‘Inte ya Cishinka mwi Ulu’

UKUTULA kale abalemba imishikakulo ne nyimbo balatasha umweshi ukuti usuma. Ica kumwenako fye, ulwimbo ulwapuutwamo na Lesa lulanda pa mwanakashi “uwayemba ngo mweshi.” (Ulwimbo lwa Nyimbo 6:10) E lyo kemba wa malumbo na o aitile umweshi ukuti ‘inte ya cishinka mwi ulu.’ (Amalumbo 89:37) Bushe aya mashiwi balanda pa mweshi yacindama shani?

Lyonse umweshi ushinguluka icalo mu nshiku 27.3. Ifi lyonse umweshi ushinguluka icalo mu nshiku 27.3, e fyo basosela ukuti wa cishinka. Lelo, kemba wa malumbo afwile alikwete na fimbi ifyacindama ifyo aletontonkanyapo ilyo alembele yalya mashiwi. Mu lwimbo ulo asobele pa Bufumu ubo Yesu asambilishe abasambi bakwe ukulapepela, aitile umweshi ukuti ‘inte ya cishinka.’—Mateo 6:9, 10.

Imyaka ukucila pali 3,000 iyapita, Yehova Lesa apangene icipingo ca Bufumu ne Mfumu Davidi iya mu Israele. (2 Samwele 7:12-16) Umulandu Lesa apanganine cilya cipingo na Davidi wa kuti alefwaya Yesu Kristu ukwisapyana Davidi pa cipuna ca Bufumu no kuteka ku ciyayaya. (Esaya 9:7; Luka 1:32, 33) Ilyo kemba wa malumbo alelanda pa cipuna ca Bufumu ica bufyashi bwa kwa Davidi, atile: ‘Cikapampamikwa umuyayaya ngo mweshi; kabili nge nte ya cishinka mwi ulu.’—Amalumbo 89:36, 37.

Kanshi ‘ica kubuutusha iciteko bushiku,’ e kuti umweshi, citucinkulako ukuti Kristu akateka ku ciyayaya. (Ukutendeka 1:16) Daniele 7:14 ilanda pa Bufumu bwa kwa Kristu ukuti: “Ukuteka kwakwe kuteka kwa muyayaya, ukushakapite, no bufumu bwakwe tabwakonaulwe.” Umweshi ni nte iitucinkulako pali ubu Bufumu na pa mapaalo abantu bakaipakisha ilyo Kristu akalateka.

[Abatusuminishe Ukubomfya Icikope pe bula 32]

Moon: NASA photo