Ico Adryana Alefwaisha

ADRYANA, umukashana wa myaka 6 uwikala ku Tulsa, mu Oklahoma, ku U.S.A., alefwaisha ukucita icintu cimo. Ico alefwaya calingana ne co kemba wa Malumbo David aimbilepo mu lwimbo ilyo atile: “Icintu cimo nalomba kuli Yehova, e co ndefwayafwaya; ukwikala mu ng’anda ya kwa Yehova inshiku shonse sha mweo wandi, ku kutambo busuma bwa kwa Yehova, no kubuusha mwi tempele lyakwe.”—Amalumbo 27:4.

Ilyo Adryana ali fye ne myeshi 6, bamusangile no bulwele bwabipisha bwa neuroblastoma, kansa iimena kuli bongobongo, mu mungololo, na mu mishipa. Ubu bulwele bwalengele amolu ya kwa Adryana yonse yabili ukuba no bulebe. Ilingi line badokota balemulepula pa kumundapa, kabili pa mwaka uutuntulu balebomfya imiti iya kwipaya insandesande umuba ubulwele.

Bawishi ba kwa Adryana tabasumina mu fyo Adryana na banyina basuminamo, kabili baipwishe akabungwe akacitila abana abakwata amalwele yabipisha ifyo balefwaya ukuti kakalipilile umwana wabo indalama pa kuti akayetandala ku parka iisuma nga nshi mu calo ukwaba fimashini fya kwangalapo ifingi. Lelo ilyo bashilamusuminisha ukuya, balitalile bamwipusha fimo fimo. Pa kubasuka Adryana alibatashishe nga nshi pa kusumina ukumulipilila indalama, lelo abebele ukutila kuti atemwa sana ukuyatandala ku Bethel, amaofesi aya Nte sha kwa Yehova mu New York ayangalila umulimo wa kushimikila uwa mwi sonde lyonse. Ilyo Adryana aishileishiba ukuti ni bawishi e balefwaya aleya ku cifulo uko engayaangala no kusangalala sana, alipepele kuli Yehova ukuti ili libe lishuko lya kuyatandala ku Bethel. Ilyo aba muli kalya kabungwe bamwene ukuti bawishi Adryana tabakeene ifyo umwana wabo alefwaya, balimusuminishe ukuyatandala ku Bethel nangu ca kuti baletontonkanya ukuti umwaice nga aya kulya te kuti asangalale sana.

Adryana aile ku New York mu kutandala pa Bethel umuku wa kubalilapo, kabili aile na banyina, nkashi nankwe, e lyo no munankwe. Adryana atile: “Yehova alyaswike ipepo lyandi. Nalishibe ukuti ali no kulenga bamunyinefwe ku Bethel ukutupokelela bwino sana, ica kuti nalimwene ifyo bapaanga amabuuku, bamagazini, na maBaibolo. Naliipakishe ukutandala ku Bethel ukucila fye ne fyo nali no kuipakisha ku cifulo ukwaba fimashini fya kwangalapo ifingi.”

Adryana ‘alitambile ubusuma bwa kwa Yehova’ kabili alitashishe pa fyo umulimo ubombwa pa maofesi yakalamba aya bantu ba kwa Yehova pali lelo. Pa mbali ya maofesi yakalamba aya Nte sha kwa Yehova ayaba mu New York, kwaliba na maofesi yambi ayanono mu fyalo fimbi. Na imwe kuti mwatandalila amaofesi yakalamba aya Nte sha kwa Yehova uko mwikala.