Ukusambilila Ifya mu Baibolo Kulakosha Icitetekelo

UWALANDIILEKO abasambi banankwe abapwishishe Isukulu lya Gileadi Ilya Watchtower ilyalenga 122 atile: “Ala lishuko sana ukupoosa imyeshi isano ukusambilila fye Icebo ca kwa Kabumba wesu no kusambilila ifyo atontonkanya pa fintu!” Abapwishishe isukulu pa March 10, 2007, abali 56, tabakatale abalaba ubu bushiku pantu e lyo babatumine ukuya ku fyalo 26 ku kubomba umulimo wa bumishonari.

Ilyo fye munyinefwe Theodore Jaracz, uwaba mwi Bumba Litungulula asengele bonse abasangilwe kuli uku kulongana abali 6,205, alandile ati: “Natwishiba ukuti pali kuno kulongana, bucibusa bwenu na Lesa bwalakosa sana e lyo icitetekelo cenu na co cine calakosa sana.” Lyena atendeke ukwita bakalanda ba malyashi yane abalandile ifyebo fya mu Baibolo ifyali no kukosha abasambi no kubafunda ifyo bengabomba bwino umulimo wa bumishonari.

Babakoseleshe Ukulakosha Icitetekelo ca Bantu Bambi

Munyinefwe Leon Weaver, uwaba mu Komiti ya Musambo ku United States, alandile ilyashi lyaleti “Mwinenuka mu Kucita Icawama.” Aebele abasambi ukuti balibomba kale imyaka nalimo 13 mu mulimo wa nshita yonse uwa kusambilisha abantu ifya mu Baibolo ifingabaafwa ukuba ne citetekelo. Atile: “Uyu mulimo usuma pantu ulapususha abantu, kabili ulacindika Yehova, Shifwe wa ku muulu.” Munyinefwe Weaver lyena akoseleshe abasambi ukuti tabafwile ukuleka ‘ukubyala ku mupashi’ kabili tabafwile no ‘kunenuka mu kucita icawama.’—Abena Galatia 6:8, 9.

Munyinefwe David Splane, uwaba mwi Bumba Litungulula, alifundile bwino sana abasambi ilyo alandile ilyashi ilyaleti “Balilenipo Ukucita Icisuma.” Munyinefwe Splane akoseleshe bamishonari bapya ukubomba bwino ukufuma lilya line batendeka fye umulimo. Abebele ukuti ifingabafwa ukucite fyo ni fi: “Temweni umulimo wenu. Mwila-angufyanya ukusondwelela ifintu. Mwilaifinya. Mwilalengulula bambi. Muleiceefya, kabili mulecindika bamunyinenwe abo mukasanga uko muleya.” Lyena alandile no kuti: “Ilyo mukekila fye mu ndeke, mukatampe no kubomba imilimo isuma, kabili tulemulombela kuli Yehova ukuti amupaale ilyo mwakulaya ‘mulebila imbila nsuma’ ku bantu.”—Esaya 52:7.

Kafundisha we sukulu lya Gileadi Munyinefwe Lawrence Bowen, alandile ilyashi ilyaleti “Ifintu Tuli no Kupyana Ifyo Twashininkisha Ukuti Fikabako.” Munyinefwe Bowen aibukisheko abasambi ukuti icalengele ukuti ukuteyanya kutendeke Isukulu lya Gileadi lilya line kwali ne Nkondo ya Calo iya Bubili, ni co balicetekele ukuti amasesemo  yalembwa mu Cebo ca kwa Yehova yali no kufikilishiwa. (AbaHebere 11:1; Ukusokolola 17:8) Ukutula fye lilya line, Isukulu lyalikosha icitetekelo ca basambi abengi. Icitetekelo cakosa cilalenga abasambi abalepwisha isukulu ukuti babe abacincila ilyo baleya mu kubila imbila ya cine.

Munyinefwe Mark Noumair, kafundisha na umbi uwe sukulu lya Gileadi, alandile ilyashi lyaleti “Mwanjibukisha Umuntu Umo Uo Mwapalana Nankwe.” Alandile pali kasesema Elisha uwali ne citetekelo cakosa kabili uwali uwashipa mu mulimo wakwe. Munyinefwe Noumair alandile pe lembo lya 1 Ishamfumu 19:21, kabili atile: “Elisha alyalwile imikalile yakwe, abikile amano ku kucita ukufwaya kwa kwa Yehova ukucila ukubika amano ku fyo umwine alefwaya.” Atashishe abalepwisha  isukulu pa kuba nga Elisha kabili abakoseleshe ukuti uko bakaya mu kubombela, bakatwalilile ukupashanya Elisha.

Umuntu wa Citetekelo Alashipa pa Kulanda

Abapwishishe isukulu balekosha icitetekelo cabo ilyo balesambilila ifya bumishonari, lelo baleya na mu kubila imbila nsuma ku bantu pa mpela ya mulungu. Ilyo balebomba mwi bala, kwali ne fisuma fimo ifyacitike, kabili mu lyashi lya kwa Munyinefwe Wallace Liverance kafundisha na umbi uwe sukulu lya Gileadi, e mo abasambi bashimike no kulangilila fimo fimo ifyacitike ilyo baleshimikila. Ilyashi lya kwa munyinefwe Liverance lyaleti, “Twalitetekela, Kabili E co Tulandila,” kabili muli ili lyashi alandile pa fyebo fya mutumwa Paulo ifyaba pali 2 Abena Korinti 4:13.

Pa numa ya ili lyashi, bamunyinefwe babili, Daniel Barnes na Charles Woody, abekala pa Bethel, baipwishe bamishonari ababa mwi bala pali ino nshita na bali bamishonari kale. Aba bantu balandile sana pa fyo Yehova asakamana abamubombela mu cishinka ne fyo abapaala. (Amapinda 10:22; 1 Petro 5:7) Mishonari umo umwaume alandile ati: “Ine no mwina mwandi, pa mulandu wa fyo twasambilile mu sukulu lya Gileadi, twali-imwenene na menso ifyo Yehova asakamana abantu bakwe. Ala icitetekelo cesu calikosele icine cine. Icitetekelo calicindama pantu ababomfi ba kwa Lesa bonse fye apo bapela, kumo na bamishonari bene, bali no kweshiwa kabili bali no kukwata amafya na masakamika.”

Twalilileni Ukulundulula Amasambililo ya mu Baibolo Ayakosha Icitetekelo

Ilyo programu yaleya ku kusondwelela, Munyinefwe Samuel Herd uwaba mwi Bumba Litungulula, alandile ilyashi ilikalamba kabili ilyalinga sana ilyaleti “Twalilileni Ukukoselesha Bamunyinenwe.” Bushe ifyo abapwishishe isukulu lya Gileadi basambilile fyali no kubaafwa shani? Munyinefwe Herd atile: “Ifyo musambilile fikamwafwa ukwishiba ifyo mwingabomfya ululimi lwenu ku kulumbanya Yehova, ukusambilisha abantu icine abo mukasanga uko mukaya mu kubombela, e lyo no kukosha icitetekelo ca bamunyinenwe.” Nomba acinkwileko abasambi ukuti ululimi lwine ulu kuti lwalanda ne fyabipa. (Amapinda 18:21; Yakobo 3:8-10) Akoseleshe abasambi ukulapashanya Yesu mu fyo ena alebomfya ululimi. Bushiku bumo ilyo abasambi baumfwile ifyo Yesu alandile batile: “Bushe imitima yesu tayacilabilima . . . ilyo acilatukupukwila Amalembo?” (Luka 24:32) Munyinefwe Herd atile: “Nga ca kuti ifyo mulelanda kuli bambi fili bwino, ninshi muli no kukoselesha bamunyinenwe abo mukasanga uko muleya.”

Icakonkelepo, abapwishishe isukulu babapeele ifipepala fya ku sukulu ifiitwa ati amadiploma. E lyo umusambi umo abelengele kalata ya kutasha pa masambililo ya ku Gileadi. Iyi kalata yatile: “Icikalamba ico tulefwaya sana ukucita pali ino nshita, kubomfya ifyo tusambilile pa kuti tulebomba umulimo wesu uwa bumishonari mu cishinka. Apo natuipeelesha ukuya fye na ku mpela ya calo, tulesubila ukuti ifyo tuli no kubomba fili no kulenga Kasambilisha wesu Uwakulisha Yehova Lesa ukutashiwa icine cine.” Abalongene pa kumfwa ifi, bonse baombele amakuuku. Ca cine, uku kulongana kwa bapwishishe isukulu kwalikoseshe icitetekelo ca basangilweko bonse.

[Amashiwi pe bula 17]

“Nga ca kuti ifyo mulelanda kuli bambi fili bwino, ninshi muli no kukoselesha bamunyinenwe abo mukasanga uko muleya.”

[Akabokoshi pe bula 15]

IFIPENDO FYA BALI MU KALASI

Bafumine mu fyalo: 9

Bakayabombela mu fyalo: 26

Abasambi bonse pamo bali: 56

Imyaka ya kufyalwa nga kwakanya pali umo: 33.4

Imyaka baba mu cine nga kwakanya pali umo: 16.8

Imyaka babomba mu mulimo wa nshita yonse nga kwakanya pali umo: 13

[Icikope pe bula 16]

Abapwishishe Isukulu lya Gileadi Ilyalenga 122

Umutande uli pe samba, ukupenda kutampiile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.