Amepusho Ukufuma ku Babelenga

Bushe Yakobo alilufyenye filya aibepekeshe ukuti ali ni Esau nga fintu Ukutendeka 27:18, 19 kulanda?

Napamo na imwe mwalishiba ili lyashi. Ilyo Isaki akotele, aebele Esau ukuti amwipaile inama mpanga kabili atile: “Ulete na kuli ine, no kuleka ndye, ukuti umutima wandi ukupaale ncili nshilafwa.” Nomba Rebeka umukashi wa kwa Isaki alyumfwile ifyo umulume wakwe alandile, awe e fyo aipike inama iisuma nga nshi, no kweba Yakobo ukuti: “Nobe wingishe [ifya kulya ifi] umuli wiso, no kuleka alye, ukuti akupaale ilyo tailaise mfwa yakwe.” Lyena Yakobo uwafwele ifya kufwala fya kwa Esau ne mpapa sha bana ba mbushi mu mukoshi na ku maboko yakwe, aile kuli wishi ninshi nasenda ne nama iisuma. Ilyo Isaki amwipwishe ukuti, “Ni wani, we mwana wandi?” Yakobo ayaswike ati: “Ni ne Esau, ne beli lyenu.” Isaki alimucetekele kabili alimupaalile.—Ukutendeka 27:1-29.

Kwena, Baibolo tayalondolola bwino bwino umulandu Rebeka na Yakobo bacitile ica musango ulya, lelo ifyo yatweba fitulanga ukuti tabapangiile libela, lelo fyacitike fye palya pene. Tufwile ukwishiba ukuti Icebo ca kwa Lesa tacilanda ukutila filya Rebeka na Yakobo bacitile baliwemye nelyo ukutila balilufyenye, e ico kanshi ili lyashi talifwile ukulenga umuntu ukubepa ubufi e lyo no kucenjesha umuntu umbi. Lelo nangu cibe fyo, Baibolo yalilandapo fimo pali cilya cacitike.

Ica kubalilapo ca kutila, ili lyashi line lilatulangilila bwino bwino ukutila Yakobo e wakwete insambu ya kupaalwa kuli wishi, te Esau iyo. Inshita imo kale, Yakobo alishitile ububeli bwa kwa mpundu munankwe Esau uushacindike ububeli bwakwe, kabili na Esau umwine alisumine ukushitisha ububeli. Esau akabushenye ububeli ne fya kulya pantu ali ne nsala. E fyo “asuulile ububeli.” (Ukutendeka 25:29-34) Kanshi lintu Yakobo atwele inama kuli wishi, alefwaya ukuti amupaale, pantu na kuba e wakwete insambu ya kupaalwa.

Ica bubili ca kutila, ilyo Isaki aishileishiba ukuti napaala Yakobo, tatile alayalula amapaalo amupaalile. Napamo aibukishe filya Yehova aebele Rebeka ninshi na bampundu tabalafyalwa. Yehova atile: “Umukalamba akabombelo mwaice.” (Ukutendeka 25:23) Na kabili nacicindama ukwishiba no kuti lintu Yakobo ali mu kuya ku Harani, Isaki alilundilepo amapaalo na yambi pali yalya amupaalile pa kubala.—Ukutendeka 28:1-4.

Na mu kulekelesha, tufwile ukulaibukisha ukutila Yehova alishibe fyonse ifyalecitika kabili aliposeleko na mano. Yalya mapaalo Isaki apaalile Yakobo e yalya yene Yehova alaile Abrahamu. (Ukutendeka 12:2, 3) Nga ca kuti Lesa talefwaya Yakobo ukupaalwa, ukwabula no kutwishika nga alicitilepo fimo. Lelo Yehova alangilile ukuti filya Yakobo apaalilwe e fyo ifintu fyalingile ukuba, pantu amwebele ukuti: “Indupwa shonse sha pano isonde shikapaalilwa muli iwe na mu bufyashi bobe.”—Ukutendeka 28:10-15.