Amepusho Ukufuma ku Babelenga

Bushe ni nama shinga pa shasanguluka isho Noa aingishe mu cibwato? Bushe alebuulapo cinelubali (7) nelyo alebuulapo 14, ishilume cinelubali ne shikota cinelubali?

Ilyo Noa apwishishe ukupanga icibwato, Yehova amwebele ukuti: “Patama iwe, na ba ng’anda yobe bonse, mu cibwato; pantu ni we namona umulungami ku cinso candi mu nkulo ino. Ifya mu musango onse wa nama ishasanguluka ubuulepo cinelubali cinelubali, icilume ne cikota ca ciko, ne sha mu nama ishishasanguluka shena ubuulepo shibili, ilume ne nkota ya iko.” (Ukutendeka 7:1, 2) AmaBaibolo yamo pamo nga Bible wa Mushilo, Diocess of Mbala, na Chinamwanga Bible 63, yapilibula amashiwi ya ciHebere ukuti, “ishilume cinelubali ne shikota cinelubali.”

Mu ciHebere ishiwi “cinelubali (7),” balelilemba ukuti “cinelubali cinelubali.” (Ukutendeka 7:2) Mu milembele ya baHebere ukubwekeshapo inambala imiku ibili takupilibula ukuti ninshi kusansha ayo manambala. Ica kumwenako fye, pali 2 Samwele 21:20 “umuntu wa mushinku ukalamba” bamulondolola ukuti akwete “iminwe mutanda [6] ku maboko yonse yabili, ne fikondo mutanda ku makasa yonse yabili.” Mu ciHebere, inambala “mutanda [6]” baibwekeshapo imiku ibili. Ici tacipilibula ukuti ili paka lyakwete iminwe 12 ku kuboko kumo kumo ne fikondo 12 ku lukasa lumo lumo. Ukubwekeshapo inambala kulanga ukuti ukuboko kumo kumo kwakwete iminwe 6 no lukasa lumo lumo lwakwete ifikondo 6.

E ico, filya pa Ukutendeka 7:2 patila “cinelubali cinelubali” tacipilibula ukuti ni 14, kwati fye ni filya fine amashiwi ya kuti “fibili fibili” pa Ukutendeka 7:9, 15 tayapilipula ukuti alesenda inama shine pa shishasanguluka. Ukubwekeshapo inambala kupilibula ukuti alesenda fye cinelubali (7) pa musango umo umo uwa nama shasanguluka. Kanshi Noa alesenda inama shasanguluka ‘cinelubali,’ e lyo ishishasanguluka ‘shibili.’

Nomba ninshi ni mwi mwalola amashiwi yakonka pali “cinelubali cineluba” ayatila “icilume ne cikota” pa Ukutendeka 7:2? Ici calenga abantu ukulatontonkanya ukuti Noa bamwebele ukusenda inama shasanguluka 14, iilume ne ikota, pa kuti shikasande bwangu. Lelo ico basendele inama shasanguluka ishingi te mu kuti balefwaya fye shikasande bwangu iyo. Pa Ukutendeka 8:20, tubelengapo ukuti ilyo Noa afumine mu cibwato, “akuulile Yehova iciipailo; abuulilepo ne nama ishasanguluka isha misango yonse, ne fyuni ifyasanguluka ifya misango yonse, no kuninike fya kuninika pa ciipailo.” Inama yalenga cinelubali pa shasanguluka yalengele Noa ukutuula ilambo kuli Lesa, e lyo shilya shashele mutanda shatwalilile ukusandana.