Amepusho Ukufuma ku Babelenga

Bushe insoka yalandile na Efa yalikwete amolu?

Pa Ukutendeka 3:14, Yehova Lesa alandile ku nsoka iyabepele Efa mwi bala lya Edene. Atile: “Pantu wacite ci, Watiipwa ni we pa fitekwa fyonse, kabili pa fya mweo fyonse ifya mpanga; wakulaendela pe fumo lyobe, no kulalyo lukungu inshiku shonse sha mweo obe.” Baibolo taisosa mu kulungatika ukuti ilya nsoka Satana abomfeshe pa kubepa Efa yalikwete amolu kale. Nangu cingati amashiwi ya pa Ukutendeka 3:14 kuti yalenga bamo ukutontonkanye fyo, tatufwile ukusondwelela bwangu bwangu ukuti ilyo insoka bashilaitiipa yalikwete amolu. Mulandu nshi tushilingile ukusondwelela ifyo?

Uo Yehova alepingula ni Satana, umupashi uushimoneka uwabomfeshe insoka. Baibolo ilondolola Satana ukuti ni “wishi wa bufi” kabili “icisoka ca pa kutendeka.” Aya mashina yonse yafwile yalosha kuli filya Satana abomfeshe insoka iyo Efa alemona pa kuti amubeleleka ukupondokela Lesa.—Yohane 8:44; Ukusokolola 20:2.

Lesa e wapangile insoka, kabili ilyo Satana aibomfeshe pa kubepa Efa ninshi Adamu afwile ali-inika kale ishina. Insoka tayakwata amano nga bantu, kanshi teti tuipeele umulandu ukuti e yabepele Efa. Tayaishibe no kwishiba ukuti Satana aleibomfya kabili te kuti ishibe no bupingushi bwa kwa Lesa kuli balya bacipondoka.

Nomba mulandu nshi Lesa alandile ukuti insoka yalisuulwa? Ifyo fye insoka yaba, filya yendela pe fumo na filya ifumya akalulimi kwati ilefwaya ukumyanga ulukungu, filalangilila bwino sana ifyo Satana asuulwa. Kale ilyo Satana ali malaika wa kwa Lesa, alikwete icifulo icikalamba nga nshi, nomba balimupoosa ukufuma mu muulu kabili ekala umwasuulwa umo Baibolo ita ukuti Tartari.—2 Petro 2:4.

Na kabili, pali iyi yine inshita Satana asuulwa ‘akalasa ubufyashi’ bwa kwa Lesa “ku citende” kwati ni filya insoka isuma umuntu ku citende. (Ukutendeka 3:15) Yesu, uo abantu ba kwa Satana bacushishe, e bufyashi bwa kubalilapo ubwa kwa Lesa. Lyena Kristu na Bena Kristu basubwa abakabuukila ku muulu bakashonaula umutwe wa cisoka ca mampalanya umupwilapo. (Abena Roma 16:20) Kanshi filya Lesa atiipile insoka filanga ukuti alisuula Satana Kaseebanya, “icisoka ca pa kubalilapo” icishimoneka, kabili akamonaula ku ciyayaya.