Barsilai Umwaume Uwayishibe Bwino

‘CINSHI ico ningabela uwa kumucusha?’ Barsilai ali ne myaka 80 ilyo asosele aya mashiwi ku Mfumu Davidi iya mu Israele. Baibolo itila uyu mwaume ali “muntu wa fyuma nga nshi.” (2 Samwele 19:32, 35) Barsilai aleikala mu Gileadi, icalo ca mpili icali ku kabanga ka mumana wa Yordani.—2 Samwele 17:27; 19:31.

Cinshi calengele Barsilai asose yalya mashiwi kuli Davidi? Kabili mulandu nshi asose amashiwi ya musango yu?

Ukupondokela Imfumu

Davidi ali mu bwafya pantu umwana wakwe Abishalomu “aibile imitima ya bena Israele” no kuibika pa bufumu. Calishibikwe bwino bwino ukuti Abishalomu ali no kwipaya onse uwali ne cishinka kuli wishi. E co Davidi na babomfi bakwe balifulumwike mu Yerusalemu. (2 Samwele 15:6, 13, 14) Ilyo Davidi afikile mu Mahanaimu, umusumba uwali ku kabanga ka Yordani, Barsilai alimwafwilishe.

Barsilai, Shobi, na Makiri, bapeele Davidi ifintu ifingi nga nshi. Aba baume ba cishinka batatu balishibe bwino ifyo Davidi na babomfi bakwe balepitamo pantu batile: “Abantu bali ne nsala, kabili nabapomponteka, kabili ba cilaka, mu matololo.” Barsilai, Shobi, na Makiri bacitile apapelele amaka yabo no kupeela Davidi na babomfi bakwe  amasanshi, ing’anu, barle, ubuunga bwa ng’anu, imbuto shasalulwa, cilemba, ilanda, ubuci, bata, impaanga, na fimbipo.—2 Samwele 17:27-29.

Ukwafwilisha Davidi kwali kuibika mu kapoosa mweo. Nalimo Abishalomu ali no kwipaya onse uwaletungilila imfumu. Kanshi ukuba ne cishinka kuli Davidi kwalelanga ukuti Barsilai ali mwaume washipa.

Ifintu Fyayaluka

Tapakokwele, abashilika ba kwa Abishalomu balilwile na baume ba kwa Davidi. Ubu bulwi bwabelele mu mutengo wa mu Efraimu, nalimo mupepi na Mahanaimu. Abashilika ba kwa Abishalomu balibacimfishe, “kabili abaipaiwe bulya bushiku bali abengi.” Nangu cingati Abishalomu alifulumwike, tapakokwele balimwipeye.—2 Samwele 18:7-15.

Na kabili Davidi aishileba imfumu mu Israele ukwabula uwa kumulwisha. Abantu bakwe balilekele ukulubanta. Kabili bucishinka bwabo kuli Davidi bwalengele abacetekele no kulabatasha.

Ilyo inshita yafikile iya kuti Davidi abwelelemo ku Yerusalemu, “Barsilai umwina Gileadi atentemwike ukufuma ku Rogelimu, apitile ne mfumu ku kuishindika ku Yordani.” Pali bulya bushiku, Davidi aebele Barsilai umukoloci ukuti: “Twabuke nobe, no kuleka [ndekuliisha, NW] ku mwandi ku Yerusalemu.”—2 Samwele 19:15, 31, 33.

Ukwabula no kutwishika, Davidi alitashishe sana pa fyo Barsilai amwafwile. Ici tacalepilibula ukuti imfumu yalefwaya fye ukumulambula pa fyo aicitile. Barsilai ali ne fyuma ica kuti talekabila ubwafwilisho bwa musango yo. Davidi afwile alefwaya ulya mukoloci aleikala kwi sano pa kuti alemupandako amano pantu ali ne mibele iisuma nga nshi. E lyo kuli Barsilai, ukulaikala kwi sano kwali no kuba lishuko ilikalamba sana pantu ali no kuba icibusa ca mfumu.

Umwaume Uwafuuka Kabili Uwayishibe Bwino

Ilyo Imfumu Davidi yamwipwishe ukuya nayo ku Yerusalemu, Barsilai ayaswike ati: “Nga kanshi ni shinga inshiku sha myaka ya mweo wandi, pa kuti ine nje pamo ne mfumu ku Yerusalemu? Ine lelo ndi ne myaka amakumi cinekonsekonse. Bushe ningeshibe cisuma ne cibi? Bushe umubomfi wenu engasonde ico ndelya napamo ico ndenwa? Bushe ncili ndeumfwa amashiwi ya ng’omba ishaume atemwa ishanakashi?” (2 Samwele 19:34, 35) E fyo Barsilai mucinshi mucinshi akeene ukuya na Davidi kabili akeene ishuko ilisuma nga nshi. Mulandu nshi akaanine?

Cimo icalengele Barsilai akaane ni co alikulile sana kabili umulandu no bukalamba takwete maka ya kubomba imilimo imo. Nalimo Barsilai aletontonkanya ukuti tali na kwikala inshiku ishingi ico alikulile. (Amalumbo 90:10) Alyafwile Davidi ukufika apapelele amaka yakwe, kabili alishibe bwino ukuti apo alikulile sana takwete maka ya kubomba imilimo iingi. Barsilai talekele ukufwaya ukulumbuka ukumulenga ukukanatontonkanya pa fyo ashingakwanisha ukucita. Ali uwafuuka, tali nga Abishalomu uwalefwaisha ukulumbuka.—Amapinda 11:2.

Na cimbi ico Barsilai akaanine ukuya ne mfumu ca kuti apo alikulile sana, talefwaya ukuyaba icisendo ku mfumu Lesa asalile. Barsilai atile: “Cinshi ico umubomfi wenu alebela kabili uwa kucusha bashikulu imfumu?” (2 Samwele 19:35) Nangu cingati Barsilai aletungilila  Davidi, afwile aletontonkanya ukuti umulumendo e wingabomba bwino imilimo ukumucila. Atile: “Moneni umubomfi wenu Kimhamu; lekeni aabuke na bashikulu imfumu, kabili muciteni icawama mu menso yenu.” Nalimo Barsilai alelosha ku mwana wakwe uo aifyalile. Davidi tafulilwe lelo alisuminishe ku fyo Barsilai asosele. Na kuba, ilyo ishilayabuka Yordani, Imfumu Davidi “yafyompele Barsilai, no kumupaala.”—2 Samwele 19:37-39.

Cisuma Ukukanacishamo

Ilyashi lya kwa Barsilai likomaila pa kulinga. Lelo, tatufwile ukukaana imilimo nelyo ukusengauka ukulatinamina pa kuti tuleikala fye nelyo ukulamona kwati teti tukwanishe ukubomba imilimo ya mu cilonganino. Nga twashintilila pali Lesa kuti atupeela amano na maka ya kubomba imilimo ya mu cilonganino.—Abena Filipi 4:13; Yakobo 4:17; 1 Petro 4:11.

Lelo, na kabili, tulingile ukumona nga kuti twakwanisha ukubomba imilimo. Ica kumwenako fye, tutile nalimo Umwina Kristu alikwata imilimo iingi mu cilonganino ca kwa Lesa. E lyo ailuka ukuti ukusumina imilimo na imbi kuti kwalenga alekelesha imilimo imo iya mu Malembo pamo ngo kulasakamana ulupwa lwakwe. Nga munyina wa musango yo akaana imilimo yalundwapo, kuti alanga ukuti alifuuka.—Abena Filipi 4:5; 1 Timote 5:8.

Barsilai ali muntu musuma kabili kuti cawama ukulatontonkanya pa mibele yakwe pa kuti tulemupashanya. Ali uwa cishinka, uwashipa, kapekape, kabili uwafuuka. Ne cacindamisha ca kuti abikile sana amano ku fya kwa Lesa ukucila ifyo alefwaya.—Mateo 6:33.

[Mapu pe bula 15]

(Nga mulefwaya ukumona mapu, moneni muli magazini)

Barsilai uwali ne myaka 80 aendele ulwendo ulutali nga nshi ilyo aleafwilisha Davidi

GILEADI

Rogelimu

Sakuti

Mahanaimu

Umumana wa Yordani

Gilgali

Yeriko

Yerusalemu

EFRAIMU

[Icikope pe bula 13]

Mulandu nshi Barsilai akaanine ukuya na Davidi?