Ifyacindama Ifyo Mwingafunda Abana

GLADYS abomba pa sukulu ku Mendoza, ku calo ca Argentina. Bushiku bumo ilyo alepita pa nse ye kalasi limo ifi amwene kafundisha alebelengela abana be sukulu ba gredi 4 Icitabo Candi ca Malyashi ya mu Baibolo. * Gladys aebele ulya kafundisha ukuti ni Nte ya kwa Yehova kabili amulangile ne fyo engacita pa kuti abana be sukulu baleumfwa sana ifyaba mu citabo. Kafundisha alitemenwe sana ifyalondolwele Gladys, kabili alefwaya no kuti cilya citabo na co cikabe pa fitabo fya kusambilishamo abana be sukulu. Nomba alingile ukupoka insambu ku bakalamba ba pa sukulu. Alitemenwe sana ilyo bamusuminishe.

Ilyo papitile inshita, ubushiku ubo basalile ukuti e bwa kukoselesha abana ba masukulu ukubelenga ifitabo bwalifikile, kabili uyu kafundisha aebele abana ba mwi kalasi lyakwe ukubelengela abana be sukulu banabo muli ici ciine citabo. Pa mulandu wa kuti ifyacitike pali iyi programu fyaliweme sana, uyu kafundisha bamwebele ukuti akalande fimo pali programu ya pa TV. Ilyo batendeke ukulanda pa mibele ya bana be sukulu, uwaleipusha ulya kafundisha muli programu ya pa TV atile, “Mucita shani pa kuti abana be sukulu mu kalasi lyenu babe ne mibele isuma?” Kafundisha alondolwele ukuti abafunda ifyaba mu Icitabo Candi ca Malyashi ya mu Baibolo. Alandile ukuti nangu ca kutila tafunda ifya mapepo mu kalasi, alabomfya ici citabo ukufunda abana be sukulu imibele isuma pamo nga ukuba no mucinshi, ukulekelela, ukwikatana, ukumfwana, ukuba ne cumfwila e lyo no kutemwana. Bonse balisumine ukuti calicindama ukufunda abana iyi mibele isuma.

Bushe kuti mwatemwa ukufunda abana benu imibele isuma nge yi? Inte sha kwa Yehova kuti bamupeelako Icitabo Candi ca Malyashi ya mu Baibolo. Ala ici citabo cisuma sana!

[Futunoti]