Icanso Conse Ico Bengafulila Iwe Cikakufilwa

“Icilwilo conse icafulilwa iwe tacakashuke.”—ESAYA 54:17.

1, 2. Bushe ifyacitikila Inte sha kwa Yehova mu Albania filanga shani ukuti amashiwi yaba pali Esaya 54:17 ya cine?

MU myaka ya ku numa, mu calo icinono ica mpili icabela lwa ku kabanga ku kapinda ka ku kulyo aka Bulaya, kwali Abena Kristu abashipa. Ubuteko bwa baKomyunisiti, bamukaanalesa, bwalyeseshe na maka ukubalofya. Nangu cingati balebalungulusha, ukubapoosa mu nkambi sha kucushishamo abantu, no kubabepesha ubufi pa milabasa, aba Bena Kristu batwalilile ukuba abashipa. Bushe ni bani aba bene? Ni Nte sha kwa Yehova isha ku Albania. Nangu ca kuti calyafishe sana ukulalongana pamo no kulashimikila, umupampamina wabo walenga abantu ukucindika Abena Kristu no kulalumbanya ishina lya kwa Yehova. Mu 2006 ilyo balepeela iofeshi lya musambo ilipya, Nte umo uwabombela Yehova pa myaka iingi atile: “Nangu Satana alwishe shani, lyonse alafilwa lelo Yehova ena alacimfya!”

² Ifi fyonse filanga fye apabuuta ukuti amashiwi yaba pali Esaya 54:17 ayo Lesa alaya abantu bakwe ya cine, ayatila: “Icilwilo conse icafulilwa iwe tacakashuke; no lulimi lonse ulwaimina iwe mu kupingula ukalufulunganya.” Ifyacitika mu myaka ya ku numa filanga fye ukuti nangu abantu ba kwa Satana bengacita shani, te kuti baleshe Abena Kristu ba cine ukulapepa Yehova Lesa.

Satana Alapanga Ifyanso, Lelo Alifilwa

3, 4. (a) Fyanso nshi fimo ifyo Satana abomfya? (b) Bushe ifyanso fya kwa Kaseebanya fyafilwa shani ukulesha Abena Kristu ukulalumbanya Yehova?

³ Pa fyanso ifyo bapangila Abena Kristu ba cine paba ifibindo, ukubemina, ukubapoosa mu cifungo, no ‘kubacululusha ku fipope.’ (Amalumbo 94:20) Mu fyalo fimo, nangu fye ni pali ino ine nshita ilyo Inte sha kwa Yehova balesambilila cino cipande, aba Bena Kristu ba cine ‘bale-eshiwa’ pa mulandu wa kuba ne cishinka kuli Lesa.—Ukusokolola 2:10.

⁴ Ica kumwenako fye, umusambo wa Nte sha kwa Yehova mu calo cimo watile mu mwaka fye umo, bapokelele amalipoti 32 ayaleti ababomfi ba kwa Lesa balibasanshile ilyo baleshimikila imbila nsuma. Wasosele no kuti kwali  amalipoti 59 aya Nte sha kwa Yehova isho baikete kuli bakapokola pa mulandu fye wa kushimikila imbila nsuma. Pali aba pali abaice na bakalamba, abaume na banakashi. Bamo balibabulile ififwati fyabo, ukubakopa ifikope, no kubapoosa mu cifungo kwati fipondo. E lyo bambi nabo balabatiinya ukuti bakabacita akantu nga batwalilila ukulashimikila. Ku calo cimbi nako kwali amalipoti 1,100 aya baNte abo baikete, abo balipilishe ndalama ku kapokola, e lyo nabo bapumine. Amalipoti ukucila pali 200 yalanga ukuti ifi fyacitike fye mu bushiku bumo ilyo balongene ku kusefya imfwa ya kwa Yesu! Na lyo line, umupashi wa kwa Yehova walilenga abantu bakwe aba muli ifi fyalo fibili na mu fyalo fye fimbi ukutwalilila ukumubombela te mulandu na mafya ayo bapitamo. (Sekaria 4:6) Icipyu ca balwani babo tacakabaleshe ukulalumbanya Yehova. E co twalishininkisha ukuti takwaba icanso icingacilikila ukufwaya kwa kwa Lesa.

Indimi sha Bufi Balashifulunganya

5. Ni ndimi nshi isha bufi ishaimine ababomfi ba kwa Yehova mu nshita ya batumwa?

⁵ Esaya asobele ukuti abantu ba kwa Lesa bakafulunganya nelyo ukushinina ululimi lonse ulwingabemina. Mu nshita ya batumwa, Abena Kristu ilingi line balebabepesha ubufi, baletila bantu ababi. Amashiwi yaba pa Imilimo 16:20, 21 e fyo yalanga, yatila: “Aba bantu, . . . balefundaula sana umusumba wesu, kabili balesabankanya intambi isho tushasuminishiwa ukupokelela atemwa ukucita, apo tuli bena Roma.” Kwaliko ne nshita ilyo aba mapepo baeseshe ukutunka bakateka ukukanda abasambi ba kwa Kristu, batile: “Aba bantu abapinuna aba pano isonde baisa na kuno, . . . [kabili] balekaanya ifipoope fya kwa Kaisare.” (Imilimo 17:6, 7) Umutumwa Paulo balemwita ukuti “lisakamika” kabili intungulushi ya cakaniko icisongelekanya ubusangu “mwi sonde lyonse.”—Imilimo 24:2-5.

6, 7. Bushe Abena Kristu ba cine bashinina shani abantu abasosa ifyabipa pali bena?

⁶ Kanshi tatupapa ukuti Abena Kristu ba cine muno nshiku balababepesha ubufi bwafita fititi pa kuti fye babonawile ishina lyabo. Mulandu nshi twingasosela ukuti tulashinina abatubepesha ubufi bwa musango yo?—Esaya 54:17.

⁷ Imibele yesu iisuma fwe Nte sha kwa Yehova ilanga apabuuta ukuti ifyo basosa pali ifwe, fya bufi icine cine. (1 Petro 2:12) Ilyo Abena Kristu batwalilila ukulaumfwila amafunde ya mu fyalo bekalamo, ukuba ne mibele isuma, no kulasakamana abantu bambi, ifyabipa ifyo abantu basosa pali bena filamoneka fye apabuuta ukuti bufi bwafita fititi. Imibele yesu e ilanga ukuti tuli bantu basuma. Abamona imilimo iisuma iyo tubomba, balalumbanya Shifwe wa ku muulu kabili balasumina ukuti ababomfi ba kwa Yehova baliba ne mibele iisuma nga nshi.—Esaya 60:14; Mateo 5:14-16.

8. (a) Cinshi limo twingacita pa kuti tuisosele ifyo twasuminamo? (b) Bushe tushinina shani indimi sha bufi nga filya fine Kristu alecita?

⁸ Imibele yesu ilashinina ukuti tuli bantu basuma, lelo limo limo kuti calinga no kuisosela ifyo twasuminamo. Inshila imo iyo twingacitilamo ifi kulemba amakalata ku buteko na ku filye pa kuti fitucingilile. (Estere 8:3; Imilimo 22:25-29; 25:10-12) Ilyo Yesu ali pano isonde, limo limo aleshinina abalemubepesha, ukubalanga ukuti ifyo balesosa fya bufi. (Mateo 12:34-37; 15:1-11) Na ifwe bene tulapashanya Yesu, tulasumina ukulondolola ifyo twasuminamo pa kuti bambi beshibe icishinka. (1 Petro 3:15) Kanshi twikaleka ukupumya kwa bantu tusambilila nabo, abo tubomba nabo, nelyo balupwa abashipepa ukutulesha ukulashimikila imbila nsuma yaba mu Cebo ca kwa Lesa.—2 Petro 3:3, 4.

Yerusalemu “Cilibwe Icafina”

9. Ni Yerusalemu nshi iyo bapashanya ku “cilibwe cafina” ico balandapo pali Sekaria 12:3, kabili ni bani bemininako uyu Yerusalemu pano calo?

⁹ Ukusesema kwa kwa Sekaria kulalondolola umulandu inko shicushisha Abena Kristu ba cine. Moneni ifyo amashiwi yaba pali Sekaria 12:3 yalanda, yatila: “Nomba muli ubo bushiku e mo nkacita Yerusalemu ukube cilibwe icafina ku bantu na bantu bonse.” Bushe ni Yerusalemu  nshi uku kusesema kulandapo? Uku kusesema kulanda pali “Yerusalemu wa mu muulu,” e kuti Ubufumu bwa mu muulu ubo Abena Kristu basubwa babasala ukubapo ishamfumu. (AbaHebere 12:22) Abashalapo abanono abakaba impyani muli ubu Bufumu bwa kwa Mesia bacili pano calo. Abasubwa babombela pamo na banabo, “impaanga shimbi,” lintu bacincisha abantu ukutendeka kulanakila Ubufumu bwa kwa Lesa ilyo inshita ishilapwa. (Yohane 10:16; Ukusokolola 11:15) Bushe inko shayankulako shani kuli ubu bwite? Kabili bushe Yehova atungilila shani ababomfi bakwe muno nshiku? Lekeni tubebete sana Sekaria icipandwa 12 pa kuti tumone ifyo inko shayankulako kuli ubu bwite ne fyo Yehova atungilila ababomfi bakwe muno nshiku. Nga twabebeta icipandwa 12 twalashininkisha ukuti ‘icilwilo conse’ ico bapangila abasubwa ba kwa Lesa na banabo, ‘tacakashuke.’

10. (a) Mulandu nshi ababomfi ba kwa Lesa babacushisha? (b) Cinshi cacitika ku besha ukufumya “icilibwe cafina” mu nshila?

¹⁰ Pali Sekaria 12:3 patila inko ‘shilaikusulula.’ Bushe inko shiikusulula shani? Lesa atila imbila nsuma ya Bufumu ilingile ukubilwa. Inte sha kwa Yehova balibikako sana amano ku kushimikila imbila nsuma. Nomba ukusabankanya ukuti Ubufumu bwa kwa Lesa e bwingalenga fye abantu ukulaikala bwino kwaba kwati “cilibwe icafina” ku nko. Ici cilibwe caba kwati calicilika inshila ya ishi nko, kanshi shileesha ukucifumya mu nshila lintu shikaanya abashimikila imbila nsuma ya Bufumu. Inko ishikaanya abashimikila imbila nsuma ya Bufumu ‘shilaikusulula’ icabipisha. Kabili shilaseebana ilyo shifilwa ukulesha ababomfi ba kwa Lesa ukulashimikila imbila nsuma. Te kuti shilofye abapepa Lesa wa cine abatemwa ukubila “imbila nsuma ya muyayaya” iya Bufumu bwa kwa Lesa ilyo impela ya buno bwikashi bwabipa ishilafika. (Ukusokolola 14:6) Mu calo cimo ica mu Afrika, kapokola uubombela mu cifungo amwene ifyo balecusha Inte sha kwa Yehova, kabili atile: ‘Muleipoosela fye nshita ukulacusha aba bantu. Tabakasuusuke, lelo bayabalefulilako fye.’

11. Bushe Lesa afikilisha shani ubulayo bwakwe ubwaba pali Sekaria 12:4?

¹¹Belengeni Sekaria 12:4. Yehova alaya ukuti mu mampalanya akafulunganya no kupofwisha abalwisha abantu bakwe ababila imbila nsuma ya Bufumu ukwabula umwenso. Yehova alifikilisha ifyo alaile. Ica kumwenako fye, mu calo cimo umo babindile abapepa Lesa wa cine, abalebakaanya balifililwe ukulesha aba bantu ukulapokelela impapulo shilanda pali Baibolo. Inyunshipepala imo yatile Inte sha kwa Yehova shalebomfya ama balloon pa kwingisha impapulo shilanda pali Baibolo muli cilya calo! Ifyo Lesa alaile ababomfi bakwe aba cishinka fyalifikilishiwe, atile: ‘Nkashibula amenso yandi, na kafwalo onse uwa bantu na bantu nkoma ku bupofu.’ Apo icipyu cilabapelenganya, abalwani ba Bufumu bwa kwa Lesa tabeshiba ifya kucita pantu baba kwati balipofula. Nomba ifwe twalishininkisha ukuti Yehova akacingilila ibumba lya bantu bakwe kabili akulabasakamana.—2 Ishamfumu 6:15-19.

12. (a) Bushe Yesu asonteke shani umulilo ilyo ali pano isonde? (b) Mu mampalanya, bushe Abena Kristu basubwa basonteka shani umulilo ku fintu, kabili cinshi cafumamo?

 ¹²Belengeni Sekaria 12:5, 6. Abo Sekaria aitile ati “imikowa ya kwa Yuda” Bena Kristu basubwa abo bapeela umulimo wa kutungulula abantu ba kwa Lesa. Yehova alalenga Abena Kristu basubwa ukuba abacincila kwati mulilo ilyo balebomba umulimo wa kutungilila Ubufumu bwa kwa Lesa. Bushiku bumo Yesu aebele abasambi bakwe ukuti: “Naishile ku kusonteka umulilo pano isonde.” (Luka 12:49) Ukwabula no kutwishika alisonteka umulilo wa mampalanya. Yesu ali uwacincila pa kushimikila, kabili ico alelandapo sana Bufumu bwa kwa Lesa. Ici calengele ukuti mu Yudea mube icimfulunganya. (Mateo 4:17, 25; 10:5-7, 17-20) Ifi fine e fyaba na basambi ba kwa Kristu aba muno nshiku, umulandu no kucincila kwabo mu mampalanya balasonteka umulilo ku fintu kwati “ciinga icilipo umulilo mu nkuni, kabili ngo mwenge uuleaka mu mifunshi.” Icitabo ca The Finished Mystery * icafumine mu 1917 calisansalike ubumbimunda bwa mu Kristendomu. Ici calengele bashimapepo ba mu Kristendomu ukukalipa nga nshi. Kabili nomba line fye, trakiti ya Imbila Nsuma Na. 37 iitila, “Impela ya Kupepa kwa Bufi Naipalama!” yalilenga abantu abengi ukucitapo cimo, nampo nga kutendeka ukulanakila Ubufumu bwa kwa Lesa nelyo ukulabulwisha.

 “Amahema ya kwa Yuda” Bayapususha

13. Bushe amashiwi ya kuti “amahema ya kwa Yuda” yapilibula cinshi, kabili mulandu nshi Yehova apusushisha abekala muli aya mahema?

¹³Belengeni Sekaria 12:7, 8. Kale, abena Israele balebomfya sana amahema. Limo limo abalebomfya amahema ni bakacema na balimi. Abalwani nga balishile mu kusansa umusumba wa Yerusalemu, abalekabila sana ukucingililwa ni balya baleikala mu mahema pantu e bo bali no kulabalilapo ukusansa. Amashiwi yatila “amahema ya kwa Yuda” mashiwi ya mampalanya ayalanga ukuti abasubwa pali ino nshita tabekala mu misumba iyacingililwa lelo bekala mu ncende iishacingililwa. Lintu bekala muli iyi ncende, tababa no mwenso ilyo bashimikila imbila nsuma iya Bufumu bwa kwa Mesia. Yehova wa milalo “akabalilapo ukupususha amahema ya kwa Yuda” pantu e yo Satana afwaisha ukusansa.

14. Bushe Yehova acingilila shani abekala mu “mahema ya kwa Yuda” no kubafwa pa kuti tabanakile?

¹⁴ Na kuba, ificitika ukutula kale filanga ukuti Yehova alacingilila abasubwa ilyo bekala mu “mahema” pantu e bemininako Ubufumu bwa kwa Lesa pano calo. * Alabafwa pa kuti ‘tabanakile,’ e kutila alabafwa ukuba abakosa kabili abashipa nga filya imfumu Davidi yali.

15. Mulandu nshi Yehova ‘afwaila ukufita inko shonse,’ kabili ni lilali akacita ifi?

¹⁵Belengeni Sekaria 12:9. Mulandu nshi Yehova ‘afwaila ukufita inko shonse’? Pantu balakaanya Ubufumu bwa kwa Mesia. Apo balaseebanya no kucusha abantu ba kwa Lesa, balinga ukupingulwa. Nomba line fye abantu ba kwa Satana bali no kusansa abapepa Lesa wa cine umuku wa kulekelesha kabili ici cikalenga mu calo mukabe inkondo iyo Baibolo ita ukuti Armagedone. (Ukusokolola 16:13-16) Ilyo abantu bakwe bakabasansa, Kapingula Wapulishamo akabapokolola kabili akalenga ishina lyakwe ukuba ilya mushilo mu nko shonse.—Esekiele 38:14-18, 22, 23.

16, 17. (a) Bushe “icikwatwa ca babomfi ba kwa Yehova” cinshi? (b) Ukushipikisha amafya ayo Satana aleta pali ifwe kulanga cinshi?

¹⁶ Satana takwata icanso icinganenuna icitetekelo nelyo ukupwisha ukucincila kwa bantu ba kwa Lesa aba mwi sonde lyonse. Umutende twakwata pa mulandu wa kwishiba ukuti Yehova uwaba na maka ya kupokolola abantu bakwe alatucingilila e “cikwatwa ca babomfi ba kwa Yehova.” (Esaya 54:17) Takwaba uwingafulunganya umutende twakwata kabili takwaba nangu umo uwingatukaanya ukulasambilishiwa na Yehova. (Amalumbo 118:6) Satana akatwalilila ukulatunka abantu ukuti baletukaanya no kulatucusha. Ukutwalilila ukushipikisha ilyo baletucusha bushininkisho bwa kuti umupashi wa kwa Lesa waba pali ifwe. (1 Petro 4:14) Imbila nsuma ya Bufumu bwa kwa Yehova ubuleteka ilebilwa mu calo fye conse. “Amabwe ya mu cisukushilo” aya mampalanya baliyapoosa pa bantu ba kwa Lesa pa kuti fye babanashe. Lelo pa mulandu wa maka ayo Yehova abapeela, ababomfi bakwe balashipikisha mafya ayaba kwati mabwe ya mu cisukushilo. (Sekaria 9:15) Abena Kristu basubwa ne “mpaanga shimbi” tabakabaleshe ukubomba umulimo wa kushimikila!

¹⁷ Tulefulukisha fye inshita ilyo tukalubuka ku mafya yonse ayo Kaseebanya aleta pali ifwe. Ala ubu bulayo bwa kuti “icilwilo conse icafulilwa iwe tacakashuke; no lulimi lonse ulwaimina iwe mu kupingula ukalufulunganya” bulatusansamusha nga nshi!

[Amafutunoti]

Kuti Mwayasuka Shani?

• Finshi filanga ukuti ifyanso fya kwa Satana fyalifilwa ukulesha Abena Kristu ukulapepa Yehova?

• Bushe Yerusalemu wa mu muulu aba shani nge “cilibwe cafina”?

• Bushe Yehova apususha shani “amahema ya kwa Yuda”?

• Apo Amargedone naipalama, finshi ifyo mwenekela ukuti e fikacitika?

[Amepusho]

[Ifikope pe bula 21]

Nangu cingati Satana alebacusha, abantu ba kwa Yehova aba mu Albania batwalilile fye ne citetekelo

[Icikope pe bula 23]

Yesu alishinine abalemubepesha ubufi

[Ifikope pe bula 24]

Icanso conse ico bengapangila abashimikila imbila nsuma cikafilwa