Icacindama Sana Ukucila Ukwiluka Imimonekele ya Muulu

NALIMO mu fyalo fyonse fye kwaliba amapinda ayalanda pa kuti ilyo abantu bamona ifyo umuulu ulemoneka, baleshiba nga kwalaba imfula nangu icimwela. Ipinda limo ilya ciNgeleshi litila: Umuulu nga wakashika pa cungulo, abensha ingalaba balatemwa; lelo umuulu nga wakashika ulucelo, abensha ingalaba balatiina. Muno nshiku, abapima ifyo umwela wenda no kwishiba ifyo kwalaba batila mu mwela mulaba ulukungu no tuntu tumbi utunono sana kabili ifi fine e filenga umuulu ukukashika pa cungulo. Balanda no kuti nga cabe fi, ulucelo kuti kwacelebuka nga filya fine ipinda lya ciNgeleshi lilanda.

Na lintu Yesu aali pano calo, abantu balitemenwe ukulolesha ifyo umuulu ulemoneka no kulanda pa fyo bukaca nangu ifyo kwalaba. Yesu aebele abaYuda bamo ukuti: “Lintu cabe cungulo mutila, ‘Kukacelebuka, pantu umuulu naukashika ce’; kabili ulucelo mutila, ‘Leelo kuleba impepo ne mfula pantu umuulu naukashika ce, kabili naubundama.’ Mwaishibo kwiluka imimonekele ya muulu.” Nomba Yesu abebele na fimbi ifyo balekabila ukutontonkanyapo, atile: “Lelo tamwiluka ifishibilo fya nshita.”—Mateo 16:2, 3.

Bushe ifi fine “fishibilo fya nshita” fyali e finshi? Fyali fintu ifingi ifyalelanga bwino bwino ukuti Yesu aali e Mesia wa cine uwafumine kuli Lesa. Ifyo Yesu alecita fyalemoneka fye apabuuta tuutu nga filya fine umuntu engamona umuulu nga naukashika. Nomba abaYuda abengi balisuulile ifishibilo ifyalelanga ukuti Mesia alishile. Basuulile icacindeme sana ukucila pa kwiluka imimonekele ya muulu.

Muno nshiku na mo, kwaliba icishibilo icacindama sana ico abantu bafwile ukwishiba icacila pa kwiluka imimonekele ya muulu. Yesu asobele ukuti cino calo cabipa cikonaulwa pa kuti kukese icalo cisuma. Alandile pa fintu fyalekanalekana ifyali no kulacitika ukulangilila ukuti cino calo calaswa conaulwe. Pali ifyo fintu paba inkondo ne fipowe mwi sonde lyonse. Yesu atile nga mwamona ifi fyonse, ninshi Lesa alaswa onaule icalo.—Mateo 24:3-21.

Bushe mulamona ifi “fishibilo fya nshita”