Cinshi Ububifi Bufulile Ifi mu Calo?

Kalume atoola aka kwangasha mwi bala ako alemona ati kasuma sana—awe kanshi kapata—kapuulika kamonaula amenso no kumulemanika. Kumbi nako, namayo apoosa akanya pa cishala cabela mu mbali ya musebo. Umuntu umbi na o uo batamfishe incito abuula imfuti no kuya uko alebomba kale kabili aipaya bonse abo asanga, no mwine aipaya. Umwaume umbi na o uo bacindika sana, alolungana no twana utunono.

KU CA bulanda, shino nshiku ifyabipa fya musango yu nafifula sana. Icabipa sana ca kuti, aya malyashi yalomfwika kwati tayabipile sana nga twaumfwa no kuti ku fyalo fimbi kuli inkondo ya kufwaya ukulofya umutundu umbi, no kusansa kwa tupondo. Ulupapulo lumo ulo balembele mu 1995 lwatile: “Ino myaka yaba 1900 e mwacitika ifintu ifishaibipila, ica kuti yaba fye kwati myaka ya kwa Satana. Muli iyi myaka emo abantu bapanga sana ifyanso fya kwipailako abantu banabo kabili balipaya abantu abengi nga nshi. Ne cilenga baleipaya abanabo ni pa mulandu wa kupusana umutundu, ukupusana uko bapepa nelyo pa mulandu wa kutila abantu bambi balikwata icuma.”

Te apo peka iyo, abantu na kabili balekowesha umwela ne calo, no konaula ifyo Lesa apanga, kabili baleipaya ne fiteekwa ica kuti ifingi fili fye mupepi no kupwa. Bushe abantu kuti bapwisha ifibi fyonse ifi filecitika no kulenga icalo ukuwama no kuba no mutende? Nelyo bushe ukwesha ukuwamya ifintu mu calo kuti caba kwati kupyangila amabula ukulefuma umwela? Kafundisha umo uwa pa yuniversiti uwalanda sana pa bubifi ubwaba mu calo, atile: “Ndafwaya sana ukucitapo fimo, ndafwaya ukuwamya ifintu mu calo. Nomba ifintu mu calo tafimoneka ukuti filewama.” Limbi na imwe e fyo mumona ukuti ifintu tafilewama.

Ifintu mu calo fyaba fye kwati ni filya ciba ubwato nga buli pali bemba apali amabimbi yakalamba nga nshi kabili cila bushiku amabimbi yaleya yaleluminako. Nangu ca kutila bonse abali mu bwato tabalefwaya ukulola uko amabimbi yalebasunkila, nabafilwa ukupindulula ubwato ukuti buye uko balefwaya. Awe mukwai ubwato bwena bulesendwa fye na mabimbi no kulaya fye iciyeyeye, no kwiminina nakalya.

Kwena cimo icalenga ububifi ukufula sana pano calo mulandu wa kuti abantu babembu. (Abena Roma 3:23) Na lyo line, apo ububifi bufikile, ifyo bufulile sana, ne fyo buleya fye pa ntanshi, filetulanga fye ukutila kwena te bantu fye balenga ukuti ifyabipa filecitika. Bushe nalimo kwaliba umubifi uushimoneka lelo uwa maka sana uusonga abantu ukucita ifyabipa? Nga e ko aba, ninshi nani, kabili kuti twaicingilila shani kuli uyu mubifi? Icipande cikonkelepo calayasuka aya mepusho yonse.

[Abatusuminishe Ukubomfya Icikope pe bula 3]

© Heldur Netocny/Panos Pictures