Ukuba ne Nsansa Ilyo Tulelolela Yehova

BUSHE mwalilyapo icisabo icishilapya? Kwena mufwile tamwaipakishe nangu panono ukulya ico cisabo. Palapita inshita pa kuti icisabo cipye, kabili cisuma ukulolela capya. Kwaliba ifintu na fimbi ifyo twingamwenamo nga twalolela. Baibolo itila: “Cisuma ukulinda tondolo ukupususha kwa kwa Yehova.” (Inyimbo sha Bulanda 3:26; Tito 2:13) Ni shani fintu Abena Kristu bafwile ukulolela Yehova? Kuti twamwenamo shani mu kumulolela?

Bushe Ukulolela Lesa E Kutila Shani?

Fwe Bena Kristu, ‘tulolela no kulaibukisha ukubapo kwa bushiku bwa kwa Yehova.’ Tulolela ukulubulwa lintu Yehova ‘akonaula abantu bashipepa.’ (2 Petro 3:7, 12) Yehova umwine alafwaya sana ukupwisha ububi bonse, nomba alalolela ukuti akapusushe Abena Kristu mu nshila iikalenga ishina lyakwe ukucindikwa. Baibolo itila: “Lesa, nangu line alafwayo kulanga ubukali bwakwe no kusokolola amaka yakwe, alekelele no kushishimisha ukwingi ifipe fya bukali ifyapekanishiwilwa ubonaushi, pa kuti asokolole ubucindami bwa bukata bwakwe pa fipe fya luse.” (Abena Roma 9:22, 23) Nga filya fine acitile mu nshiku sha kwa Noa, na muno nshiku mwine, Yehova alishiba inshita ya kupususha abantu bakwe. (1 Petro 3:20) Kanshi, mu kulolela Lesa mwaliba no kulolela inshita yakwe iya kucitapo cimo.

Ilyo tulelolela ubushiku bwa kwa Yehova, limo kuti twakalifiwa ilyo tulemona ifintu mu calo fileya filebipilako fye. Nga ca kuti twakalifiwa pa mulandu wa filecitika mu calo, kuti cawama ukutontonkanya pa mashiwi ya kwa kasesema Mika, uwalembele ukuti: “Aliloba umubile ukufuma pano isonde, uwatambalala tamwaba mu bantunse.” Lyena alandile no kuti: “Lelo ine nakulalolela Yehova, nakulalindila Lesa we pusukilo lyandi.” (Mika 7:2, 7) Bushe ‘kulindilila’ kwa musango nshi uko tufwile ukuba na ko? Apo ukulolela ilingi line kulakalifya, bushe kuti twaba shani ne nsansa ilyo tulelolela Lesa?

Ukuba ne Nsansa Ilyo Tulelolela

Kuli Yehova kuti twasambililako ukuba ne mibele isuma ilyo tulelolela. Yehova tatala aleka ukuba “Lesa wa nsansa.” (1 Timote 1:11) Aliba ne nsansa ilyo alolela pantu acili alacita fimo pa kuti akafikilishe ubufwayo bwakwe ubwa kufisha abantu abamutemwa ku kupwililika, nga filya fine alefwaya bena ukuba pa kutendeka fye ilyo ababumbile. (Abena Roma 5:12; 6:23) Alamona ifisuma ififuma mu mulimo wakwe, e kutila abantu abengi sana balisa ku kupepa kwa cine. Yesu atile: “Tata acili alebomba na nomba, na ine ncili ndebomba.” (Yohane 5:17) Ukubombela bambi kulaletela sana umuntu insansa. (Imilimo 20:35) E fyo na Bena Kristu ba cine bacita, tabekala fye ilyo balelolela. Balabombesha ukwafwa bambi ukuti beshibe ifyo Lesa afwaya ukucitila abantunse.

Ukufuma fye na kale, abantu ba cishinka balaba ne nsansa ilyo balelumbanya Lesa pa kulolela inshita yakwe iya kucitapo cimo. Natulande pali Davidi uwaimbile amalumbo. Davidi alicushiwe ku mfumu, cibusa wakwe alimufutwike, kabili no mwana wakwe na o alimufutwike. Ilyo ifi fyonse fyalecitikila Davidi, bushe cali no  kumwangukila ukuba ne nsansa ilyo alelolela Yehova ukumulubula inshita nga yafika? Amalumbo 71, napamo ayalembelwe na Davidi wine yatila: “Lelo ine ndecetekela [‘ndelolela,’ NW] pe, no kufushapo pe pa kumutasha; akanwa kandi kalelondololo bulungami bwenu, ukupususha kwenu, akasuba konse.” (Amalumbo 71:14, 15) Mu nshita ya kufulwa ilyo alelolela, Davidi ali ne nsansa pantu ali uwacincila ukulumbanya Yehova no kukosha bambi mu kupepa kwa cine.—Amalumbo 71:23.

Ukulolela Yehova takukalifya nga filya tumfwa pa kulolela basi iicelelwe. Kwaba nga filya abafyashi balolela ne nsansa umwana wabo ilyo alekula mpaka aba umukalamba uo bakulaumfwilapo icilumba. Ilyo balelolela, balabombesha, e kutila balamukansha, ukumufunda no kumusalapula, kabili balacita fyonse ifi pantu bafwaya ukuti akabe umwana musuma. Na ifwe fwe balolela Yehova, tulaba ne nsansa ilyo tuleafwa bambi ukupalama kuli Lesa. Na ifwe tufwaya Lesa ukutupaala, kabili na pa kulekelesha, ukutupususha.

Mwileka Isubilo Ukupwa

Ukulolela Yehova kwalola mu kuti tufwile ukutwalilila ukumutemwa no kumubombela ukwabula ukuleka isubilo ukupwa. Ici tacayanguka. Muno nshiku, ababomfi ba kwa Lesa abengi bekala na bantu abaseka bonse abacetekela amalayo ya kwa Lesa. Tontonkanyeni pa bena Israele ba cishinka abatwalilile ukuba ne subilo pa myaka 70 yonse iyo bali muli bunkole mu Babele. Cinshi cabafwile ukutwalilila ukuba ne subilo? Ukubelenga ibuuku lya Amalumbo e kwabafwile. Icipandwa cimo ica kukoselesha ico twingatila napamo iyi nshita ninshi calilembwa kale, citila: “Ku cebo cakwe e ko nacetekela; umutima wandi ulolela Shikulu, ukucila abalinshi abalindililo lucelo, abalinshi abalindililo lucelo. Mwe bena Israele, cetekeleni Yehova.”—Amalumbo 130:5-7.

AbaYuda abatwalilile ukuba ne subilo lyakosa ukupitila mu kubelenga no kulanda pali lyena balilambwilwe lintu mu kupelako abalwani baishilecimfya abena Babele. Ukwabula no kupoosa inshita, abaYuda abengi aba citetekelo babwelele ku Yerusalemu. Baibolo ilanda pali ilya nshita ukuti: “Ilyo Yehova abweseshe bunkole bwa Sione, . . . utunwa twesu twaiswilemo inseko.” (Amalumbo 126:1, 2) Balya baYuda tabalekele isubilo lyabo ukupwa, lelo batwalilile ukukosha icitetekelo cabo. Kabili tabalekele ukwimba inyimbo sha kutasha Yehova.

Na Bena Kristu ba cine na bo, balabombesha lyonse ukuba ne citetekelo cakosa ilyo balelolela Lesa muli ino nshita ya “mpela ya bwikashi.” Balasambilila Icebo ca kwa Lesa, balakoseleshanya, kabili balalumbanya Yehova ukupitila mu kubila imbila nsuma iya Bufumu.—Mateo 24:3, 14.

Ukulolela Lesa pa Kuti Tumwenemo mu fyo Aletulungika

Kasesema wa kwa Lesa Yeremia alembele ukuti: “Cisuma ukulinda tondolo ukupususha kwa kwa Yehova.” (Inyimbo sha Bulanda 3:26) Ico Yeremia alelandapo ca kutila cali no kuba bwino ku bantu ba kwa Lesa ukukanalailishanya pa fyo Yehova abalungike ilyo alekele Yerusalemu ukonaulwa. Lelo, ukuti baali  no kumwenamo mu fyo abalungike ukupitila mu kutontonkanya pali bucintomfwa bwabo na pa fyo balingile ukwalula imibele yabo.—Inyimbo sha Bulanda 3:40, 42.

Ukumwenamo kwesu mu fyo Yehova atulungika, kuti twakupashanya kuli filya icisabo ciya cilekula mpaka capya. Ilyo Baibolo ilanda pa kusalapula ukufuma kuli Lesa, itila: “Kuli abo abakanshiwa kuli kwene kutwala icisabo ca mutende, e kutila, ubulungami.” (AbaHebere 12:11) Filya fine caba ukuti pafwile ukupita inshita pa kuti icisabo cipye, e fyo caba na kuli ifwe, pafwile ukupita inshita pa kuti twaluke no kutendeka ukukonka ifyo Lesa aletufunda. Tutile twalufyanya fimo kabili batupoka imilimo imo mu cilonganino, ukuitemenwa ukulolela Lesa kukatulenga ukukanafuupuka no kukanaleka. Ilyo ifintu fyabe fi, amashiwi Davidi alandile uwapuutilwemo no mupashi yalatukoselesha nga nshi, atile: “Ubukali [bwa kwa Lesa] bwa nshita inininini, ukubisha kwakwe kwa nshita yonse ya mweo wa muntu; ku cungulo ukulila kuti kwaisatubilisha, lelo ku lucelo kuli akapundu.” (Amalumbo 30:5) Nga tulelolela no kukonka ukufunda ukwaba mu Cebo ca kwa Lesa no kuteyanya kwakwe, inshita yesu iya kwaula “akapundu” ikafika.

Palapita Inshita pa Kuti Umuntu Akosoke

Nga uli mwaice nangu e lintu fye wabatishiwe, napamo ulefwaya sana ukubomba imilimo na imbi iya mu cilonganino ca Bena Kristu. Nomba palapita inshita pa kuti umuntu akosoke no kufikapo ukubomba iyo milimo. E ico, ilyo ucili umwaice, bomfya bwino inshita ukwishiba ifingi ifyaba mu Baibolo. Ku ca kumwenako, ilyo ucili umwaice e nshita isuma sana iya kubelenga Baibolo yonse, ukubombesha sana ukuba ne mibele ya Bwina Kristu, no kusambilila bwino ifya kubomba umulimo wa kupanga abasambi. (Lukala Milandu 12:1) Nga ca kuti waiceefya no kulolela Yehova, inshita yalinga ikafika iya kuti ukabombe imilimo na imbi mu cilonganino.

Umulimo wa kupanga abasambi na o walinga ukutekanya pa kuubomba. Filya fine umulimi alingile ukutwalilila ukutapilila mpaka Lesa akameshe ulubuto, e fyo caba na ku mulimo wa kupanga abasambi. (1 Abena Korinti 3:7; Yakobo 5:7) Pa kusambilisha umuntu ukuti abe ne citetekelo no kutemwa imibele ya kwa Yehova, palapita imyeshi nangu fye imyaka iya kusambilila nankwe Baibolo mu kutekanya. Kanshi mu kulolela Yehova mwaliba no kukwata umute, nangu ca kuti pa kutampa fye, abasambi tabacita ifyo balesambilila. Nga ca kutila balemoneka ukuti kwena balitemwa ifyo balesambilila, nangu fye ni panono, ico kuti caba cilangililo ca kuti baleumfwila umupashi wa kwa Yehova. Nga mwatekanya, mukaba ne nsansa ilyo mukamona Yehova alenga umusambi wenu ukukosa mu kupepa no kuba umusambi wa kwa Kristu.—Mateo 28:20.

Ukulolela Lesa Kulangililo Kuti Twalimutemwa

Ilyashi lya kwa nakulubantu umo uwikala mu ciswebebe cabela ku ncende ya Andes, ku South America, kuti lyatulanga bwino sana ukuti ukulolela kulalanga ukuti umuntu alitemwa uo alelolela kabili alimucetekela. Uyu nakulubantu pamo na nkashi umbi, e Nte sha kwa Yehova fye beka mu mushi uo bekalamo. Bushe kuti mwaelenganya ifyo bomfwa bwino sana ukulolela Abena Kristu banabo nga baumfwa ukuti baleisa? Inshita imo, kangalila wenda alilubile ilyo aleya mu kubatandalila umuku wa kubalilapo. Pa kulondoka, abwelele uko afumine ukuya mu kufwaya bwino inshila, kabili ici calengele ukuti acelwe sana ukufika. Ninshi no bushiku nabucila na pa kati, e lyo amwene umushi aleyako ulemonekela apatali. Apo muli uyu mushi tamwali amalaiti, alipapile ukumona ulubuuto. Ala alitemenwe ilyo afikile mu mushi no kumona ukuti lulya lubuuto lwalefuma ku nyali iyo ulya nakulubantu abikile pa muulu! Uyu nakulubantu alishibe ukuti nangu cibe shani kangalila aleisa, e co alelolela.

Na ifwe bene tulomfwa bwino ukulolela Yehova kabili tulatekanya, nge fyacitile ulya nakulubantu. Tatutwishika nangu panono ukuti Yehova akafikilisha amalayo yakwe. Kabili nga filya fine kangalila wenda atashishe ifyo ulya nakulubantu acitile, na ifwe tulatasha abantu abatulolela ukwabula ukufulwa. E co na Lesa wine atemenwa abamulolela. Baibolo itila: “Yehova acankilwa . . . abalolela icikuuku cakwe.”—Amalumbo 147:11.

[Icikope pe bula 18]

Abantu abacincila ukulumbanya Lesa balaba ne nsansa ilyo balelolela Yehova