Ifipapwa Fibili Ifyacitike pa Kulongana Kumo Ukwa Citungu mu Georgia
Ifipapwa Fibili Ifyacitike pa Kulongana Kumo Ukwa Citungu mu Georgia
IFIPAPWA fibili fyalicitike pa Kulongana kwa Citungu kumo ukushakalabwe ukwali mu calo ca Georgia mu 2006. Uku kulongana kwa Nte sha kwa Yehova ukwa nshiku shitatu, kwatampile pa 7 ukufika pa 9 July, kabili kwali no mutwe waleti, “Ukulubuka Nakupalama!” Uku kulongana kwabelele mu fifulo fyalekanalekana 6 mu calo ca Georgia. Pali kulya kulongana pali ifyebo fya kwa Lesa ifingi, kabili bonse abasangilweko balicilile pali 17,000.
Mu January 2006, bamunyinefwe batendeke ukubombesha ukufwaya icifulo cisuma ico abantu abengi nga nshi bengalonganinapo mu Tbilisi umusumba ukalamba uwa calo ca Georgia. Abali no kusangwa ku kulongana mu fifulo fya kulonganinamo fimbi, bali no kulaumfwila amalyashi pali lamya.
Muli iyi myaka yapita ubuteko bwa calo ca Georgia panono panono bwatendeke ukulapeela abekala calo insambu ya kuipepela. E mulandu wine nangu ca kuti baNte balabacusha sana, balitwalilile ukubombesha, kabili balicetekele ukuti icifulo ca kulonganinapo cali no kumoneka mu musumba ukalamba. Kwena, abena Georgia baliba bwino sana kabili ba cileela. Lelo nangu cibe fyo, kwaba abakalamba ba mipepele imbi ababa ne mpatila iyabipa nga nshi. Bushe baali no kubwesha imitima yabo no kusuminisha baNte ukusonkela icikuulwa ica kuti bakalonganinemo?
Bamunyinefwe abaali muli Komiti ya Kulongana kwa Citungu bailemona abakalamba ba fibansa fya mupila ifyalekanalekana ne fikuulwa fikalamba umubela ifyangalo. Abakalamba ba ifi fifulo balesumina ukutila kuti bafibomfya, lelo bamunyinefwe nga balanda inshiku sha kulongana, balya bantu balekaana. Aba muli komiti ya kulongana balipapile ilyo abasakamana icikuulwa ca kulishishamo ifilimba mu musumba wa Tbilisi basumine ukuti baNte bakalonganinemo. Ici cikuulwa cabela mu kati ka musumba uukalamba, umo bashimucindikwa bakumanina nga balecita fimo ifyacindama.
Abali muli komiti ya kulongana balyumfwile bwino ukutila mu kubombesha kwabo mwalifumine ifisuma. E ico batendeke ukupekanya ukulongana mu matauni ne misumba imbi ukusanshako ne tauni lya Tsnori, na Kaspi e lyo ne misumba ya Kutaisi,
Zugdidi na Gori. Kwali no mulimo uukalamba uwa kubika bamashini bakulenga amashiwi yaleumfwika mu fifulo monse umwabelele ukulongana pa kuti balekutika kuli programu pa nshita fye imo ine. Balipekenye fyonse kabili balelolela fye ukulongana. Lyena mu kupumikisha ilyo kwashele fye umulungu umo ukutila ukulongana kutendeke, abakalamba abasakamana icikuulwa ca kulishishamo ifilimba mu musumba wa Tbilisi balikenye baNte ukulonganinamo. Tabalandile no mulandu bakaanine.Icipapwa ca Kubalilapo
Cinshi bamunyinefwe baali no kucita apo ne nshiku sha kutendeka ukulongana shali fye mupepi? Batontonkenye ukutila icisheleko fye kuyalonganina kwi tauni lya Marneuli ukwaba amafarmu, ukwalepa bakilomita 40 ukufuma mu musumba wa Tbilisi. Ilingi line balelonganina ukulongana kwa citungu ku Marneuli kwine pe farmu lya lupwa lumo ifi ulwa Nte sha kwa Yehova. Kale ici cifulo balelonganinapo cali libala ilikalamba. Imyaka 10 iyapita, ifilonganino fyonse ifya mu Tbilisi fyalelonganina pali ili line farmu. Nomba, ku Marneuli kwine, e ko baNte babasansa icabipisha ku bantu aba lupato.
Inshita imo ilyo baNte babasanshile, ni mu mwaka wa 2000 pa 16 September. Bakapokola ba mwi tauni lya Marneuli balicilike imisebo pa kuti baleshe baNte ukuya ku cifulo ca kulonganinapo. Lyena kwaishile amabasi umwali ifipondo ifingi, ne ntungulushi ya fipondo Vasili Mkalavishvili uo bafumishe pali bushimapepo mwi calici ca Orthodox. Baimike bamotoka na mabasi umwali baNte abaleya ku kulongana ku Marneuli, kabili bamo balibatintenye ukubafumya muli bamotoka no kubomina imfwila. Bambi na bo balibasendeele ifipe, ukusanshako fye na maBaibolo ne mpapulo shimbi isha cebo ca kwa Lesa.
Ifipondo ifyali napamo 60 na fimbi fyasanshile abali pa cifulo ca kulonganinapo ku Marneuli kwine. BaNte nalimo 40 balicenenwe. Munyinefwe umo balimulashile umwele mu cifuba. Ifipondo fimo fyaleimya imfuti no kulasonteka bamunyinefwe no kubatiinya, kabili fyalelishisha ne mfuti mu muulu ninshi nafikalipa icine cine. Icipondo cimo casonteke imfuti nkashi umwine we farmu no kumweba ati acipeele indalama ne fibeekobeeko. Ifipondo fyalisakawilile ifipe ifyali mu ng’anda ya kwa uyu nkashi, iyabelele ku mpela ya cifulo ca kulonganinapo no konaula ifintu ifingi, kabili fyaibile ne fipe fya mutengo. Fyatobawile amawindo yonse mu ng’anda no koca impapulo shonse pamo ne fipuna fya mapulanga ifya kwikalapo pa kulongana. Ifipondo fyalyonawile impapulo ishingi nga nshi. Mu nshita ya kutila bakapokola baleshe ifipondo ifyasanshile baNte, nabo balisanshileko Inte sha kwa Yehova. *
E ico abali muli Komiti ya Kulongana kwa
Citungu balisakamene ukuti nalimo na uno muku kuti babasansa, e lyo ubwafya bumbi bakwete bwali bwa kuti pali cilya cifulo balelonganina palekumana fye abantu 2,500, nomba bali no kucita shani pa kuti abantu 5,000 bakumane? Bushe bali no kucita shani apo ne nshita ya kulongana yali naifika? Cali kwati cipapwa ilyo abene ba mafarmu yabili ayapakana ne li line farmu balonganinapo batile, kuti babasuminisha ukulonganina mu ncende shabo nga balipilako indalama shimo ifi.Ala mwandini bamunyinefwe balikwete umulimo ukalamba uwa kuwamya amabala pa kuti yabe icifulo cisuma ica kulonganinapo. Imfula nayo yalengele umulimo ukukosa pantu yaleloka fye umulungu onse ilyo ukulongana takulafika. Mwi bala lya bena mupalamano ilyo baNte bayashime, mwali amapoteto, e ico bamunyinefwe bali ne ncito ya kwimba amapoteto. Mu kubalilapo fye, bamunyinefwe ne nkashi mu kuitemenwa batendeke ukwimba amapoteto ninshi uku ne mfula ileloka icine icine. Lyena balifumishe ulupango umo lwapelele pa kuti bakushe icifulo ca kulonganinapo, kabili bashimpile ne milongoti pa kuti bapange ica kufimba pa muulu ku kucingilila abalelongana ku kasuba ne mfula. Bamunyinefwe balekabila ukupangilapo ifipuna fya mapulanga na fimbi ifingi, kabili balekabila ukubika ifisoselo na fimbi. Kwali imilimo ya bukapenta iingi, ukupoopa, ukuputaula amapulanga ne milimo imbi, kabili aba bwananyina abaipeelesha balebomba akasuba no bushiku ica kuti bamo tabalelala ubushiku bonse.
Lelo ico bonse basakamene ca kuti, “Bushe cikaba shani nga ca kutila imfula yatwalilila fye ukuloka ukufika fye na lintu kukaba ukulongana? Bushe abakulaisa mu kulongana tabakulaibila fye umubili onse mu matipa?” Bamunyinefwe bashitile impimbili no kufimba pa nshi apaali amatipa. Awe mukwai na kasuba nako kalibalike! E ico inshiku shonse shitatu isha kulongana akasuba nako kalibalike, kabili icifulo ca kulonganipo caliweme.
Ilyo abaishile mu kulongana bafikile, balitemenwe nga nshi ukumona ifyo apa kulonganina paweme. Apa balelonganina tapali ica kubapumfyanya icili conse ica kuti baleumfwa fye kwati bali mu calo cipya. Abalelongana baikele fye bwino bwino, kabili mu mbali mwali imiti ya makunyu ne miti imbi iitwala ifisabo e lyo na mabala ya nyanje na tomato. Ku numa ya cisebele nako kwali ifimuti ifitabilila bwino ifitwala imyangashi. Inshita ne nshita abali pa kulongana baleumfwa uko bamukolwe balelila ne nkota shileteteela ilyo abantu baletoola amani shabikiile. Kwali na fimbi ifyalelila filya ifilila mu mpanga, lelo ku balelongana ifi fyonse fyali fye kwati tunyimbo tusuma. Abalelongana tabapumfyanishiwe ku fyo baleumfwa, lelo balekutikisha amalyashi ya kufunda kusuma ukwaba mu Baibolo. Lelo kwali na fimbi ifyaweme pali uku kulongana ifyo abasangilweko bashakalabe.
Icipapwa ca Bubili
Pa mpela ya kulongana kwa lucelo pali Cisano abasangilwe ku kulongana balipapile icine cine ilyo munyinefwe Geoffrey Jackson uwaba mwi Bumba Litungulula ilya Nte sha kwa Yehova abilishe ukuti * Abengi balipapile pali ici cacitike, kabili balelukusha fye ifilamba ku nsansa. Ulupwa lumo ulwasansamwike sana lwatile: “Ala mwandini tuletasha nga nshi pali ici cipapwa icacitika, ici Yehova atucitila cipapwa icine cine. Uyu mulimo wali ukalamba nga nshi, lelo baubombele mu nshita fye iinono!”
Baibolo ya New World Translation of the Holy Scriptures mu lulimi lwa bena Georgia naifuma.Nkashi umo uwafumine kwi tauni lya Tsalendjikha uwalekutika kuli programu ukubomfya lamya atile: “Ala ndefilwa no kulondolola insansa nkwete pali iyi Baibolo ifumine. Cine cine ndemutasha sana pali uku kulongana kushaiwamina ukwa nshiku shitatu. Ala mwandini, cintu ico tushakalabe.” Ulupwa lumo ku cilonganino cabela ku masamba ya calo ca Georgia, mupepi na bemba wa Black Sea, lwatile: “Ukufuma fye na kale, pa ng’anda twakwete Baibolo imo fye mpo, nomba ifwe bonse 4 natuikwatila Baibolo wa New World Translation. Nomba cila muntu kuti aibelengela Baibolo bwino bwino.”
Lelo kwena kwaliko na mafya yamo ayo abalelongana bashaishibe na kwishiba. Cimo icacitike ca kutila, amaBaibolo ya New World Translation yalipulintilwe kabili bayatumine ku calo ca Georgia ninshi no kulongana kucili fye ukutali, lelo ababombela pa mupaka wa calo balikeene ukupisha amaBaibolo. Bamunyinefwe batwele umulandu kuli loya uulandilako abantu ku buteko. Uyu loya alilwishishe ica kuti ubuteko bwalisuminishe ukupisha amaBaibolo ilyo ukulongana kwali mupepi no kutendeka. Kabili atumine fye ne nkonkani yakwe ku kulongana ukwali ku Marneuli pa kuti apokeko amaBaibolo ayapya aya kubomfya pa maofesi yabo.
Balibapokelele Bwino ku Bena Georgia
Kwali na cimbi icalengele ukuti Inte sha kwa Yehova mu Georgia baleibukisha sana kulya kulongana ukwali ku Marneuli. Pali kulya kulongana pasangilwe na munyinefwe uwaba mwi Bumba Litungulula ilya Nte sha kwa Yehova. Bonse fye abasangilwe pali kulya kulongana bali ne nsansa sana ica kuti bamunyinefwe na bankashi bonse balefwaisha ukumuposha nge fyo baposha mu lutambi lwabo. Munyinefwe Jackson aiminine ama-awala ayengi ukulaposha bamunyinefwe na bankashi ilyo ukulongana kushilatendeka, pa kutuusha, e lyo na pa mpela ya kulongana pene, lelo nangu cali ifyo, baJackson tabailishenye.
Kale sana mu 1903, ilyo ukulongana kwa citungu na kumbi kwapwile, munyinefwe umo atile: “Kwena ifyo nasambilila pali kuno kulongana fisuma sana ica kuti nangu umuntu anjeba ati tukabushanye ifyo nsambilile ne ndalama ishingi nga nshi, te kuti nsumine nangu ca kuti ndi mupiina.” Kwena palipita imyaka ukucila 100 ukutula apo munyinefwe alandile aya mashiwi, lelo ifyo ulya munyinefwe aumfwile, e fyo na baNte ba ku calo ca Georgia baumfwile ilyo basangilwe ku kulongana kwa citungu ukushakalabwe ukwaliko mu mwaka wa 2006.
[Amafutunoti]
^ para. 10 Nga mulefwaya ukwishiba ilyashi na limbi pa fyo Inte sha kwa Yehova shacula mu calo ca Georgia, kuti mwabelenga Awake! ya January 22, 2002, amabula 18 ukufika ku 24.
^ para. 16 Amalembo ya Calo Cipya aya ciGriki aya Bwina Kristu mu lulimi lwa bena Georgia yafumine mu 2004.
[Akabokoshi pe bula 19]
Abali ‘Abanono’ Nomba Nabafula
Amashiwi yaba pali Esaya 60:22 yalifikilishiwa mu Georgia. Yatila: “Umunono akabe kana limo, uwacepa akabo luko lwakosa, Ine Yehova ne wasose ci, mu nshita ya ciko nkacilengo kukalakasha.” Mupepi ne myaka 20 iyapita bakasabankanya ba Bufumu mu Georgia tabafikile na 100, lelo ino nshita nabafika mupepi na 16,000. Aba bakashimikila wa Cebo ca kwa Lesa abacincila balatungulula amasambililo ya Baibolo mupepi na 8,000 cila mulungu. Cine cine, ici cilangililo ca kuti umulimo uleya pa ntanshi mu calo ca Georgia.
[Icikope na Mamapu pe bula16]
(Nga mulefwaya ukumona icikope na mamapu, moneni muli magazini)
RUSSIAN FEDERATION
GEORGIA
⇨ Zugdidi
⇨ Kutaisi
Marneuli ⇨ Gori
⇨ Kaspi
⇨ Tsnori
TBILISI
TURKEY
ARMENIA
AZERBAIJAN
[Abatusuminishe]
Icalo: Icikope ca ba NASA/Visible Earth imagery
[Icikope pe bula 16]
Icilubi icaba mu Tbilisi
[Ifikope pe bula 17]
Abalelonganina mu ncende shimbi shisano balekutika na ku malyashi balelanda ku Marneuli ukubomfya lamya
[Ifikope pe bula 18]
Abasangilwe ku kulongana balipapile kabili balisangalele ilyo Baibolo ya “New World Translation” mu lulimi lwa bena Georgia yafumine