Bushe Mwabika fye Amano ku fyo Mufwaya Pali Ino Nshita?

SAYANTISITI uwaishibikwa sana Albert Einstein asosele amashiwi ayo abantu abengi batemwa ukulanda. Atile: “Nshitontonkanya pa fyo nkacita ku ntanshi pantu inshita ilapita bwangu sana.” Abantu abengi balasosa amashiwi ayapalana na aya, batila: “Wilasakamana ifikacitika ku ntanshi!” Nelyo limbi mwalyumfwapo bamo basosa abati: “Ulecita fye ifyo ulefwaya.” “Sakamana fye ifya pali ino nshita.” “Ifya mailo filabeko fye.”

Ni kale abantu batendeke ukulande fi. Abena Epikuri batemenwe ukusosa ukuti: “Mulelya no kunwa kabili mulesangalala. Fimbi ifyashala fya cabecabe fye.” Na bantu bamo abaikeleko pa nshita imo ine no mutumwa Paulo nabo e fyo baletontonkanya. Baleti: “Tulye no kunwa, pantu mailo tukafwa.” (1 Abena Korinti 15:32) Baleti imyaka twikala abomi inono sana kabili nga twafwa ninshi calaala capwa, kanshi tufwile ukusangalala ilyo tushilafwa.

Nomba icilenga abengi nga nshi pano calo ukukanatontonkanya pa fya ku ntanshi, te kutila bafwaya fye ukulasangalala. Amafya bapitamo yaleta amacushi ya mutatakuya ayengi nga nshi ica kuti teti batemwe no kutontonkanya pa nshita ya ku ntanshi pantu bamona kwati takuli ifisuma ifikacitika.

Bushe Tufwile Ukupanga Ifyo Tukacita ku Ntanshi?

Nangu fye bantu abekala bwino nabo bamona kwati ukulatontonkanya pa fya ku ntanshi kuicusha fye. Batila: “Nga cinshi ningalaicushisha?” Bamo balanda ukuti abatontonkanya pa fyo bakacita ku ntanshi balakalipwa imitima ilyo amapange yabo yakaana ukubomba. Nangu fye ni Yobo na o alikalipwe umutima lintu amapange yakwe ‘yaputwilwe,’ pantu ifyo alemona kwati fyali no kuletela ulupwa lwakwe insansa fyalyonaike.—Yobo 17:11; Lukala Milandu 9:11.

Robert Burns, umwina Scotland uwalelemba imishikakulo, alingenye amacushi tupitamo ku ficitika lintu umuntu mu kukanaishiba aonaula amansa ya kwa kapanga ilyo alelima na pulao. Kapanga ena alafulumuka ilyo bamonawila umwa kwikala. Lyena Robert Burns atile: ‘E fyo ciba ilyo twaponenwa na macushi ayabipisha, ilingi line na mapange ayasuma ayo tukwata yalafilwa ukubomba.’

 Bushe ici cilolele mu kuti tatulingile ukulatontonkanya pa fyo tukacita ku ntanshi? Awe nakalya. Nga tatuipekenye bwino bwino kuti mwafuma ubusanso ilyo icipuupu nelyo utuyofi tumbi twacitika. Ica kumwenako fye, takwali nangu umo uwali no kulesha icipuupu ico baleita ukuti Hurricane Katrina ukucitika. Lelo abaipekanya bwino bwino, abantu abengi nga tabafwile kabili no musumba wine nga tawaonaike sana.

Nga imwe muletipo shani? Bushe caliba fye bwino ukubika fye amano ku fyo tufwaya pali ino nshita no kukanatontonkanya pa fya ku ntanshi? Moneni ifyo icipande cakonkapo cilelanda pali ili lyashi.

[Ifikope pe bula 3]

“Mulelya no kunwa kabili mulesangalala. Fimbi ifyashala fya cabecabe fye”

[Icikope pe bula 4]

Abaipekanya bwino bwino, abantu abengi nga tabafwile ku cipuupu baleita ukuti Hurricane Katrina kabili no musumba wine nga tawaonaike sana

[Abatusuminishe]

U.S. Coast Guard Digital