Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga mwalicitile fyo, moneni nga kuti mwayasuka amepusho yakonkapo:

• Mulandu Nshi “Amalembo ya mu Cipingo ca Kale” yacindamina?

Pantu Kalemba wa aya Malembo te lesa uwakaluka uushaishibikwa lelo aba ni Lesa wa kutemwa, Yehova. Yesu na bakonshi bakwe aba kubalilapo balebomfya Amalembo ya ciHebere. Muli aya Malembo mwaliba ifyebo fyacindama ifingatwafwa mu mikalile yesu kabili yalalenga tuleba ne subilo lya ku ntanshi.—9/1, amabula 4-7.

• Inshita yapitapo ukutula ilyo Adamu na Efa babembwike yalanga finshi?

Imyaka yonse iyapitamo, yalenga cishininkishiwe ukuti Satana wa bufi pantu Adamu na Efa na bantu bambi abengi nga nshi balifwa. Inshita iyapitapo yalanga ukuti abantu te kuti baleikala bwino nga baleitungulula abene ukucila ukulatungululwa na Lesa kabili abantu tababapangile ukuti baleitungulula.—9/15, amabula 6-7.

• Mulandu nshi Yakobo bashamwebawilile pali filya aibepekeshe ukuti ali ni Esau?

Yakobo alikwete insambu ya kupaalwa kuli wishi, pantu alishitile ububeli bwa kwa Esau. Ilyo Isaki aishileishiba ukuti napaala Yakobo, tatile alayalula amapaalo amupaalile. Na Lesa uwalingile ukwalula ifintu, alefwaya ukuti Yakobo e o akapaalwe.—10/1, ibula 31.

• Bushe ifi fwe bantu twaba na kampingu filanga shani ukuti tatwasangwike fye?

Mu fyalo fye fyonse, abantu balaitemenwa ukwafwilisha bambi kabili bamo balaibika fye na mu kapoosa mweo. Abantu abasanguka fye nga tabaitemenwa ukwafwilisha bambi pantu nga baba fye kwati ni nama ishishibika amano ku shinankwe.—10/15, ibula 20.

• Mulandu nshi twingalandila ukutila Lesa aliicefya, kabili alanga shani ukuti aliicefya?

Apo Yehova Lesa ni Kabumba kabili e Mulopwe, taba nga ifwe pantu ena tapali ifyo engafilwa ukucita. Lelo ukulingana na 2 Samwele 22:36, Lesa aliicefya pantu alasakamana abalanda abafwaya ukumuteemuna, kabili alababelela uluse. Ciba kwati Yehova alakontama no kufwailisha abamutiina.—11/1, amabula 4-5.

• Bushe ifiinga bashula filanga shani ukuti amalyashi ya mu Baibolo ya cine?

Abashula ifya kushulashula balisanga ifiinga mu Samaria apalembwa amashina aya mikowa 7 iyo balumbula pali Yoshua 17:1-6. Ifiinga bashulile apabelele umusumba wa Aradi filanga ukuti ifyo Baibolo yalanda pa ndupwa umwalefuma bashimapepo fya cine kabili fyalilembwapo ne shina lya kwa Lesa. Ifiinga bashulile apabelele umusumba wa Lakishi fyalanda pa fyo imitekele yali mu Yuda na macushi yalecitikamo lintu abena Babiloni tabalasansa abaYuda.—11/15, amabula 12-14.

• Cinshi citwafwa ukwishiba ukuti Luka e walembele ibuuku lya Imilimo?

Ilandwe lya kwa Luka ne buuku lya Imilimo ya Batumwa fyonse bafitumine nga makalata kuli Teofile, ukulangilila ukuti Luka e walembele amabuuku yonse yabili. Amashiwi pamo nga “twafumineko”, “twatile” na “alitupatikishe” yalanga ukuti Luka na o alibombeleko imilimo yalembwa mwi buuku lya Imilimo. (Imilimo 16:8-15)—11/15, ibula 18.

• Bushe Umwina Kristu afwile ukumona shani ukwipaya inama no kwipaya isabi?

Ukutula pali Noa, Lesa alisuminisha abantu ukulaipaya inama no kulya. Lelo ifunde lya kutila tufwile ukufumyamo umulopa litwafwa ukwishiba ukuti umweo wa nama walicindama kabili tufwile ukuucindika ukuti wafuma kuli Lesa. Kanshi Abena Kristu tabepaya inama ku musamwe fye nelyo ukwesha fye ukumona nga ba malungi nelyo ukwipaya fye icipayeipaye. Calicindama sana ukulaumfwila amafunde ya kwa Kaisare no kulalangulukilako bakampingu ba bambi. (Abena Roma 14:13)—12/1, ibula 31.