Abantu Balafwayafwaya Amano Yene Yene

Kuti naisunga shani mu mikalile yandi?

Kuti nacita shani pa kuti ulupwa lwandi lube ne nsansa?

Bushe kuti nacita shani pa kuti ndebomba bwino incito?

BUSHE mwalitala amuipushapo amepusho ya musango yu? Bushe mwalisangile amasuko yene yene? Cila mwaka abantu balafumya ifitabo fyapusanapusana napamo 2,000 ifilanda pa mano yene yene e lyo na pa fintu fimbi ifyacindama. Mu Britain fye mweka, ababelenga ifitabo bapoosa indalama amadola ya ku Amerika amamilioni 150 cila mwaka ku kushita ifitabo filanda pa fyo abantu bengapwisha amafya mu mikalile yabo. Mu United States, abashitisha ifitabo ifyo abantu bamona kwati umuntu nga aibelengela kuti apwisha amafya yakwe, balapanga ulupiya ukufika ku madola 600 milioni cila mwaka. Kanshi te imwe mweka mufwayafwaya amano yene yene pa kuti mwishibe ifya kwikala bwino.

Kalemba umo alandile pa kupanda amano ukwaba mu fitabo ifingi ilyo atile: “Ifingi ifyo balemba mu fitabo ifipya, babwekeshapo fye ifyo bambi balembele mu fitabo fya kale.” Cine cine, abalemba uku kufunda ukusangwa mu fitabo ifingi, babwekeshapo fye amashiwi ya mano yene yene ayalembelwe mu citabo cakokola sana ukucila ifitabo fyonse pano calo. Kwena, pano calo tapaba icitabo icasabankana isonde lyonse icingalingana ne ci. Amabuuku yamo ayaba muli ici citabo yalipilibulwa mu ndimi shimo, kabili mu ndimi shimbi na mo balipilibula ici citabo conse fye. Indimi umo bapilibwila ici citabo shalifika 2,400. Kabili ici citabo calipulintwa amabilioni 4.6 mu calo conse. Ico citabo, ni Baibolo.

Ukwabula no kupita mu mbali, Baibolo itila: “Amalembo yonse yantu yapuutwamo kuli Lesa kabili ya mulimo ku kusambilisha, ku kwebaula, ku kulungika ifintu, ku kusalapula kwa mu bulungami.” (2 Timote 3:16) Kwena, Baibolo tayalembwa nga filya fyaba ifitabo fya kuibelengela ifyo abantu bamona kwati kuti fyabafwa ukupwisha amafya. Lelo ico sana sana Baibolo yalembelwe, kulondolola ubufwayo bwa kwa Lesa ku bantunse. Nangu cibe fyo, Baibolo yalikwata ne fyebo ifingi nga nshi ifingatwafwa ukwishiba ifya kucita pa mafya ayo ifwe bonse ilingi line tukwata mu bumi, kabili yalilaya ukuti bonse abakonka ifyo ilanda bakanonkelamo. (Esaya 48:17, 18) Kanshi nga twakonka ifyo Baibolo isambilisha, ifintu kuti fyatuwamina, kabili ukufunda kwabamo kulabomba ku muntu onse fye te mulandu no mutundu wakwe, intambi sha ku mwabo, nelyo amasambililo ayo umuntu akwata. Baibolo yalilandapo pa kusunga bwino ubumi bwenu, pa fyo ulupwa lwingaba ne nsansa, na pa babomfi na babengisha incito. Mukwai belengeni icipande cakonkapo pa kuti muimwene nga ca kutila ifyo Baibolo ilanda pali iyi milandu filabomba.