Mulandu Nshi Lesa Alekela Ifyabipa Ukulacitika?

AMACUSHI ne fintu ifyabipa filecitika fye mpanga yonse. Abantu aba kaele na bashilika balafwa mu nkondo. Bumpulamafunde no lukaakala na fyo nafiseeka sana. Limbi tapakokwele apo na imwe bene bamufyengele nelyo ukumucusha pa mulandu wa mpatila. Nalimo ifyo mwapitamo nelyo ifyo mwamona fyalilenga muleipusha amuti, ‘Mulandu nshi Lesa alekela ifyabipa ukulacitika?’

Abantu abengi balepusha ici cipusho. Ica kumwenako fye, papita imyaka mupepi na 3,600 apo umuntu wa kwa Lesa uwa cishinka Yobo aipushishe ukuti: ‘Cinshi ico ababifi babela no mweo?’ (Yobo 21:7) Kabili ilyo papitile imyaka 1000, kasesema Yeremia na o alyumfwile ububi lintu amwene abantu ba mu calo aleikala balecita ifyabipa kabili aipwishe ukuti: “Cinshi ico imibele ya babifi ishukila? Cinshi ico babele cibote bonse abafutike cibi?” (Yeremia 12:1) Yobo na Yeremia balishibe ukuti Lesa alilungama. Lelo, nabo bene balelanguluka umulandu ububifi bwafulile. Limbi na imwe bene amano yalapela nga mwamona ifyabipa ifilecitika.

Abantu bamo batila Lesa e walenga ububifi no kucula. Bambi nabo batila, ‘Nga ca kuti Lesa alilungama, alitemwa abantu, kabili alikwata na maka ukucila bonse, mulandu nshi ashafumishapo ububifi no kucula? Mulandu nshi alekela ifyabipa ukulacitika ukufika na ino nshita?’ Icipande cakonkapo calayasuka aya mepusho e lyo na yambi ayacindama.

[Abatusuminishe Ukubomfya Icikope pe bula 3]

AP Photo/Adam Butler