Amepusho Ukufuma ku Babelenga

Apo abaYuda balibakeenye ukubomfya “conse icatutumushiwa” pa Ca kucilila, mulandu nshi Yesu ena abomfeshe umwangashi ilyo acitile Icibukisho ca mfwa yakwe, pantu umwangashi nao ulabila?—Ukufuma 12:20; Luka 22:7, 8, 14-20.

Pa kwibukisha ilyo bafumine mu Egupti, Abena Israele balesefya Ica kucilila kabili batendeke ukusefya mu 1513 B.C.E. Ilyo Yehova alebapeela amafunde pa fyo bali no kulasefya, atile: “Conse icatutumushiwa mwikalalyako; mu bwikalo bwenu bonse mukalelye mikate iishatutumuka.” (Ukufuma 12:11, 20) Ici cibindo cakumine fye umukate uo balelya pa Ca kucilila, tacakumine umwangashi.

Umulandu wa kubalilapo uo bashalelila imikate iyatutumuka wa kuti ilyo abena Israele balefuma mu Egupti balikwankwenye. Pa Ukufuma 12:34 patila: “E ico abo bantu basendele umufuba wabo ucili taulatutumuka, ifya kukandilamo fyabo nafikakilwa mu nsalu shabo pa mabeya yabo.” Ukulya imikate ishatutumuka pa kusefya Ica kucilila kwali no kulaibukisha abana babo ici cishinka cacindama.

Mu kuya kwa nshita, abantu batendeke ukupashanya ulubembu nelyo ukubola ku citutumushi. Ica kumwenako fye, ilyo umutumwa Paulo alelanda pa muntu uwakwete imisango iyabipa mu cilonganino ca Bena Kristu, aipwishe ukuti: “Bushe tamwaishiba ukuti icitutumushi cinono citutumusho mufuba onse?” Lyena atile: “Fumyenimo icitutumushi ca kale, ukuti imwe mube umufuba upya, nge fyo muli abashatutumushiwa. Pantu, na cine, Kristu ica kucilila cesu alipeelwa ilambo. E ico tucite umutebeto, te wa citutumushi ca kale, nangu wa citutumushi ca bubi no bubifi, lelo uwa mukate ushatutumushiwa uwa bufumacumi ne cine.” (1 Abena Korinti 5:6-8) Mukate fye uushatutumuka e o bali no kubomfya nge cimpashanya ca mubili wapwililika uwa kwa Yesu.—AbaHebere 7:26.

Pa numa, abaYuda balitendeke ukubomfya umwangashi pa kusefya Ica kucilila. Bafwile batendeke ukuubomfya lintu babwelele ku Babiloni uko bali bankole. Mu Baibolo tamwaba ifunde ilyakeenye ukubomfya umwangashi pa Ca kucilila, kanshi e mulandu wine Yesu na o aubomfeshe pa kulya Ica kucilila. E lyo ne fyo balepanga umwangashi wa kale fyalipusene ku fyo balecita pa kuti umufuba uwa kupangila umukate ututumuke. Pa kuti umufuba ututumuke, balebikako icitutumushi. Lelo pa kupanga umwangashi tabelebikako icitutumushi. Mu myangashi iine e mwaleba ifilenga ifya kunwa balepangako ukubila. Umwangashi uushabila nga tawasangilwe pa nshita balesefya Ica kucilila pantu balelobolola imyangashi mu August na mu September e lyo Ica kucilila calebako mu March nelyo mu April.

Kanshi, filya Yesu abomfeshe umwangashi ukuba icimpashanya ca pa Cibukisho tafyapusene na mafunde ayaleseshe ukubomfya icitutumushi pa kusefya Ica kucilila. Umwangashi wa kashika onse uo bashasankanyamo shuga nelyo ifili fyonse kuti wabomfiwa ukuba icimpashanya ca “mulopa waumo mutengo” uwa kwa Kristu.—1 Petro 1:19.