Ukuba ne Subilo te Mulandu no Kwikala mu Calo ca Masakamika

UWALI kale kateka wa mu Amerika Bill Clinton atile: “Pali ino nshita abantu yaweyawe balacitila abanabo ifisuma kabili balapwisha amafya ayaseeka ukucila ifyo cali kale.” Alandile aya mashiwi mu March 2006 pa kukumana kwali mu Ottawa, ku Canada. Atile ukutula mu 2004 ilyo kwali icinkunka ca tsunami abantu abengi balaipeelesha ukucitila bambi ifisuma no kulayafwilisha utubungwe utushili twa buteko kabili asosele no kuti tufikile pa nshita ilyo abantu mu calo “baleafwana ukucila ifyo cali kale.”

Bushe batini utuyofi e tulingile ukulenga abantu ukuli konse ukubombesha pa kuti ifintu fikawame ku ntanshi? Bushe ifi abantu bafwana pali ino nshita e fingalenga tube ne subilo lya kuti ku ntanshi kukaba umutende no mutelelwe uubelelela?

 Uo Twingasubilamo Fye

Ifyo abantu bacita pa myaka 6000 iyapita filanga ukuti ilingi line abantu te bakucetekela. E mulandu wine amalembo yatwebela ukuti: “Mwitetekela bakankaala, nangu mwana wa muntu uo takuli ukupususha muli wene.” (Amalumbo 146:3) Ukucetekela mu tubungwe, ifyuma, na mapange ya bantu kwa fye kabili kukalifya fye umutima. Mulandu nshi? Pantu “icalo cileya no lunkumbwa lwa ciko.”—1 Yohane 2:17.

Lelo, ukutula fye na kale abantu abalungama balacetekela Lesa pantu tafilwa ukufikilisha ifyo alaya. Baibolo imwita ukuti “ica kulolelako ca kwa Israele nelyo isubilo lya kwa Israele” kabili “ica kulolelako ca bashibo nelyo isubilo lya fikolwe [fya bena Israele],” kabili mwaba amashiwi ayengi alanda pa kusubila, ukulolela, no kucetekela muli wena. (Yeremia 14:8; 17:13; 50:7) Na kuba, e fyo Amalembo yatukoselesha ‘ukulolela Yehova.’—Amalumbo 27:14.

Amapinda 3:5, 6 yatucincisha ukuti: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.” Kanshi tatwingatwishika ubu bulayo pantu Yehova Lesa taaluka, alishintililwapo, kabili alafikilisha ifyo alaya. (Malaki 3:6; Yakobo 1:17) Afwaya ukuti lyonse muleba ne nsansa, kabili nga muleumfwila ifyo asosa mu Cebo cakwe, Baibolo, mukatunguluka te mulandu no kwikala muli ici calo ca masakamika.—Esaya 48:17, 18.

Umuntu uumfwila Lesa no mutima wakwe onse kuti acetekela ubu bulayo ubutila: “Witiina, pantu ine ndi nobe, witentuka, pantu ine ndi Lesa obe; nakulakulengo kutalila, cene, nakulakwafwa, cene, nakulakufumbatila ku kwa kulyo kwandi kwa bulungami.” (Esaya 41:10) Ukuba no mute wa kupepa no kulatontonkanya pali ubu bulayo kulasansamusha bonse abatemwa Yehova Lesa pantu bulabafwa ukupwisha amafya na masakamika.

Tontonkanyeni pa fyo baAndrea bacita. BaAndrea ni Nte ya kwa Yehova kabili bakwata abana babili. Batila: “Ipepo no kulatontonkanya pa malayo ya kwa Yehova e finkosha lyonse nga ndi na mafya. Ukulaibukisha lyonse ukuti Yehova taaluka kulanjafwa ukushipikisha.”

Kosheni Isubilo Lyenu Muli Yehova

Kemba wa malumbo umo alikomaile sana pa kusubila muli Yehova, atile: “Umutende wingi ku batemwa amalango yenu; kuli bene takwaba na ca kuipununako.” (Amalumbo 119:165) Nga mulebikako amano ilyo mulebelenga Icebo ca kwa Lesa mukalatontonkanya pa fintu ‘ifya cine, ifya mushiye, ifyalungama, ifya musangwela, ifyatemwikwa, ifyawama, ifisuma ne fya kutasha.’ Nga ca kuti mwabikako amano ku kumfwa, ku kusambilila, na ku kulacita ifya musango yu, “Lesa wa mutende akaba na imwe.”—Abena Filipi 4:8, 9.

Ilyo baJohn balelanda pa fyo bapitamo pa myaka iingi batile: “Kale nali no mwenso uwa fingacitika ku ntanshi. Pa kupwisha uyu mwenso calicindeme sana ukwishiba ukuti intanshi nalekabila ukwalula imibele yandi ne fyo naletontonkanya e lyo pa numa ukuba icibusa ca kwa Lesa uwapwililika kabili uushimoneka. Pa kuba cibusa wa kwa Lesa nalekabila ukusambilila pali wena. Ici casanshishemo ukulabelenga Icebo ca kwa Lesa no kulatontonkanya pa fyo nalebelenga.”

Ukunwa amenshi ya mweo, e kuti icine ica mu Malembo ayapuutwamo, ni nshila iisuma sana iya kuicingililamo ku fyabipa ifyo batambisha pa mulabasa cila bushiku. Ukulakonka amafunde yaba mu Baibolo kuti kwaikatanya ulupwa lwenu kabili te kuti mulesakamikwa sana. Na kabili Lesa alaya kuti aliipekanya “ukuilango kuti wa maka ku kwafwa ababa ne mitima ya mpomfu kuli wene.” (2 Imilandu 16:9) Yehova akapwisha amafya mu nshila iisuma sana. E co tamulekabila ukulaumfwa umwenso.

BaPhinehas abekala mu calo umo baipayaulula abantu abengi nga nshi umulandu ne inkondo batila: “Nshintilila fye pali Yehova. Ukulakonka ifishinte fya mu Baibolo kwalingafwa ukusengauka amafya ayengi.” Nga mwacetekela Yehova Lesa kuti amwafwa ukupwisha  ubwafya ubuli bonse ubwingaba kwati cibumba icicilikile inshila yenu. (Amalumbo 18:29) Umwana uwatemwana sana na bafyashi bakwe alabacetekela kabili omfwa kwati nacingililwa ilyo ali nabo, ilyo alwele, na lintu ali no bwafya. Na imwe e fyo mwingalaumfwa nga ca kuti mwaumfwila ubwite bwa kulolela Yehova.—Amalumbo 37:34.

Icilenga Ukuti Tube ne Subilo Ilya Kosa

Yesu aebele abasambi bakwe ukuti: “Imwe mufwile ukupepa ifi, amuti: ‘Shifwe wa mu muulu, ishina lyenu lishishiwe. Ubufumu bwenu bwise. Ukufwaya kwenu kucitwe pano isonde nga mu muulu.’” (Mateo 6:9, 10) Ubu Bufumu bwa mu muulu, ubuteko ubo Yesu Kristu abapo imfumu, e bo Lesa abomfya pa kulanga ukuti e wakwata insambu sha kuteka icalo.—Amalumbo 2:7-12; Daniele 7:13, 14.

Fyonse ifilenga abantu ukusakamikwa pali lelo filelanga fye ukuti Lesa fye e wingapwisha aya mafya. Kabili nomba line Lesa ali no kupwisha amafya yonse! Apo nomba Yesu Kristu ni Mfumu iyasontwa na Lesa, balimupeela amaka aya kulenga bumulopwe bwa kwa Yehova ukucindikwa no kulenga ishina Lyakwe ukuba ilya mushilo. (Mateo 28:18) Nomba line ubu Bufumu buli no kutendeka ukuteka cino calo kabili bukafumyapo fyonse ifilenga abantu ukusakamikwa no kuba no mwenso. Esaya 9:6 ilanda pa malumbo ya kwa Yesu ayalanga ukuti alilinga ukuba Kateka musuma uwingatulubula ku mwenso na ku masakamika. Ica kumwenako fye, bamwita ukuti, “Wishi wa nshita pe,” “Kabilo wa cipesha amano,” na “Cilolo wa mutende.”

Tontonkanyeni pe lumbo lya kuti “Wishi wa nshita pe.” Apo ni “Wishi wa nshita pe,” Yesu alikwata amaka kabili alafwaisha ukubomfya ilambo lyakwe ilya cilubula ku kwafwa abantu abacumfwila ukuba no mweo wa muyayaya pe sonde. Ici cilepilibula ukuti bakalubuka ku lubembu no kukanapwililika ifyo bapyene ku muntu wa kubalilapo Adamu. (Mateo 20:28; Abena Roma 5:12; 6:23) Na kabili Kristu akabomfya amaka Lesa amupeela ukubuusha abantu abengi abafwa.—Yohane 11:25, 26.

Na lintu ali pano calo, Yesu ali “Kabilo wa cipesha mano.” Yesu alishibe sana Icebo kwa Lesa ne cifyalilwa ca bantu. Ici calengele alepwisha bwino amafya abantunse balekwata. Ukutula apo bamubikila pa cipuna ca Bufumu mu muulu, Kristu alitwalilila ukuba “Kabilo wa cipesha mano,” kabili eo Yehova abomfya pa kulanshanya na bantunse. Ukufunda kwa kwa Yesu ukwaba mu Baibolo kusuma kabili tamwaba filubo. Ukwishiba no kucetekela ukuti ukufunda kwa kwa Yesu kusuma kabili takwaba na filubo kuti kwalenga mwaleka ukuba no mwenso no kusakamikwa.

Na kabili Esaya 9:6 ita Yesu ukuti “Cilolo wa mutende.” Apo Kristu ni “Cilolo wa mutende” nomba line ali no kufumyapo ulufyengo lonse. Bushe akafumyapo shani ulufyengo? Ni lintu akaleta Ubufumu bwa buMesia ubukalateka icalo conse mu mutende.—Daniele 2:44.

Ilyo ubu Bufumu bukalateka mu calo conse mukaba umutende. Kuti mwashinikisha shani ukuti e fyo cikaba? Icasuko cisangwa pali Esaya 11:9 apatila: ‘[Abatekwa ba ubu Bufumu ] tabakacite bubi, kabili tabakonaule, mu lupili lwandi lwa mushilo monse; pantu icalo cikesulamo ukwishiba Yehova, ifyo amenshi yafimba pali bemba.’ Abantu bakasuka bakeshibe sana Lesa kabili bakalamumfwila. Bushe ukusubila ukuti ifi fikacitika takulemulenga ukuba ne nsansa? Nga ca kuti ili subilo lilamuletela insansa mwipoosa ne nshita, ili line tendekeni ukusambilila pa kuti ‘mukeshibe Yehova.’

Nga mwaishiba Lesa, icitetekelo cenu cikakosa kabili kuti mwaisaba no mweo wa muyayaya. Lelo, kuti mwaishiba fye Lesa nga mwabika amano ku kufwaya ukwishiba ifyo Baibolo isambilisha pa filecitika muno nshiku na pa nshita isuma iya ku ntanshi iyo Baibolo yalaya. Kanshi tulemukoselesha ukutendeka ukusambilila ne Nte sha kwa Yehova uko kwine mwikala. Nga mwacite fyo tamwakabe no mwenso wa fingacitika ku ntanshi kabili mukaba ne subilo te mulandu no kwikala muli ici calo ca masakamika.

 [Akabokoshi ne Fikope pe bula 7]

Umulandu Ubufumu bwa kwa Lesa Bulengela Tube ne Isubilo

Yesu Kristu, uwaba Imfumu ya Bufumu bwa kwa Lesa, alipeelwa insambu na maka ya kuteka icalo conse. (Mateo 28:18) Akawamya fyonse ifyo baonaula pa calo. Kabili alikwata amaka ya kupwisha amalwele. Ifipesha amano ifyo Yesu acitile ilyo ali pano isonde fyalelanga ifyo abantu bakaipakisha amapaalo ilyo akalateka, no kuti alilinga ukuba Imfumu. Bushe pali iyi mibele ya kwa Mesia Imfumu iyo batantawilile ni ili kwi iyo mwatemwapo sana?

▪ Ukukanaifinya.—Marko 10:13-16.

▪ Amano no kukanaba na kapatulula.—Marko 10:35-45.

▪ Ukucetekelwa no kukanaitemwa.—Mateo 4:5-7; Luka 6:19.

▪ Ubulungami no mulinganya.—Esaya 11:3-5; Yohane 5:30; 8:16.

▪ Ukulangulukilako bambi no kuicefya.—Yohane 13:3-15.

[Icikope pe bula 4]

Ukubelenga Baibolo no kulatontonkanya pa fyo mulebelenga kuti kwamwafwa ukulasubila muli Yehova