Kateka Umukankaala Tasalile Bwino

KWALI kateka umukankaala, uwali umulungami, aleumfwila amafunde, kabili alepepa. Aile kuli Yesu no kumufukamina kabili amwipwishe ati: “Mwe Kasambilisha Musuma, cinshi mfwile ukucita pa kuti mpyane ubumi bwa muyayaya?”

Ifyo Yesu amwaswike fyalangile ukuti pa kuba no bumi bwa muyayaya, ulya muntu alingile ukulasunga amafunde ya kwa Lesa. Ilyo uyu mulumendo aipwishe Yesu ukuti amwebe amafunde ayo afwile ukulasunga, Yesu atile: “Wilaipaya, Wilacita bucende, Wilaiba, Wilashimika ubunte bwa bufi, Cindika wiso na noko, kabili, Uletemwo munobe nga we mwine.” Aya mafunde yali ayacindama kabili nayo yali pa Mafunde ayo Lesa apeele Mose. Lyena uyu mulumendo atile: “Nalibaka ifi fyonse; finshi fimbi nabulisha?”—Mateo 19:16-20.

Yesu “alimutemenwe” kabili atile kuli ena: “Icintu cimo e co wabulisha: kabiye, kashitishe fyonse ifyo wakwata no kupeela abapiina, kabili ukakwate cuma mu muulu, e lyo wise ulenkonka.”—Marko 10:17-21.

Palya pene ulya kateka umulumendo alingile ukusala ico afwile ukucita nomba tacayangwike. Bushe aali no kucita shani? Bushe ali no kuitemenwa ukupeela abapiina ifyuma fyakwe no kutendeka ukukonka Yesu, nelyo ali no kutwalilila fye ne fyuma fyakwe? Bushe ali no kutwalilila ukuba ne fyuma fyakwe pano calo, nelyo bushe ali no kutampa ukufwaya ifyuma fya ku muulu? Cifwile calyafishe sana kuli uyu mulumendo ukusala ifyo alacita. Alitemenwe ukuba cibusa wa kwa Lesa, pantu alesunga Amafunde kabili ifi aipwishe alefwaya ukwishiba na fimbi ifyo afwile ukucita pa kusenaminwa na Lesa. Cinshi acitile? “Afuminepo naikatwa ubulanda, pantu alikwete ifikwatwa ifingi.”—Marko 10:22.

Kateka umulumendo tasalile bwino ifya kucita. Asalapo ukuba umukonshi wa kwa Yesu uwa cishinka, nga alisangile ico alefwaya, e kutila ubumi bwa muyayaya. Baibolo tayatweba icacitike kuli uyu mulumendo. Lelo,  twalishiba ukuti ilyo papitile imyaka nakalimo 40, abashilika abena Roma baonawile Yerusalemu na Yuda. Ifyuma fya baYuda abengi fyalyonaike kabili abengi balifwile.

Lelo umutumwa Petro na basambi bambi tabali nga ulya kateka umulumendo, bena balisalile bwino ifya kucita. ‘Bashile fyonse’ no kukonka Yesu. Ala mwandini balimwenenemo muli filya basalile! Yesu abebele ukuti bakakwata ifingi sana ukucila ifyo bashile. Na kabili, bali no kuba no bumi bwa muyayaya. Tabaumfwile ububi pa numa pa mulandu wa filya basalile ukucita.—Mateo 19:27-29.

Bonse fye kulaba limo ilyo tufwile ukupingula ifya kucita mu mikalile—pa fintu ifishacindama sana nangu pa fyacindama icine cine. Finshi Yesu atufundile pa kupingula ifya kucita mu mikalile? Bushe mukakonka ifyo atufundile? Nga mwasalapo ukukonka ifyo atufundile, mukamwenamo apakalamba. Nomba natulande pa fyo twingacita nga tulefwaya ukukonka ifyo Yesu atufundile e lyo ne fyo twingamwenamo mu fyo asosele.