‘Silfere Yandi, na Golde Yandi’

MULI ba 500 B.C.E., Imfumu Koreshe iya ku Persia yalubwile abantu ba kwa Lesa ukufuma mu busha mu Babiloni. Abantu abengi nga nshi balibwelelemo ku Yerusalemu ku kukuula cipya cipya itempele lya kwa Yehova ilyashele fye icitantaala. Abantu babwelelemo bali abapiina, kabili abena fyalo abali mupepi tabalefwaya ukuti bakuule cipya cipya itempele. E ico abalekuula bamo baletwishika nga ca kutila ubu bukuule bwacindama nga nshi bukapwa.

Yehova aebele kasesema wakwe Hagai ukukoselesha abalekuula ukuti ali na bo. Lesa atile: “Nkatensha ne nko shonse, fikasuke afiisa ifisuma fya nko shonse, na ine njisusha mu ng’anda iyi ubukata.” Pa kukoselesha abalekuula, abasakamene ukuti bapiina, Hagai abebele ubukombe bwa kwa Lesa ubwa kuti: “‘Silfere wandi, na golde wandi,’ cisemo ca kwa Yehova.” (Hagai 2:7-9) Mu myaka fye isano ukutula apo Hagai alandiile ifi fyebo fya kukoselesha, balipwishishe ukukuula.—Esra 6:13-15.

Amashiwi ya kwa Hagai yalakoselesha na babomfi ba kwa Lesa aba muno nshiku pa kubomba imilimo ikalamba iya kutwala pa ntanshi ukupepa Yehova. Mu 1879 ilyo umusha wa cishinka kabili uwashilimuka atampile ukulemba ino magazini, iyo kale baleita ukuti Zion’s Watch Tower and Herald of Christ’s Presence, abikilemo ifyebo fya kuti: “Natucetekela ukuti YEHOVA e mwine wa ino magazini ya ‘Zion’s Watch Tower,’ e ico tatwakatale atulombelesha nangu kupaapaatila abantu ukutwafwa. Ilyo uwatila: ‘Golde yonse na silfere yonse iyaba mu mpili yandi,’ akafilwa ukutupeela indalama, tukeshiba ukuti inshita nomba yafika iya kuleka ukulemba ino magazini.”

Na nomba Ulupungu lwa kwa Kalinda lucili lulalembwa. Pa muku wa kubalilapo, iyi magazini yapulintilwe fye mu ciNgeleshi kabili yonse pamo yali 6,000. Pali ino nshita, impendwa ya Ulupungu lwa kwa Kalinda ulufuma cila mweshi ni 28,578,000, mu ndimi 161. * E lyo magazini na imbi iyo twita ati Loleni!, iifuma cila mweshi iba 34,267,000, mu ndimi 81.

Inte sha kwa Yehova balabomba imilimo iingi iilenga Yehova ukwishibikwa ukuti e Shikulu Uwalinga ukuteka umuulu ne calo, iilenga no kuti imbila nsuma iya Bufumu ishibikwe. Na kuba ifi fine fibili e filenga no kuti balelemba na Ulupungu lwa kwa Kalinda. (Mateo 24:14; Ukusokolola 4:11) Inte sha kwa Yehova muno nshiku balicetekela filya ino magazini yalandile mu 1879. Balicetekela ukuti Lesa alabafwa mu mulimo wabo no kuti tabakatale ababulwa indalama sha kubomfya mu milimo yakwe. Nomba bushe indalama isho Inte sha kwa Yehova babomfya mu mulimo Lesa abapeela shifuma kwi? Kabili milimo nshi imo imo iyo balebomba pa kuti babile imbila nsuma mu calo conse?

Ni kwi Bafumya Indalama?

Ilyo Inte sha kwa Yehova babila imbila nsuma, ilingi line abantu balabepusha ukuti, “Bushe balamufolesha pali ifi mubomba?” Tababafolesha. Baipeleesha ukwaafwa fye abantu banabo. Icilenga aba bantu balebomfya inshita yabo iikalamba ku kweba abantu pali Yehova na pa bulayo bwaba mu Baibolo ubwa kuti ku ntanshi ifintu fikawama, ni co balatasha Lesa. Balamutasha pa fyo abacitila na pa fyo imbila nsuma yabaafwa ukuba ne mikalile isuma no kuba ne subilo. Kanshi balafwaya ukulaebako bambi ifi fintu ifisuma. Ilyo babomba uyu mulimo, bakonka filya Yesu alandile ati: “Mwapeelwe fye ubupe, na imwe mulepeela fye.” (Mateo 10:8) Kanshi ukufwaya ukuba Inte sha kwa Yehova na Yesu, e kulenga balebomfya indalama shabo ku kwebako bambi ifyo basumina, kumo fye na  bekala ukutali sana.—Esaya 43:10; Imilimo 1:8.

Indalama shingi shifwaikwa pa kuti umulimo wa kushimikila ubombeke na pa kuti tukwate ifitwafwa ukubomba uyu mulimo pamo nga bamashini ba kupulintila impapulo, amaofeshi ya baNte, Ifikuulwa fya Kulonganinamo Ukulongana Kukalamba, amayanda ya bamishonari, na fimbipo. Ni kwi indalama shifuma? Abantu e basangula mu kuitemenwa fye indalama babomfya kuli fyonse ifi. Inte sha kwa Yehova tabeba abantu mu filonganino ukuti bafwile ukulalipila indalama sha kwafwilisha imilimo ibombwa mu filonganino, kabili tabashitisha impapulo bashila abantu. Abantu nga balefwaya ukupeela ubupe bwa kwafwilisha umulimo wa kusambilisha, baNte balapokelela ubo bupe. Natulandeko fye pa mulimo umo uo baNte babomba pa kuti imbila nsuma ilebilwa mu calo conse, no yu mulimo, wa kupilibula impapulo.

Impapulo mu Ndimi 437

Pa myaka iingi, impapulo sha Nte sha kwa Yehova shaba pa fya kubelenga ifipilibulwa mu ndimi ishingi sana. Balalemba utupepala twa kubelenga, ututabo, bamagazini, ne fitabo ifikalamba mu ndimi 437. Kwena, pa kuti umulimo wa kupilibula ubombeke, indalama shikabilwa shingi nga filya fine caba na ku milimo imbi iyakuma ukushimikila. Nomba bushe uyu wine mulimo wa kupilibula baubomba shani?

Abalemba impapulo sha Nte sha kwa Yehova nga bapwisha ukulemba ifyebo mu ciNgeleshi, balatuma ifyo fyebo pa kompyuta kuli bakapilibula mu calo conse abasambilila ukubomba uyu mulimo. Kwaliba abapilibula impapulo shesu mu ndimi shalekanalekana. Mwi bumba limo ilya bakapilibula, muba abantu ukutampila pali 5 ukufika kuli 25. Icilenga bakapilibula ukufula nelyo ukucepa, kukosa kwa lulimi bapilibwilamo nelyo imilimo bakwata.

Nga bapwisha ukupilibula balapitulukamo no kubelengamo. Ico bafwaya sana, kupilibula ifyebo ifileumfwika  bwino bwino kabili ifyalungama. Kanshi ni ncito iikalamba. Nga balepilibula ifyebo ifyayafya, bakapilibula balafwaikwa ukusokota sana mu lulimi balefumya ifyebo balepilibula e lyo na mu lulimi balepilibwila pa kutila ifyebo fyumfwike bwino bwino. Ifyebo ifingi fipilibulwa ukufuma mu ciNgeleshi, lelo kwaliba na bapilibula ukufuma mu ciFrench, icina Russia, nelyo iciSpanish. Ica kumwenako fye, pa kuti bapilibule bwino icipande ca muli Loleni! icilelanda pali sayansi nangu pa lyashi lya kale, bafwile ukubelenga ifyebo na fimbi pali ilyo lyashi.

Bakapilibula abengi babombela pa maofeshi ya Nte sha kwa Yehova inshita yonse, e lyo kwaba na babombako uyu mulimo mu nshita mu nshita. Bambi nabo, babombela ku cifulo uko kwine balanda ululimi bapilibula. Bakapilibula tabafola pa mulimo babomba. Bakapilibula ababomba uyu mulimo inshita yonse balabapeela umuputule wa kwikalamo ne fya kulya kabili balapeelako kanono ako bengashitamo tumo tumo utukabilwa sana. Mu calo conse mwaba Inte sha kwa Yehova 2,800 ababomba umulimo wa kupilibula. Pali ino nshita pa maofeshi 98 aya Nte sha kwa Yehova paliba bakapilibula e lyo limo aba pa maofeshi aya e balalolekesha na pali bakapilibula ababa mu fifulo fimbi. Ica kumwenako fye, iofeshi lya mu calo ca Russia lyangalila bakapilibula ukucila pali 230 ababomba uyu mulimo na bafwilishako mu nshita mu nshita. Aba bantu bapilibula indimi ukucila pali 30, ukubikako ne shishaishibikwa sana mu calo ca Russia, pamo nga iciChuvash, iciOssetian, ne ciUighur.

Ifyo Bakapilibula Babafwa Ukulapilibula Bwino

Nge fyo bonse abaeshapo ukusambilila ululimi lumbi baishiba, ukupilibula bwino bwino ifyebo mu lulimi lumbi, takwayanguka. Icifwaikwa, kupilibula ifishinka bwino bwino e lyo no kufilemba bwino ica kutila umuntu nga alebelenga fileumfwika fye kwati bafilembele mu lulimi lwine alebelenga. Pa kuti cibe ifyo, umuntu afwile ukwishiba uyu mulimo. Palapita imyaka pa kuti bakapilibula abapya beshibe bwino bwino uyu mulimo, kabili Inte sha kwa Yehova lyonse fye balasambilisha bakapilibula ifya  kubomba uyu mulimo. Abaishiba sana umulimo wa kupilibula, balaya mu kusambilisha bakapilibula pa kuti baishiba bwino ukupilibula e lyo no kubomfya kompyuta.

Muli uyu programu wa kusambilisha bakapilibula, mulefuma ifisuma. Ica kumwenako fye, aba pa maofeshi ya Nte sha kwa Yehova ku calo ca Nicaragua batile: “E muku wa kubalilapo uo abapilibula ululimi lwa ciMiskito kuno babatumine uwa kubasambilisha ifya kubomba umulimo, uwafumine ku maofeshi ya ku Mexico. Ici cilengele aba bakapilibula ukulabomba bwino sana. Ifyo balepilibula fileumfwika bwino sana.”

Amashiwi Ayafika Abantu pa Mutima

Ico kwabela umulimo wa kupilibula amaBaibolo ne fitabo filanda pali Baibolo mu ndimi abantu balanda, ni co tufwaya icebo cilefika abantu pa mitima, kabili ifyo fine e filecitika. Mu 2006, Inte sha kwa Yehova ku calo ca Bulgaria balitemenwe sana ilyo Baibolo ya Amalembo ya Bwina Kristu aya ciGriki yafumine mu cina Bulgaria. Aba pa maofeshi ya ku Bulgaria balipokelela sana amashiwi ya kutasha pali iyi Baibolo. Abantu mu cilonganino batile “tabaleumfwa fye ifyo Baibolo ilanda epela, lelo filebafika na pa mitima.” Umukalamba umo mu musumba wa Sofia, muli ici cine calo atile: “Nalibelenga Baibolo pa myaka iingi, nomba nshabala mbelengapo Baibolo iya kuti ileumfwika no kumfika pa mutima nge yi.” Mu calo ca Albania na mo, Nte umo umwanakashi ilyo apokele fye Baibolo ya New World Translation atile: “Ala Icebo ca kwa Lesa cileumfwika bwino mu cina  Albania! Lishuko sana ukuti Yehova alelanda na ifwe mu citundu cesu!”

Kwena pa kuti bakapilibula bapwe Baibolo yonse palapita imyaka iingi. Lelo nga ca kuti abantu abengi sana batendeka ukumfwikisha Icebo ca kwa Lesa nga babelenga iyo Baibolo, batini kuti twatila balyonawile nshita?

Tubombela Pamo na Lesa

Kwena ififwaikwa pa kuti tushimikile mbila nsuma fingi, te kupilibula fye iyo. Kwaba no kulemba, ukupulinta, no kutuma impapulo shilanda pali Baibolo e lyo ne milimo imbi iibombeka pa maofeshi, mu miputule, na mu filonganino fya Nte sha kwa Yehova. Fyonse ifi pa kuti ficitwe kano twabombesha kabili ne ndalama kano e po shili. Lelo, abantu ba kwa Lesa ‘balaipeela no kwanga’ pa kubomba uyu mulimo. (Amalumbo 110:3) Bena baishiba ukuti lishuko ukubombako uyu mulimo kabili bamona ukuti Yehova alibacindamika, e mulandu wine abamwena ukuti ni “bakabomba banankwe.”—1 Abena Korinti 3:5-9.

Kwena Lesa uwalanda ukuti ‘silfere yandi, na golde yandi,’ talolela ifwe ukumupeela indalama pa kuti abombe umulimo wakwe. Na lyo line, Yehova alicindamika ababomfi bakwe pa kubapeela ishuko lya kucindika ishina lyakwe ku bupe bapeela ububomba ku kushimika icine “ku nko shonse,” icingafwa abantu ukwisapusuka. (Mateo 24:14; 28:19, 20) Bushe na imwe te kuti mutemwe ukucitapo fimo ku kutwala pa ntanshi uyu mulimo ushakatale aubombwa na kabili?

[Futunoti]

[Akabokoshi pe bula 18]

“BALATWAFWA UKULATONTONKANYA PA FYACINDAMA”

Umukashana wa myaka 14 atumine kalata ku maofeshi ya Nte sha kwa Yehova ku Cameroon kabili alembelemo ukuti: “Ilyo nashitile ifya kubomfya ku sukulu uno mwaka, nashitishe ifitabo nalebelengamo uyu mwaka wapwile pali 2,500 franc [K20,000]. Natuma iyi ndalama ya bupe, kabili nabikapo na 910 francs [K7,000] iyo nalesunga. Twalilileni ukubomba umulimo usuma. Ala mulabomba pa kutupeela Ulupungu lwa kwa Kalinda na Loleni! Aba bamagazini balatwafwa ukulatontonkanya pa fyacindama.”

[Akabokoshi ne Cikope pe bula 18]

UBUPE UBUSUMA SANA

Pa maofeshi ya Nte sha kwa Yehova mu calo ca Mexico, bapokelele kalata yafumine ku mwana wa myaka 6. Ishina lyakwe ni Manuel, kabili ekala mu citungu ca Chiapas State. Apo talati eshibe ukulemba, cibusa wakwe e wamulembeleko kalata. Manuel atile: “Bamama bampeele inkumba iikota. Ilyo yafyele, nalisalilepo akana kamo akasuma sana kabili ako bamunyinane mu cilonganino bangafwileko ukukusha. Nomba pali ino nshita nintemwa sana pa kutuma indalama nasangilemo ilyo nashitishe ilya nkumba. Inkumba yafinine amakilogramu 100, kabili naishitishe pali 1,250 pesos [K440,000]. Mukwai bomfyeni ishi ndalama ku mulimo wa kwa Yehova.”

[Akabokoshi pe bula 19]

‘BOMFYENI ISHI INDALAMA KU KUPILIBULA BAIBOLO’

Pa kulongana kwa citungu ukwa Nte sha kwa Yehova mu 2005 ku calo ca Ukraine, Baibolo ya Amalembo ya Bwina Kristu aya ciGriki yalifumine mu lulimi lwa cina Ukraine. Ubushiku bwakonkelepo, basangile akapepala mu kabokoshi ka misangulo apali amashiwi ya kuti: “Ndi ne myaka 9. Natasha sana pa kutupeela Baibolo ya Amalembo ya ciGriki. Bamayo bapeele ine no mwaice wandi ulu lupiya ulwa kuninina basi pa kuya ku sukulu. Nomba nga takuli imfula, twaleyenda fye pa kuya ku sukulu kabili twalisungile ulu lupiya 50 hryvnia [K40,000]. Ine no mwaice wandi tulefwaya mubomfye iyi ndalama ku kupilibula Baibolo yonse mu lulimi lwa kuno mwesu.”

[Akabokoshi pe bula 20, 21]

IFYO BAMO BASANGULA

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama isho babika mu tubokoshi twa misangulo utwalembwapo ati “Imisangulo ya Mulimo wa Mwi Sonde Lyonse—Mateo 24:14.”

Cila mweshi, ifilonganino filatuma ishi ndalama ku maofeshi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Bible and Tract Society of Pennsylvania, Akabokoshi 33459, Lusaka 10101. Umuntu nga atuma cheke kuli iyi adresi, alingile ukulemba ukuti abakapoka indalama ni ba “Watch Tower Society.” Abalefwaya kuti basangula ne fibeekobeeko nelyo ifipe fimbi ifya mutengo. Uulepeela ifya musango uyu, afwile ukutumina pamo na kalata iyalinga fye no kulondolola ukuti ubo bupe atumine ku maofeshi ya Nte sha kwa Yehova.

UKUPEKANYA UKUPEELA MU KUITEMENWA

Ukulunda pa kupeela indalama fye ishine, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Inshila shimo shimo ni shi:

Inshuwalansi: Umuntu kuti alembesha ba Watch Tower Society ukuti e bakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti indalama sha ku banki, ifipepala ifilanga ukuti umuntu alibikishako indalama ku banki nelyo indalama sha penshoni, fyaseekeshiwa kuli ba Watch Tower Society. Nangu kuti alembesha ukuti ba Watch Tower Society e bakapoka indalama ilyo umwine akafwa. Kuti acite fyo ukukonka na mafunde ye banki abikishako indalama.

Nsonsela: Bamo abakwata indalama ishingi mu twampani kuti batila nsosela wabo aleya ku Watch Tower Society nge ndalama sha bupe. E lyo bambi na bo, kuti baumana akapi no kubika pamo indalama shabo no kushitwala ku banki, e lyo batila nsonsela wabo aleya ku Watch Tower Society.

Impanga ne Fikuulwa: Impanga ne fikuulwa ifyo bengashitisha kuti fyasangulwa ngo bupe, nangu nga ni ng’anda, kuti balemba fye icipangano ca kuti ba Watch Tower Society e bakaba abene ba ng’anda ilyo umwine akafwa. Ipusheni ku maofeshi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo ba Watch Tower Society impanga nelyo ifikuulwa.

Ifya Cishale no Kuseekesha: Umuntu kuti alemba no kusuminishanya na ba Watch Tower Society ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli ba Watch Tower Society. Limo tabali pilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela.

Nga mulefwaya ukupeela mu kuitemenwa, mulingile ukulembela ku maofeshi ya Nte sha kwa Yehova no kwipusha nelyo ukubatumina lamya ukubomfya inambala ili pe samba.

Treasurer’s Office

Watch Tower Bible and Tract Society of Pennsylvania

Box 33459, Lusaka 10101

Lamya: (021) 1 272062

[Ifikope pe bula 19]

Abapilibula mu lulimi lwa ciMiskito, pa musambo wa ku Nicaragua