Mulefwailisha “Ifyashika Fya Kwa Lesa”

“Umupashi ufwailisha muli fyonse, ne fyashika fya kwa Lesa.”—1 ABENA KORINTI 2:10.

1. Finshi fimo ifyaba mu Baibolo ifyo umuntu omfwa bwino sana ilyo atendeka fye ukusambilila Baibolo?

FWE bengi mu cilonganino ca Bena Kristu tulebukisha ifyo twatemenwe ilyo twasambilile fye icine. Twalishibe umulandu ishina lya kwa Yehova lyacindamina, ico Lesa asuminisha ukucula, umulandu abantu bamo bayila ku muulu, ne fisuma ifyo aba cishinka kuli Lesa bakaipakisha ku ntanshi. Limbi kuti na kale twalebelenga Baibolo, nomba ifi fyonse tatwafyumfwile nge fyo na bantu abengi bafilwa ukufyumfwa. Twali ngo muntu uulelolesha mu menshi pali bemba. Pa mulandu wa kuti takwete ica kumwenako, alefilwa ukumona bwino bwino ifisuma ifyaba pa nshi ya bemba. Lelo ilyo afwala amakalashi ya mu menso yalya abasamba insamfi bafwala, atemwa sana pantu yalenga amona isabi ne fya mweo fimbi ifya kupapa kabili ifimoneka bwino sana ifyaba pa nshi ya bemba. Na ifwe ilyo umuntu umo atendeke fye ukutwafwa ukwishiba ifyo Amalembo yalanda, e lyo twatampile ukumfwa “ifyashika fya kwa Lesa.”—1 Abena Korinti 2:8-10.

2. Mulandu nshi ukusambilila ifyaba mu Cebo ca kwa Lesa kushingapwila?

² Bushe tufwile ukwishibako fye fimo fimo ifyo Baibolo ilanda capwa no kupwa? Pa “fyashika fya kwa Lesa” paba na mano yakwe ayasokololwa ku Bena Kristu ukupitila mu mupashi wa mushilo lelo ayo abantu bambi bashaishiba. (1 Abena Korinti 2:7) Ala amano ya kwa Lesa yengi icine cine kabili cilomfwika bwino ukusambilila pali yena! Tatwakatale atwishiba amano ya kwa Lesa yonse. Insansa twakwete ilyo twaishibe fye amasambililo ya kubalilapo aya mu Baibolo tashakatale ashipwa nga twakonkanyapo ukufwailisha “ifyashika fya kwa Lesa.”

3. Cinshi cacindamina ukwishiba bwino umulandu twasuminina ifyo tusambilila?

 ³ Mulandu nshi tufwile ukwishibila “ifyashika”? Nga twaishiba ifyo twasuminamo no mulandu twasuminina ifyo fintu, icitetekelo cesu cikakosa sana kabili tukacetekela sana ifyo tusambilila ukufuma mu Baibolo. Amalembo yatweba ukuti tulebomfya ‘amaka yesu aya kupelulula’ pa kuti ‘tuleshininkisha fwe bene icabo kufwaya kwa kwa Lesa icisuma kabili icapokelelwa kabili icapwililika.’ (Abena Roma 12:1, 2) Nga twaishiba bwino umulandu Yehova afwaila ukuti tulecita ifintu fimo, e lyo twingaba sana ne cumfwila kuli ena. Kanshi ukwishiba “ifyashika” kuti kwatupeela amaka ya kukaana amatunko ya kucite fyabipa no kulenga ‘twapimpilile milimo isuma.’—Tito 2:14.

4. Finshi fifwaikwa ukucita pa kubelenga Baibolo?

⁴ Pa kuti twishibe ifyashika, tufwile ukulabelenga. Nomba ukubelenga tulelandapo te kwa kupitamo fye ulubilo. Tulelanda pa kubelenga kwa kuti tuletontonkanya na pa fyo tulebelenga no kufilinganya ku fyo twaishiba kale. (2 Timote 1:13) Muli uku kubelenga, tufwile no kwiluka umulandu balandile icintu cimo ico twabelenga. Ilyo tulebelenga ifya mu Baibolo tufwile ukwetetula na pa fyo fingatwafwa ukwishiba ifya kucita pa fintu fimo e lyo ne fyo twingafibomfya ku kwafwa bambi. Na kabili, apo “Amalembo yonse yantu yapuutwamo kuli Lesa,” tufwile ukulabelenga “icebo conse icifuma mu kanwa ka kwa Yehova.” (2 Timote 3:16, 17; Mateo 4:4) Ukubelenga ifyaba mu Baibolo ni ncito! Nomba kulomfwika bwino sana, kabili “ifyashika fya kwa Lesa” tafyakosa ica kuti twafilwa ukufyumfwa.

Yehova Alaafwa Abaiceefya Ukwishiba Ifyashika

5. Ni bani bengeshiba “ifyashika fya kwa Lesa”?

⁵ Nangu ca kuti tamwafikile apatali ku sukulu kabili tamwabelesha ukubelenga sana, tamufwile ukumona kwati “ifyashika fya kwa Lesa” te kuti mufyumfwikishe. Ilyo Yesu alesambilisha abantu pano calo, Yehova tasokolwele ubufwayo bwakwe ku ba mano na basambilile sana, lelo abusokolwele ku bashasambilila, abantu yaweyawe abaiceefeshe no kusumina ukufundwa kuli uyu mubomfi wa kwa Lesa. Abo Lesa asokolwelele icine bali fye kwati tunya nga kubalinganya ku basambilile mu masukulu ya pa muulu. (Mateo 11:25; Imilimo 4:13) Ilyo umutumwa Paulo alembeele abasumina banankwe pa “fyo Lesa apekanishisha abamutemwa,” atile: “Ni kuli ifwe Lesa afisokolwela mu mupashi wakwe, pantu umupashi ufwailisha muli fyonse, ne fyashika fya kwa Lesa.”—1 Abena Korinti 2:9, 10.

6. Bushe amashiwi yaba pali 1 Abena Korinti 2:10 yalola mwi?

⁶ Bushe umupashi wa kwa Lesa ufwailisha shani “muli fyonse, ne fyashika fya kwa Lesa”? Umupashi tausokolwela Umwina Kristu umo umo ifya mu Baibolo, lelo Yehova abomfya umupashi wakwe ukutungulula ukuteyanya kwakwe ukusambilisha abantu ba kwa Lesa abaikatana ifyaba muli Baibolo. (Imilimo 20:28; Abena Efese 4:3-6) Mu filonganino fyonse pano calo, abantu basambilila ifyebo fya mu Baibolo fimo fine. Mu kupita kwa myaka, bonse mu filonganino balasambilila ifyebo fya mu Baibolo ifyo na Abena Kristu banabo basambilile kale. Umupashi wa mushilo ulaafwa ababa mu filonganino fyonse ukuba ne mitima ifwaikwa pa kumfwikisha “ifyashika fya kwa Lesa.”—Imilimo 5:32.

 Bushe “Ifyashika fya kwa Lesa” ni Finshi?

7. Cinshi abengi bafililwa ukumfwikisha “ifyashika fya kwa Lesa”?

⁷ Tatufwile ukutontonkanya ukuti “ifyashika” ni filya ifyayafya sana ukuumfwa. Icalenga abengi ukufilwa ukwishiba “ifyashika fya kwa Lesa” te pa mulandu wa kuti amano ya kwa Lesa yalyafya ukumfwa, lelo ni pa mulandu wa kuti Satana alalufya abantu ica kuti balakaana ubwafwilisho bufuma kuli Lesa ukupitila mu kuteyanya kwakwe.—2 Abena Korinti 4:3, 4.

8. Bushe ni finshi ifyashika ifyo Paulo alelandapo mu cipandwa ca butatu ica kalata yakwe ku bena Efese?

⁸ Icipandwa ca butatu muli kalata ya kwa Paulo ku bena Efese citulanga ukuti pa “fyashika fya kwa Lesa,” paliba ifingi ifyo Baibolo yalanda ifyo abantu ba kwa Yehova abengi baishiba bwino bwino. Ne fi, fintu pamo nga, Ulubuto ulo Baibolo yatile lukesa, abo Lesa asala ukufuma pano isonde no kuyateka ku muulu, e lyo no Bufumu bwa kwa Mesia. Paulo alembele ukuti: “Mu nkulo shimbi iyi nkaama tayalengelwe ukwishibikwa ku bana ba bantu nge fyo yasokololwa nomba mu mupashi ku batumwa bakwe na bakasesema bakwe aba mushilo, pa kuti abena fyalo babe impyani shinensu kabili ifilundwa fya mubili umo kabili abakumako pamo na ifwe ku cilayo muli Kristu Yesu.” Paulo atile alipeelwe umulimo wa “kulenga abantu bamone ifyo inkaama yashila ilesakamanwa iyo ukutula ku nshita sha pe yafiswa muli Lesa.”—Abena Efese 3:5-9.

9. Mulandu nshi twingasoselo ukuti ukwishiba “ifyashika fya kwa Lesa” lishuko sana?

⁹ Paulo akonkenyepo ukulondolola ubufwayo bwa kwa Lesa ubwa kuti na “mu mekalo ya mu muulu kwingeshibikwa amano ya misango misango nga nshi aya kwa Lesa ukupitila mu cilonganino.” (Abena Efese 3:10) Bamalaika balasambililako fimo ilyo balemona no kwishiba amano ya kwa Yehova ayamonekela ku fyo acita mu cilonganino ca Bena Kristu. Ala ukwishiba ifintu ifyo na bamalaika bakumbwa lishuko icine cine! (1 Petro 1:10-12) Paulo na kabili atile tulingile ukwesha sana “ukulingulula pamo na ba mushilo bonse ifyabo bufumo no butali no kulepa no kushika,” e kuti ukwishiba bwino amasambilisho ya buKristu. (Abena Efese 3:11, 18) Nomba natulande pa fyashika fya kwa Lesa fimo fimo ifyo nakalimo tushaumfwikisha.

Ifyashika fya kwa Lesa Fimo Fimo

10, 11. Ukulingana na Malembo, ni lilali Yesu aishilebo “bufyashi” bwa “mwanakashi” wa kwa Lesa uwa ku muulu?

¹⁰ Twalishiba ukuti Yesu e mukalamba pa “bufyashi” bwafuma mu “mwanakashi” wa kwa Lesa uwa ku muulu ubwalandwapo pa Ukutendeka 3:15. Pa kumfwikisha bwino uyu mulandu, limbi kuti twaipusha ukuti: ‘Ni lilali Yesu aishileba ubufyashi nelyo Ulubuto ulo batile lukesa? Bushe ni lintu talaisa pano calo, nelyo lilya afyelwe fye pano calo, nangu bushe ni pa lubatisho lwakwe, atemwa ilyo abuushiwe?’

¹¹ Lesa alaile ukuti mu kuteyanya kwakwe ukwa ku muulu, uko ubu busesemo bwita ati “umwanakashi,” mukafuma ubufyashi nelyo umwana uukafwanta insoka ku mutwe. Lelo palipitile imyaka iingi nga nshi, umwanakashi wa kwa Lesa takwete mwana uwingaba na maka ya konaula Satana no kupesha imilimo yakwe. E co ubusesemo bwa kwa Esaya bwalandile ukuti uyu mwanakashi ni “ng’umba” kabili “uwalunguluko mutima.” (Esaya 54:1, 5, 6) Mu kuya kwa nshita, Yesu alifyelwe mu Betelehemu. Lelo ni lilya fye abatishiwe no kusubwa ku mupashi no kuba umwana waibela uwa kwa Lesa, e lyo Yehova asosele ukuti: “Uyu e Mwana wandi.” (Mateo 3:17; Yohane 3:3) Ili line e lyo uyu mwana, aishibikwe ukuti e mukalamba pa “bufyashi” bwa mwanakashi. Inshita imbi, abasambi ba kwa Yesu na bo balisubilwe no mupashi no kuba abana ba kwa Lesa. “Umwanakashi” wa kwa Yehova, uwaleimona nge ‘ngumba iishafyala’ pa myaka iingi, asukile “apongomoko tupundu no kupunda.”—Esaya 54:1; Abena Galatia 3:29.

12, 13. Malembo nshi yatulanga ukuti abasubwa bonse abacili pano calo e “musha wa cishinka kabili uwashilimuka”?

¹² Ica cibili pa fyashika fya kwa Lesa ifyo  atusokolwela, bufwayo bwakwe ubwa kusala abantu 144,000 ukufuma pano calo. (Ukusokolola 14:1, 4) Twalishiba kabili twalisumina ukuti bonse abasubwa no mupashi abacili pano calo e “musha wa cishinka kabili uwashilimuka” uo Yesu atile akalapeela aba mu ng’anda yakwe “ifya kulya” pa nshita iyilingile. (Mateo 24:45) Malembo nshi mu Baibolo ayalanga ukuti ili lisambilisho lya cine? Bushe pali ili lembo Yesu alelanda pa Mwina Kristu fye onse uwingasambilisha aba bwananyina ifya kwa Lesa?

¹³ Lesa aebele uluko bwa bena Israele ukuti: “Imwe muli nte shandi, . . . muli babomfi bandi abo nasala.” (Esaya 43:10) Nomba pa Nisani 11 mu 33 C.E., Yesu aebele intungulushi sha bena Israele ukutila tabali babomfi ba kwa Lesa pantu alibakeene. Yesu atile: “Ubufumu bwa kwa Lesa bukapokwa kuli imwe no kupeelwa ku luko ulutwale fisabo fya buko.” Aebele ne bumba lya bantu ukuti: “Moneni! Ing’anda yenu yashilwa imwe icipompa.” (Mateo 21:43; 23:38) Ulupwa lwa bena Israele ulwali umusha wa kwa Yehova, talwali na cishinka kabili talwashilimwike. (Esaya 29:13, 14) Inshita imbi pali bulya bwine bushiku, ilyo Yesu aipwishe ukuti: “Nga kanshi nani umusha wa cishinka kabili uwashilimuka?” ico aleipusha ca kutila, ‘Luko nshi ulwashilimuka ulukapyana abena Israele, ulukaba umusha wa cishinka uwa kwa Lesa?’ Umutumwa Petro ayaswike ici cipusho ilyo aebele icilonganino ca Bena Kristu basubwa ukuti: “Imwe muli . . . ‘luko lwa mushilo, abantu abali cikwatwa caibela.’” (1 Petro 1:4; 2:9) Lulya luko lwa Bena Kristu basubwa nelyo “Israele wa kwa Lesa,”e lwaishileba umusha wa kwa Yehova. (Abena Galatia 6:16) Nga filya fine abena Israele bonse abali “ababomfi” ba kwa Lesa baleitwa ati umusha, e fyo na Bena Kristu bonse abasubwa abacili pano calo betwa ukuti “umusha wa cishinka kabili uwashilimuka.” Ala lishuko ukupokelela “ifya kulya” ukupitila mu musha wa kwa Lesa!

Kuti Mwamwenamo Sana mu Kubelenga Ifya kwa Lesa

14. Mulandu nshi twingabela ne nsansa nga ca kuti pa kusambilila Baibolo, tatulebelenga fye lubilo lubilo?

¹⁴ Ilyo twaumfwikisha Amalembo yamo, ne citetekelo cesu cakosa sana, bushe tatuba ne nsansa? E mulandu wine ukubelenga ifya mu Baibolo no kutontonkanyapo kwawamina ukucila ukubelenga fye lubilo lubilo. Kanshi ilyo mulebelenga impapulo sha Bwina Kristu muleyipusha amuti: ‘Bushe ifyo balondolola pano fyayampana shani ne fyo naishiba kale pali uyu mulandu? Malembo nshi na yambi nelyo fishinka nshi na fimbi ifyo ndeibukisha ifilelangilila ukuti ifilandilwe muli cino cipande fya cine?’ Nga mwasanga ukuti mufwile ukubelengelapo na fimbi, lembeni icipusho mulefwaya ukuti mukeshibe icasuko no kucisunga pa kuti ico cine e co mukafwailishepo mwi sambililo lyenu ilikakonkapo.

15. Finshi twingasambililapo ifingatuletela insansa nga twafishiba kabili cinshi cingatwafwa ukulafibukisha?

¹⁵ Finshi twingasambililapo ifingatuletela insansa nga twafishiba? Kuti twasambilila ifintu pamo nga ifipangano fyalekanalekana ifyo Lesa apangene na bantu pa kuti bakamwenemo. Kuti mwakosha icitetekelo cenu nga mwabelenga no kumfwikisha amasesemo ayengi ayasobele ukuti Yesu Kristu akesa nelyo mwabelenga ulupapulo ululondolola icikomo ne cikomo mwi buuku lya busesemo limo ilya mu Baibolo. Cimbi na co icingakosha sana icitetekelo cenu, kubelenga ilyashi lya muno nshiku ililanda pa mibombele ya Nte sha kwa Yehova ilyaba mu citabo citila Jehovah’s Witnesses—Proclaimers of God’s Kingdom,  ica ciNgeleshi. * Na kabili, ukupituluka mu fipande fya mu Ulupungu lwa kwa Kalinda ifitila “Amepusho Ukufuma ku Babelenga,” na ko kwine kuti kwamwafwa ukumfwikisha amalembo yamo. Tekanyeni no kumona bwino bwino ifyo balandile pa Malembo ayo babomfeshe pa kulondolola icishinka balelandapo. Ukucite fyo kukamwafwa ukukansha “ukulingulula” kwenu no kumwafwa ukulailuka ifintu. (AbaHebere 5:14) Ilyo mulebelenga, mulelembako na fimo muli Baibolo yenu mwine nelyo pe pepala limbi pa kuti muleibukisha ifyo mwabelenga no kufibomfya ku kwafwa bambi.

Afweni Abacaice Ukubika Amano ku Kubelenga

16. Kuti mwayafwa shani abacaice ukulaumfwa bwino ukusambilila ifya mu Baibolo?

¹⁶ Abafyashi kuti bayafwa abana babo ukutemwa ifya kwa Lesa. Ala mwilamona kwati ifyashika fya kwa Lesa fyalikosa sana ica kuti abacaice te kuti bafyumfwikishe. Nga mwaebela libela abaice ukuti bakafwaye ifyebo pa lyashi limo ilyo mukalandapo pe sambililo lya Baibolo ilya lupwa, kuti mwaisabepusha ifyo basangile. Pe sambililo lya lupwa, kuti mule-eba abana no kuti balangilile ifyo bengalondolwela umuntu ifyo basuminamo ne fyo bengalanga umuntu ukuti ifyo basumina fya cine. Na kabili, kuti mwabomfya broshua itila ‘Moneni Icalo Cisuma’ * pa kulanga abana ukwabelele ififulo ifyalumbulwa mu Baibolo no kubafwa ukumfwikisha ifili mu kubelenga Baibolo ukwa cila mulungu.

17. Mulandu nshi tushifwile ukupoosela inshita yonse fye kwi sambililo lya pa lwesu ilya Baibolo?

¹⁷ Ukusambilila ifya mu Baibolo pa lwenu kulomfwika bwino kabili kulakosha sana icitetekelo, lelo cenjeleni pantu kuti kwawaminina ica kuti mwalaba na ku kupekanya ukulongana. Ukulongana ni nshila na imbi iyo Yehova atufundilamo ukupitila mu “musha wa cishinka kabili uwashilimuka.” Na lyo line, ukufwaya ifyebo na fimbi kuti kwalenga muleasuka bwino pe Sambililo lya Citabo pa Cilonganino nelyo pa fishinka fikalamba ifya mu kubelenga Baibolo ukwa cila mulungu mwi Sukulu lya Butumikishi.

18. Mulandu nshi cacindamina ukubika amano ku kwishiba “ifyashika fya kwa Lesa”?

¹⁸ Ukusambilila ifyashika ifyaba mu Cebo ca kwa Lesa kuti kwamwafwa ukupalama kuli Yehova. Baibolo ilatweba ubusuma bwa kucite fyo ilyo isoso kuti: “Mu cintelelwe ca mano mwaba nga mu cintelelwe ca ndalama; lelo ukwishiba kulaafwa ni mu kuti amano yalenga cibinda wa yako ukuba no mweo.” (Lukala Milandu 7:12) Kanshi calicindama ukubika amano ku kwishiba bwino bwino ifya kwa Lesa. Baibolo yalaya abatwalilila ukufwailisha ukuti: ‘Ukwishiba Lesa bakakusanga.’—Amapinda 2:4, 5.

[Amafutunoti]

Bushe Kuti Mwalondolola?

• Bushe “ifyashika fya kwa Lesa” finshi?

• Mulandu nshi tushifwile kulekela ukufwailisha ifyashika fya kwa Lesa?

• Mulandu nshi twingasoselo kuti Umwina Kristu onse fye alikwata ishuko lya kumfwikisha “ifyashika fya kwa Lesa”?

• Cinshi cingamwafwa ukumwenamo sana mu “fyashika fya kwa Lesa”?

[Amepusho]

[Icikope pe bula 28]

Ni lilali Yesu aishileba Ulubuto ulo batile lukesa?

[Icikope pe bula 31]

Abafyashi kuti baebela libela abana ukufwaya

ifyebo pa lyashi likalandwapo pe sambililo lya lupwa