Ifyo Twingafwaisha Ukwishiba mwi Buuku lya kwa Hosea
Icebo ca kwa Yehova ca Mweo
Ifyo Twingafwaisha Ukwishiba mwi Buuku lya kwa Hosea
MU BUFUMU bwa mikowa 10 ubwa Israele mushele fye abantu abanono abalepepa Lesa wa cine. Ilyo Yeroboamu II aleteka, mu Israele muli sana icuma, lelo lintu fye afwa ne cuma caloba. Nomba mu Israele mwaba icimfulunganya, kabili mu nshita fye inono pa numa ya kwa Yeroboamu II ishamfumu 6 e shakonkana ukuteka kabili shine pali ishi bashipeye fye. (2 Ishamfumu 14:29; 15:8-30; 17:1-6) Pali iyi ine nshita mu Israele muli icimfulunganya, Hosea acili alebomba umulimo wakwe uwa bukasesema uo atendeke mu 804 B.C.E. kabili nabomba pa myaka 59.
Ifilecitika mu cupo ca kwa Hosea filelanga ifyo Yehova omfwa pa bantu bakwe bacipondoka. Mu bukombe bwakwe, Hosea aleta pa bwelu ifilubo fya kwa Israele, asobela ubupingushi ubuli no kwisa pali bena, kabili alanda na pa bekashi ba mu bufumu bwa kwa Yuda. Hosea alemba ifi fyonse mwi buuku ilyainikwa ishina lyakwe kabili abomfya amashiwi aya mutembo e lyo talepita mu mbali pa kulanda ubukombe bwakwe. Apo ili ibuuku lyalipuutwamo na Lesa, ifyebo fyabamo fya mweo kabili fya maka.—AbaHebere 4:12.
“KOPE UMWANAKASHI CILENDE”
Yehova aeba Hosea ukuti: “Kabiye, kope umwanakashi cilende.” (Hosea 1:2) Hosea aumfwila Yehova, aupa Gomere no kufyalamo umwana umwaume. Abana babili abo Gomere akonkeshapo ukufyala bafwile bana ba mu bucende. Amashina ya aba bana, Loruhama na Loami, yaliba ne fyo yapilibula. Yapilibula ukuti Yehova takomfwile abena Israele abashaba na cishinka uluse kabili akabakaana.
Bushe Yehova omfwa shani pa bantu bakwe bacipondoka? Aeba Hosea ukuti: “Kabiye kabili, katemwe umwanakashi umucende uwatemwikwa ku munankwe, ifyo Yehova atemwa abana ba kwa Israele, nelyo bene baalukila ku milungu imbi.”—Hosea 3:1.
Amasuko ku Mepusho ya mu Baibolo:
1:1—Lintu Hosea ali kasesema, mulandu nshi alandile pa mfumu shonse shine isha mu Yuda ilyo mu Israele mwena alumbwilemo fye imfumu imo? Ni pa mulandu wa kuti ishamfumu sha mu lupwa lwa kwa Davidi e shamfumu isho Lesa asalile ukulateka abantu abo aisalile umwine. Ishamfumu shaleteka mu bufumu bwa ku kapinda ka ku kuso tashalefuma mu lupwa lwa kwa Davidi, kano fye ishamfumu sha mu Yuda e shalefuma mu lupwa lwakwe.
1:2-9—Bushe ca cine Hosea aupile cilende? Ee, Hosea aupile umwanakashi uwaishileba umucende. Mwi buuku lyakwe, Hosea talanda nga ca kuti ifyalecitika mu cupo cakwe fyali fye ciloto nelyo icimonwa.
1:7—Ni lilali Yehova aumfwilile aba mu ng’anda ya kwa Yuda uluse no kubapususha? Aya mashiwi yafikilishiwe mu 732 B.C.E. lintu Imfumu Hisekia yaleteka. Muli shilya nshiku, Yehova alifumishepo icintiinya abena Ashuri baleleta ku Yerusalemu lintu atumine malaika ukuyaipaya abashilika abena Ashuri 185,000 mu bushiku fye bumo. (2 Ishamfumu 19:34, 35) Awe e fyo Yehova apuswishe Yuda, te “ku buta nangu ku lupanga nangu ku bulwi, kuli bakafwalo iyo nangu ni ku ba pali bakafwalo,” lelo kuli malaika umo fye.
1:10, 11—Apo ubufumu bwa ku kapinda ka ku kuso ubwa Israele bwawile mu 740 B.C.E., bushe abana ba kwa Israele na bana ba kwa Yuda ‘balonganikwe shani pamo’? Abengi abaleikala mu bufumu bwa ku kapinda ka ku kuso balile mu Yuda ilyo abekashi ba mu Yuda bashilabasenda mu busha ku Babiloni mu 607 B.C.E. (2 Imilandu 11:13-17; 30:6-12, 18-20, 25) Ilyo abaYuda babwelele ku mwabo mu 537 B.C.E., abana ba bena Israele aba mu bufumu bwa ku kapinda ka ku kuso nabo bali pa babwelele.—Esra 2:70.
2:21-23, NW—Finshi fyasobelwe muli aya mashiwi ya kwa Yehova ayatila: “Nkatanda wena [Yesreele] nge mbuto shandi mwi sonde, kabili nkabelelo luse uushabelelwe uluse”? Ishina lye beli Hosea afyele muli Gomere ni Yesreele. (Hosea 1:2-4) Ili shina lipilibula ukuti “Lesa akatande mbuto.” Ubu bwali busesemo ubwalelanda pa fyo Yehova ali no kulonganika abantu bakwe abashelepo mu 537 B.C.E. kabili ali no kubatanda nge mbuto mu Yuda. Impanga iyali amapopa pa myaka 70 yali no kumesha ing’anu, umwangashi walowa, ne miti iyo bafumyako amafuta. Mu mashiwi ayalembwa kwati mushikakulo, uku kusesema kutila ifi fya kulya fisuma fikapaapaata umushili ukufumya umufundo, kabili umushili ukalomba imyulu ukulosha imfula, e lyo imyulu nayo ikapaapaata Lesa ukupanga amakumbi ya mfula. Ifi fyonse fyali no kulacitika pa kuti abashalapo abakabwela bakaipakishe amapaalo ayengi nga nshi. Abatumwa, Paulo na Petro, balondolwele ukuti Hosea 2:23 ilosha na ku kulonganika abashalapo ba muli Israele wa ku mupashi.—Abena Roma 9:25, 26; 1 Petro 2:10.
Ifyo Twingasambililako:
1:2-9; 3:1, 2. Tontonkanyeni pa fyo Hosea aipeeleshe ukutwalilila ukuba mu cupo pa mulandu fye wa kuba ne cumfwila kuli Lesa! Bushe na ifwe twaliba ne cumfwila kuli Lesa ica kuti tulaipusula ukucita ifyo tufwaisha pa kuti fye tucite ukufwaya kwakwe?
1:6-9. Yehova alipata abantu abasangukila ukupepa kwa cine kwati fye ni filya fine apata abacende.
1:7, 10, 11; 2:14-23. Ifyo Yehova asobele pali Israele na Yuda fyalifikilishiwe. Kanshi fyonse ifyo Yehova asosa filacitika.
2:16, 19, 21-23; 3:1-4. Yehova aliiteyanya ukwelela abalapila ne mitima yabo yonse. (Nehemia 9:17) Tufwile ukulapashanya Yehova, ukuba aba cililishi no luse kuli bambi.
“YEHOVA ALI NO MULANDU WA KULUBULWISHA ABEKASHI”
“Yehova ali no mulandu wa kulubulwisha abekashi ba mu calo.” Mulandu nshi? Pantu “mu calo tamuli icine nangu cikuuku nangu kwishiba Lesa.” (Hosea 4:1, NW ) Abena Israele abapondokele Lesa balefinsha abanabo, balesuumya umulopa, balepepa tulesa twa bufi, kabili balecita no bulalelale. Mu nshita ya kuti balombe Yehova ukubafwa, “baita Egupti, baya ku Ashuri.”—Hosea 7:11.
Yehova abilisha ubupingushi bwakwe, atila: ‘Israele akaminwa.’ (Hosea 8:8) Abekashi ba mu bufumu bwa Yuda nabo bene bali no mulandu. Pali Hosea 12:2 (NW ) patila: “Yehova ali no mulandu wa kulubulwisha Yuda, no kulubulwisha Yakobo umwabela fye imibele yakwe; kabili akamupeele calingana ne micitile yakwe.” Lelo abantu bakwe bakabwela na kabili mu calo cabo pantu Yehova alaya ukuti: ‘Ndebashita mbafumye mu maka ya ku Mbo; ku mfwa e ko ndebalubula.’—Hosea 13:14.
Amasuko ku Mepusho ya mu Baibolo:
6:1-3—Bushe ni bani baleti: “Natuye, tubwelele kuli Yehova”? Nalimo abena Israele abashali ne cishinka kuli Yehova e balekoseleshanya ukuti babwelele kuli Yehova. Nga e basosele aya mashiwi, ninshi balebepa fye, tabalapile iyo. Icikuuku cabo cali fye icinono kabili calepwa bwangu nge “kumbi lya lucelo, . . . ngo nume uucelelo kulukuta.” (Hosea 6:4) E lyo limbi uwalandile aya mashiwi ni Hosea, alepaapaata abantu bakwe ukubwelela kuli Yehova. Lelo te mulandu na basosele aya mashiwi, abena Israele abapondweke balekabila ukulapila ne mitima yabo yonse no kubwelela kuli Yehova.
7:4—Ni mu nshila nshi abena Israele bacilende babelele nge “buku ilyakafiwa”? Ukupashanya abena Israele kwi buku kulanga ukuti bali na mapange ayabipa sana mu mitima yabo.
Ifyo Twingasambililako:
4:1, 6. Nga tulefwaya Yehova aletupaala, tufwile ukutwalilila ukusambilila pali wena no kulacita ifyo tulesambilila.
4:9-13. Yehova akapingula abacito bulalelale na baba mu mipepele ya bufi.—Hosea 1:4.
5:1. Abatungulula abantu ba kwa Lesa bafwile ukukaana ubusangu. Nga tabacitile fyo, kuti babeleleka bambi ukuipoosa mu mipepele ya bufi, kabili kuti baba kuli bena ngo ‘lukose nelyo isumbu.’
6:1-4; 7:14, 16. Ukulanda fye ukuti natulapila, kwa fye kabili bumbimunda. Uulufyenye nga alefwaya Lesa amubelele uluse, afwile ukulapila ukufuma pa nshi ya mutima kabili icingalanga ukuti nalapila icine cine, kubwelela ‘ku wa mu muulu,’ e kuti ku kupepa kwapulamo. Alingile ukulacita ifintu ukulingana na mafunde ya kwa Lesa.—Hosea 7:16.
6:6. Umuntu nga alecita ulubembu ninshi tatemwa Lesa. Nangu abombe shani imilimo ya kwa Lesa, nga alecita ulubembu, Lesa akamukanda.
8:7, 13; 10:13. Ku bena Israele abalepepa utulubi icishinte citila “ico umuntu alebyala, e co kabili akalobolola” califikilishiwe.—Abena Galatia 6:7.
8:8; 9:17; 13:16. Ukusesema ukwalelanda pa bufumu bwa ku kapinda ka ku kuso kwalifikilishiwe lintu abena Ashuri baonawile umusumba uukalamba uwa Samaria. (2 Ishamfumu 17:3-6) Twalicetekela ukuti Lesa akacita ifyo asosa kabili akafikilisha ifyo alanda.—Impendwa 23:19.
8:14. Yehova apoosele “umulilo pa mishi [ya mu Yuda]” mu 607 B.C.E. lintu abena Babiloni baonawile Yerusalemu na Yuda nge fyo kasesema asobele. (2 Imilandu 36:19) Fyonse ifyo Lesa alanda filacitika.—Yoshua 23:14.
9:10. Nangu cingati baliipeele kuli Lesa, abena Israele baile “ku Baali-peore, e lyo baipaatwilile kuli Baali wa Nsoni.” Kuti cawama sana nga twasambililako ku fyabacitikile ilyo balufyenye no kuibaka pa kuti tatulekele ukuba ne cishinka kuli Yehova.—1 Abena Korinti 10:11.
10:1, 2, 12. Fwe babomfi ba kwa Lesa tatufwile ukuba no bumbimunda. Nga ‘twatanda mu bulungami, tulobolola umwabelo luse nelyo icikuuku ca kwa Lesa.’
10:5. Bet-abene (icipilibula ukuti “Ing’anda ya Bubifi”) lishina lilanga imisuula ilyo bainike umusumba wa Betele (icipilibula “Ing’anda ya kwa Lesa”). Ilyo iciponti ca ng’ombe ica mu Bet-abene bacisendele muli bunkole, abekashi ba mu Samaria balilooseshe pantu balibasendele kalesa ako baipeeleko. Mwandini ubu buwelewele! Bushe batini ca mano ukucetekela akalubi akashipema akashingaicingilila no kuicingilila?—Amalumbo 135:15-18; Yeremia 10:3-5.
11:1-4. Lyonse Yehova alasunga bwino sana abantu bakwe. Tatitikisha abamunakila.
11:8-11; 13:14. Icebo Yehova asosele ukuti akabwesesha ukupepa kwa cine pa bantu bakwe ‘tacabwelele ibusha kuli ena.’ (Esaya 55:11) Mu 537 B.C.E., abena Israele balifumine muli bunkole mu Babiloni no kubwelelamo ku Yerusalemu. (Esra 2:1; 3:1-3) Fyonse ifyo Yehova alandila muli bakasesema fikacitika.
12:6. Tufwile ukutwalilila ukuba ne cikuuku, umulinganya, no kulalolela Yehova.
13:6. Abena Israele ‘baliikwite, ne mitima yabo yalituumine, e co balabiile [Yehova].’ Tufwile ukutaluka ku fintu fyonse ifingalenga twaba ne cilumba.
“SHALITAMBALALE NSHILA SHA KWA YEHOVA”
Hosea apaapaatile abena Israele ukuti: “We Israele, bwelela kuli Yehova Lesa obe; pantu wawa ku mampuulu yobe.” Akonkomeshe abantu bakwe ukulomba Yehova ukuti: “Lekeleleni amampuulu yesu yonse, buuleni ne cisuma; muleke tufishe kuli imwe no tuombe twa milomo yesu.”—Hosea 14:1, 2.
Uwalapila alingile ukubwelela kuli Yehova, ukulanakila inshila shakwe, no kulatuula amalambo ya kumulumbanya. Mulandu nshi? Pantu “shalitambalale nshila sha kwa Yehova; abalungama e mo benda.” (Hosea 14:9) Ala tulasekelela ukwishiba ukuti abengi “bakaba na katiina kuli Yehova na ku busuma bwakwe mu nshiku sha kulekelesha”!—Hosea 3:5.
[Icikope pe bula 15]
Ifyalecitika mu cupo ca kwa Hosea fyalelanga ifyo Yehova asunga abantu bakwe
[Icikope pe bula 17]
Ilyo umusumba wa Samaria baonawile mu 740 B.C.E., ubufumu bwa mikowa 10 ubwa Israele bwalilobele