Umulimo Ukalamba Uo Ernst Glück Abombele

NAPAPITA imyaka 300 ukutula apo Ernst Glück abombele umulimo uukalamba uo abantu abengi bashakwete maka ya kubomba. Apilibwile Baibolo mu lulimi ulo asambilile fye.

Glück afyelwe mu 1654 mu Germany, mwi tauni linono ilya Wettin, mupepi na ku Halle. Bawishi bali bapasta mwi calici lya baLutheran, kabili ulupwa lwakwe lwalitemenwe sana ukupepa. Ici calengele Ernst ukusambilila ifya kwa Lesa. Apwishishe amasambililo yakwe mu Germany ninshi ali ne myaka 21, kabili aileikala mu calo citwa Latvia. Muli ilya myaka abantu abengi tabaleya ku masukulu, kabili tabakwete ifitabo ifingi mu ndimi sha cikaya. Glück alembele ukuti: “Ilyo nafikile muli cino calo ninshi ncili fye umulumendo, kabili ubwafya nasangile bwa kuti aba mwi calici lya bena Latvia tabakwete Baibolo . . . Ici calengele ndape kuli Lesa ukuti nalasambilila ulu lulimi no kulwishiba bwino.” Awe e fyo aipeeleshe ukupilibula Baibolo mu lulimi lwa bena Latvia.

Aipekanya Ukutendeka Ukupilibula

Pali ilya nshita incende Glück aleikalamo baleita ukuti Livonia kabili abena Sweden e baleteka ilya ncende. Umulashi uwaleimininako imfumu ya ku Sweden muli ilya ncende ali ni Johannes Fischer. Fischer alefwaya sana abantu ba mu calo ukulasambilila kabili alefwaya no kukwata icuma. Glück alandile na Fischer pa fyo alefwaya ukupilibula Baibolo mu lulimi lwa bena Latvia. Apo Fischer alikwete icikuulwa ca kupulintilamo ifitabo mu musumba wa Riga, ukupulinta Baibolo mu lulimi lwa bena Latvia kwali no kulenga abantu ukusambilila ifya kulemba ululimi lwabo, kabili ali no kusangamo icibwesha. E ico, Fischer alombele Imfumu Charles XI iya ku Sweden ukubasuminisha ukupilibula Baibolo. Imfumu yalisuminishe kabili yali-ipeelesha ukulamupeela  indalama sha kubomfya ilyo balepilibula. Icipangano Imfumu yasaine pa August 31, 1618, calengele umulimo wa kupilibula ukutendeka.

Ilyo ifi fyonse fyalecitika, Glück ninshi aleipekanishisha ukubomba umulimo wa kupilibula. Apo ali mwina Germany, nalimo alafwaya nga alebomfya Baibolo ya kwa Martin Luther pa kupilibula. Lelo Glück alefwaya ukupilibula Baibolo iisuma ukufumya mu ciHebere na mu ciGriki. Apo taishibe sana indimi isho babomfeshe pa kulemba Baibolo, Glück aile ku Hamburg, mu Germany ku kusambilila iciHebere ne ciGriki. Ilyo ali kulya, cimoneka kwati shimapepo uwafumine ku Livonia Jānis Reiters alimusambilishe ululimi lwa bena Latvia ne ciGriki ico balembelemo Baibolo.

Imyaka ya Kubomba ne Myaka ya Kulolela

Ilyo Glück apwishishe ukusambilila ululimi mu 1680, abwelele ku Latvia kabili aileba pasta. Tapakokwele atampile ukupilibula Baibolo. Mu 1683, balimusontele ukuba pasta pa minshoni iikalamba iya mu Alūksne, uko abantu batila eko apilibwilile Baibolo.

Pali ilya nshita, ululimi lwa bena Latvia talwakwete amashiwi aya kubomfya pa kulanda pa mashiwi na masambilisho yamo aya mu Baibolo. Ici calengele Glück ukubomfya amashiwi yamo aya ciGerman pa kupilibula. Lelo alibombeshe pa kupilibwila Icebo ca kwa Lesa mu lulimi lwa bena Latvia ica kuti na bakalapashi ba uyu mulimo batila alipilibula bwino sana Baibolo. Glück apangile na mashiwi ayapya, kabili abena Latvia balabomfya amashiwi ayengi pa mashiwi apangile. Pali aya paba amashiwi pamo nga “ica kumwenako,” “umutebeto,” “ipaka,” “ukulengula,” no “kushinina.”

Johannes Fischer lyonse alelembela imfumu ya ku Sweden ifyo umulimo walelunduluka. Kabili bakalata batila Glück apwishishe ukupilibula Amalembo ya ciGriki mu 1683. Apwishishe ukupilibula Baibolo yonse mu 1689. Kanshi abombele uyu umulimo uukalamba mu myaka 8. * Calisendele inshita pa kuti basabankenye Baibolo apilibwile, lelo mu 1694, lintu ubuteko bwasuminishe, basukile basabankanya Baibolo mu lulimi lwa bena Latvia.

 Abalemba pa fyacitike kale balatwishika nampo nga Glück apilibwile Baibolo pa lwakwe fye. Kwena afwile alemonako na muli Baibolo yapilibwile Luther kabili alibulile ne fiputulwa fimo ifya Baibolo ifyo bapilibwile kale mu lulimi lwa bena Latvia no kufisansha kuli Baibolo apilibwile. Lelo ifi fiputulwa fyali fye ifinono nga nshi. Bushe kwaliko bambi abamwafwile ukupilibula? Kwena Glück alikwete uwalemwafwa ilyo alepilibula Baibolo na bambi abalebelengamo pa kuti bashinikishe ukuti alepilibula fye bwino. Lelo cimoneka kwati aba bantu bena tabalepilibulako. Kanshi Glück afwile apilibwile Baibolo eka fye.

Baibolo iyo Glück apilibwile yalicindeme sana pantu yalyafwile abena Latvia ukwishiba ifya kulemba ululimi lwabo. Lelo icacindeme sana ca kuti abena Latvia balikwete Baibolo mu lulimi lwabo kabili yali no kubafwa ukwishiba icine icingabalenga ukuba no mweo. Abena Latvia tabalaba ifyo Ernst Glück abacitile. Ukucila pa myaka 300, abekashi ba mu Alūksne balisungilila ifimuti fya mioke fibili ifyo beta ukuti Glika ozoli nelyo imioke ya kwa Glück. Alimbile iyi miti pa kuti bakaleibukishishapo Baibolo apilibwile. Na kabili, mu Alūksne mwaliba icikuulwa icinono umo basungila ifya kale umwaba amaBaibolo yalekanalekana kabili pali aya paba na Baibolo Glück apilibwile iyo babalilepo ukupulinta. Na pa cishipa ce tauni lya Alūksne napo paliba Baibolo kabili balembapo no kuti 1689, umwaka Glück apwishishe ukupilibula Baibolo.

Umulimo Abombele pa Numa

Ilyo Glück afikile fye mu Russia atampile ukusambilila ululimi lwa bena Russia. Mu 1699 alembele ukuti alitampile ukucita na cimbi ico alefwaisha, e kuti ukupilibwila Baibolo mu lulimi lwa bena Russia. Muli kalata iyo alembele mu 1702, atile alitendeke ukulembulula Baibolo ya bena Latvia. Lelo ifintu fyalyalwike kabili alifililwe ukutwalilila ukupilibula Baibolo. Nangu ca kuti mu Latvia mwali umutende pa myaka iingi, mu 1702 abena Russia na bena Sweden batendeke ukulwila ici calo kabili abena Russia balicimfishe no kupoka umusumba wa Alūksne. Glück no lupwa lwakwe balibasendele ku Russia. * Muli iyi nshita ya nkondo Glück alilufishe ama manyuskripiti ya Baibolo ipya iya mu lulimi lwa bena Latvia na Baibolo apilibwile mu lulimi lwa bena Russia. Mu 1705, Glück alifwile, afwilile mu Moscow.

Calibipile sana ilyo Glück alufishe amaBaibolo ayapya ayo apilibwile mu lulimi lwa bena Latvia no lwa bena Russia. Na lyo line, ukufika fye na pali lelo, bonse ababelenga Baibolo mu lulimi lwa bena Latvia balanonkelamo muli Baibolo Glück apilibwile.

Ernst Glück aba pa bantu abengi ababomba imilimo iikalamba nga nshi iya kupilibula Baibolo mu ndimi sha cikaya. Ici calenga abantu bonse babe ne shuko lya kubelenga Icebo ca kwa Lesa no kwishibe cine pali Lesa. Kanshi Yehova alelenga abantu bonse ukumwishiba ukupitila mu maBaibolo ayapilibulwa mu ndimi ukucila pali 2,000.

[Amafutunoti]

[Icikope pe bula 13]

Baibolo Glück apilibwile

[Icikope pe bula 14]

Inte sha kwa Yehova balasambilisha abantu Baibolo mu musumba uo Glück alepilibwilamo Baibolo