Lekeni Icebo ca kwa Lesa Cilemutungulula

“Icebo cenu ni nyali ku makasa yandi, kabili lubuuto ku nshila yandi.”—AMALUMBO 119:105.

1, 2. Mulandu nshi abantu abengi bafililwa ukusanga umutende wine wine ne nsansa?

BUSHE kuti mwaibukisha inshita imo ilyo mwaipwishe umuntu umo ukumulangako inshila? Napamo mwali fye mupepi no kufika uko mwaleya nomba tamwaishibe bwino bwino inshila ya kuyamo. Nangu limbi mwalilubilile fye kabili pa kuti mulondoke mwali no kubwelela kulya kwine fye mwatulile. Nga tamwishibe bwino bwino uko muleya nelyo nga namulubilila fye, bushe te kuti ciwame ukwipusha uwaishiba bwino iyo ncende? Nga mwaipusha uwaishiba bwino iyo ncende, kuti amwafwa ukufika uko muleya.

² Pa myaka iingi nga nshi, abantunse balyesha ukulaitungulula abene, kabili tabafwaya Lesa ukulabatungulula. Lelo abantu abashapwililika nga bakaana ukutungululwa na Lesa, tapaba uko balola. Tabeshiba ne fyo bengacita pa kuti basange umutende wine wine ne nsansa. Mulandu nshi bafililwa ukusanga umutende wine wine ne nsansa? Imyaka ukucila 2,500 iyapita, kasesema Yeremia atile: “Te kwa muntunse ukwenda kwakwe; te kwa muntu uuleya ukushikimika amatampulo yakwe.” (Yeremia 10:23) Umuntu onse uufwaya ukuitungulula umwine no kukaana ukumwafwa ku waishiba bwino ifintu, ilingi line alasanga ubwafya. Kanshi abantu balakabila uwa kubatungulula!

3. Mulandu nshi Yehova Lesa abela uwafikapo ukutungulula abantunse, kabili cinshi aatulaya?

³ Yehova Lesa eka e wafikapo ukutungulula abantu. Mulandu nshi? Pantu alishiba bwino sana ifyo abantu bapangwa ukucila umuntu fye onse. Alishiba ne calengele abantunse ukupumbuka mu nshila no kuya fye iciyeyeye. Na kabili alishiba ne fyo bengacita pa kuti babwelele mu nshila yalungama. Kabinge, apo ni Kabumba, Yehova lyonse aleshiba ifingatuwamina. (Esaya 48:17) E ico, kuti twacetekela sana ifyo atulaya pa Amalumbo 32:8 ukuti: “Ndekushilimuna, kabili ndekulange nshila iyo ufwile ukwendamo; ndekupanda amano na menso yandi pali iwe.” Kuti twacetekela sana ukuti Yehova e wingatutungulula bwino. Nomba bushe atutungulula shani?

4, 5. Bushe Icebo ca kwa Lesa kuti catutungulula shani?

⁴ Kemba wa malumbo apepele kuli Yehova ukuti: “Icebo cenu ni nyali ku makasa yandi, kabili lubuuto ku nshila yandi.” (Amalumbo 119:105) Ifyo Lesa aalanda ne fya kutwibukishako fyaba mu Baibolo, kabili kuti fyatwafwa ukwishiba ifya kucita pa mafya ayaba nge fipindami mu nshila yesu. Ca cine, nga tulebelenga Baibolo no kuleka iletutungulula, ninshi na kuli ifwe bene cikaba nga filya fine fisosa Esaya 30:21 ukuti: “Amatwi yenu yakomfwe cebo cafuma ku numa yenu, icileti, Iyi e nshila, e mo mwende.”

⁵ Lelo moneni ukuti Amalumbo 119:105 yalanda pa fintu fibili ifyapalana ifyo Icebo ca kwa Lesa cicita. Ica kubalilapo, Icebo ca kwa Lesa caba nge nyali ku makasa yesu. Ilyo twaba na mafya mu mikalile yesu, ifishinte fya mafunde ifyaba mu Baibolo fifwile ukututungulula pa kuti twishibe bwino ifya kucita e lyo no kusengauka amafya ayaba nge fiteyo nelyo ifilindi umo twenda muli cino calo. Ica bubili, ifya kutwibukishako ifyaba mu Cebo ca kwa Lesa fyaba ngo lubuuto ku nshila yesu, kabili filatwafwa ukusala bwino ifya kucita pa kuti tube ne subilo lya kwikala umuyayaya mu Paradaise iyo  Lesa alaya. Mu nshila yesu nga namubuuta bwino bwino, tukeluka ifingafuma mu fyo tulecita, ifibi nelyo ifisuma. (Abena Roma 14:21; 1 Timote 6:9; Ukusokolola 22:12) Natulandepo sana pa fyo Icebo ca kwa Lesa cingaba nge nyali ku makasa yesu kabili ngo lubuuto ku nshila yesu.

“Inyali ku Makasa Yandi”

6. Ni muli finshi fimo fimo umo Icebo ca kwa Lesa ciba nge nyali ku makasa yesu?

⁶ Cila bushiku, tulatontonkanya pali fimo ifyo twalacita. Fimo ifyo tucita kuti fyamoneka ukuti tafyayafya, nomba limo kuti kwaba fimo ifingalenga twaba mu bwafya, limbi kuti bwaba bwesho bwa kufwaya ukucita ubulalelale, ubwesho bwa kukanaba no bufumacumi, nangu ubwesho ubwingakuma ukukanaipoosa mu fya calo. Pa kucimfya ayo mesho, tulingile ‘ukulalingulula no kulekanya icalungama ne cabipa.’ (AbaHebere 5:14) Nga twaishiba bwino bwino Icebo ca kwa Lesa, no kumfwikisha ifishinte fya mafunde ifyabamo, kampingu wesu alakanshiwa bwino, ica kuti tulasala bwino ifya kucita ifingasekesha Yehova.—Amapinda 3:21.

7. Londololeni icingalenga Umwina Kristu ukumona kwati cili fye bwino ukuya ku kwangalila pamo na bo abomba nabo abashasumina.

⁷ Natulandeko pali cimo icingacitika. Bushe muli bakalamba abafwaya sana ukulenga umutima wa kwa Yehova ukusamwa? (Amapinda 27:11) Nga ni fyo, ninshi mulecita bwino. Nomba tutile bamo abo mubomba nabo balefwaya mukaye nabo ku fyangalo fimo, kabili bamupeela ne tiketi lya kuyaingilila pa mwinshi. Mulomfwana bwino na bo pa ncito, kabili kuti batemwa sana ukuya-angalila pamo na imwe. Limbi kuti mwabacetekela sana ukuti basuma fye. Kabili ca cine, muli fimo kuti baba fye abasuma. Nomba kuti mwacita shani? Bushe kuti mwaba mu bwafya nga mwasumina ukuya na bo ku fyangalo? Bushe Icebo ca kwa Lesa kuti camwafwa shani ukusala bwino ifya kucita pa ca musango yu?

8. Fishinte nshi ifya mu Malembo ifitwafwa ukutontonkanya pa fyo tulingile ukwampana na bantu banensu?

⁸ Natulandeko pa fishinte fya mafunde fimo fimo ifya mu Malembo. Icishinte cimo ico twingebukisha sana ni cilya caba pali 1 Abena Korinti 15:33, icitila: “Ukubishanya kubi konaule mibele isuma.” Bushe ukumfwila ici cishinte ce funde kwalola mu kuti mufwile ukukankamba abashasumina? Te fyo Amalembo yalanda iyo. Pantu no mutumwa Paulo wine alitemenwe ‘abantu ba musango onse,’ ukubikako fye na bashasumina bene. (1 Abena Korinti 9:22) Na pa kuti fye tutile tuli Bena Kristu, kano tuletemwa abantu bambi ukubikako fye na balya bene abo tushipepa nabo. (Abena Roma 10:13-15) Naendi, kuti twakonka shani ukufunda kwa kuti “tubombe icisuma kuli bonse,” nga ca kuti tuleitalusha ku bantu abengalinga ukwafwa?—Abena Galatia 6:10.

9. Kufunda nshi ukwa mu Baibolo ukutwafwa ukwishiba bwino ifyo tufwile ukwampana na bo tubomba nabo?

⁹ Nalyo line, paliba sana ubupusano pa kuba fye bwino ku muntu mubomba nankwe, e lyo no kutemwana sana nankwe. Pano e po  tulingile ukwibukisha icishinte ce funde na cimbi ica mu Malembo. Umutumwa Paulo asokele Abena Kristu ukuti: “Mwiba kwi koli limo line na bashasumina.” (2 Abena Korinti 6:14) Bushe amashiwi ya kuti “mwiba kwi koli limo line na bashasumina” yalola mwi? Mu maBaibolo yamo bapilibula aya mashiwi ukuti “mwilacitila ifintu pamo kwati muli bamo bene,” no kuti “mwilayampana na bashalinga kwampana nabo.” Ni pi twingatila e po ukwampana no muntu tubomba nankwe kutendekela ukubipa? Kabili ni pi twingatila e po ukuba kwi koli limo line no ushasumina kutendekela? Icebo ca kwa Lesa Baibolo kuti camutungulula nga muli no bwafya bwa musango yu.

10. (a) Bushe Yesu alesala shani ifibusa? (b) Fipusho nshi fingafwa umuntu ukusala bwino ifibusa?

¹⁰ Natulande pali Yesu uo tulingile ukupashanya, kabili uwatemenwe abantunse ukutula fye lintu babumbilwe. (Amapinda 8:31) Ilyo ali pano calo, alitemenwe sana abakonshi bakwe. (Yohane 13:1) Na kuba Yesu ‘alitemenwe’ fye no muntu uwalufiwe ne mipepele ishali iya cine. (Marko 10:17-22) Lelo Yesu na kabili alishibe bwino abengaba sana ifibusa fyakwe. Abashali abafumacumi mu kucita ifyo Wishi afwaya bena tabali ifibusa fyakwe iyo. Inshita imo, Yesu atile: “Muli banandi nga mulecita ifyo imweba.” (Yohane 15:14) Ca cine, nalimo mulomfwana fye bwino no muntu umo uo mubomba nankwe. Lelo ipusheni amuti: ‘Bushe alafwaya ukukonka ifyo Yesu alanda? Bushe alafwaya ukusambilila pali Yehova, uo Yesu atile e o tufwile ukupepa? Bushe na o alakonka amafunde ya kwa Lesa nga filya fine na ine ne Mwina Kristu nkonka?’ (Mateo 4:10) Ilyo mulelanda na bantu mubomba nabo no kupampamina pa kukonka amafunde ya mu Baibolo, mukeshiba ifya kwasuka ifi fipusho.

11. Ni muli finshi fimo fimo umo Icebo ca kwa Lesa cifwile ukulatutungulula?

¹¹ Icebo ca kwa Lesa kuti caba nge nyali ku makasa yesu mu fintu na fimbi ifingi. Tutile Umwina Kristu umo uushibomba ashukila incito iyo afwaya sana. Nomba iyo ncito yalikosa kabili ikalamusendela sana inshita ica kuti nga aingila, ilingi line akalapuswa ku kulongana na ku milimo imbi iyakuma ukupepa kwa cine. (Amalumbo 37:25) Umwina Kristu umbi na o nalimo kuti atunkwa ukutamba fimo ifyaishibikwa ukuti fyalipusana na mafunde ya mu Baibolo. (Abena Efese 4:17-19) E lyo umbi na o kuti  limbi alafulwa bwangu pa filubo fya basumina banankwe. (Abena Kolose 3:13) Mu fintu fya musango yu fyonse, tufwile ukuleka Icebo ca kwa Lesa caba nge nyali ku makasa yesu. Nga tulekonka ifishinte fya mafunde ya mu Baibolo, kuti twaishiba bwino ifya kucita nga twaba no bwafya bwa musango fye onse. Icebo ca kwa Lesa ca “mulimo ku kusambilisha, ku kwebaula, ku kulungika ifintu, ku kusalapula kwa mu bulungami.”—2 Timote 3:16.

“Ulubuuto ku Nshila Yandi”

12. Bushe Icebo ca kwa Lesa caba shani ngo lubuuto ku nshila yesu?

¹²Amalumbo 119:105 yasosa no kuti Icebo ca kwa Lesa caba ngo lubuuto ku nshila yesu, cilatusanikila uko tuleya. Twalishiba ifyo cikaba ku ntanshi, pantu Baibolo yalitulondolwela umulandu ifyabipa ficitikila muno calo ne fikacitika ku ntanshi. Twalishiba no kuti tuleikala mu “nshiku sha kulekelesha” isha buno bwikashi bwabipa. (2 Timote 3:1-5) Ukwishiba ifikacitika ku ntanshi kufwile ukutulenga ukutontonkanyapo sana pa fyo imibele yesu ilingile ukuba pali ino nshita. Umutumwa Petro alembele ukuti: “Apo ifi fyonse e fyo fili no kusunguluka, imwe mufwile ukuba abantu ba musango wa myendele ya mushilo ne milimo ya kuipeelesha kuli bukapepa, abalolela no kulaibukisha ukubapo kwa bushiku bwa kwa Yehova!”—2 Petro 3:11, 12.

13. Bushe ukwishiba ukuti tuleikala mu nshiku sha kulekelesha kufwile ukutulenga ukutontonkanyapo shani pa fyo tucita mu mikalile yesu?

¹³ Ifyo tutontonkanyapo ne fyo tucita mu mikalile yesu fifwile ukulanga ukutila twalishininkisha ukuti “icalo cileya no lunkumbwa lwa ciko.” (1 Yohane 2:17) Ukukonka ifyo Baibolo yalanda kukatulenga ukusala bwino ifyo twingafwaya ukucita ku ntanshi. Ica kumwenako fye, Yesu atile: “E ico, mulefwaya intanshi ubufumu no bulungami bwakwe, na fyonse ifi fimbi fikalundwako kuli imwe.” (Mateo 6:33) Tuletasha abacaice abengi abalelanga ukuti balicetekela aya mashiwi ya kwa Yesu pa mulandu wa kuti balebomba umulimo wa nshita yonse! Bambi na bo, ukubikako fye ne ndupwa shonse, bali-itemenwa ukukuukila ku fyalo uko bafwaya sana abantu abengi aba kushimikila pa Bufumu.

14. Cinshi ulupwa lumo ulwa Bena Kristu lwacitile pa kuti babombeshe mu mulimo wa kubila?

¹⁴ Katulande pa lupwa lumo ulwa Bena Kristu bane ulwafumine ku United States of America no kukuukila ku calo ca Dominican Republic. Baile mu kubombela mu cilonganino caba mwi tauni umwaba abantu 50,000. Muli ici cilonganino mwaba bakasabankanya ba Bufumu  nalimo 130. Nomba pa April 12, 2006, abantu nalimo 1,300 e basangilwe ku Cibukisho ca mfwa ya kwa Kristu! Muli ili tauni, cili kwati ifisabo mwi bala nafipya, pantu pa numa fye ya myeshi isano, bonse aba muli ulu lupwa, bawishi, banyina, na bana babo babili umwaume no mwanakashi, batampile ukulatungulula amasambililo ya Baibolo yonse pamo 30. (Yohane 4:35) Bawishi batile: “Mu cilonganino mu mwesu mwaba bamunyinefwe na bankashi 30 abaisa kuno ku kwafwilisha. Nalimo 20 pali aba bafuma ku United States of America, e lyo abashala bafuma ku Bahamas, ku Canada, ku Italy, ku New Zealand, na ku Spain. Bonse fye nga baisa balaba abacincila mu mulimo wa kushimikila ica kuti balikoselesha sana na bamunyinefwe bonse abo twasanga kuno ukucincila sana mu mulimo.”

15. Bushe Yehova amupaala shani pa mulandu wa kuti mwalibika sana amano ku kufwaya Ubufumu mu mikalile yenu?

¹⁵ Kwena, abengi te kuti bakuukile ku fyalo fimbi uko bafwaya sana abantu abengi aba kushimikila pa Bufumu. Lelo kuli balya abengakuuka, na kuli balya abengaalula imikalile yabo pa kuti bakuuke, Lesa akabapaala nga nshi nga bayabombelako kumbi. Lelo konse fye uko mubombela, bombeleni Yehova na maka yenu yonse, pantu nga mulecite fyo mukalabombela Lesa ne nsansa. Nga mwabika sana amano ku kufwaya Ubufumu mu mikalile yenu, Yehova alilaya ukuti ‘akamupongolwele paalo, kukasuke kukabule incende ya kubapo.’—Malaki 3:10.

Ifisuma Ififuma mu Kucita Ifyo Yehova Aalanda

16. Fisuma nshi tukasangamo nga tuleleka Icebo ca kwa Lesa ukulatutungulula?

¹⁶ Nge fyo twaumfwa, ifyo Yehova aalanda filatwafwa mu nshila shibili ishapalana. Inshila ya kubalilapo, Icebo ca kwa Lesa caba nge nyali ku makasa yesu pantu cilatwaafwa ukuya mu nshila yalungama kabili cilatutungulula nga pali fimo ifyo tulefwaya ukucita. Na kabili, caba ngo lubuuto ku nshila yesu pantu cilatweba bwino bwino ifikacitika ku ntanshi. E cilenga tucite ifyo Petro atukonkomeshe ukuti: “Sunsunkanyeni amatontonkanyo yenu, mube abatekanya umupwilapo; tonteni isubilo lyenu pa cikuuku ca bupe fye icili no kuletwa kuli imwe pa kusokololwa kwa kwa Yesu Kristu.”—1 Petro 1:13.

17. Bushe ukubelenga Baibolo kuti kwatwafwa shani ukulakonka ifyo Lesa atutungulula?

¹⁷ Yehova cine cine alatutungulula. Nomba bushe mukasumina ukuti alemutungulula? Pa kuti muleishiba ifyo Yehova afwaya ukuti mulecita, beni no mukoosha wa kulabelenga Baibolo cila bushiku. Mule-etetula pa fyo mwabelenga, esheni sana ukwiluka ifyo Yehova engafwaya ukuti mucite pali uyo mulandu, kabili tontonkanyeni na pa nshila shalekanalekana umo mwingabomfya ifyo mulebelenga. (1 Timote 4:15) Lyena, bomfyeni “amaka yenu aya kupelulula” pa fyo mulefwaya ukucita.—Abena Roma 12:1.

18. Fisuma nshi tukakwata nga twaleka Icebo ca kwa Lesa ukulatutungulula?

¹⁸ Nga tulekonka ifishinte fya mafunde ifya mu Cebo ca kwa Lesa, tukeshiba bwino ifya kucita pa fintu kabili tukeshiba ne nshila yalungama iya kuyamo. Twalicetekela ukuti ifyalembwa mu Cebo ca kwa Yehova filalengo “wapelwa amano ukubo wa mano.” (Amalumbo 19:7) Nga twaleka Baibolo ukulatutungulula, tukaba na kampingu wasanguluka ne cimwemwe pantu ninshi tulecita ifisekesha Yehova. (1 Timote 1:18, 19) Nga twaleka Icebo ca kwa Lesa ukulatutungulula cila bushiku, Yehova akatulambula no kutupaala, na pa kulekelesha akatupeela umweo wa muyayaya.—Yohane 17:3.

Bushe Muleibukisha?

• Mulandu nshi cacindamina ukuleka Yehova Lesa ukulatutungulula?

• Bushe Icebo ca kwa Lesa kuti caba shani nge nyali ku makasa yesu?

• Bushe Icebo ca kwa Lesa caba shani ngo lubuuto ku nshila yesu?

• Bushe ukubelenga Baibolo kukatwafwa shani ukulakonka ifyo Lesa aalanda?

[Amepusho]

[Icikope pe bula 15]

Ni pi twingatila e po ukwampana no ushasumina kutendekela ukubipa?

[Icikope pe bula 16]

Abalecita ifyo Yehova afwaya e bali sana ifibusa fya kwa Yesu

[Ifikope pe bula 17]

Bushe imilimo yesu ilalanga ukuti twalibika sana amano ku fya Bufumu?