Amepusho Ukufuma ku Babelenga

Bushe amashiwi yaba pa Amapinda 22:6 yalola mu kuti abana ba Bena Kristu nga babakansha bwino, tabakaleke ukupepa Yehova nga bakula?

Pa Amapinda 22:6 patila: “Kanshisho mwaice umo afwile ukubela, ilyo akakota takafumemo.” Akamuti ilyo kali akanono nga nakakongama, na lintu kakakula ukuba icimuti, ninshi e fyo ne cimuti cikaba ifyo fine. E fyo na bana bene baba, nga babafunda bwino ifya kwa Lesa ku bwaice, ilingi line balatwalilila ukubombela Yehova na lintu bakula. Nge fyo umufyashi onse aishiba, pa kufunda umwana, abafyashi bafwile ukubombesha pa nshita ntali. Pa kulenga abana babo ukuba abasambi ba kwa Kristu, abafyashi bafwile ukubikako sana amano ku kufunda abana babo, ukubakonkomesha, ukubakoselesha no kubasalapula, kabili balingile no kulacita filya fine bafunda abana. Bafwile ukutwalilila pa myaka iingi ukufunda abana cikuuku cikuuku kabili ukwabula ukutendwa.

Nomba bushe ici calola mu kuti umwana nga aleka ukupepa Yehova, ninshi abafyashi tabamufundile bwino? Limo e fyo cingaba, nakalimo abafyashi tabafikilepo ukufunda abana babo mu kusalapula no kukonkomesha kwa kwa Yehova. (Abena Efese 6:4) Na lyo line, amashiwi yaba pali ili lembo tayapilibula ukuti abana nga babakansha bwino ninshi nangu cibe shani bakaba aba cishinka kuli Lesa. Abafyashi te kuti balenge abana babo ukuba ifyo bena balefwaya. Abana na bo, nga filya fine abakalamba baba, balikwata insambu ya kuisalila ifya kucita, kabili mu kulekelesha, abene e bafwile ukusala ifya kucita mu mikalile. (Amalango 30:15, 16, 19) Nangu abafyashi bengabombesha shani ukufunda abana, abana bamo balaleka ukupepa Lesa, nga filya fine na Solomone acitile, uwalembele ne ci cine cikomo tulelandapo. Na bana baume bamo aba kwa Yehova na bo balipondweke.

Kanshi, ili lembo talipilibula ukuti abana bonse ‘tabakafume’ mu nshila ya kwa Lesa, lelo lyalola mu kutila abana abengi abo bakansha bwino tabaleka ukupepa Lesa nangu bakula. Awe mwandini ili lembo lilakoselesha sana abafyashi! Ukwishiba ukuti mu kubombesha ukukansha abana babo ukulacita ifyo Yehova afwaya mulafuma ifisuma, kulingile ukukoselesha abafyashi. Apo umulimo wabo walicindama kabili abana balakonkelesha sana ifyo abafyashi balecita, abafyashi bafwile ukubika sana amano ku mulimo wabo uwa kufunda abana.—Amalango 6:6, 7.

Na lintu abana baleka ukupepa Yehova, abafyashi ababikile sana amano ku kubakansha, kuti bakwata isubilo lya kuti abana babo bakakutuluka no kutampa ukupepa na kabili. Icebo ca kwa Lesa ico abafyashi basambilisha abana ca maka sana, kabili abana tabalaba bwangu ifyo abafyashi babo babafundile.—Amalumbo 19:7.