“Alitupatikishe”

ABANTU abekala mu fyalo fyaba ku kabanga baliba ne cileela. Ica kumwenako fye, mu India ulupwa kuti lwapeela ifya kulya ifyo bacikwata ku beni abo bashacilaenekela no kwenekela e lyo bena baikala insala. Mu Iran namo umufyashi umwanakashi lyonse alesusha ifya kulya mu fuliji pa kuti umweni nga aishile inshita iili yonse kuti bamupekanishisha.

Na bantu abengi abo Baibolo yalandapo nabo bali ni bakapekape. Umo uwali kapekape ni Ludia, nakalimo tali mu Yuda lelo alekonka intambi sha mu mipepele ya baYuda kabili aleikala mu Filipi, uwali umusumba uukalamba mu citungu ca Makedonia. Pa bushiku bumo ubwe sabata, umutumwa Paulo na banankwe bali pa lwendo kabili basangile Ludia na banakashi bambi nabalongana mumbali ya mumana ku nse ya Filipi. Yehova aiswile umutima wa kwa Ludia kabili alikutike ku fyebo Paulo alandile pali bulya bushiku. Ne ci, calengele ukuti abatishiwe pamo na ba mu ng’anda yakwe. Lyena Ludia apapeete Paulo na banankwe ukutila: “Nga namuninga ukuba uwa cishinka kuli Yehova, ingileni mu ng’anda yandi no kwikala.” Luka uwali pamo na Paulo atila: “Alitupatikishe.”—Imilimo 16:11-15.

Nga Ludia, Abena Kristu ba muno nshiku nabo ni bakapekape ku basumina banabo pamo nga bakangalila benda na bena mwabo. ‘Balabapatikisha’ ukuti bekale nabo. E lyo nabo balanonkelamo ilyo bakutika ku malyashi ya kukoselesha no kubishanya pamo. Nangu abengi pa Nte sha kwa Yehova bapiina, ‘baliba ne cileela.’ (Abena Roma 12:13; AbaHebere 13:2) Bukapekape bwabo bulabalenga ukuba ne nsansa. Ukwabula no kutwishika Yesu alilungike ilyo atile: “Mwaba insansa ishingi mu kupeela ukucila ishaba mu kupokelela.”—Imilimo 20:35.