“Lesa Uupeela Ukushipikisha no Kusansamusha” Akamwaafwa

IMYAKA nakalimo 2,000 iyapita, Paulo, uwalembeleko Baibolo alondolwele ukuti Yehova ni “Lesa uupeela ukushipikisha no kusansamusha.” (Abena Roma 15:5) Apo Baibolo ilatweba ukuti Yehova taaluka nangu papita inshita, kuti twacetekela ukutila na ino ine nshita Lesa alasansamusha abamubombela. (Yakobo 1:17) Na kuba, Baibolo itweba no kuti Yehova alasansamusha abaleloosha mu nshila shalekanalekana. Abasansamusha shani? Lesa alakosha abapepa kuli wena ukulomba ukuti abaafwe. Alalenga na Bena Kristu ba cine ukwafwa abasumina banabo. Na kabili, mu Cebo cakwe Baibolo, mwaliba amalyashi ayasuma, ayengakosha sana abaleloosha umwana. Natulande pali ifi fintu fitatu, cimo cimo.

“Na o Yehova Alyumfwile”

Imfumu Davidi alembele pali Kabumba wesu Yehova ukuti: “Mutetekeleni mu nshita shonse, mwe bantu, pongolweleni ku cinso cakwe ifya mu mitima yenu; Lesa e cubo kuli ifwe.” (Amalumbo 62:8) Cinshi calengele Davidi ukucetekela Yehova? Ilyo Davidi alandile pa fyo cali kuli ena, atile: “Umulanda uyu alililile, na o Yehova alyumfwile, no kumupususha mu fya kumanama fyakwe fyonse.” (Amalumbo 34:6) Mu bucushi bonse ubo Davidi apitilemo, alepepa kuli Lesa ukuti amwafwe, kabili na o Yehova lyonse fye alemwafwa. Ku fyo apitilemo, Davidi alishibe ukuti Lesa aali no kumutungilila no kumwafwa ukushipikisha.

Abafyashi abaleloosha bafwile ukwishiba  ukuti Yehova akabatungilila ilyo bali sana no bulanda, nga filya fine ayafwile Davidi. Kuti balomba ku ‘Uumfwa ukupepa’ no kucetekela ukuti akabaafwa. (Amalumbo 65:2) BaWilliam abo tulandilepo mu cipande ca kubalilapo, batile: “Ilingi line nga natontonkanya pa mwana wandi uwafwa, ng’umfwa kwati kuti cawama na ine nafwa fye, lelo ndalomba Yehova ukungafwa. Lyonse fye alankosha no kunenga ukushipikisha.” Na imwe bene nga mulepepa kuli Yehova kabili namumucetekela pa kupepa, Lesa mukulu uwa ku muulu akamwafwa. Pantu na kuba, Yehova Lesa alaya bonse abafwaisha ukumubombela ukuti: “Pantu ine, ne Yehova Lesa obe, nkekato kwa kulyo kobe, nkatila kuli iwe, Witiina, ine nakulakwafwa.”—Esaya 41:13.

Abanenu aba Cishinka Kuti Bamwafwa

Abafyashi nga bafwilwa umwana ilingi line balakabila inshita ya kuba beka no kuloosha pa kuti babeko eyefilya. Nomba, nga balefwaya ukulaba beka lyonse fye, kuti cabipa. Te kuti ciwame pantu na Baibolo itila te cisuma umuntu ‘ukuitalusha ku banankwe.’ (Amapinda 18:1, NW) Kanshi, kuti cawama abaleloosha nga tabaleitalusha ku bantu.

Abapepa Lesa kuti baafwa sana abanabo abaleloosha. Amapinda 17:17 yatila: “Icibusa citemwa mu nshita yonse, kabili munyina afyalilwo kumanama.” BaLucy, abo tulandilepo mu cipande ca kubalilapo, balibasansamwishe ku banabo ba cishinka ilyo umwana wabo afwile. Ilyo balelanda pali aba banabo ba mu cilonganino, batile: “Balitwafwile sana pantu baletupempula, nangu ca kuti limo tabalekwata ifya kulanda ifingi. Umunandi umo aleisa mu kumpempula ninshi ndi fye neka. Aleishiba ukuti alansanga pa ng’anda ndelila, ilingi line aleisa kabili twalelilila pamo. Umbi na o alentumina foni cila bushiku iya kunkoselesha. E lyo bambi na bo baletwita ku mwabo ku kulya ifya kulya, kabili ukufika na lelo e fyo bacita.”

Nangu ca kutila ubulanda bwa bafwililwe umwana tabupwa bwangu, kuti basansamuka nga balepepa kuli Lesa no kwampana na banabo Abena Kristu. Abafyashi abengi Abena Kristu abafwilwapo umwana balishiba ukuti Yehova alasansamusha abaleloosha. Ca cine, Yehova “e  uposha abafunike misana, kabili e ukaka pa filonda fyabo.”—Amalumbo 147:3.

Amalyashi Yaba mu Baibolo Ayengamusansamusha

Abaleloosha nga balepepa e lyo no kwampana na banabo Abena Kristu kuti balesansamuka. Kabili Icebo ca kwa Lesa na co kuti casansamusha abaleloosha. Amalyashi yaba mu Baibolo yatulanga ukuti Yesu alafwaya sana ukupwisha ubulanda bwa bafyashi abaleloosha kabili alikwata na maka ya kucite fyo. Yesu akapwisha ubulanda bwabo pantu akabuusha abafwa. Aya malyashi yalasansamusha nga nshi abaleloosha. Natulandeko pa malyashi yabili.

Luka icipandwa 7 ilondolola icacitike ilyo Yesu akumene na bantu mu musumba wa Naini abaleya mu kushiika uwafwile. Baleya mu kushiika umwana mwaume umo fye uwa kwa mukamfwilwa. Icikomo 13 citila: “Shikulu atile ashimumona fye, amwikatilwe nkumbu, no kutila kuli wene: ‘Leko kulila.’”

Banono sana abengeba umwanakashi uuleya mu kushiika umwana wakwe ukuti leka ukulila. Cinshi Yesu ena aebele ulya mwanakashi ukuleka ukulila? Pantu alishibe ukuti ubulanda bwakwe bwalapwa. Ilyashi likonkanyapo ukuti: “[Yesu] alipaleme no kukumya ku busamba, na bamupingile baliminine, na o atile: ‘We mulumendo, Ndekweba nati, Ima!’ No wafwile alimine, atendeko kulanda, na Yesu amupeele kuli nyina.” (Luka 7:14, 15) Ilyo ici cacitike, nyina wa kwa uyu mulumendo nalimo alililile na kabili, nomba apa pena icalengele ukulila mulandu wa nsansa.

Inshita imbi, umuntu umo ishina lyakwe ni Yairo, aile kuli Yesu, no kumulomba ukuyaundapa umwana wakwe umukashana uwali ne  myaka 12 uwalwele ubwa kufwa. Tapakokwele, aba kumweba ukuti umwana wakwe nafwa balishile. Ilyo Yairo aumfwile aya mashiwi yalimuleteele sana ubulanda, lelo Yesu amwebele ati: “Witiina, tetekela fye.” Ilyo bafikile, Yesu aingile mu ng’anda no kuya ukwali icitumbi ca mukashana. Amwikete ku kuboko no kumweba ati: “We mukashana, ndekweba nati Ima!” Cinshi cacitike? “Ilyo line umukashana alimine alaenda.” Bushe abafyashi bakwe baumfwile shani? “Apo pene balipeshiwe amano no kusekelela apakalamba nga nshi.” Ilyo Yairo no mukashi wakwe bakumbatile umwana wabo, balitemenwe sana. Cali kwati baleloota fye.—Marko 5:22-24, 35-43.

Amalyashi ya mu Baibolo aya musango yu ayalanda pa kubuusha abana yalalanga abafyashi abaleloosha ifyo bafwile ukwenekela ukuti e fikacitika ku ntanshi. Yesu atile: “Inshita ileisa ilyo bonse ababa mu nshiishi bakebukishiwa kabili bakomfwe shiwi lyakwe no kufumamo.” (Yohane 5:28, 29) Yehova afwaya ukuti Umwana wakwe akabuushe abafwa. Abana abengi nga nshi abafwa “bakomfwe shiwi lyakwe” ilyo akasosa kuli bene ukuti: ‘Ndemweba nati Imeni!’ Aba bana bakatampa ukwenda no kulanda na kabili. Kabili nga filya cali kuli Yairo no mukashi wakwe, abafyashi babo ‘bakapeshiwa amano no kusekelela apakalamba nga nshi.’

Nga ca kuti mwalifwilwa umwana, mukwai ishibeni ukutila Yehova kuti apwisha ubulanda bwenu, no kumulenga ukuba ne nsansa ilyo akabuusha umwana wenu. Pa kuti na imwe mukasangweko ilyo ici cintu cishaiwamina cikacitika, citeni ifyakonkomeshe uwaimbile amalumbo, uwatile: “Fwayeni Yehova no kumono bukose bwakwe, fwayeni icinso cakwe pe; ibukisheni ifipesha amano ifyo acitile, ifya kupapa fyakwe.” (Amalumbo 105:4, 5) Kanshi, bombeleni Lesa wa cine Yehova, no kumupepa ukulingana na fintu afwaya.

Cinshi cikafumamo ino ine nshita nga ‘mwafwaya Yehova’? Lesa akamukosha nga mulepepa kuli wena, Abena Kristu banenu abamutemwa na bo bakalamusansamusha, e lyo nga mulesambilila ne fyaba mu Cebo ca kwa Lesa, awe mukasansamushiwa. Na kabili, nomba line fye, muli no kumona ‘ifipesha amano ne fya kusungusha’ ifyo Yehova akacita pa kuti mukamwenemo ku ciyayaya, imwe no mwana wenu uwafwile.

[Akabokoshi pe bula 5]

“Ndefwaya Ulya Mwanakashi Uwafwilwa Abana Babili”

Ba Kehinde na bena mwabo ba Bintu, ni Nte sha kwa Yehova aba ku Nigeria. Abana babo babili bafwile mu busanso bwa pa musebo. Ukutula apo abana babo bafwila, balomfwa sana ubulanda pa kufwilwa abana babili pa muku umo. Nangu cabe fyo, ukucetekela Yehova kulabasansamusha, kabili tabaleka ukushimikilako bambi ifyo Yehova alaya muli Baibolo.

Abantu balemona ukuti ba Kehinde na ba Bintu bali fye abatekanya kabili abakosa. Bushiku bumo abanakashi bamo bana Ukoli baebele umunabo wa ba Bintu ukuti: “Ndefwaya ulya mwanakashi uwafwilwa abana babili uushaleka ukushimikila abantu ifya mu Baibolo. Ndefwaya akanondolwele icamulenga ukushipikisha.” Ilyo ba Bintu baile kwa bana Ukoli, bana Ukoli babebele ati: “Ndefwaya ukwishiba ico mushalekela ukushimikila pali Lesa uwaipaya abana benu. Lesa alinsendela umwana uo nakwete fye umukashana. Ukufuma fye apo pene, Lesa nshimufwaya no kumufwaya.” Ba Bintu babomfeshe Baibolo ukulondolola umulandu abantu bafwila no mulandu twingabela ne subilo line line ilya kuti abafwa bakabuuka.—Imilimo 24:15; Abena Roma 5:12.

Pa numa ya kulanshanya, bana Ukoli batile: “Nalemona kwati umuntu nga afwa ninshi Lesa e wamusenda. Nomba e lyo naishiba icishinka.” Ifyo bana Ukoli baumfwile fyalengele batendeka ukusambilila Baibolo ne Nte sha kwa Yehova pa kuti beshibe na fimbi pa malayo ya kwa Lesa.

[Akabokoshie pe bula 6]

‘Kuti Natemwa Ukubafwa, Nomba Nshishibe Ifyo Ningacita’

Ca cine ukuti abafyashi abafwililwe umwana e lyo na bana bambi abashele balaba sana no bulanda, nomba abanabo na bo limbi kuti tabeshibe ifyo bengacita. Kuti bafwaya ukwafwa abafwililwe lelo baletiina ukutila limbi kuti bacita fimo nelyo ukusosa fimo ifishiweme ifingalenga ubulanda ukucilamo. Natulande pali fimo ifyo mwingacita nga muletontonkanya ukutila, ‘kuti natemwa ukubaafwa, nomba nshishibe ifyo ningacita.’

❖ Mwitiina ukupempula abafwililwe pa mulandu wa kuti tamwishibe bwino ifyo mwingabeba nelyo ifyo mwingabacitila. Ukubapempula fye kwine kuti kwabakosha. Nga tamukwete ifya kulanda, kuti mwabakumbatila fye nelyo ukubeba ukuti “awe kwena nacibipa sana.” Nga mwacite fi kuti baishiba ukutila namubasakamana. Bushe mulatiina ukutila nga mwatendeka ukulila kuti mwalenga baumfwa sana ubulanda? Baibolo itila: “Lileni pamo na balila.” (Abena Roma 12:15) Ukulila kukalanga ukuti na imwe namumfwa ubulanda, kabili ico kuti cabasansamusha.

❖ Mwilolela ukuti bamwebe ifya kubacitila. Kuti mwabapekanishishako utwa kulya tumo. Nangu kuti mwabasamfishako ifipe nga pali ifilambile. Bushe kuti mwayabashitilako tumo tumo uto balekabila? Mwibeba ukuti, “Nga pali ifyo mulekabila kuti mwanjeba.” Nangu ca kutila nga mwabebe fi ca cine ninshi mulefwaya ukubafwa, abafyashi abengi abafwililwe bamona kwati ninshi tamukwete nshita. Bepusheni fye amuti, “Bushe kuli utumilimo tumo uto ningamwafwako ino ine nshita?” kabili nga epo tuli, bombeni ilyo line. Lelo mwitampa ukuya na ku miputule uko mushifwile kuya nelyo ukubepusha ne fyo mushilingile ukwishiba.

❖ Mwibeba ukuti, “Ninjishiba ifyo muleumfwa.” Fwe bantu twalipusanapusana ifyo tumfwa nga twafwilwa umuntu wesu. Nangu ca kuti na imwe bene mwalifwilwapo umwana, tamwishibe bwino bwino ifyo bena baleumfwa.

❖ Palakokola pa kuti abafwililwe batampe ukumoneka ukuti baleikala nge fyo baleikala kale. Twalilileni ukulabafwa ukufika apapelele amaka yenu. Ilingi line abantu nga e lyo bafwilwa fye, abengi sana balabapoosako amano, lelo abafwililwe balakabila ukubaafwa na lintu papite nshita. Pooseniko amano pa kuti muleishiba ifyo balekabila na mu milungu nangu fye imyeshi yakonkapo. *

[Futunoti]

[Ifikope pe bula 7]

Amalyashi ya mu Baibolo yatulanga ukuti Yesu alafwaya ukubuusha abana kabili alikwata na maka ya kubabuusha