“Ubupe ubo Mwampeele Ubwacindama nga Nshi”

AYA e mashiwi yasosele uwali kale kateka wa calo ca Belgium ilyo alelanda pa citabo ca Umuntu Wakulisha Uwabalile Abako Uwa Mweo. * Umwina mupalamano alimutandalile no kumutwalila icitabo kabili uyu muntu alipokele. Pa numa, alembele kalata ya kutasha, atile: “Ilyo mwantandalile nalyumfwile bwino sana, kabili ico natemenwe sana bupe ubo mwampeele ubwacindama nga nshi, e kutila icitabo cilanda pa ‘Muntu Uwakulisha.’”

Uyu mwaume wali kateka alibelengele icitabo kabili atile: “Nga ca kuti abantu balebelenga sana amabuuku ya mu Baibolo ayalanda pali Yesu no kulakonka amafunde ya kwa Yesu Kristu, pali lelo icalo nga caliwama icine cine. Nga tatukabila icipani ca kusungilila umutende mu calo; nga takwaba ukusansa kwa fipondo, kabili mu calo nga tamwaba na lukaakala.” Nangu cingati asumine ukuti ifi aletontonkanya tafingacitika, alitashishe umwina mupalamano wakwe pa fyo amutandalile.

Kabili alembele no kuti: “Imwe muli bantu ababa bwino sana abafwaya ukuwamya ifintu kabili abafwaya abantu ukuba ne mibele iisuma.”

Inte sha kwa Yehova basumina ukuti nangu abantu babombeshe shani, te kuti bawamye ifintu pano calo. Uwingawamya fye ifintu ni Lesa epela. Balapashanya umuntu wakulisha, Yesu Kristu. Bushe Inte sha kwa Yehova balimutandalilapo nomba line? Ilyo bakamutandalila, mufwile mukaipakisha ukulanshanya nabo pa muntu wakulisha uwabalile abako uwa mweo. Kabili bakatemwa ukumupeelako icitabo ico ulya mwaume wali kateka atemenwe nga nshi.

[Futunoti]