Bushe Kwaliba Uumukoselesha Ukulabombela Lesa?

USIA atendeke ukuteka ubufumu bwa ku kapinda ka ku kulyo ubwa Yuda ninshi acili fye umwaice. Ali fye ne myaka 16 kabili atekele pa myaka ukucila 50, e kutila ukufuma mu 829 B.C.E. ukufika mu 778 B.C.E. Ukutula fye ku bwaice, Usia “acitile icawama mu menso ya kwa Yehova.” Cinshi calengele ukuti Usia alecita icawama mu menso ya kwa Yehova? Baibolo itila: ‘[Usia] alebombela Lesa ne cishinka inshiku shonse isho Sekalia, uwalemupandako amano mu fyebo fya kwa Lesa, aikele pano isonde, na Lesa alimupaalile.’—2 Imilandu 26:1, 4, 5, Bible wa Mushilo.

Finono twaishiba pali Sekaria, uwalepanda imfumu Usia amano, ni pali ili line fye ilembo e po Baibolo yamulandapo. Na lyo line, apo e ‘walepanda Usia amano mu fyebo fya kwa Lesa,’ Sekaria alibombele umulimo uusuma nga nshi uwalengele imfumu yacaice ukulacita icawama mu menso ya kwa Yehova. Icitabo cimo icilanda pali Baibolo citila Sekaria afwile “alishibe sana Amalembo, alishibe ifingi pali Lesa, kabili alesambilishako na bambi.” (The Expositor’s Bible) Uwasoma Baibolo umo alandile pali Sekaria ukuti: “Alishibe sana amasesemo kabili . . . alikwete amano, aliipeeleshe kuli Lesa, ali umulungami; kabili cimoneka kwati e walengele Usia ukulacita ifisuma mu menso ya kwa Lesa.”

Yehova alipaalile sana Usia pantu ali uwa cishinka, kabili “akosele icibi” pantu ‘Lesa alemwafwa.’ “Mu nshiku shonse sha kwa Sekaria,” Usia aletunguluka muli fyonse ifyo alecita pantu ali uwa cishinka kuli Lesa. (2 Imilandu 26:6-8) Nomba ilyo Usia akwete sana ifyuma, alilekele ukukonka ifyo Sekaria amusambilishe. ‘Umutima wakwe walitakalele kabili aliiletelele. Afutwike Yehova.’ Pa mulandu wa kucita cimo icalangile ukuti takwete akatiina kuli Lesa, alilwele ifibashi kabili ici calengele ukuti aleke ukulabomba imilimo yonse iyo ishamfumu shalebomba.—2 Imilandu 26:16-21.

Bushe na imwe mwalikwata uumusambilisha nelyo uumukoselesha ‘ukulafwaya Lesa’? Nampo nga muli baice nelyo abakalamba, nampo nga muli baume nelyo abanakashi, mufwile mwalikwata umo uumukoselesha ukulabombela Lesa. Muletasha ukuti mwalikwata umuntu wa musango yu pantu amano amupanda yakamwafwa ukulacita icawama mu menso ya kwa Yehova. Muleumfwa kuli uyu Mwina Kristu wakosoka kabili mulekonka ukupanda amano kwakwe. Ala mwikatala amusuula ifyo ‘uumupanda amano mu fyebo fya kwa Lesa’ amusambilisha.—Amapinda 1:5; 12:15; 19:20.