Bushe Muli “Babomfi Abasuma Abo Lesa Alanga Icikuuku”?

“Ku kutemwa aba bwananyina mube abatemwana nga nshi. Ku kucindikana ni mwe mubalilepo.”—ROM. 12:10.

1. Malayo nshi ayaba mu Cebo ca kwa Lesa?

ICEBO CA KWA LESA catulaya ukuti Yehova akulatwafwa nga twafuupuka nelyo nga twaba inkumbabulili. Ica kumwenako fye, moneni aya mashiwi ya cisansamushi ayatila: “Yehova atungilila bonse abalewa, kabili enuna bonse abakontama.” “Ondapa aba nkumbabulili, no kubakakila pa filonda fyabo.” (Amalu. 145:14; 147:3) Na kabili, Shifwe wa ku muulu umwine asosa ukuti: “Ine, ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’”—Esa. 41:13.

2. Bushe Yehova atungilila shani ababomfi bakwe?

² Nomba bushe Yehova, uwikala ku muulu ukushailepela, ‘ekata shani ukuboko kwesu.’ Bushe ‘atwinuna’ shani amacushi nga ‘yatukontamika’? Yehova alatutungilila muli uyu musango mu nshila ishalekanalekana. Ica kumwenako fye, ukupitila mu mupashi wakwe uwa mushilo, Yehova alapeela abantu bakwe “amaka yacila aya bantunse.” (2 Kor. 4:7; Yoh. 14:16, 17) Na kabili ifyebo fyaba muli Baibolo, Icebo ca kwa Lesa ica maka filakosha ababomfi ba kwa Lesa. (Heb. 4:12) Bushe kwalibako inshila na imbi iyo Yehova abomfya pa kutukosha? Icasuko caba mwi buuku lya kwa Petro ilya kubalilapo.

“Lesa Alanga Icikuuku mu Nshila Shalekanalekana”

3. (a) Mashiwi nshi umutumwa Petro asosele pa macushi? (b) Fyebo nshi fyaba ku mpela ya kalata Petro abalilepo ukulemba?

³ Ilyo umutumwa Petro alembele kalata ku basubwa banankwe, abebele ukuti balikwete umulandu uusuma uwa kulasekelela pantu bali no kupokelela icilambu icisuma nga nshi. Lyena asosele no kuti: “Nangu ca kuti ni pa kashita fye akanono, nacilinga ukuti mube no bulanda pa mulandu wa macushi ayalekanalekana.” (1 Pet. 1:1-6) Petro abomfya ishiwi lya kuti “ayalekanalekana.” Ili shiwi lilanga ukuti amacushi yakaba mu misango iyapusanapusana. Petro tapelele apa pene, ukusha aba bwananyina balelanguluka nga ca kuti bali no kushipikisha amacushi ya misango iyapusanapusana. Lelo, alondolwele ukuti Abena Kristu bafwile ukucetekela ukuti Yehova akabafwa ukushipikisha ubucushi bonse ubwingabaponena, te mulandu no musango bwingeshilamo. Ubu bulayo bwaba ku mpela ya kalata, uko Petro alelanda pa fintu ifyakumine “impela ya fyonse.”—1 Pet. 4:7.

4. Mulandu nshi amashiwi yaba pali 1 Petro 4:10 yatusansamushisha?

⁴ Petro atila: “Imwe bonse Lesa alimupeela ubupe bwaibela umo umo. Apo muli babomfi abasuma abo Lesa alanga icikuuku mu nshila shalekanalekana, mulebomfya ubupe Lesa amupeela ku kubombela abanenu.” (1 Pet. 4:10) Petro na kabili abomfya ishiwi lya kuti ‘ukulekanalekana.’ Petro aleti, ‘Amacushi yeshila mu misango iyalekanalekana, lelo Lesa na o alanga icikuuku mu misango iyalekanalekana.’ Mulandu nshi aya mashiwi yatusansamushisha? Yapilibula ukuti te mulandu no musango wa bucushi ubwingesa pali ifwe, Lesa akatulanga icikuuku icikatwafwa ukushipikisha ubo bucushi. Nomba bushe namumona ifyo Lesa alanga icikuuku kuli ifwe? Petro atila, kupitila mu Bena Kristu banensu.

“Ukubombela Abanenu”

5. (a) Cinshi ico Umwina Kristu onse afwile ukucita? (b) Mepusho nshi twingepusha?

⁵ Ilyo Petro alembele kalata ku bantu bonse  ababa mu cilonganino ca Bena Kristu, atile: “Ukucila pali ifi fyonse, muletemwana nga nshi.” Lyena asosele no kuti: “Imwe bonse Lesa alimupeela ubupe bwaibela umo umo. . . . Mulebomfya ubupe Lesa amupeela ku kubombela abanenu.” (1 Pet. 4:8, 10) E ico, onse mu cilonganino afwile ukulakoselesha Abena Kristu banankwe. Twaliseekeshiwa ifintu ifyacindama sana ifya kwa Yehova, kabili twalikwata umulimo wa kufipeela ku bantu bambi. Ninshi, fintu nshi ifyo fine ifyo twaseekeshiwa? Petro atila “bupe.” Bupe nshi ubo bwine? Bushe tububomfya shani ‘ku kubombela abanensu’?

6. Fya bupe nshi fimo ifyo Abena Kristu babaseekesha?

⁶ Icebo ca kwa Lesa catila: “Ica bupe conse icisuma no bupe bonse ubwapwililika fifuma ku muulu.” (Yako. 1:17) Ca cine, icikuuku ca kwa Yehova e cilenga ukuti aseekeshe ifya bupe fyonse ku bantu bakwe. Ubupe bumo ubusuma nga nshi ubo Yehova atupeela, mupashi wakwe uwa mushilo. Ubu bupe bulenga twaba ne mibele iisekesha Lesa, pamo nga ukutemwa, ubusuma, no bufuuke. Iyi mibele ilenga ukuti na ifwe tulelanga ukutemwa ku Bena Kristu banensu no kuitemenwa ukubafwilisha ilyo babulisha fimo. Amano ya cine cine no kwishiba na fyo fyaba pa fya bupe ifyo umupashi wa mushilo utwafwa ukukwata. (1 Kor. 2:10-16; Gal. 5:22, 23) Na kuba, amaka twakwata no kulamuka na fyo kuti fyaba fya bupe ifyo twingabomfya ku kucindika no kulumbanya Shifwe wa ku muulu. Lesa alitupeela umulimo wa kubomfya ukulamuka ne mibele yesu ku kulanga icikuuku ca kwa Lesa ku Bena Kristu banensu.

Kuti Twafibomfya Shani “ku Kubombela” Abanensu

7. (a) Bushe ishiwi lya kuti “ubwaibela” lyalola mwi? (b) Mepusho nshi tulingile ukuipusha, kabili mulandu nshi?

⁷ Petro alandile pa fya bupe twapokelela ukuti: “Imwe bonse Lesa alimupeela ubupe bwaibela umo umo. . . . Mulebomfya ubupe Lesa amupeela.” Ishiwi lya kuti “ubwaibela” lilanga ukuti imibele no kulamuka kuti fyapusana mu musango e lyo na mu bukalamba. Na lyo line, Umwina Kristu umo umo akoseleshiwa ‘ukulabomfya ubupe Lesa amupeela [e kutila ubupe ubuli bonse ubo Umwina Kristu apokelela] ku kubombela abanankwe.’ Na kabili amashiwi ya kuti “apo muli babomfi abasuma . . . mulebomfya ubupe” yaba lifunde. Kanshi tufwile ukuipusha ukuti: ‘Bushe cine cine ndabomfya ubupe ubwaseekeshiwa kuli ine ku kukoselesha Abena Kristu banandi?’ (Linganyeniko 1 Timote 5:9, 10.) ‘Nelyo momfya ukulamuka uko Yehova ampeela ilingi line ku kucita ifinsekesha,  nalimo ku kulonganika ifyuma nelyo ku kufwaisha ukulumbuka?’ (1 Kor. 4:7) Nga tulebomfya ifya bupe twapokelela ‘ku kubombela abanensu,’ ninshi tukalasekesha Yehova.—Amapi. 19:17; belengeni AbaHebere 13:16.

8, 9. (a) Landeni fimo ifyo Abena Kristu mu calo conse bacita ilyo babombela abasumina banabo. (b) Bushe bamunyina ne nkashi aba mu cilonganino mwabamo bafwana shani?

⁸ Icebo ca kwa Lesa calilanda pa fintu ifyalekanalekana ifyo Abena Kristu baaliko mu nshita ya batumwa balecita pa kubombela abanabo. (Belengeni Abena Roma 15:25, 26; 2 Timote 1:16-18.) Na pali ino ine nshita Abena Kristu ba cine balakonka ifunde lya kubomfya ifya bupe fyabo ku kwafwilisha Abena Kristu banabo. Moneni fimo ifyo Abena Kristu ba cine bacita ilyo bomfwila ili funde.

⁹ Bamunyinefwe abengi balapoosa inshita iikalamba cila mweshi ku kupekanya amalyashi ya pa kulongana. Nga balanda amalyashi pa kulongana, ifyebo fyacindama ifyo basanga ilyo balebelenga Baibolo filalenga bonse mu cilonganino ukulashipikisha. (1 Tim. 5:17) Bamunyinefwe na bankashi abengi baliyangusha sana ica kuti balaba ifibusa ku Bena Kristu banabo. (Rom. 12:15) Bamo lyonse balatandalila ababa no bulanda no kupepela pamo na bo. (1 Tes. 5:14) Bambi balalemba ifyebo fya kukoselesha ku Bena Kristu banabo abaleshipikisha amacushi. E lyo bambi na bo balafwilisha abalwala ukulasangwa ku kulongana lyonse. Ba Nte abengi nga nshi balabombako umulimo wa kwafwilisha abasumina banabo ukukuula amayanda ayonaika nga kwaba akayofi. Ukutemwa uko aba bamunyinefwe balanga ne fyo bafwilisha abasumina banabo fyonse filanga ifyo “Lesa alanga icikuuku mu nshila shalekanalekana.”—Belengeni 1 Petro 4:11.

Bushe Icacindamisha ni Cili Kwi?

10. (a) Milimo nshi ibili iyo Paulo abikileko amano ilyo alebombela Lesa? (b) Tupashanya shani Paulo muno nshiku?

¹⁰ Ababomfi ba kwa Lesa tababaseekesha fye ifya bupe fya kubomfya ku kwafwilisha Abena Kristu banabo lelo balibaseekesha ne mbila nsuma iya kushimikila ku bantu banabo. Umutumwa Paulo alishibe ukuti alekabila ukulacita ifi fibili ilyo alebombela Yehova. Lintu alembele kalata ku cilonganino ca mu Efese, alandile pa “mulimo wa cikuuku ca kwa Lesa” uo bamupeele pa kuti bena benganonkelamo. (Efes. 3:2) Lelo, alembele no kuti: “Lesa atumona ukuti natulinga ukuseekeshiwa imbila nsuma.” (1 Tes. 2:4) Nge fyo cali kuli Paulo, na ifwe bene twalishiba ukuti twaliseekeshiwa umulimo wa kulashimikila imbila nsuma ya Bufumu bwa kwa Lesa. Nga twalicincila mu mulimo wa kushimikila, ninshi tulapashanya Paulo uwali uwacincila nga nshi mu kushimikila imbila nsuma. (Imil. 20:20, 21; 1 Kor. 11:1) Twalishiba ukuti ukushimikila imbila nsuma ya Bufumu kuti kwapususha imyeo ya bantu. Lelo, na kabili tulesha na maka ukupashanya Paulo ilyo tufwailisha inshila ya ‘kupeelelamo ica bupe icafuma kuli Lesa’ ku Bena Kristu banensu.—Belengeni Abena Roma 1:11, 12; 10:13-15.

11. Bushe tufwile ukulamona shani umulimo wa kushimikila no mulimo wa kukoselesha aba bwananyina?

¹¹ Ni uli kwi pali iyi milimo ibili uwacindama sana? Ukwipusha ici cipusho cimo cine fye no kwipusha ukuti, Bushe lipindo nshi ilyacindama sana pa mapindo yabili ayo icuni cakwata? Mukwai icasuko nacishibikwa bwino bwino. Pa kuti icuni cipupuke, cilakabila amapindo yonse yabili. E fyo caba na ku Bena Kristu, tufwile ukulabomba iyi milimo ibili, ninshi e lyo tukalacita fyonse ifyo Lesa enekela ifwe ukucita. E ico, tatufwile ukulamona kwati kuti twabombako umulimo wa kushimikila imbila nsuma no kulekelesha umulimo wa kukoselesha aba bwananyina. Lelo tufwile ukulamona iyi milimo ukuti yendela pamo, nga filya fine Petro na Paulo balemona iyi milimo. Mulandu nshi twasosela ukuti iyi milimo yendela pamo?

12. Bushe Yehova atubomfya shani?

¹² Ilyo tushimikila, tulabomfya imisambilishishe iyalekanalekana iyo nalimo twaishiba pa kuti imbila nsuma ya Bufumu iisansamusha abantu ingafika pa mitima yabo. Lintu tucita  ifyo, tulabafwa ukuba abasambi ba kwa Kristu. Lelo, na kabili tulabomfya no kulamuka kwesu ne fya bupe fimbi ifyo nalimo twakwata pa kuti twingakoselesha Abena Kristu banensu ku fyebo ifisuma nelyo ukupitila mu kubafwilisha ilyo babulishe fimo. Shonse ishi ni nshila Lesa alangilamo icikuuku. (Amapi. 3:27; 12:25) Nga tulecita ifi, ninshi tulebafwa ukutwalilila ukuba abasambi ba kwa Kristu. Ilyo tulebomba iyi milimo, e kutila umulimo wa kushimikila ku cintubwingi no wa ‘kubombela abanensu,’ tulakwata ishuko ilikalamba ilya kubomfiwa na Yehova.—Gal. 6:10.

“Mube Abatemwana Nga Nshi”

13. Cinshi cingacitika nga twaleka ‘ukubombela abanensu’?

¹³ Paulo akonkomeshe Abena Kristu banankwe ukuti: “Ku kutemwa aba bwananyina mube abatemwana nga nshi. Ku kucindikana ni mwe mubalilepo.” (Rom. 12:10) Na kabushe, ukutemwa sana bamunyinefwe kulalenga tulebomba no mweo wesu onse nga “babomfi abasuma abo Lesa alanga icikuuku.” Twalishiba ukuti Satana nga alenga twaleka ‘ukubombela abanensu,’ ninshi akapwisha ukwikatana kwaba pali ifwe. (Kol. 3:14) E lyo nga twaleka ukwikatana ninshi tukaleka no kuba abacincila mu mulimo wa kushimikila. Satana alishiba ukuti nga afuna ipindo lyesu limo, ninshi tukafilwa ukubomba imilimo yesu kwati ni filya fine icuni cingafilwa ukupupuka.

14. Ni bani banonkelamo mu ‘kubombela abanensu’? Landeni ica kumwenako.

¹⁴ ‘Ukubombela abanensu’ takunonsha fye abapokelela icikuuku ca kwa Lesa lelo kulanonsha na balya bene abo Lesa abomfya ukulanga icikuuku. (Amapi. 11:25) Ica kumwenako fye, tontonkanyeni pali Ryan no mwina mwakwe Roni, abekala ku Illinois, ku United States. Ilyo baumfwile ukuti icipuupu (Harricane Katrina) naconaula amayanda ya ba Nte banabo ayengi nga nshi, ukutemwa aba bwananyina kwalengele ukuti baleke incito, bafume mu ng’anda baleikalamo, no kushita ing’anda iinono iya kukulika kuli motoka no kuiwamya, kabili baendele amakilomita 1,400 ukuya ku Louisiana. Baikele kulya umwaka uutuntulu ne myeshi, balebomfya inshita yabo, amaka, ne ndalama ku kwafwilisha bamunyinabo. Ryan, uuli ne myaka 29, atile: “Ukubombako uyu mulimo kwalilenga napalama sana kuli Lesa. Nalimwene ifyo Yehova asakamana abantu bakwe.” Ryan asosele no kuti: “Ukulabombela pamo na bamunyina abakalamba kwalengele nasambilila ifingi pa fya kusakamana aba bwananyina.  Kwalengele naishiba no kuti kwaliba imilimo iingi iyo fwe bacaice tufwile ukulabomba mu kuteyanya kwa kwa Yehova.” Roni, uuli ne myaka 25, na o atile: “Ndomfwa bwino sana ukuti nalibombeleko ulya mulimo wa kwafwilisha bambi. Naliba ne nsansa sana ukucila kale. Nalishiba ukuti na mu myaka iileisa nkatwalilila ukulanonkelamo mu fyo naimwenene ilyo twalebomba uyu mulimo.”

15. Mulandu nshi uusuma uo tulingile ukutwalilila ukulabomba nga babomfi abasuma abo Lesa alanga icikuuku?

¹⁵ Ukwabula no kutwishika ukumfwila ifunde lya kwa Lesa ilya kushimikila imbila nsuma ne lya kulakoselesha Abena Kristu banensu kulalenga tuleipakisha amapaalo ayengi. Abo twafwa balatwalilila ukubombela Yehova, e lyo na ifwe tulaba ne nsansa ishaba fye mu kupeela. (Imil. 20:35) Mu cilonganino conse mulaba ukwikatana ilyo bonse batampa ukulatemwa bambi. Na kabili ukutemwana kutwishibisha ukuti tuli Bena Kristu ba cine. Yesu atile: “Nga muletemwana, e lyo bonse bakeshiba ukuti muli basambi bandi.” (Yoh. 13:35) Ne cacilapo ca kuti ilyo Shifwe uutusakamana, Yehova, amona ababomfi bakwe aba pano calo balefwaisha ukukoselesha abali mu kukabila, umucinshi ulaya kuli ena. Ala mwandini twalikwata umulandu uusuma uwa kubomfesha ifya bupe fyesu ‘ku kubombela abanensu’ pantu na kuba tuli “babomfi abasuma abo Lesa alanga icikuuku”! Bushe mukatwalilila ukulabombela abanenu?—Belengeni AbaHebere 6:10.

Bushe Muleibukisha?

• Bushe Yehova akoselesha shani ababomfi bakwe?

• Finshi ifyo Lesa atuseekesha?

• Ni nshila nshi isho twingafwilamo Abena Kristu banensu?

• Cinshi cikalenga tukatwalilile ukubomfya ica bupe cesu ‘ku kubombela abanensu’?

[Amepusho]

[Ifikope pe bula 13]

Bushe mubomfya “ubupe” bwenu ku kubombela bambi nelyo ku kucita ifimusekesha?

[Ifikope pe bula 15]

Tulashimikila imbila nsuma kuli bambi no kwafwilisha Abena Kristu banensu

[Icikope pe bula 16]

Abafwilisha abanabo ilyo kwaba akayofi balinga ukubatasha pantu balaipusula ku fintu ifingabaletela insansa