Ifyo Mwingalacita Ukufwaya kwa kwa Lesa Muno Nshiku
Ifyo Mwingalacita Ukufwaya kwa kwa Lesa Muno Nshiku
“[Kristu] afwilile bonse ukuti abali abomi beikalila abene beka.”—2 ABENA KORINTI 5:15.
1. Shimikeni ifyacitike mu mulimo wa kwa mishonari umo.
BA AARON * ababomba bumishonari muno Afrika bashimike ukuti: “Ilyo inkondo ya bana calo yapwile, motoka yesu e yabalilepo ukuya ku mushi umo ifi uwabelele mu kati sana. Imyotoka shaleyako sha bashilika fye. Palipitile inshita ukwabula ukwishiba ifyalecitika kuli bamunyinefwe ba ku cilonganino cinono icali kuli ulya mushi, lelo twalefwaya ukutwalila bamunyinefwe ifyo balekabila. Twabatwalile ifya kulya, ifya kufwala, ne mpapulo shilanda pali Baibolo, kabili twasendele na vidio ilanda pa kuteyanya kwa kwa Yehova iitila Jehovah’s Witnesses—The Organization Behind the Name. * Abantu abengi nga nshi balishile mu kutamba vidio ku cipaka cesu ica fyani kwati ni filya abantu baya ku cikuulwa batambilamo ubunkolanya. E calengele tutambishe iyi vidio imiku ibili. Abengi abatambileko balisumine ukusambilila Baibolo. Mu fyo twacitile mwalifumine ifisuma nga nshi.”
2. (a) Mulandu nshi Abena Kristu basalilapo ukulabombela Lesa? (b) Mepusho nshi twalalanshanyapo?
2 Mulandu nshi ba Aaron na banabo bailile ku cifulo cayafya ifi? Ni co ukutasha Lesa pe lambo lya cilubula ilya Yesu Kristu, kwalengele baipeela kuli Lesa pa kutila balecita ukufwaya kwakwe. Nga filya fine fyacita ba Aaron na banabo, Abena Kristu bonse abaipeela kuli Lesa ‘tabaikalila abene beka’ lelo fyonse ifyo bacita ‘bacitile mbila nsuma.’ (2 Abena Korinti 5:15; 1 Abena Korinti 9:23) Balishiba ukuti ilyo buno bwikashi bukapita, indalama shonse ne fifulo abantu bakwata muli cino calo tafyakakwate ncito. Kanshi ilyo bali no mweo nabakwata na maka, basalapo ukulacita ukufwaya kwa kwa Lesa. (Lukala Milandu 12:1) Cinshi cingatwafwa ukulacita ukufwaya kwa kwa Lesa? Cinshi cingatwafwa ukupampamina pa kubombela Lesa kabili nani engatupa amaka? Kabili milimo nshi twingabombela Lesa?
Ifingatwafwa Ukulunduluka mu Kubombela Lesa
3. Bushe umuntu atendeka shani ukucita ukufwaya kwa kwa Lesa?
3 Abena Kristu ba cine bafwaya ukulacita ukufwaya kwa kwa Lesa mpaka ne mfwa. Pa kutendeka ukucita ukufwaya kwa kwa Lesa, umuntu alalembesha mwi Sukulu lya Butumikishi, alatendeka ukubelenga Baibolo cila bushiku, atendeka no kushimikila e lyo alunduluka ukufika ku lubatisho. Ilyo tuleya tulelunduluka mu kupepa, tulebukisha amashiwi ya mutumwa Paulo aya kuti: “Etetula pali fi fintu; obelwa kuli fyene, ukuti ukulunduluka kobe kumoneke kuli bonse.” (1 Timote 4:15) Umuntu nga alelunduluka mu kupepa te kutila ninshi alefwaya ukucindikwa ku bantu lelo cilanga fye ukuti alefwaisha ukubombela Lesa no mweo onse. Nga twacita ifyo ninshi tulefwaya Lesa aletutungulula muli fyonse ifyo tucita mu bumi, na kuba e wingatutungulula bwino sana ukucila fwe bene.—Amalumbo 32:8.
4. Cinshi cingatwafwa ukuleka ukusakamana na pashilingile?
4 Lelo ukushimunuka nelyo ukusakamana sana ukuti tatwakabombe bwino kuti kwalenga twafilwa ukulunduluka mu kubombela Lesa. (Lukala Milandu 11:4) Kanshi pa kuti tumone ifyo cawama ukubombela Lesa no kwafwa abantu bambi, tatufwile ukusakamana ukuti tukafilwa. Moneni ifyo cali kuli Erik. Aletontonkanya pa kuya mu kubombela mu cilonganino balanda ululimi lwa ku calo cimbi. Lelo alelanguluka ukuti: ‘Bushe nkaya mu kumfwana na babwananyina? Bushe nkabatemwa? Bushe bakantemwa?’ Atila: “Naishilekutuluka ukuti mfwile ukubika amano ku babwananyina ukucila ukulatontonkanya fye pa fingangwamina. Natile mfwile ukuleka ukusakamana lelo mfwile fye ukubika amano ku kucita ifingaafwa abantu. Nalipepele ukuti Lesa angafwe kabili e fyo nakuukile. Nomba ndaipakisha sana umulimo wandi muli ici cilonganino.” (Abena Roma 4:20) Ca cine, nga twabika amano ku kubombela Lesa na ku kwafwa abantu e lyo twingaba sana ne nsansa no kuipakisha ubumi.
5. Mulandu nshi cawamina ukuteyanya bwino ifintu ilyo tulefwaya ukubombela Lesa? Shimikeni ifyo bamo bacitile ici.
5 Pa kubombela bwino Lesa, tufwile ukuteyanya bwino ifya kucita mu mikalile. Te kuti ciwame ukulakongola sana pantu inkongole kuti shatuteka ubusha ica kuti twalafilwa no kubombela Lesa. Baibolo itucinkulako ukuti: “Uwashima musha ku muntu uumwashima.” (Amapinda 22:7) Nga twacetekela Yehova no kubika amano ku kumubombela te kuti tulekongola na pashilingile. Ica kumwenako fye, Guoming na bankashi yakwe babili pamo na banyinabo bekala uko amayanda yakosa umutengo e lyo ne ncito ishisuma shalyafya ukusanga. Ukubomfya bwino indalama no kwafwana pa kushita ifintu kulalenga ukuti balekumanisha ifyo bakabila mu mikalile nangu ca kutila te bonse pa ng’anda ababomba. Guoming atile: “Inshita shimo, pali ifwe palaba abashilebomba, abashikwata indalama. Na lyo line tulatwalilila ukubomba bupainiya no kusakamana bamayo bwino bwino. Caliwama ukuti bamayo tabafwaya twaleka umulimo wa nshita yonse pa kuti tulebapeela ifintu ifya mutengo.”—2 Abena Korinti 12:14; AbaHebere 13:5.
6. Ca kumwenako nshi cilelanga ifyo twingaalula imikalile yesu pa kuti tulecita ukufwaya kwa kwa Lesa?
6 Nga kwaliba fimo ifya calo ifimusendela sana inshita—nampo nga kufwaya indalama nangu fye ukwangala—mufwile ukwalula sana imikalile yenu pa kuti mutendeke ukucita ukufwaya kwa kwa Lesa. Lelo te kuti mwalule imikalile yenu apo pene fye, kanshi nga mwafilwa ukwaluka bwangu, te kwesha ukumona kwati calaala capwa mwafilwa. Natulande pali Koichi uwalepoosa sana inshita ku kwangala. Ilyo ali umupungwe, Koichi alisambilile Baibolo, lelo pa myaka iingi abikile fye amano ku fyangalo fya pa vidio. Kasuba kamo Koichi ayipwishe ukuti: ‘Bushe ifi fine fye e fyo nakulacita? Nincila imyaka 30, lelo tapali icacindama ico ncita pano calo!’ Koichi alitendeke ukusambilila Baibolo na kabili no kukonka ukufunda ukufuma ku cilonganino. Nangu tayalwile imibele apo pene, alitwalilile ukubombesha. Ukupepa sana kuli Lesa no bwafwilisho ukufuma ku bantu bambi kwalengele asuka aleka ukwangalisha. (Luka 11:9) Fino tulelanda, Koichi mubomfi utumikila kabili aliba ne nsansa.
Mulebomba Ukulingana na Maka Yenu
7. Mulandu nshi cawamina ukwishiba apapelele amaka yesu pa kubombela Lesa?
7 Pa kucita ukufwaya kwa kwa Lesa, kano tulebomba no mweo onse. Tufwile ukuba abacincila, tatufwile ukuba abanang’ani pa kubombela Lesa. (AbaHebere 6:11, 12) Na lyo line, Yehova tafwaya ukuti ilyo tulemubombela tulenaka ica kuti twafuma na kwi fupa. Ukusumina fye ukuti te kuti tubombe umulimo wa kwa Lesa ku maka yesu kulalenga Lesa ukucindikwa kabili kulalanga ukuti twalishiba apapela amaka yesu. (1 Petro 4:11) Yehova alitulaya ukuti akatupeela amaka ayo tukabila pa kucita ukufwaya kwakwe, lelo tatufwile ukulanaka ukucila mu cipimo pa mulandu fye wa kufwaya ukucita ne fyo Lesa ashenekela ifwe ukucita. (2 Abena Korinti 4:7) Ilyo tulebombela Lesa, nga tatulefwaya ukulanaka ica kuti twafuma na kwi fupa, tufwile ukulateyanya bwino imibombele yesu.
8. Cinshi cacitike ku mukashana umo Umwina Kristu uwalefwaya ukulabombesha ku ncito uku ninshi ni painiya, kabili cinshi acitilepo?
8 Moneni ifyo cali kuli Ji Hye uwa ku calo cimo ica ku kabanga ka Asia uwalebomba incito iyakosa sana uku ninshi ni painiya. Ashimika ukuti: “Nalefwaya ukubombesha sana umulimo wa kwa Yehova kabili nalefwaya no kubombesha sana ku ncito, lelo nasangile ukuti nalelaala fye amaawala yasano. Nasukile naleka ukutontonkanya pa cine ico naishibe pa mulandu wa kunaka sana, kabili insansa nalekwata mu kubombela Yehova shalipwile.” Pa kutila Ji Hye alebombela Yehova ‘no mutima onse, no mweo onse, no kutontonkanya konse, e lyo na maka yonse,’ atendeke ukufwaya incito iishingalamusendela sana inshita. (Marko 12:30) Ji Hye atila: “Nangu ca kuti balupwa lwandi balempatikisha ukubomba incito ya kufola indalama ishingi, nabikile sana amano ku kucita ukufwaya kwa kwa Lesa. Indalama sha kushitamo ifyo nkabila mu mikalile pamo nga ifya kufwala ifisuma, shena na nomba ndakwata. Ndomfwa bwino pantu ndakwata inshita iikalamba iya kusendama! Ino nshita ndaba ne nsansa pa kubomba umulimo wa kushimikila, kabili bucibusa bwandi na Yehova bwalikosa sana. Ne calenga ifi mulandu wa kuti nshakwata inshita ya kukumbwa ifya mu calo kabili nshakwata ifimpumbula ku kubombela Lesa.”—Lukala Milandu 4:6; Mateo 6:24, 28-30.
9. Finshi fingacitika ku bantu nga tulebashimikila?
9 Te bonse bengabombela Lesa mu mulimo wa nshita yonse uwa kushimikila. Nga muli bakoloci, mulalwalilila nangu mwaliba na mafya yambi, mufwile ukwishiba ukuti Yehova alamutasha sana pa fyo mwaba aba busumino na pali fyonse ifyo mumubombela no mutima onse. (Luka 21:2, 3) Kanshi nangu ca kutila tatubombele amaawala ayengi, tatufwile ukumona kwati tapali ifikankaala ifyo twacitila abantu. Tutile twashimikila fye pa mayanda ayanono, kabili twasanga ukuti tapali nangu bamo abalefwaya ukumfwa imbila nsuma. Abene ba mayanda, kumo na balya abashafumine ukuti tulande na bo, kuti bashala balelandapo pa nshita iitali nangu fye pa nshiku ishingi! Tatwenekela ukuti onse uwaumfwa imbila nsuma akafwaya ukusambilila icine, lelo twalishiba ukuti kulaba bamo abengafwaya ukusambilila. (Mateo 13:19-23) Bambi mu kuya kwa nshita kuti bafwaya ukusambilila ilyo ifintu fyayaluka mu calo nelyo mu mikalile yabo. Ifwe nga tuleshimikila fye, nangu abantu tabankwileko, ninshi tulebomba umulimo wa kwa Lesa. Tuli “bakabomba banankwe aba kwa Lesa.”—1 Abena Korinti 3:9.
10. Lishuko nshi ilyo bonse mu cilonganino bakwata?
10 Na kabili, nga tulebombesha kuti twayafwa balupwa na babwananyina ba mu cilonganino. (Abena Galatia 6:10) Imilimo yesu iisuma kuti yaafwa sana bambi kabili kuti yalenga bacitapo cimo nangu pengapita inshita iikalamba. (Lukala Milandu 11:1, 6) Nga ca kutila baeluda na babomfi batumikila balebomba bwino, kuti bayafwa sana aba mu cilonganino ukuba bakapepa bakosa no kubomba sana imilimo ya Bwina Kristu. Lesa alitweba ukuti nga twaba “abacincila pe mu mulimo wa kwa Shikulu,” ukucucutika kwesu “te kwa fye.”—1 Abena Korinti 15:58.
Imilimo Mwingabombela Lesa Inshita Yonse
11. Ni kwi kumbi mwingayabombela nga mulabomba bwino mu cilonganino cenu?
11 Fwe Bena Kristu tulomfwa bwino ukuba abomi kabili tufwaya ukucindika Lesa muli fyonse ifyo tucita. (1 Abena Korinti 10:31) Nga tulebomba umulimo wa kushimikila abantu imbila nsuma ya Bufumu ukwabula ukuleka no kubasambilisha fyonse ifyo Yesu alandile, kuti twaba ne shuko lya kubomba imilimo yalekanalekana iingatuletela insansa. (Mateo 24:14; 28:19, 20) Kuti twakuukila na mu cilonganino cimbi umo balefwaya ababomfi na bambi. Limbi kuti caba cilonganino cabela mu cifulo cimbi, icilonganino umo balanda ululimi lumbi nelyo ukuya ku calo cimbi. Baeluda na babomfi batumikila abafikapo abashilaupa kuti babeta ku Sukulu lya Kukansha ilya Butumikishi, e lyo nga bapwa isukulu kuti babatuma ku kubombela ku filonganino fimbi uko balekabila Abena Kristu bakosoka, nangu ku calo cimbi. Abaupana ababa mu mulimo wa nshita yonse kuti baya ku sukulu lya Gileadi mu kusambilila bumishonari no kuya mu kubombela ku calo cimbi. Lyonse fye aba kubombela pa Bethel na ba kubomba imilimo ya bukuule nelyo iya kuwamya ifikuulwa mu misambo, balakabilwa.
12, 13. (a) Cinshi cingamwafwa ukusala umulimo wa nshita yonse uo mwingabomba? (b) Langilileni ifyo imilimo umuntu engasambilila ingamwafwa ukubomba umulimo umbi uo bengamupeela.
12 Mulimo nshi uwa nshita yonse mwingatemwa ukubomba? Apo muli babomfi ba kwa Yehova abaipeela, lyonse fye mufwile ukukonka ubutungulushi ubufuma kuli Yehova na ku kuteyanya kwakwe. ‘Umupashi wakwe uusuma’ ukamwafwa ukusala bwino ico mwingacita. (Nehemia 9:20) Ilingi line nga mwabombako umulimo umo, kuti bamweba ukuya mu kubomba umulimo umbi umo mwingabomfya ifyo mwasambilile mu ncito mwalebomba.
13 Moneni ifyo ba Dennis na bena mwabo ba Jenny babombele. Ilingi line balabombako umulimo wa kukuula Amayanda ya Bufumu. Ilyo kwapitile icikuuku ca mwela ica Hurricane Katrina icaletele mulamba ku kapinda ka ku kulyo aka calo ca United States of America, baliitemenwe ukuya-afwilisha abaponenwe no bwafya. Ba Dennis batile: “Imilimo twasambilile ilyo twalekuula Amayanda ya Bufumu, yalengele catwangukila ukwafwa bamunyinefwe kabili ici calituletela insansa. Abo twayafwile balatasha sana kabili tulomfwa bwino icine cine. Bambi abaipeleeshe ukwafwa abantu kuli ici cifulo tababombele nge fyo baNte babombele. Amayanda ayo baNte bakuulile e lyo na yaonaike, ayo bawemye yali 5,300. Kwali na Mayanda ya Bufumu ayengi ayo bawemye nelyo ukukuula. Abantu abamona iyi milimo, pali nomba balafwaya sana ukumfwa ubukombe bwa Bufumu.”
14. Finshi mufwile ukucita nga mulefwaya ukutendeka umulimo wa nshita yonse?
14 Bushe te kuti ciwame mwasalapo ukulabombela Lesa umulimo wa nshita yonse? Nga mwacite ifyo, Lesa akamupaala nga nshi. Nga ca kutila pali ino nshita kuli ifilemucilikila ukutendeka umulimo wa nshita yonse, kuti cawama mwacitapo fimo. Mufwile ukupepa nga filya Nehemia apepele ilyo alefwaya sana ukubomba umulimo wacindama. Atile: “Mwe Shikulu, . . . lekeni kube ishuko ku mubomfi wenu.” (Nehemia 1:11) Lyena cetekeleni ‘Uumfwa ukupepa,’ no kulacita ifilelanga ukuti mulefwaya Yehova ukwasuka ipepo lyenu. (Amalumbo 65:2) Pa kuti Yehova amupeele ico mulefwaya, mufwile ukucitapo cimo. E lyo nga mwatampa ukubomba umulimo wa nshita yonse, te kwesha ukuneenuka. Mu kuya kwa nshita, mukeshiba bwino ifya kubomba umulimo kabili mukaba ne nsansa sana.
Ukubombela Lesa E Kwingatuletela Sana Insansa
15. (a) Kuti twamwenamo shani nga tulelanshanya na baabombela Lesa pa myaka iingi nangu nga tulebelenga amalyashi yabo? (b) Shimikeni ilyashi lya muntu umo ilyamukoselesha sana.
15 Nga mulecita ukufwaya kwa kwa Lesa, fisuma nshi mwingenekela? Ipusheniko ababombela Yehova pa nshita ntali, sana sana ababomba imyaka iingi mu mulimo wa nshita yonse. Baliba ne nsansa icine cine mu mikalile yabo! (Amapinda 10:22) Bakamweba ukuti lyonse Yehova alabafwa ukukwata ifyo bakabila mu mikalile e lyo ne fintu fye fimbi na lintu ifintu fyafishe. (Abena Filipi 4:11-13) Ukufuma mu 1955 ukufika mu 1961, mu Ulupungu lwa kwa Kalinda mwaleba amalyashi ayalelanda pa fyo ababomfi ba cishinka aba kwa Lesa balebomba. Ukutule lyo, mu Ulupungu lwa kwa Kalinda na muli Loleni! mulaba amalyashi ayengi aya babomfi ba kwa Lesa. Aya malyashi yonse yalalanga ukupimpa kwa babomfi ne nsansa bakwata, nga filya fine ibuuku lya mu Baibolo ilya Imilimo lilanda pa batumwa. Nga mulebelenga aya malyashi yashaiwamina, na imwe mukamona ukuti kwena ifi, e fyo umuntu afwile ukwikala!
16. Cinshi cilenga Umwina Kristu ukuba ne nsansa?
16 Ba Aaron, balya twacilandapo pa kutendeka, bebukisha ukuti: “Mu Afrika, nalishibe abacaice bamo abalesabanta mu calo ukuya balefwaya icingabaletela insansa mu mikalile. Abengi tabalecisanga nakalya. Lelo fwe balebomba umulimo Lesa atupeela, uwa kushimikila abantu imbila nsuma ya Bufumu, twalekwata ifya kucita ifingi ifyaletuletela insansa. Twali-imwena fwe bene ukuti mwaba insansa ishingi mu kupeela ukucila ishaba mu kupokelela.”—Imilimo 20:35.
17. Mulandu nshi tufwile ukulacitila ukufwaya kwa kwa Lesa pali ino nshita?
17 Nga imwe finshi mufwaya ukucita mu mikalile yenu? Nga tapali imilimo nangu imo iyo mufwaya ukubomba iingamwafwa ukulacita ukufwaya kwa kwa Lesa, bwangu bwangu kuti kwaisa fimbi ifya kumusendela inshita na maka yenu. Mulandu nshi mwingonawila ubumi bwenu ubwacindama ku kucita ifimoneka kwati e fyacindama mu calo ca kwa Satana? Nomba line ilyo “ubucushi bukalamba” bukesa, ifyuma ne fifulo abantu bacindika muno calo tafyakakwate ncito. Icikatwafwa fye ni bucibusa bwesu na Yehova. Tukasekelela pantu tukamona ukuti twalicitile bwino ukulabombela Lesa no kulayafwa abantu, no kuti twacitile ukufwaya kwa kwa Lesa no mweo onse!—Mateo 24:21; Ukusokolola 7:14, 15.
[Amafutunoti]
^ para. 1 Amashina yamo nayalulwa.
^ para. 1 Inte sha kwa Yehova e bapanga iyi vidio.
Bushe Kuti Mwalondolola?
• Bushe Yehova omfwa shani nga tulemubombela?
• Bushe ukuteyanya bwino ifya kucita no kukanafusha imilimo imbi kuti kwatwafwa shani ukubombela Lesa no kwafwilisha abantu?
• Milimo nshi twingabombela Lesa inshita yonse?
• Cinshi cingatuletela insansa sha cine pali ino nshita?
[Amepusho]
[Ifikope pe bula 23]
Pa kubombela Yehova no mweo onse, kano imilimo imbi tailetusendela sana inshita
[Ifikope pe bula 24]
Fingi twingacita mu mulimo wa kwa Lesa