwaba abacita ifyo Lesa afwaya kabili ababa mu kupepa kwa cine. Kanshi, calicindama ukusala bwino ukwa kupepa. Nga ca kuti mwasanga iyo nshila kabili mwatampa ukwendamo, ninshi mwasanga imikalile iisuma sana, pantu abenda muli iyi nshila balitemwana.—Abena Efese 4:1-4.

Ala nga mwasanga ukupepa kwa cine mukaba ne nsansa nga nshi! Cikaba kwati muleenda na Lesa. Lesa akamusambilisha ifya kuba na mano ne citemwiko pa kuti muleumfwana bwino na bambi. Mukeshiba umulandu mwabela pano calo ne fyo Lesa alaya ukucita ku ntanshi kabili mukakwata isubilo. Ala mukatemwa sana nga mwafwaya no kusanga ukupepa kwa cine.

[Icikope pe bula 5]

Pa fitabo fya mapepo fyonse ifya kale, ni Baibolo fye e itulondolwela bwino icitemwiko ca kwa Lesa

[Ifikope pe bula 7]

Abena Kristu ba cine baleshibikwa pantu baliba ne citemwiko