Ifyo Mwingafwa Abana Ukutemwa Lesa ne Mitima Yabo Yonse

MUNO nshiku calyafya sana ukuba cibusa wa kwa Yehova Lesa. (Amalumbo 16:8) Ukusesema kwa mu Baibolo kutila tuleikala mu ‘nshiku sha kulekelesha ishayafya,’ umo abantu abengi ‘batemwa ukwangala ukucisho kutemwa Lesa.’ (2 Timote 3:1-5) E ico, abantu abengi muno nshiku tabatemwa Lesa.

Kanshi nga tulefwaya abana besu ukutemwa Yehova Lesa ne mitima yabo yonse, tufwile ukubombesha. Ni fwe tulingile ukubafwa pa kuti bamutemwe ne mitima yabo yonse. Nomba finshi twingacita pa kubafwa?

Tufwile Ukulalanshanya Bwino na Bana

Kuti twayafwa abana ukutemwa Lesa ne mitima yabo yonse nga ca kuti na ifwe bene twalimutemwa ne mitima yesu yonse. (Luka 6:40) E fyo Baibolo yalanda, itila: “Muletemwa Yehova Lesa wenu imitima yenu yonse, ne myeo yenu yonse, na ku maka yenu yonse. Ifyebo ifi, ifyo ndemweba lelo, fibe mu mitima yenu: kabili mulefundisha abana benu no mukoosha.”—Amalango 6:4-7.

Bushe kuti twayafwa shani abana ukutemwa Lesa ne mitima yabo yonse? Ica kubalilapo, tufwile ukwishiba ifyo umwana atontonkanya. E lyo ica bubili ca kuti tufwile ukuleka umwana aishiba ifyaba mu mutima wesu.

Ilyo Yesu Kristu ali na basambi bakwe babili abaleya ku Emao, abakoseleshe ukulanda ifyabasakamike. Lintu akutike ku fyo balandile, e lyo abalungike ukubomfya Amalembo. Kabili pa numa abasambi batile: “Bushe imitima yesu tayacilabilima ilyo acilalanda na ifwe?” Ifi e fyo fwe bafyashi tulingile ukulalanshanya na bana besu. (Luka 24:15-32) Bushe kuti twaishiba shani ifyo umwana wesu atontonkanya?

Nomba line, abafyashi abakusha abana nelyo abakwata abana abakalamba ababa ne mibele isuma mu cilonganino balibepwishe pa fyo balelanshanya na bana babo. Ica kumwenako fye, baGlen abekala ku Mexico bakwata abana bane abakalamba. * Ilyo babepwishe, baGlen batile: “Abafyashi bafwile ukubombesha pa kuti balelanshanya bwino na bana. Ine no mukashi wandi tatwalepoosa inshita iikalamba ku fintu ifishacindama, lelo inshita iikalamba twaleba pamo na bana besu. Ilyo abana besu bali ne myaka 13 ukufika kuli 19, twaleikala nabo icungulo pa nshita ntali tulelanshanya pa kuti batwebe ifyo baletontonkanya. E lyo na lintu tulelya ifya kulya, twalekutika ku fyo balelanda. Ici calengele twishibe umo baleluba kabili twalebalungika cikuuku cikuuku, ilingi line ukwabula no kuti beshibe.”

Pa kuti tulelanshanya bwino na bana, tufwile ukuleka baishiba ifyaba mu mitima yesu. Yesu atile: “Umuntu musuma afumya ifisuma mu cipao icisuma ica mutima wakwe, . . . pantu ku kupaka kwa mu mutima e ko akanwa kakwe kalandila.” (Luka 6:45) BaToshiki bekala ku Japan kabili abana babo batatu baba mu mulimo wa nshita yonse. Ilyo baToshiki babepwishe, batile: “Ilingi line nalebeba ifyo naishilekwata icitetekelo muli Yehova, icalengele nshininkishe ukuti eko aba, e lyo ne fyo ifintu ifyo napitamo fyalenga nshininkishe ukuti ifyo Baibolo ilanda fya cine kabili e fingalenga fye umuntu ukuba ne nsansa.” E lyo baCindy abekala ku Mexico nabo batile: “Lyonse abalume bandi balepepa pamo na bana. Ilyo balekutika ku mapepo yabo ayalefuma pa nshi ya mutima, abana balilwike ukuti Yehova te Lesa wa kwelenganya fye, eko aba.”

Abana Basambilila Sana ku fyo Tucita

Ifyo tucita filasambilisha sana abana ukucila ifyo tubeba pantu incitilo shesu shilenga baimwena ukuti twalitemwa sana Lesa. Icumfwila kuli Yehova e calengele abantu ukushininkisha ukuti Yesu Kristu alitemenwe sana Lesa. Yesu atile: “Pa kuti aba pano isonde beshibe ukuti natemwa  Tata, ifyo na Tata ampeela ifunde lya kucite co, e fyo na ine ndecita.”—Yohane 14:31.

BaGareth bekala ku Wales kabili ni baNte. Ilyo nabo babepwishe, batile: “Abana besu balingile ukwishiba ukuti twalitemwa sana Yehova no kuti tulesha na maka ukulacita ifintu ukulingana no kufwaya kwakwe. Ica kumwenako fye, abana bandi balamona ukuti pa mulandu wa kumfwila Lesa, nga nalufyanya, ndasumina ukuti ni nduba kabili ndalomba ubwelelelo. Nomba abana bandi nabo e fyo bacita.”

BaGreg abena Australia, batile: “Twalefwaya abana besu ukwishiba ukuti ico twacindamika sana mu bumi bwesu, cine ca mu Baibolo. Kanshi pa kusala incito nelyo ukuya ku kwangala, twaletala twaikala pa nshi no kumona nga fikalatulesha ukushimikila no kulasangwa ku kulongana. Tulatemwa ukumona umwana wesu umukashana uwa myaka 19 alebombako bupainiya bwa kwafwilisha kabili na o tafwaya icili conse ukulamupumfyanya.”

Tufwile Ukwafwa Abana Besu Ukwishiba Lesa

Te kuti tutemwe nelyo ukucetekela umuntu uo tushaishiba. Ilyo umutumwa Paulo alefwaya Abena Kristu ba mu Filipi ukutemwa sana Yehova, abalembele ukuti: “Ici e co ntwalilila ukupepela, ukuti ukutemwa kwenu kufule nga nshi pamo no kwishiba kwine kwine no kwiluka konse.” (Abena Filipi 1:9) BaFalconerio abekala ku Peru bakwata abana bane kabili batile: “Ukubelenga no kusambilila Baibolo lyonse kulalenga icitetekelo ca bana ukukosa. Limo limo nga nalekelesha isambililo lya lupwa, icitetekelo ca bana bandi cilanaka.” BaGary abekala ku Australia batila: “Libili libili ndalanga abana ifyo ukusesema kwa mu Baibolo kufikilishiwa. Kabili ndabeba ifyo benganonkelamo nga balekonka ifishinte fya mu Baibolo. Icalenga abana ukuba ne citetekelo cakosa mulandu wa kuti lyonse tulakwata isambililo lya lupwa.”

Nga ca kuti umufyashi talekalipa lintu alesambilisha abana e lyo alelenga baleba abayangukililwa ica kuti balesekako ne nseko, abana balasambilila bwino sana. (Yakobo 3:18) BaShawn na baPauline abekala ku Britain bakwata abana bane. Ilyo babepwishe pa fyo balesambilisha abana batile: “Pe sambililo lya lupwa tatwalekalipila bana nangu ni lintu batampa  ukucita utwa kucitacita. Twalesambilila nabo mu nshila shalekanalekana. Limo twaleeba abana ukusala ifyo balefwaya tusambililepo. Twalebomfyako na mavidio ya mu kuteyanya kwa kwa Yehova. Limo limo nga pali pamo apo twalefwaya ukulanshanya na bana, twaleimika tepu nelyo ukuibwekesha ku numa, lyena nga batamba twalebeba ukulandapo.” BaKim nabo bekala ku Britain, bena balandile ukuti: “Ndapekanya bwino sana isambililo pa kuti ningalaipusha abana amepusho ayengalenga baletontontonkanya pa kwasuka. Tulaipaikisha ukusambilila, kabili palabe nseko.”

Ukubafwa Ukusala aba Kwangala Nabo

Abana besu kuti batemwa sana Yehova no kucindamika ukupepa kwa cine nga balesangwa sana na Bena Kristu banensu. Cisuma ukulapekanya inshita ya kuba pamo na Bena Kristu banensu abo abana bengangala nabo no kusambililako fimo. Lelo pa kucite fi, cikabila ukubombesha. Na kabili abana besu kuti banonkelamo sana nga tuleitako nelyo ukutandalila ababa mu mulimo wa nshita yonse. Ico abengi pali aba babela mu mulimo wa nshita yonse ni co balesangwa sana na babomfi ba kwa Lesa abacincila. Mishonari umo atile: “Ilingi line abafyashi bandi baleita bapainiya ku ca kulya. Balitemenwe sana umulimo wa nshita yonse ica kuti na ine nalefwaisha ukuba painiya.”

Nomba ico tushilingile ukulaba ca kuti abana besu kuti basambilila ne fyabipa ku bantu bambi. Kanshi nga tulefwaya ukusambilisha bwino abana, tufwile ukubacingilila ku bantu ababa ne misango iyabipa. (1 Abena Korinti 15:33) Abafyashi bafwile ukuba abalamuka pa kusambilisha abana ukunayangala na bantu abashaishiba Yehova nelyo abashamutemwa. (Amapinda 13:20) BaShawn abo tulandilepo na pa kubala batile: “Twasambilishe abana besu ukuba bwino sana ku bana be sukulu banabo, no kuti tabali no kulayangala nabo nga bainuka ku sukulu. Abana besu balishibe umulandu twabakanishe ukuba mu tubungwe twa pa sukulu nelyo ukulayangalako ifyangalo fya pa sukulu.”

Umulandu Ukukansha Abana Kwacindamina

Nga tulekansha abana ukulalanda pa fyo basuminamo, tukalenga bakatemwe ukulacita ifilanga ukuti balitemwa Lesa. BaMark abekala ku United States batile: “Twalefwaya abana besu ukumona ukutila kuti baleipakisha ukwebako bambi ifyo basuminamo pa nshita iili yonse, te lintu fye bali mu mulimo wa kushimikila. E ico, nga twaya ku kwangala ku parka, ku lulamba lwa bemba, nelyo mu mutengo, tulasenda amaBaibolo ne fitabo filanda pali Baibolo, kabili tulalanda na bantu twasanga kulya pa fyo twasuminamo. Abana besu balatemwa sana ukushimikila pamo na ifwe muli iyi nshila. Ilyo tulelanshanya na bantu pa Cebo ca kwa Lesa nabo bene balalandapo no kulondolola ifyo basuminamo.”

Umutumwa Yohane alyafwilishe abantu abengi ukutemwa sana Lesa. Alembele pali aba bantu ukuti: “Nshikwete ica kunenga ukutootela icacila pali ifi, pa kuumfwa ukuti abana bandi [muli Kristu] benda mu cine.” (3 Yohane 4) E co nga twayafwa abana ukulatemwa Lesa ne mitima yabo yonse, na ifwe bene tukaba ne nsansa nga nshi.

[Futunoti]

[Ifikope pe bula 9]

Tufwile ukubombesha pa kuti tulelanshanya bwino na bana pa fyo twasuminamo

[Icikope pe bula 10]

Mulekansha abana benu ukulacita ifilanga ukuti balitemwa Lesa

[Abatusuminishe]

Courtesy of Green Chimneys Farm