Ukuwina Umulandu Mu Cilye Ca European Court Of Human Rights

PA JANUARY 11, mu 2007, icilye ca European Court of Human Rights ica mu Strasbourg, ku France, capingwile umulandu uo na bonse basuminisheko. Abawinine uyu mulandu ni Nte sha kwa Yehova lintu batwele icalo ca Russian Federation ku cilye. Icilye capingwile ukuti Inte sha kwa Yehova shifwile ukulapepa ukwabula ukubapumfyanya no kuti ifilye tafifwile ukuba no lufyengo kuli bena. Lelo lekeni tulande pa calengele Inte sha kwa Yehova ukutwala umulandu kuli ici cilye.

Mu cilonganino ca Nte sha kwa Yehova icaba mu musumba wa Chelyabinsk, ku Russia, mwafula sana bankomamatwi. Aba muli ici cilonganino balelonganina pa koleji. Pa nshiku ya Mulungu pa 16 April, mu 2000, umukalamba wa kabungwe kalolekesha pa nsambu sha bantu aka regional Human Rights Commission na bakalamba ba bakapokola babili, e lyo na kapokola uushifwala uniformu bacilime ukulongana kwa ba muli ici cilonganino. Umulandu no kupata Inte sha kwa Yehova, umukalamba wa kabungwe kalolekesha pa nsambu sha bantu atile baleke ukulongana apo pene fye kabili abapeele imilandu ya bufi ukuti balelongana ukwabula ukupoka ulusa. Lyena ukutula pa May 1, mu 2000, balibaleseshe ukulalonganina pa koleji.

Inte sha kwa Yehova shatwele umulandu ku mubomfi wa buteko uwa mu Chelyabinsk uutwala bashimilandu ku cilye, lelo tacitilepo nangu cimo. Ulupapulo lwa mafunde ya mu calo ca Russia no lupapulo lulanda pa nsambu no buntungwa bwa bantu ulwa Convention for the Protection of Human Rights and Fundamental Freedoms fyalanda ukuti abantu bonse balikwata ubuntungwa bwa kupepa no kwangalila capamo. E co baNte batwele umulandu ku cilye ca mu Chelyabinsk lelo tacacitilepo nangu cimo. Lyena baishiletwala umulandu ku cilye cimbi icikalambako ica regional court lelo na co cine tacacitilepo icili conse. Ilyo ifi fyalecitika ninshi kale kale icilye cikalamba ica mu Russia calisosa ukuti “ukulingana ne funde lilanda pa buntungwa bwa mipepele ya mu Russia, amashiwi ya kuti ‘ukwabula ukupumfyanya’ yapilibula ukuti abalelongana pa cikuulwa [ico bapepelapo] tabalekabila ukupoka ulusa ku buteko.”

Pa 17 December, mu 2001, uyu mulandu bautwele ku cilye ca European Court of Human Rights. Ukulubulula kwaliko pa September 9, mu 2004. Ifi e fyo ici cilye capingwile:

“Icilye cisangile ukuti abaletele uno mulandu ku cilye balibekele pa nsambu shabo isha kulapepa ukwabula ukubapumfyanya pantu pa 16 April mu 2000, ababomfi ba mu buteko bacilime ukulongana ilyo inshita ya kupwisha ukulongana ishilafika.”

“Ifunde talyasuminishe ababomfi ba buteko ukuyapumfyanya ukulongana pa cifulo ico basonkela ukulingana ne funde.”

“[Cino Cilye] cisangile ukuti ifunde ilyo icilye ca Russian Supreme Court cashika ililanda pa kulongana pamo ukwa bamapepo litila tabafwile ukupoka ulusa nelyo ukwishibisha aba mu buteko.”

“Kanshi umukalamba wa kabungwe kalolekesha pa nsambu sha bantu na banankwe balipulile mwi funde lyaba mu cipande 9 [icilanda pa butungwa bwa mipepele] ica mu lupapulo lwa Convention for the Protection of Human Rights and Fundamental Freedoms lintu bapumfyenye ukulongana kwa aba bantu ukwaliko pa 16 April mu 2000.”

“Cino cilye cisangile ukuti ifilye fya mu Russia fyalifililwe . . . ukumfwa uyu mulandu ku mbali shonse shibili. Kanshi . . . fyalipulile mwi funde lyaba mu cipande calenga 6 [icitila onse alikwata insambu sha kulubulula] ica lupapulo lwa Convention for the Protection of Human Rights and Fundamental Freedoms.”

Inte sha kwa Yehova baletasha sana kuli Lesa pa kubafwa ukuwina umulandu mu cilye ca European Court of Human Rights. (Amalumbo 98:1) Bushe ni Nte sha kwa Yehova fye e shali no kunonkelamo mu fyo icilye capingwile? Umukalamba wa kabungwe ka Institute on Religion and Public Policy Joseph K. Grieboski atile: “Ubupingushi bwa ici cilye nabucindama sana pantu bukalenga imipepele yonse mu Europe ukukwata ubuntungwa. Ifyo icilye cipingwile fikalenga imipepele yaba mu fyalo finakila icilye ca European Court of Human Rights ukukwata sana ubutungwa bwa kupepa.”