Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga mwalicitile fyo, moneni nga kuti mwayasuka amepusho yakonkapo:

• Cinshi twingasambilila ku cilangililo ca kwa Yesu ica kwa shibweni wa mupampamina? (Luka 11:5-10)

Ici cilangililo ca mwaume wali no mupampamina ciletusambilisha imibele tulingile ukukwata ilyo tulepepa. Tufwile ukulalomba no mukoosha, ukuba no mupampamina, sana sana ilyo tulelomba umupashi wa mushilo uwa kwa Lesa. (Luka 11:11-13)—12/15, amabula 20-2.

• Bushe icilangililo casosele Yesu ica kwa mukamfwilwa na kapingula citusambilisha cinshi? (Luka 18:1-8)

Cilanga ifyo ipepo lyacindama. Kapingula uwa mu cilangililo ca kwa Yesu ali uushalungama, Yehova ena alilungama kabili alafwaisha ukwafwa ababomfi Bakwe. E ico, kanshi tulingile ukuba ne citetekelo nge ca kwa mukamfwilwa wa mu cilangililo ca kwa Yesu.—12/15, amabula 26-8.

• Mulandu nshi umutumwa Paulo aebele Abena Kristu ba mu Korinti “ukukusha imitima”? (2 Abena Korinti 6:11-13)

Cilemoneka kwati abena Korinti bamo tabalemona abasumina banabo ukuti balicindama. Bali abaifinya kabili tabalefwaya ukulaumfwana na bantu bambi. Tufwile ukulamona abasumina banensu ukuti balicindama nga nshi, no kulapanga ifibusa na fimbi.—1/1, amabula 9-11.

• Bushe ukukakatika balandapo pa Ukusokolola 7:3, kukakatika nshi?

Ilyo Lesa asuba Abena Kristu umupashi wa mushilo, ninshi abakakatika umuku wa kubalilapo. Lelo Ukusokolola 7:3 kulosha ku kukakatika kwa kulekeleshako, ukwaba bushininkisho bwa kuti uwasalilwe no kukakatikwa pa kubala nomba nalanga ukuti wa cishinka ukufika na ku mpela.—1/1, amabula 30-1.

• Bushe abafyashi kuti basambililako finshi ku lyashi lya mu Baibolo ililanda pali Samwele?

Ica kubalilapo, bafwile ukusambilisha abana babo Icebo ca kwa Lesa nga filya fine abafyashi ba kwa Samwele bacitile. Na kabili balingile ukukoselesha abana babo ukusalapo ukulabombela Yehova mu mulimo wa nshita yonse.—1/15, ibula 16.

• Bushe kuti twalanga shani ukuti twaliba ne nsansa ilyo tulelolela Yehova?

Fwe Bena Kristu, ‘tulolela . . . ubushiku bwa kwa Yehova.’ Tulolela ukulubulwa lintu Yehova ‘akonaula abantu bashipepa.’ (2 Petro 3:7, 12) Nangu ca kuti Yehova alafwaya sana ukupwisha ububi bonse, lelo alashishimisha pa kuti akapusushe Abena Kristu mu nshila iikalenga ishina lyakwe ukucindikwa. Tulingile ukucetekela ukuti Yehova alishiba inshita ya kupususha abantu bakwe. Lelo pali ino nshita, tufwile ukuba abacincila ukulalumbanya Lesa. (Amalumbo 71:14, 15)—3/1, amabula 17-18.

• Bushe Noa aingishe mu cibwato inama cinelubali (7) nelyo aingishe 14, ishilume cinelubali ne shikota cinelubali?

Noa bamwebele ukuti pa nama ishasanguluka “ubuulepo cinelubali cinelubali.” (Ukutendeka 7:1, 2) Mu ciHebere ishiwi “cinelubali (7),” balelilemba ukuti “cinelubali cinelubali.” (Ukutendeka 7:2) Mu milembele ya baHebere ukubwekeshapo inambala imiku ibili takupilibula ukuti ninshi kusansha ayo manambala, nge fyo na malembo yambi yalanga. Noa afwile alesenda inama shasanguluka cinelubali, ishilume shitatu ne nkota shitatu e lyo ne yalenga cinelubali iyo abomfeshe ukutuula ilambo kuli Lesa. (Ukutendeka 8:20)—3/15, ibula 31.

• Mulandu nshi Abena Kristu balingile ‘ukumwena’ umwalola icitetekelo ca baeluda, e kuti abatungulula mu filonganino?

Umutumwa Paulo aletweba ‘ukumona’ nelyo ukutontonkanya sana pa fisuma ififuma mu myendele isuma iya baeluda no kupashanya imibele yabo iya citetekelo. (AbaHebere 13:7) Ico tucitile fi ni co Icebo ca kwa Lesa e fyo catweba ukuti tulecita. Na kabili, twalishiba ukutila baeluda bafwaya umulimo wa kwa Lesa ukulaenda bwino no kuti tube abatuntulu mu citetekelo.—4/1, ibula 28.