Ifyo Kristu Akacita Ilyo Akesa

MAGAZINI ya Veja yalondolwele ifyacitike pa nshiku shine mu musumba wakulisha mu Brazil umwikala sana abakankaala ukutila: “Ulukakaala Lwabipisha mu São Paulo.” Ulu lukakaala lwacitike mu May 2006 kabili umusumba balionawile icabipisha. Abantu 150 balifwile ilyo kwali “ulukakaala ulwabipisha pa maawala ukucila pali 100” kabili pa bafwile pali bakapokola, bamukukulu, na bantu aba kaele.

Ukuli konse uko mwingaya, ulukakaala balalulandapo sana mu malyashi ya pa mulabasa. Bakateka balifilwa ukupwisha ulukakaala. Icalo cileya cilebipilako fye. Nalimo mulomfwa ububi pantu ifibi filecitika fye mpanga yonse. Nangu cibe ifyo, nomba line ifibi tafyakabeko.

Yesu afundile abasambi bakwe ukupepela Ubufumu bwa kwa Lesa ukwisa no kufwaya kwakwe ukucitwa “pano isonde nga mu muulu.” (Mateo 6:9, 10) Ubu Bufumu buteko bwa cine cine ubo Lesa abikapo Yesu Kristu ukuba Imfumu, kabili bukapwisha amafya ya bantunse yonse. Nomba pa kuti Ubufumu bwa kwa Lesa ubo Kristu atekapo bukafumye ifyabipa fyonse pa calo, amabufumu ya bantunse yafwile ukufumapo. Ifi fine e fyo Kristu akacita nga aisa.

Bushe Bakateka Bakasumina Ukuti Kristu Akabafumyepo?

Bushe inko shikasumina ukutekwa na Kristu? Umutumwa Yohane balimulangile icimonwa icilondolola ifikacitika. Ashimika ukuti: “Namwene iciswango [amabufumu ya pano isonde] ne shamfumu sha pe sonde ne milalo ya shiko nafilongana ku kulwa no waikala [Yesu] pali kabalwe no mulalo wakwe.” (Ukusokolola 19:19) Cinshi cikacitika kuli ishi shamfumu muli ubu bulwi? Baibolo itila Imfumu iyo Yehova asonta ‘ikabafuna ku nkonto ya cela, ikabatobaula nge nongo ya mubumfi.’ (Amalumbo 2:9) Amabufumu ya pano isonde bakayashonaula. Ubufumu bwa kwa Lesa “bukashonaula no kupesha aya mabufumu [ya bantunse] yonse, kabili bukeminina umuyayaya.”—Daniele 2:44.

Cinshi cikacitika kubashifwaya ukutekwa no Bufumu bwa kwa Lesa? “Pa kusokololwa  kwa kwa Shikulu Yesu ukufuma ku muulu pamo na bamalaika bakwe aba maka mu mulilo uulebilima,” Yesu bamulondolola kwati ‘aleleta icilandushi pa bashaishiba Lesa na bashinakila imbila nsuma.’ (2 Abena Tesalonika 1:7, 8) Amapinda 2:22, yatila: “Lelo ababifi bakaputulwa mu calo, na bafutika bakafumpulwamo.”

Ilyo Baibolo ilanda pa kwisa kwa kwa Kristu itila: “Moneni! Aleisa na makumbi, ne linso lyonse likamumona.” (Ukusokolola 1:7) Ici tacilole mu kuti abantu bakamumona aleisa. Ukutula fye apo aila ku muulu, Yesu aba mupashi “uwaikala mu lubuuto ulushingapalamwako, uo umuntunse nangu umo tabala amona.”—1 Timote 6:16.

Yesu tafwile fye no kumoneka mu buntunse pa kuti bonse abekala pe sonde ‘bamumone’ kwati fye ni filya fine Yehova na o ashamoneke ilyo aletele Ifinkunka 10 pa bena Egupti mu nshiku sha kwa Mose. Pali ilya nshita abantu tabatwishike ukuti Yehova e waletele filya finkunka, lelo balilwike ukuti Yehova ni Lesa uwa maka. (Ukufuma 12:31) Cimo cine e cikacitika na lintu Kristu akatendeka ukubomba umulimo Lesa amupeela uwa konaula ababifi. Ababifi ‘bakamona,’ nelyo ukwiluka ukuti Lesa alebomfya Yesu ukubapingula. Bakeshiba ukuti Yesu alebapingula pantu kale kale balisokwa. Ukwabula no kutwishika “ilinso lyonse likamumona [Yesu], . . . ne mitundu yonse ya pano isonde bakapumapo imisowa pa mulandu wakwe.”—Ukusokolola 1:7.

Pa kuti pe sonde pakabe umutende no mutelelwe na kabili, Kristu akafumyapo ababifi na mabufumu ya bantunse. Lyena akalateka icalo conse kabili ububifi bonse bukapwa.

Ukubweseshamo Ukukaleta Amapaalo ku Ciyayaya

Umutumwa Petro alandile pa “kubweseshamo fyonse ifyo Lesa alandile mu kanwa ka bakasesema bakwe aba mushilo aba ku kale.” (Imilimo 3:21) Uku kubweseshamo kulesanshamo no kuwamya isonde ilyo Kristu akalateka. Esaya ali pali bakasesema abo Lesa abomfeshe ukulanda pali uku “kubweseshamo fyonse” pe sonde. Esaya asosele ifi fyebo mu mwanda wa myaka uwalenga 8 B.C.E. Asobele ukuti Yesu Kristu, “Cilolo wa mutende,” akaleta umutende pe sonde. Esaya asosele pa kuteka kwa kwa Kristu ukuti: “Ku kukula kwa bukateka bwakwe, na ku mutende, takwakabe mpela.” (Esaya 9:6, 7) Yesu akasambilisha abantu ukuba aba mutende. Abakekala pe sonde ‘bakailemeno bwingi bwa mutende.’—Amalumbo 37:11.

Bushe kukaba insala no bupiina ilyo Kristu akalateka? Esaya atile: “Yehova wa milalo akacitile nko shonse umutebeto wa fya mafuta, umutebeto wa myangashi ya pa fisekwa, ifya mafuta ifyaisulamo ubufyompo, imyangashi ya pa fisekwa iyalengululwa.” (Esaya 25:6) Kemba wa malumbo na o atile: “Mube ukupaka kwa ngano mu calo, na pa muulu wa mpili.” (Amalumbo 72:16) Kumfwa ku bakekala pe sonde Baibolo itila: “Bakakuula amayanda no kwikalamo, bakalima na mabala ya myangashi no kulye fisabo fya yako; tabakakuule na bambi abekalamo, tabakalime na bambi abalyako; pantu inshiku sha bantu bandi shikaba nge nshiku sha muti, ne milimo ya minwe yabo abasalwa bandi bakasekelamo pa myaka iingi.”—Esaya 65:21, 22.

Esaya asobele no kuti ukulwala ne mfwa tafyakabeko. Ukupitila muli Esaya, Lesa atile: “Yakashibulwa amenso ya mpofu, na matwi ya bankomamatwi yakakomonwa; e lyo uwalemana amolu akacilauka nge nsebula, no lulimi lwa kwa cibulu lukaula.” (Esaya 35:5, 6) Lyena “umwikashi wa mu calo takasose, ati, Nindwala.” (Esaya 33:24) Lesa “akamine mfwa ukumina kwa pe. Shikulu Yehova akafuuta ne filamba pa finso fyonse.”—Esaya 25:8.

 Nomba cinshi cikacitika ku bafwa “ababa mu nshiishi”? (Yohane 5:28, 29) Esaya asobele ukuti: ‘Bakaba no mweo abafwa benu, . . . bakema.’ (Esaya 26:19) Ukwabula no kutwishi abafwa bakabuuka.

“Lesa Cipuna Cobe ica Bufumu Pe na Pe”

Kanshi ico Kristu akacita nga aisa, kuwamya isonde. Isonde likasanguka paradaise, kabili abantu bonse bakalapepa fye Lesa wa cine eka. Bushe kuti twatwishika no kutwishika ukuti Yesu Kristu akawamya ifintu pa calo no kufumyapo ububi bonse?

Tontonkanyeni pa fyo uwapeela Yesu amaka aba. Ilyo Baibolo ilanda pa Mwana itila: “Lesa cipuna cobe ica bufumu pe na pe, ne nkonto ya bufumu bobe ni nkonto ya bulungami. Watemenwe ubulungami, kabili wapatile bumpulamafunde.” (AbaHebere 1:8, 9) Uwapeela Yesu icipuna ca bufumu, e kutila amaka, ni Yehova. Apo Lesa e wapeela Yesu amaka ya kuteka, takwakabe ubwafya ubo Yesu akafilwa ukupwisha.

Ilyo Yesu abuukile aebele abasambi bakwe ukuti: “Amaka yonse nayapeelwa kuli ine mu muulu na pano isonde.” (Mateo 28:18) Pali 1 Petro 3:22, patila: “Bamalaika na bamulopwe na ba maka balengelwe ukunakila wene.” Kanshi takwakabe bamulopwe na ba maka abakacimfya Yesu. Takwakabe icikamulesha ukulenga abantu ukuipakisha umutende ku ciyayaya.

Bushe Ukwisa kwa kwa Kristu Kulenga Abantu Ukumfwa Shani?

Umutumwa Paulo alembele muli kalata wakwe ku bena Tesalonika ukutila: “Twibukisha pe umulimo wenu uwa citetekelo no kubombesha kwenu kwa kutemwa no kushipikisha kwenu pa mulandu wa kusubila muli Shikulwifwe Yesu Kristu pa cinso ca kwa Lesa wesu kabili Shifwe.” (1 Abena Tesalonika 1:3) Paulo atile ukusubila muli Yesu Kristu e kulenga umuntu ukubombesha no kushipikisha. Ukusubila muli Yesu kusanshamo no kucetekela ukuti Kristu akesa kabili akawamya ifintu pe sonde. Isubilo lya musango yo kuti lyalenga Abena Kristu ba cine ukukosa nelyo ukushipa na lintu bali na mafya yene yene.

Lekeni tulande pali baCarlos abekala mu São Paulo ku Brazil. Mu August 2003, baCarlos babebele ukuti nabakwata ubulwele bwa kansa. Ukutula muli ulya mwaka baCarlos babalepula imiku 8, kabili ici calenga ukuti balelwalilila no kulakalipwa. Nangu balwalilila ifyo, balakoselesha bambi. Ica kumwenako fye, ilyo baleshimikila mu musebo uwabamo icipatala icikalamba, bakumenye Nte munabo uwakwata abalume abalwala kansa. Apo nabo balacula ku bulwele bwa kansa pa nshita ntali, baCarlos bakoseleshe Nte munabo na balume bakwe. Pa numa ya kulanshanya nabo, balya bantu balitashishe pa fyo ‘babakoseleshe.’ Kanshi baCarlos balisumine ukuti amashiwi yasosele umutumwa Paulo ya cine ayatila: ‘[Lesa] e utukoselesha mu bwafya bonse, pa kuti na ifwe tumone ukukoselesha bonse abali mu bwafya ubwalekanalekana.’—2 Abena Korinti 1:4, Icipangano Cipya.

Cinshi cilenga baCarlos ukulakoselesha bambi te mulandu no kulwala kansa? Isubilo bakwata ilya kuti Kristu akesa kabili akawamya isonde e lilenga baCarlos ‘ukulacite cawama.’—Abena Galatia 6:9.

Natulande na pali baSamuel abo baipaile umwaice wabo lwa mupepi fye na pa mwabo. Uyu mulumendo bamulashile impolopolo 10, kabili icitumbi cali fye mumbali ya musebo pa maawala 8 ilyo bakapokola balefwailisha ifyacitike. BaSamuel bacili balebukisha icacitike. Na lyo line, balikosa pa mulandu we subilo bakwata ilya kuti Kristu akesafumya ububifi pe sonde kabili ukuteka kwakwe ukwalungama kukaleta amapaalo pa bantunse. Ilingi line baSamuel balelenganya  ifyo bakakumbatila umwaice wabo nga abuuka mu Paradaise.—Imilimo 24:15.

Cinshi Mufwile Ukucita?

Nga mwaba ne subilo lya kuti Kristu akesa no kuwamya isonde mukaba ne nsansa icine cine. Yesu Kristu akafumyapo fyonse ifilenga amafya e lyo ne fyabipa ifitucitikila.

Finshi mulingile ukucita pa kuti mukaipakishe amapaalo ayo Kristu akaleta pa bantunse? Tendekeni ukusambilila Baibolo Icebo ca kwa Lesa. Ilyo Yesu apepele kuli Wishi atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.” (Yohane 17:3) Lyonse mulebebeta ifyo Baibolo isambilisha. Inte sha kwa Yehova abekala uko kwine mwikala kuti batemwa ukumwafwa ukwishiba ifyo Baibolo isambilisha. Tulemukoselesha ukubafwaya nelyo ukulembela ku balemba uno magazini.

[Ifikope pe bula 7]

Ico Kristu akacita nga aisa, kuwamya isonde

[Abatusuminishe]

Inset, background only: Rhino and Lion Park, Gauteng, South Africa