“Icine Cinshi?”

KATEKA umwina Roma Ponti Pilato e waipwishe Yesu ici cipusho kabili taleipushisha pa mulandu wa kuti alefwaya ukwishiba icine. Pilato talefwaya ukwishiba icine iyo, kabili na Yesu wine tamwaswike. Napamo Pilato alemona kwati icine calyafya sana ukwishiba.—Yohane 18:38.

E fyo na bantu abengi muno calo bamona icine, pamo fye ne ntungulushi shimo isha mapepo, abafunda abantu, e lyo na baba mu fikansa fya calo. Basumina ukuti icine, sana sana icine pa mibele isuma ne cine pali Lesa, taciba ica cine lyonse fye, lelo cilaalukaaluka cila nshita. Balosha mu kuti abantu kuti baisalila abene icibi nelyo icisuma. (Esaya 5:20, 21) Kabili balosha na mu kuti abantu balikwata insambu ya kukaana amafunde ne fishinte fya mibele isuma ifyo abena kale balekonka kabili bafimona ukuti fya kale kabili tafibomba ino nshita.

Lelo kwena nacicindama ukuti twishibe icalengele Pilato ukwipusha cilya cipusho. Yesu atile: “Ici e co nafyalilwe, kabili ici e co naishile pano calo, ukuti nshimike icine ubunte.” (Yohane 18:37) Yesu talemona ukuti icine calyafya sana ica kuti umuntu te kuti acishibe no kucishiba. Alaile abasambi bakwe ukuti: “Mukeshibe cine, ne cine cikamulenga abantungwa.”—Yohane 8:32.

Nomba ni kwi icine cingasangwa? Inshita imo ilyo alepepa kuli Lesa, Yesu atile: “Icebo cenu e cine.” (Yohane 17:17) Muli Baibolo iyalembelwe na bantu abapuutilwemo no mupashi wa mushilo, mwaba icine icitungulula bwino abantu no kubapeela isubilo lisuma ilya kuti ku ntanshi ubumi bukawama, bukaba bumi bwa muyayaya.—2 Timote 3:15-17.

Pilato ena misuula misuula alikeene ukusambilila icine. Nga imwe, bushe mucita shani lintu mwakwata ishuko lya kusambilila icine? Nga mulefwaya ukusambilila “icine” ico Yesu alesambilisha, kuti mwaipusha Inte sha kwa Yehova. Bakatemwa sana ukusambilila icine pamo na imwe.