Bushe Mumona Kwati Mwalibembukila Umupashi wa Mushilo?
Bushe Mumona Kwati Mwalibembukila Umupashi wa Mushilo?
“Kuli ulubembu ululeta imfwa.”—1 YOHANE 5:16.
1, 2. Bushe twaishiba shani ukutila umuntu kuti abembukila umupashi wa mushilo uwa kwa Lesa?
UMWANAKASHI umwina Germany uwalebombela Lesa alembele ukuti: “Nalisakamikwa sana pantu mona kwati nalibembukila umupashi wa mushilo.” Bushe Umwina Kristu kuti abembukila umupashi wa mushilo uwa kwa Lesa?
2 Ee, umuntu kuti abembukila umupashi wa mushilo uwa kwa Yehova. Yesu Kristu atile: “Umusango onse uwa lubembu ne miponto fikalekelelwa ku bantu, lelo ukupontela umupashi takwakalekelelwe.” (Mateo 12:31) Baibolo itusoka ukuti: “Nga tulacita ulubembu pa numa ya kupokelela ukwishiba icine bwino bwino, ninshi takwashala ilambo nangu limo ilya pa membu, lelo kwashala fye ukulolela kwa kutiinya ukwa bupingushi.” (AbaHebere 10:26, 27) Kabili umutumwa Yohane alembele ukuti: “Kuli ulubembu ululeta imfwa.” (1 Yohane 5:16) Lelo bushe muntu uubembwike e wishiba nampo nga nacita “ulubembu ululeta imfwa” nelyo iyo?
Umuntu nga Alapila Alalekelelwa Imembu
3. Bushe ukulaumfwa sana ubulanda pa lubembu twacita kuti kwalanga ukuti nalimo twalicita cinshi?
3 Mu kupelako Yehova e ukapingula ababembu. Na kabushe, ifwe bonse tukalubulula kuli Lesa, kabili conse ico Lesa acita calilungama. (Ukutendeka 18:25; Abena Roma 14:12) Yehova e uwishiba nampo nga twalicita ulubembu ulushingalekelelwa nelyo iyo, kabili e wingafumya umupashi wakwe pali ifwe. (Amalumbo 51:11) Lelo, nga tulomfwa ubulanda sana pa lubembu twacita, ninshi nalimo twalilapila ukufuma pa nshi ya mutima. Nomba, ni mwi mwalola ukulapila kwa cine cine?
4. (a) Bushe ukulapila kwalola mwi? (b) Mulandu nshi amashiwi yaba pa Amalumbo 103:10-14 yatusansamushisha?
4 Ukulapila cipilibula ukwaluka nelyo ukuleka ukulacita ifyabipa ifyo twalecita kale nelyo ifyo twalepanga ukucita, e kuti ukumfwa ubulanda pa fyo twalecita no kulekelela fye ukulaficita. Nga twalibembwike e lyo twacita ifilanga ukuti umuntu nalapila, amashiwi yasosele kemba wa malumbo kuti yatusansamusha. Atile: “[Yehova] tacita kuli ifwe umwabele membu shesu, tatupeelo mwabela amampuulu yesu; pantu ifyo yasansama imyulu ukufuma pano isonde, e fyo lwakulo luse lwakwe ku bamutiina; ifyo akabanga katalukana na masamba, e fyo atalusha kuli ifwe ifya bupulumushi fyesu. Ifyo shibo acite nkumbu ku bana bakwe, e fyo Yehova acite nkumbu ku bamutiina; pantu wene aliishibe mibumbilwe yesu, aibukisho kuti tuli lukungu.”—Amalumbo 103:10-14.
5, 6. Cishinka nshi caba pali 1 Yohane 3:19-22, kabili londololeni umwalola aya mashiwi ya mutumwa Yohane.
5 Amashiwi na yambi ayatusansamusha ya mutumwa Yohane, ayatila: “Kuli ici e ko tukeshibila ukuti tuli ba mu cine, kabili tukashinina imitima yesu ku cinso cakwe muli fyonse ifyo imitima ingatuseka, pantu Lesa mukalamba ukucila imitima yesu kabili aishiba fyonse. Mwe batemwikwa, imitima yesu nga taitushinina, ninshi twaba abalandikisha kuli Lesa; kabili conse ico twalomba tulapokelela kuli wene, pantu tulabaka amafunde yakwe kabili tulacita ifya kuteemuna mu menso yakwe.”—1 Yohane 3:19-22.
6 ‘Twalishiba ukuti tuli ba mu cine’ pantu twalitemwana kabili tatucita ulubembu ku mufulo. (Amalumbo 119:11) Nga tulomfwa ubulanda, tulingile ukulaibukisha ukuti “Lesa mukalamba ukucila imitima yesu kabili aishiba fyonse.” Yehova alatubelela uluse pantu alishiba ukuti ‘twalitemwa aba bwananyina ukwabulo bumbimunda,’ alamona ifyo tulwisha ulubembu, ne fyo tubombesha ukucita ukufwaya kwakwe. (1 Petro 1:22) Nga twacetekela Yehova, ukutemwa aba bwananyina, no kukanacita imembu ku mufulo, umutima wesu ‘tawakaletuseka.’ Tukaba “abalandikisha kuli Lesa” mwi pepo, kabili akulayasuka amapepo yesu pantu tulomfwila amafunde yakwe.
Ababembukile Umupashi
7. Cinshi cipima nampo nga ulubembu kuti lwalekelelwa nelyo iyo?
7 Bushe lubembu nshi ulushingalekelelwa? Pa kwasuka bwino ici cipusho, natulande pa malyashi yamo aya mu Baibolo. Ukulanda pali aya malyashi kuti kwatusansamusha nga twalilapila e lyo tulomfwa no bulanda pa filubo fyabipisha ifyo twacitile. Twalamona ukuti umusango wa lubembu umuntu acitile teupima nampo nga ulubembu kuti lwalekelelwa nelyo iyo, lelo icipima mutima ne fyo uyo muntu alefwaisha ukucita ulo lubembu.
8. Bushe bashimapepo abaYuda aba mu mwanda wa myaka uwa kubalilapo babembukile shani umupashi wa mushilo?
8 Bashimapepo abaYuda aba mu mwanda wa myaka uwa kubalilapo balipatile Yesu Kristu kabili balemucilikila ukubomba umulimo wakwe. Balya balwani ba kwa Kristu balebembukila umupashi wa mushilo pantu balemona ifyo umupashi walelenga Yesu ukucita ifipesha amano ifyalecindika Yehova, lelo baleti alecitila fyonse filya ku maka ya kwa Satana Kaseebanya. Ukulingana ne fyo Yesu asosele, balya bantu abalepontela umupashi wa mushilo uwa kwa Lesa balecita ulubembu ulushingalekelelwa “muli buno bwikashi na muli ubo bukesa.”—Mateo 12:22-32.
9. Bushe ukuponta e kuti shani, kabili Yesu alandilepo shani?
9 Ukuponta lwambo ulwabipisha, nelyo ukutukana. Apo umupashi wa mushilo ufuma kuli Lesa, ukupontela umupashi cimo cine fye no kupontela Yehova. Uwaba ne miponto ya musango yo nga talapile ninshi alecita ulubembu ulushingalekelelwa. Ifyacitike pa kuti Yesu asose aya mashiwi filanga ukuti Yesu alelosha ku bantu abacilikila ku mufulo imilimo ya bantu abo Lesa apeela umupashi. AbaFarise balipontele umupashi pantu balimwene ukuti umupashi wa kwa Yehova wali pali Yesu, lelo bena baleti alebomfya amaka ya kwa Kaseebanya. E ico, Yesu atile: “Onse uwapontelo mupashi wa mushilo takalekelelwe umuyayaya, lelo ali no mulandu wa lubembu lwa muyayaya.”—Marko 3:20-29.
10. Mulandu nshi Yesu aitile Yuda ukuti “umwana wa boni”?
10 Ibukisheni ne fyacitile Yuda Iskariote. Yuda Iskariote tali umufumacumi, aleiba mu kabokoshi ka ndalama ako bamupeele ukulasunga. (Yohane 12:5, 6) Kabili pa numa Yuda apangene ne ntungulushi sha baYuda ukufutuka Yesu nga bamupeela isha silfere 30. Lintu afutwike Yesu, Yuda alyumfwile ububi, lelo talapile ku lubembu ulo acitile ku mufulo. E calenga ukuti Yuda ekabuuka ku bafwa, kabili e mulandu wine Yesu amwitile ukuti “umwana wa boni.”—Yohane 17:12; Mateo 26:14-16.
Abashabembukile Umupashi
11-13. Ni membu nshi Imfumu Davidi yacitile ilyo yamwene Batisheba, kabili ubupingushi bwa kwa Lesa pali Davidi na Batisheba kuti bwatusansamusha shani?
11 Abena Kristu bamo balatumbula imembu shabipisha isho bacitile. Kabili baeluda balabafwa ukuba ifibusa fya kwa Yehova na kabili. Limo limo, Abena Kristu ba musango yo nalimo kuti baleumfwa ubulanda pa fyo bapulile mu mafunde ya kwa Lesa. (Yakobo 5:14) Nga tulomfwa ubulanda, limbi twalanonkelamo nga twaishiba ifyo Amalembo yalanda pa bantu abo Lesa alekelela imembu shabo.
12 Imfumu Davidi yalicitile ulubembu ulwabipisha na Batisheba, umukashi wa kwa Uria. Ilyo Davidi ali pa mutenge amwene uyu mwanakashi wayemba alesamba, kabili atumine aba kumuleta kwi sano kabili alisendeme nankwe. Lintu Batisheba aebele Davidi ukuti ali ne fumo, Davidi apangile ukuti alenge umulume wakwe, Uria, ukusendama na Batisheba pa kuti cikeshibikwa ukuti alicitile ubucende. Ilyo aya mapange yafililwe ukubomba, imfumu yateyenye ukuti Uria bamwipaye mu nkondo. Pa numa, Batisheba aishileba umukashi wa kwa Davidi kabili alifyele umwana lelo uyo mwana alifwile.—2 Samwele 11:1-27.
13 Yehova e wapingwile umulandu wa kwa Davidi na Batisheba. Lesa alilekelele Davidi, nalimo icalengele ni co alimwene ukuti Davidi alilapile e lyo na kabili alipangene nankwe icipingo ca Bufumu. (2 Samwele 7:11-16; 12:7-14) Batisheba na o afwile alilapile pantu bamupeele ishuko lya kuba nyina wa kwa Solomone no kuba icikolwe ca kwa Yesu Kristu. (Mateo 1:1, 6, 16) Kanshi nga twalibembwike, calicindama ukulaibukisha ukuti Yehova alamona nga twalilapila.
14. Bushe ifyo Yehova alekelela apakalamba fyalangililwa shani ku fyacitikile Manase?
14 Ifyacitikile Imfumu Manase iya mu Yuda na fyo filalanga bwino sana ukuti Lesa alalekelela apakalamba. Manase alicitile ifyabipa mu menso ya kwa Yehova. Akuulile ifipailo kuli Baali, alepepa “umulalo onse uwa mu muulu,” kabili akuulile ne fipailo kuli tulesa twa bufi mu mansa shibili ishe tempele. Alepisha abana bakwe mu mulilo, alekoselesha abantu ukulapepa imipashi, kabili alengele abekashi ba mu Yuda na mu Yerusalemu “balecito bubi ukucile nko isho Yehova afitile ku cinso ca bena Israele.” Ilyo bakasesema ba kwa Lesa balemusoka, Manase taleumfwila. Mu kuya kwa nshita, imfumu ya bena Ashuri yalimusendele bunkole, kabili lintu ali muli bunkole, alilapile kabili lyonse aleicefya pa kupepa kuli Lesa. Awe Lesa alekelele Manase no kumubweseshe pa cipuna ca bufumu mu Yerusalemu, kabili Manase atendeke ukutungilila ukupepa kwa cine.—2 Imilandu 33:2-17.
15. Finshi fyacitikile umutumwa Petro ifilanga ukuti Yehova alalekelela “apakalamba”?
15 Lintu papitile imyaka iingi, umutumwa Petro alibembwike icabipisha ilyo akeene Yesu. (Marko 14:30, 66-72) Lelo, Yehova alilekelele Petro “apakalamba.” (Esaya 55:7) Mulandu nshi? Pantu Petro alilapile ukufuma pa nshi ya mutima. (Luka 22:62) Kabili ubushininkisho bwa kuti Lesa alilekelele Petro bwamoneke ilyo papitile inshiku 50 pa bushiku bwa Pentekoste. Pali ubu bushiku Petro alipeelwe ishuko lya kulanda mu kushipa pali Yesu. (Imilimo 2:14-36) Ifi fine e fyo Lesa alekelela na Bena Kristu pali lelo! Kemba wa malumbo aimbile ukuti: “Amampuulu nga mwayamwensekesha, mwe Yehova, mwe Shikulu, nani uwingeminina? Pantu kuli imwe kwabo kulekelela abalapila, ku kuleka mubelwe akatiina.”—Amalumbo 130:3, 4.
Ifyo Twingacefyako Umwenso wa Kuti Twalibembukila Umupashi wa Mushilo
16. Bushe finshi filenga ukuti Lesa aletwelela nga twabembuka?
16 Ifya kumwenako twalandapo filingile ukutwafwa ukucefyako umwenso wa kuti twalibembukila umupashi wa mushilo. Ifi fya kumwenako filanga ukuti Yehova alalekelela ababembu. Icacindama sana kulapepa lyonse kuli Lesa. Nga twalibembuka, kuti twapaapaata Lesa ukwelela imembu shesu ukubomfya ilambo lya cilubula ilya kwa Yesu. Yehova akatwelela pantu wa luse, talaba ifyo twamubombela, kabili alishiba ukuti tuli babembu. Apo twalishiba icikuuku ca kwa Yehova, kuti twashininkisha ukuti nga twapaapaata ukuti atwelele, akatwelelela.—Abena Efese 1:7.
17. Cinshi twingacita nga twalibembuka kabili tulekabila aba kutwafwa ukuba icibusa ca kwa Yehova na kabili?
17 Tutile twalibembuka e lyo tulafilwa ukupepa kuli Yehova pa mulandu wa kuti ulubembu lwesu lwalenga bucibusa bwesu na Yehova ukubwelela pa nshi, bushe cinshi twingacita? Nga ifi e fyo tupitamo, umutumwa Yakobo alembele ukuti umuntu wa musango yo alingile ukwita “abakalamba ba cilonganino bese kuli wene, kabili bapepe pali wene, bamusubile amafuta mwi shina lya kwa Yehova. Ne pepo lya citetekelo likaposha umulwele, na Yehova akamwimya. Kabili, nga alicita imembu, shikalekelelwa kuli wene.”—Yakobo 5:14, 15.
18. Mulandu nshi umuntu nga atamfiwa mu cilonganino cishipilibwila ukuti ninshi ulubembu lwakwe talwakalekelelwe?
18 Nangu cingati limo uubembwike kuti afilwa ukulapila kabili kuti atamfiwa na mu cilonganino, tacilepilibula ukuti ninshi ulubembu lwakwe te kuti lulekelelwe. Paulo alandile pa mwaume batamfishe mu cilonganino ca ku Korinti ukuti: “Ukukalipila uku ukwafuma ku cinabwingi kwayana ku wabe fi, ica kuti, nomba, mumubelele uluse no kumusansamusha, epali uwabe fi afwa ku cikonko.” (2 Abena Korinti 2:6-8; 1 Abena Korinti 5:1-5) Lelo, pa kuti abalufyenye babe ifibusa fya kwa Yehova na kabili, balingile ukupokelela ukwafwa kwa baeluda no kucita ifingalanga ukuti nabalapila icine cine. Bafwile ukutwala “ifisabo ifyawamina ukulapila.”—Luka 3:8.
19. Finshi fingatwafwa ukutwalilila ukuba “abatuntulu mu citetekelo”?
19 Cinshi cingalenga tulemona kwati twalibembukila umupashi wa mushilo? Ifingalenga, kusakamikwa sana nelyo ukulwalilila no kupopomenwa. Nga e cilelenga, ninshi ipepo no kulatuusha sana kuti fyatwafwa ukuleka ukulamona kwati twalibembukila umupashi. Tatufwile ukuleka Satana ukutunenuna ica kuti twaleka no kubombela Lesa. Apo Yehova tasekela mu mfwa ya babifi, te kuti asekelemo ukumona umubomfi wakwe aleka ukumubombela. Kanshi nga twaliba no mwenso wa kuti twalibembukila umupashi, tufwile ukutwalilila ukulabelenga Icebo ca kwa Lesa, ukubikako na mabuuku ayatusansamusha sana aya Amalumbo. Tufwile ukutwalilila ukulasangwa ku kulongana no kulabombako umulimo wa kushimikila. Ukulacita ifi kukalenga tukabe “abatuntulu mu citetekelo” kabili tatwakalesakamikwa ukuti twalicita ulubembu ulushingalekelelwa.—Tito 2:2.
20. Kutontonkanya pa mepusho nshi ukwingafwa umuntu ukwiluka ukuti tabembukila umupashi wa mushilo?
20 Bonse abomfwa umwenso wa kuti balibembukila umupashi wa mushilo balingile ukuipusha abati: ‘Bushe nalipontela umupashi wa mushilo? Apo nalilapile ku lubembu nacitile, bushe nalileka ukutontonkanya ukuti nalibembukila umupashi wa mushilo? Bushe nalicetekela ukuti Lesa alalekelela imembu? Bushe ndi musangu uukaana icine ca mu Malembo?’ Nga batontonkanya pali aya mepusho, limbi kuti bailuka ukutila tabapontela umupashi wa mushilo uwa kwa Lesa, kabili te basangu. Lelo balilapila, kabili balicetekela ukuti Yehova alalekelela imembu. Nga bailuka ifyo, ninshi tababembukila umupashi wa mushilo uwa kwa Yehova.
21. Mepusho nshi tukalandapo mu cipande cikonkelepo?
21 Ala mwandini umutima ulekala nga twaishiba ukuti tatwabembukila umupashi wa mushilo! Ne fyo tukalasambilila mu cipande cikonkelepo na fyo nafikuma sana ili lyashi. Ica kumwenako fye, kuti twaipusha fwe bene ukuti: ‘Bushe umupashi wa mushilo uwa kwa Lesa e untungulula? Bushe ndalanga ifisabo fya mupashi mu mikalile yandi?’
Kuti Mwayasuka Shani?
• Mulandu nshi twingasosela ukutila umuntu kuti abembukila umupashi wa mushilo?
• Bushe ukulapila kwalola mwi?
• Ni bani babembukile umupashi ilyo Yesu ali pano isonde?
• Finshi twingacita pa kuti tuleke ukulatontonkanya ukuti twalicita ulubembu ulushingalekelelwa?
[Amepusho]
[Icikope pe bula 17]
Abalesosa ukuti Yesu alecitile fipesha amano ku maka ya kwa Satana balibembukile umupashi wa mushilo uwa kwa Lesa
[Icikope pe bula 18]
Nangu cingati Petro alikeene Yesu, tacitile ulubembu ulushingalekelelwa