Bushe Mulapanya Ishuko lya Kwebako Bambi Ifyo Mwasumina?

“BUSHE icine cafikapo e ko caba?” Uyu e mutwe abana be sukulu mu Poland balandilepo mu lyashi babebele ukulemba. Ifyo babebele ukulandapo mu lyashi lyabo ni fi: “Tatukabila icine cafikapo. Takwaba umuntu nangu umo uucikabila. Ne cine cafikapo takwaba.” Agata, umwana we sukulu uuli ne myaka 15, Inte ya kwa Yehova, amwene ukuti ishuko lyamoneka ilya kwebako bambi ifyo asumina.

Pa kupekanya ifya kulemba, Agata abalilepo ukupepa kuli Yehova ukuti amwafwe, e lyo atampa ukufwaya ifyebo. Asangile ifyebo fyalelanda pali ili lyashi mu Ulupungu lwa kwa Kalinda ulwa July 1, 1995, kabili ifi fine fyebo e fyo alembele mu lyashi lyakwe. Asalile cilya cine icipusho abengi baishiba ico Ponti Pilato aipwishe Yesu icitila: “Icine cinshi?” (Yohane 18:38) Atile, ici cipusho calangilile ukuti uwaleipusha ali ne misuula, cali kwati alesosa ukuti ‘Icine, e cinshi ico cine? Takwaba icine!’

Agata alembele no kuti icipusho ca kwa Pilato tacipusene no mutwe wa lyashi ilyo babebele ukulemba e lyo ne fyo babebele ukulandapo. Lyena alondolwele ifyo cali pa kuti abantu batampe ukulasambilisha ukuti icine caba fye ku muntu umwine ifyo alemona, no kuti nangu abantu bapusane mu fyo baishiba, ifyo fine baishiba ninshi “fishinka.” Akomaile pa kutila ukusumine fi kulenga abantu ukuleka ukuba ne mibele isuma e lyo no kukanabika amano ku mafunde yasuma. Mu lyashi lyakwe alipwishe ifipusho pamo nge fi, “Bushe pali uwinganiina indeke nga alemona ukuti amafunde bakonkele pa kupanga indeke ukuti ilepupuka mu mulwelele te ya cine sana?” E lyo alandile pali Baibolo ukuti: “Abacetekela Icebo ca kwa Lesa balamona ifilanga ukuti cebo ca cine. Ne filanga, lyashi lya kale, ifya kale ifyo bashula, ifyo basayansi basanga, e lyo ne fyo Baibolo ifunda pa mikalile ya bantu.” Atile, alesubila ukuti bonse abafwaya ukwishiba bwino bwino icine bali no kutekanya fye mpaka bakacisange, kabili nga bacisanga, bakaipetamike no kucisumina.

Agata balimulambwile, bamupeele icipepala ca kulangilila ukuti alibombele bwino sana, kabili bakafundisha bakwe balefwaya sana ukubelenga ifyo alembele. Agata bamwebele no kubelengela abanankwe bonse mu kalasi ifyo alembele. Abana ba pa sukulu asambilila abengi balisumine ukuti alebasambilisha Baibolo. Agata alitemenwe pantu taapanishe ili ishuko lya kwebako abantu abengi ifyo asumina. Kanshi nga muleiteyanya lyonse ukushimikila abantu, mulafuma ifisuma. Ni nshita nshi na imwe mwingashukila iya kwebako abantu ifyo mwasumina?