Bushe Mwaliiteyanya Ukupusuka Ubushiku bwa bwa Yehova?

“Nabupalamo bushiku bukulu bwa kwa Yehova, nabupalama no kwangufyanisha.”—SEFANIA 1:14.

1-3. (a) Finshi Baibolo ilanda pa bushiku bwa kwa Yehova? (b) ‘Bushiku nshi ubwa kwa Yehova’ ubuli no kwisa nomba line fye?

UBUSHIKU ubukulu ubwa kwa Yehova te bushiku bwa maawala 24. Ni nshita iikalamba iyo Lesa akapingulamo ababifi. Abantu abashipepa Lesa bafwile ukutiina bulya bushiku bwafiita fititi, ubwa bukali, ubwa cipyu, ubwa kumanama, kabili ubwa bulanda. (Esaya 13:9; Amose 5:18-20; Sefania 1:15) Ukusesema kwa kwa Yoele kutila: “Iye, ubushiku ubo! pantu nabupalamo bushiku bwa kwa Yehova, kabili buleisa nga pumpunta uwafuma ku Wa maka yonse.” (Yoele 1:15) Lelo, pali bulya bwine bushiku ubukulu Lesa akapususha “abatambalale mitima.”—Amalumbo 7:10.

² Amashiwi ya kuti “ubushiku bwa kwa Yehova” yalosha ku nshita shalekanalekana ilyo Lesa apingula ababifi. Ica kumwenako fye, “ubushiku bwa kwa Yehova” bwalishile pa baleikala mu Yerusalemu lintu Yehova abomfeshe abena Babiloni ukonaula umusumba mu 607 B.C.E. (Sefania 1:4-7) Na mu 70 C.E. Lesa alipingwile ababifi ilyo abomfeshe abena Roma ukupingula abaYuda abakeene Umwana wakwe. (Daniele 9:24-27; Yohane 19:15) Na kabili Baibolo yalisobela ukuti “ubushiku bwa kwa Yehova” bukesa. Pali ubu bushiku Yehova ‘akalwa ne nko’ shonse. (Sekaria 14:1-3) Lintu umutumwa Paulo apuutilwemo no mupashi, asosele ukuti ubushiku bwa kwa Yehova bukesa mu nshita ya kubapo kwa kwa Kristu ukwatendeke lintu abikilwe pa Bufumu mu muulu mu 1914. (2 Abena Tesalonika 2:1, 2) Ilembo lya mwaka uwa 2007 lyalilinga sana pantu ifilecitika mu calo filanga ukuti ubushiku bwa kwa Yehova nabupalama nga nshi. Ili lembo lyafumine pali Sefania 1:14, apatila: “Nabupalamo bushiku bwa kwa Yehova.”

³ Apo ubushiku ubukulu ubwa kwa Lesa nabupalama, ino e nshita ilyo mulingile ukuipekanya pa kuti mukesepusuka. Bushe kuti mwaipekanya shani? Bushe kuli na fimbi ifyo mulekabila ukucita pa kuti mukaipekanye ukupusuka ubushiku bwa kwa Yehova?

Mube Abaiteyanya

4. Bwesho nshi ubukalamba ubo Yesu aiteyenye ukushipikisha?

⁴ Mu kusesema uko Yesu Kristu asobelemo ukupwa kwa buno bwikashi, aebele abasambi bakwe ukuti: “Mube abaiteyanya.” (Mateo 24:44) Ilyo Yesu alandile aya mashiwi, ninshi ena aliiteyanya ukushipikisha ubwesho ubukalamba ubo ali no kupitamo, e kutila ukupeela umweo wakwe icilubula. (Mateo 20:28) Finshi twingasambilila ku fyo Yesu aiteyenye?

5, 6. (a) Bushe ukutemwa Lesa na bantu kutwafwa shani ukuiteyanya ukupusuka ubushiku bwa kwa Yehova? (b) Bushe Yesu atulangile shani ifyo tulingile ukutemwa abantu bambi?

⁵ Yesu alitemenwe sana Yehova na mafunde Yakwe ayalungama. Ilembo lya AbaHebere 1:9 lilanda pali Yesu ukuti: “Watemenwe ubulungami, kabili wapatile bumpulamafunde. E mulandu wine Lesa, Lesa obe, akusubile amafuta ya kwanga ukucila ababiyo.” Yesu alitwalilile ukuba ne cishinka kuli Wishi wa ku muulu pantu alimutemenwe. Na ifwe nga twatemwa Lesa no kulaumfwila amafunde yakwe nga filya fine Yesu alecita, Yehova Lesa akatubaka. (Amalumbo 31:23) Ukutemwa sana Lesa no kulaumfwila amafunde yakwe kukalenga tukaiteyanye ukupusuka ubushiku ubukulu ubwa kwa Yehova.

⁶ Yesu alitemenwe sana abantu. ‘Alibekatilwe  inkumbu pantu bali abalulunkaniwa kabili abapaswa nge mpaanga ishabula kacema.’ (Mateo 9:36) Ukutemwa e kwalengele ukuti Yesu aleshimikila imbila nsuma ku bantu kabili e kulenga ukuti na ifwe bene tuleshimikila imbila nsuma ya Bufumu ku bantu bambi. Ukutemwa Lesa na bantu kulenga ukuti tube abacincila kabili ici cilenga tuiteyanye ukupusuka ubushiku ubukulu ubwa kwa Yehova.—Mateo 22:37-39.

7. Mulandu nshi tulingile ukulasekelela ilyo tulelolela ubushiku bwa kwa Yehova?

⁷ Yesu aleumfwa bwino ukucita ukufwaya kwa kwa Yehova. (Amalumbo 40:8) Na ifwe nga twaba ne mibele imo ine, tukalasekelela ilyo tulebombela Lesa umulimo wa mushilo. Na ifwe tukaba bakapekape nga filya fine Yesu ali, kabili ici cikalenga tukabe aba nsansa nga nshi. (Imilimo 20:35) Na kuba, “ukusekelela muli Yehova e maka [yesu].” Ukusekelela kukalenga tukaiteyanye bwino ukupusuka ubushiku ubukulu ubwa kwa Lesa.—Nehemia 8:10.

8. Mulandu nshi tulingile ukulapepela lyonse kuli Yehova?

⁸ Ukuba no mute wa kupepa kuli Lesa kwalyafwile Yesu ukuiteyanya ukushipikisha amesho. Yesu alepepa ilyo bamubatishe kuli Yohane. Na pa kusala abatumwa bakwe, Yesu alipepele ubushiku bonse. (Luka 6:12-16) Kabili amapepo yalefuma pa nshi ya mutima ayo Yesu apepele pa bushiku alekeleshe ukuba no mweo pano calo yalafika pa mutima wa muntu fye onse uubelenga Baibolo! (Marko 14:32-42; Yohane 17:1-26) Bushe na imwe mulapepa lyonse, nga filya Yesu alecita? Mulepepa kuli Yehova lyonse, mwilakwankwanya nga mulepepa, mulelomba ukuti umupashi wa mushilo ulemutungulula, kabili mulekonka fyonse ifyo umupashi ulemweba ukucita. Apo ubushiku ubukulu ubwa kwa Lesa nabupalama nga nshi, calicindama sana ukukosha bucibusa bwesu na Shifwe wa ku muulu muli shino nshiku shayafya. Kanshi mulepepa lyonse kuli Yehova pa kuti mupalame kuli ena.—Yakobo 4:8.

9. Bushe ukubika sana amano ku kucindika ishina lya kwa Yehova kwacindama shani?

⁹ Yesu alibikile sana amano ku kucindika ishina lya mushilo ilya kwa Yehova, kabili ici na co calimwafwile ukuiteyanya ukushipikisha amesho ali no kupitamo. Na kuba, asambilishe abasambi bakwe ukuti ilyo balepepa kuli Lesa bafwile no kulomba ukuti: “Ishina lyenu lishishiwe.” (Mateo 6:9) Nga tulefwaisha ukuti ishina lya kwa Yehova licindikwe, nelyo libe ilya mushilo, tukalaesha sana na maka ukukanacita icili conse icingaleta umuseebanya pe shina lyakwe. Kabili ici cikalenga tukaiteyanye sana ukupusuka ubushiku ubukulu ubwa kwa Yehova.

Bushe Pali Umo Mulekabila Ukwaluka?

10. Mulandu nshi tulingile ukuicecetela?

¹⁰ Nga ca kuti ubushiku bwa kwa Yehova bwaishile mailo, bushe kuti mwapusuka? Ifwe bonse tufwile ukuiceceta pa kuti tumone nga pali umo tulekabila ukwaluka. Apo ubumi bwa muntu bwalipipisha kabili inshita fye iili yonse kuti twafwa, ifwe bonse tufwile ukulakosha bucibusa bwesu na Yehova cila bushiku. (Lukala Milandu 9:11, 12; Yakobo 4:13-15) Kanshi natumone nga kuti kwabako mumo umo twingakabila ukwaluka.

11. Buyo nshi ubwa kubelenga Baibolo ubo mwakwata?

 ¹¹ Cimo icacindama ni cilya “umusha wa cishinka” atukonkomesha ukulacita, e kutila ukulabelenga Baibolo cila bushiku. (Mateo 24:45) Limbi kuti mwapanga ukuti nakulabelenga Baibolo cila mwaka, ukutampila ku Ukutendeka ukufika ku Ukusokolola, no kulatontonkanya sana pa fyo ndebelenga. Nga mulebelenga ifipandwa nalimo fine cila bushiku, mukabelenga ifipandwa fyonse 1,189 ifyaba muli Baibolo mu mwaka fye umo. Imfumu yonse iya mu Israele yalingile ukulabelenga ibuuku lya Malango ya kwa Yehova “inshiku shonse isha mweo wa iko.” Yoshua na o afwile alebelenga Amalango lyonse. (Amalango 17:14-20; Yoshua 1:7, 8) Kanshi calicindama nga nshi ukuti baeluda balebelenga Icebo ca kwa Lesa cila bushiku pantu ukucita ifi kulalenga balesambilisha “isambilisho ilituntulu”!—Tito 2:1.

12. Ukwishiba ukuti ubushiku bwa kwa Yehova nabupalama nga nshi kufwile ukumulenga ukulacita finshi?

¹² Ukwishiba ukuti ubushiku bwa kwa Yehova nabupalama nga nshi kufwile ukumulenga ukulasangwa lyonse ku kulongana no kulayasukapo. (AbaHebere 10:24, 25) Nga mulesangwa lyonse ku kulongana no kulayasukapo mukalashimikila bwino sana imbila nsuma ya Bufumu ilyo mulefwaya abantu abalemenena ku bumi bwa muyayaya pa kuti mubafwe ukwishiba Lesa. (Imilimo 13:48) Nalimo kuti mulebombako sana imilimo imbi iya cilonganino, pamo nga ukwafwilisha abakoloci no kukoselesha abacaice. Ala mwandini mukaba ne nsansa icine cine nga mulecite fi!

Ifyo Mumfwana na Bambi

13. Mepusho nshi twingaipusha pa lwa kufwala ubuntu bupya?

¹³ Apo ubushiku bwa kwa Yehova nabupalama nga nshi, bushe mulekabila ukubombesha pa kuti “mufwale ubuntu bupya ubwalengelwe umwabela ukufwaya kwa kwa Lesa mu bulungami bwa cine na bucishinka”? (Abena Efese 4:20-24) Ilyo mulelundulula imibele nga ilya Lesa akwata, abantu bambi bakalamona ukutila ‘mule-endela mu mupashi’ wa kwa Lesa no kutila mwaliba ne fisabo fya mupashi. (Abena Galatia 5:16, 22-25) Bushe kuti mwalumbulapo fimo ifyo imwe no lupwa lwenu mwacita ifilanga ukuti mwalifwala ubuntu bupya? (Abena Kolose 3:9, 10) Ica kumwenako fye, bushe mulafwilisha Abena Kristu banenu na bantu bambi? (Abena Galatia 6:10) Ukulasambilila Baibolo lyonse kukamwafwa ukuba ne mibele iyo Lesa akwata iikalenga mukaiteyanye ukupusuka ubushiku bwa kwa Yehova.

14. Mulandu nshi umuntu alingile ukulalombela umupashi wa mushilo ilyo aleesha na maka ukulundulula ukuilama?

¹⁴ Tutile mulafulwa bwangu kabili mwailuka ukuti mulekabila ukuba abailama sana, bushe cinshi mufwile ukucita? Ukuilama kwaba pa fisabo ifyo umupashi wa mushilo uwa kwa Lesa wingamulenga ukukwata. E ico, mulelomba umupashi wa mushilo, nga filya Yesu asosele ukuti: “Mulelomba, kabili mukapeelwa; mulefwaya, kabili mukasanga; mulekonkonsha, kabili cikeswilwa kuli imwe. . . . E ico, nga imwe nangu muli babifi, mwaishiba ukupeela abana benu ifya bupe ifisuma, kanshi Shinwe wa mu muulu wena akacishamo ukupeela umupashi wa mushilo ku balemulomba!”—Luka 11:9-13.

15. Cinshi mufwile ukucita nga ca kuti tamumfwana no Mwina Kristu munenu?

¹⁵ Tutile tamumfwana no Mwina Kristu munenu, bushe cinshi mufwile ukucita? Nga e fyo caba, mufwile ukubombesha pa kuti mutampe ukulaumfwana. Nga mwacite fyo mukalenga mu cilonganino mukabe umutende no kwikatana. (Amalumbo 133:1-3) Konkeni ukufunda kwa kwa Yesu ukwaba pali Mateo 5:23, 24 nelyo Mateo 18:15-17. Nga mulaleka akasuba kawa mucili fye namukalipa, ninshi mulekabila ukulapwisha bwangu amafya. Ilingi line icifwaikwa fye kuitemenwa ukulalekelela bambi. Paulo alembele ukuti: “Mubelane icikuuku, mube aba mitima ya nkumbu, abaitemenwa ukulekelelana filya na Lesa aitemenwe ukumulekelela muli Kristu.”—Abena Efese 4:25, 26, 32.

16. Ni mwi umo abaupana balingile ukulabelana inkumbu?

¹⁶ Abaupana bafwile ukulabelana inkumbu, kabili limo balingile ukulaelelana. Nga mwailuka ukuti mulekabila ukulatemwa sana abena mwenu no kuba ne nkumbu kuli bena, ibikilisheniko ukucite fyo kabili Lesa akamwafwa ukupitila mu Cebo cakwe. Bushe imwe pa lwenu mufwile  ukucitapo fimo pa kuti muleumfwila amashiwi yaba pali 1 Abena Korinti 7:1-5 ayengamwafwa ukucefya amafya mu cupo cenu no kukanacita ubucende? Ukwabula no kutwishika abalume nelyo abakashi bafwile ukuba “aba nkumbu” ku bena mwabo.

17. Finshi umuntu afwile ukucita nga alicita ulubembu ulwabipisha?

¹⁷ Inga mwalibembuka icabipisha, bushe cinshi mufwile ukucita? Citeni bwangu bwangu ifingalenga Lesa ukumubelela uluse no kumwelela. Kabiyeni kuli baeluda ukuti bamwafwe. Amapepo yabo ne fyo bakamufunda fikamwafwa ukuba icibusa ca kwa Lesa na kabili. (Yakobo 5:13-16) Pepeni kuli Yehova no kulacita ifingalanga ukuti namulapila. Nga tamucitile ifi, mukalayumfwa aba mulandu kabili kampingu yenu yakulamucusha. Davidi alicitile ulubembu ulwabipisha, lelo ilyo atumbwile ulubembu lwakwe kuli Yehova, umutima wakwe walilekele ukulamucusha! Alembele ukuti: “Iye, kushuka kwa muntu uo bwalekelelwo bupulumushi bwakwe, uo lwafimbwapo ulubembu lwakwe! Iye, kushuka kwa muntu uo Yehova tamulingila mampuulu, kabili mu mutima wakwe tamwaba bucenjeshi!” (Amalumbo 32:1-5) Yehova alalekelela umuntu uubembwike nga ca kuti alapila no mutima wakwe onse.—Amalumbo 103:8-14; Amapinda 28:13.

Twalilileni Ukutaluka ku fya Pano Calo

18. Bushe mufwile ukulamona shani icalo?

¹⁸ Ukwabula no kutwishika, mulafwaisha ukwisaikala mu calo cipya icisuma ico Shifwe wa ku muulu atulaya. Nomba bushe mumona shani cino calo cabamo abantu abashalungama abashipepa Lesa? Satana, “kateeka wa pano calo,” takwete maka pali Yesu Kristu. (Yohane 12:31; 14:30) Nangu fye ni mwe bene tamufwaya Kaseebanya ukukwata amaka pali imwe, kanshi muleumfwila amashiwi ya mutumwa Yohane ayatila: “Mwilatemwa icalo nelyo ifya mu calo.” E ca mano ico mwingacita, pantu “icalo cileya no lunkumbwa lwa ciko, lelo uucita ukufwaya kwa kwa Lesa ekalilila umuyayaya.”—1 Yohane 2:15-17.

19. Buyo bwa musango nshi ubo Abena Kristu bacaice balingile ukukwata?

¹⁹ Bushe mulaafwa abana benu “ukuisunga ababula akalema ku fya pano calo”? (Yakobo 1:27) Satana afwaya ukwikata abana benu nga filya abantu baloba isabi ku ndobani. Amakalabu ayengi no tubungwe filalenga abacaice ukuba fye nga bantu ba mu calo ca kwa Satana. Nomba ababomfi ba kwa Yehova baba mu kuteyanya ukukapusuka impela ya buno bwikashi bwabipa. E ico mufwile ukukoselesha Abena Kristu bacaice ukuba “abacincila pe mu mulimo wa kwa Shikulu.” (1 Abena Korinti 15:58) Abafyashi abatiina Lesa balingile ukwafwa abana babo ukuba no buyo ubukalenga bakabe aba nsansa no kuba ne mibele iisuma iicindika Lesa kabili iikalenga bakaiteyanye ukupusuka ubushiku bwa kwa Yehova.

Muletontonkanya pa fyo Mukalacita pa Numa ya Bushiku Ubukulu Ubwa kwa Yehova

20. Mulandu nshi tufwile ukulatontonkanishisha pa mweo wa muyayaya?

²⁰ Nga muletontonkanya pa mweo wa muyayaya, tamwakulasakamikwa sana ilyo mulelolela ubushiku bwa kwa Yehova. (Yuda 20, 21) Nga muletontonkanya pa mweo wa muyayaya mu Paradaise, mukaba ne subilo lya kwisaba no bulamba bwa ku bulumendo na kabili ne nshita iikalamba iya kucitamo ifintu ifisuma no kusambilila ifingi pali Yehova. Na kuba mukatwalilila ukusambilila pali Lesa umuyayaya pantu ifyo umuntu aishiba “fya ku mpela fye fya mibombele yakwe.” (Yobo 26:14) We fintu ubusuma ifyo tulolela!

21, 22. Fintu nshi nalimo mukalasambilishanya na bantu abakabuuka ku bafwa?

²¹ Mu Paradaise, abakabuuka bakalatushimikilako  ifyacitike kale ifyo tushaishiba. Enoke akatushimikilako ifyo ashipile pa kubilisha ubukombe bwa kwa Yehova ku bantu abashalepepa Lesa. (Yuda 14, 15) Noa na o akatulondolwelako ifyo cali pa kukuula icibwato. Abrahamu na Sara bakatwebako ifyo baumfwile ilyo babebele ukufuma mu musumba wa Uri umo baleikala bwino sana no kuya mu kwikala mu matenti. Kabili tontonkanyeni na pa fyo Estere akatulondolwela ifyo alandiileko abantu bakwe no kufulunganya amapange ya kwa Hamani aya kufwaya ukulofya abaYuda. (Estere 7:1-6) Kabili elenganyeni ifyo cikaba ilyo Yona akatushimikilako ifyo cali ilyo ali mu nda ya cisabi inshiku shitatu nelyo ifyo Yohane Kabatisha aumfwile ilyo abatishe Yesu. (Luka 3:21, 22; 7:28) Ala mwandini kukaba ifintu ifisuma ifingi nga nshi ifyo tukasambilila!

²² Mu Kuteka kwa kwa Kristu ukwa Myaka Ikana Limo, nalimo mukakwata ishuko lya kwafwa abakabuuka “ukwishiba Lesa.” (Amapinda 2:1-6) Muno nshiku, tulomfwa bwino sana ukumona uko abantu baishiba Yehova Lesa no kutampa ukucita ukufwaya kwakwe! Nomba tontonkanyeni ifyo cikawama ilya nshita lintu Yehova akamupaala ilyo mukalabombesha ukusambilisha abantu abaikeleko kale sana no kumona uko bakalacita ifyo bakasambilila ne mitima yabo yonse!

23. Cinshi tufwile ukupampaminapo ukucita?

²³ Amapaalo fwe babomfi ba kwa Yehova tuipakisha pali ino nshita yengi sana ica kuti fwe bantu abashapwililika te kuti tukumemo ukuyapenda. (Amalumbo 40:5) Tulatasha sana Lesa pa fintu atupekanishisha ifitwafwa ukuba abakosa mu kupepa. (Esaya 48:17, 18) E co te mulandu ne fyo tulepitamo pali ino nshita, natulebomba no mutima onse umulimo wa mushilo ilyo tulelolela ubushiku ubukulu ubwa kwa Yehova.

Bushe Kuti Mwayasuka Shani?

• Bushe “ubushiku bwa kwa Yehova” e cinshi?

• Finshi mufwile ukucita pa kuti muiteyanye ukupusuka ubushiku bwa kwa Yehova?

• Apo ubushiku ubukulu ubwa kwa Lesa nabupalama nga nshi, ni mwi nalimo umo tulingile ukwaluka?

• Finshi mufwaisha ukwisacita ubushiku bwa kwa Yehova nga bwapita?

[Amepusho]

[Icikope pe bula 12]

Yesu aliiteyenye ukushipikisha amesho

[Icikope pe bula 15]

Ala cikawama nga nshi ukwafwa abakabuuka ukwishiba Yehova!