Amepusho Ukufuma ku Babelenga
Amepusho Ukufuma ku Babelenga
Ilyo Davidi aipeye Galyati, cinshi Imfumu Shauli yamwipushishe ukuti, “Ni we mwana wa kwa ani, we mulumendo?” nangu ca kuti Shauli wine pa kubala e watumine aba kuyaita Davidi ukumuleta ku mwakwe ku kuba umubomfi wakwe?—1 Samwele 16:22; 17:58.
Napamo abantu kuti bayasuka fye bwangu bwangu ukuti Shauli alilabile Davidi pantu umuku wa kubalilapo bamonene, bamonene fye inshita iinono. Nomba te kuti cibe fyo pantu pali 1 Samwele 16:18-23 palanda ukuti Shauli wine e watumine aba kuyaita Davidi ukwisa ku mwakwe kabili alimutemenwe nga nshi. Davidi e watendeke no kumusendela ifyanso nga baya ku nkondo. Shauli afwile alishibene bwino na Davidi.
Abasoma sana Baibolo bamo batila amalembo ya 1 Samwele 17:12-31 na 1 Samwele 17:55–18:5 bayalundileko fye pa numa pantu tayabamo muli Baibolo ya ciGriki iya Septuagint. Baibolo ya amalembo ya ciHebere iyo bapwishishe ukupilibula mu myaka ya ba 100 B.C.E. e yo baleita ati Septuagint. Nomba, ukusondwelela ifyo pa mulandu fye wa fyo bapilibula Baibolo ya Septuagint na ko kwine te kuti kuwame iyo, pantu aya malembo yalasangwa mu fitabo fya kale ifyabamo Amalembo ya ciHebere ifyaishibikwa ukuti fya cine. *
Cimoneka ukuti filya Shauli abalilepo ukwipusha Abnere e lyo aipusha na Davidi umwine, fitulanga ukuti Shauli talefwaya fye ukwishiba ishina lya kwa wishi wa kwa Davidi. Ilyo Shauli amwene ukuti Davidi aipaya Galyati, amwene imibele na imbi iyo Shauli ashaishibe kale pali Davidi. Amwene ukuti Davidi aali ne citetekelo icikalamba sana kabili ali uwashipa nga nshi. Kanshi Shauli alefwaya ukwishiba bwino bwino wishi wa uyu mulumendo wa mibele ya musango yu. Napamo Shauli alefwaya ukuti Yese, wishi wa kwa Davidi nangu abana bakwe na bambi, na bo bakabe abashilika bakwe, pantu afwile alemona ukuti nakalimo na bo bene kuti baba abakosa kabili abashipa nga filya fine Davidi ali.
Nangu ca kuti pali 1 Samwele 17:58 paba fye amashiwi yanono ayo Davidi alandile aya kuti, “umubomfi wenu mwana wa kwa Yese umwina Betelehemu,” amashiwi yakonkapo yalanga ukuti Davidi na Shauli bafwile balilanshenyeko na fimbi ifingi. Moneni ifyo abasoma Baibolo, C. F. Keil na F. Delitzsch balandilepo pali ici, batile: “Amashiwi yaba pali [1 Samwele 18:1] aya kuti, ‘nomba pa kupwo kusosa kuli Shauli,’ yalangilila ukuti Shauli alilanshenyeko na Davidi ifintu na fimbi ifingi pa lupwa lwa kwa Davidi, pantu aya mashiwi yalanga ukuti balilanshenyeko pa nshita iitali.”
Pali fyonse ifi twalanda, kuti twatila filya Shauli aipwishe Davidi ukuti, “Ni we mwana wa kwa ani we mulumendo?” te kutila alefwaya ukwishiba Davidi pa mulandu wa kuti alimulabile. Pali iyi nshita ninshi Shauli alishibana kale na Davidi, lelo alefwaya fye ukwishiba inkulilo yakwe.
[Futunoti]
^ para. 4 Nga mulefwaya ukumfwikisha ifyo twingeshiba nga ca kuti fimo fimo ifishaba muli Baibolo ya Septuagint fya cine, belengeni icitabo ca Insight on the Scriptures, Volyumu 2, ibula 855, icalembwa ne Nte sha kwa Yehova.
[Icikope pe bula 31]
Cinshi Shauli aipushishe Davidi ukuti “ni we mwana wa kwa ani”?