“Nalekumbwa Ifyo Uyu Muntu Aali Uwashipa”

MU 2006, Günter Grass, umwina Germany uulemba ifitabo uo bapeele ne cilambu ca Nobel mu 1999, alilembele icitabo umwaba ilyashi lilanda pa bumi bwakwe. Muli ici citabo alondolwele ifyo cali ilyo bamupatikishe ukwingila incito ya kwafwilisha bakapokola na bashilika ba mu Germany. Kabili ashimike pa muntu uwamufikile sana pa mutima ica kuti nangu ni lelo acili alebukisha ifyo uyo muntu alecita nangu cingati palipita ne myaka ukucila pali 60. Ulya muntu alitwalilile ukuba uwashipa ilyo balemucusha pa mulandu wa kuti alicetekele muli Lesa.

Ilyo abalemba inyunshipepala iifuma cila bushiku mu Germany, iyo beta ukuti Frankfurter Allgemeine Zeitung, baile kuli Grass no kumwipusha fimo fimo, aibukishe uyu muntu washipa, uwakeene ukuya ku nkondo. Grass atile ulya muntu “tasumine mu tubungwe twa fikansa fya calo uto abantu batemenwe pali ilya nshita, taali mu baNazi, nangu mu baKomyunisti, nangu fye ni mu ba Socialist. Aali ni Nte ya kwa Yehova.” Grass tebukisha ishina lyakwe, lelo kwena amwitile fye ishina lya kuti Tatucita-ifintu-fya-musango-uyu. Abafwailisha pa Nte sha kwa Yehova basangile ukuti uyu mwaume ni Joachim Alfermann. Ilingi line, balemupuma no kumucusha nga nshi, basukile bamupoosa na mu cifungo umo bailemubika eka. Na lyo line Alfermann ali fye uwashangila kabili alikeene ukwingila ubushilika.

Grass alandile ati: “Ala nalekumbwa ifyo uyu muntu, aali uwashipa. Naleyipusha ne mwine nati: Bushe uyu muntu ashipikisha shani fyonse ifi? Acita shani pa kuti ashipikishe?” Alfermann balimulungulwishe pa nshita ntali pa kuti fye apondokele Lesa. Lyena mu February mu 1944, bamutwele ku nkambi ya kucushishamo abantu iya ku Stutthof. Apo bamufumishe mu nkambi mu April mu 1945, alipuswike inkondo kabili atwalilile ukuba Inte ya kwa Yehova iya cishinka mpaka fye ne mfwa yakwe mu 1998.

Alfermann ali pa Nte ishali nalimo 13,400, mu Germany na mu fyalo ifyo aba Nazi bapokele, isho bacushishe pa mulandu wa kucetekela muli Lesa. Aba baNte balekonka ifyo Baibolo yalanda ukuti tatufwile ukuitumpa mu fikansa fya calo nangu ukulwako inkondo. (Mateo 26:52; Yohane 18:36) BaNte nalimo 4,200 e bo bakakile mu nkambi sha kucushishamo abantu, kabili pali aba, 1,490 e bafwilile mu nkambi. Nangu fye ni muno nshiku, ifyo aba baNte bacitile filafika abantu abengi pa mutima, kumo na bashili Nte sha kwa Yehova, kabili balabakumbwa pa mulandu wa kushipa kwabo.

[Icikope pe bula 32]

Joachim Alfermann