Mulesekelela Pa Kubomba Umulimo Wa Kulenga Abantu Ukuba Abasambi
Mulesekelela Pa Kubomba Umulimo Wa Kulenga Abantu Ukuba Abasambi
“E ico kabiyeni, kalengeni . . . abasambi.”—MAT. 28:19.
1-3. (a) Bushe abengi bamona shani ishuko lya kubombako umulimo wa kutungulula amasambililo ya Baibolo? (b) Mepusho nshi twalalanshanyapo?
“NKASHI uwaba mu cilonganino ca ciHindu ku United States alembele ukuti: “Ndasambilila Baibolo no lupwa ulwafuma ku Pakistan pa milungu 11.” Atwalilile ukusosa ukuti: “Twalisanguka ifibusa. Ifilamba filatengelela nga naibukisha ukuti nomba line fye bali no kubwelelamo ku Pakistan. Icilenga ifilamba ukutengelela, te bulanda fye bwa kuti nkalabafuluka, lelo na pa mulandu wa fyo nsekelela ilyo ndebasambilisha pali Yehova.”
2 Bushe na imwe mwalyumfwapo bwino ilyo mwalesambilila Baibolo na bamo, nge fyaumfwile uyu nkashi? Yesu na basambi bakwe balesekelela pa kubomba umulimo wa kulenga abantu ukuba abasambi. Ilyo abasambi 70 abo akanshishe babwelele balesekelela no kumweba ilyashi ilisuma, Yesu na o “alisekelele nga nshi mu mupashi wa mushilo.” (Luka 10:17-21) Na pali ino ine nshita abengi balasekelela nga nshi ilyo balebomba umulimo wa kulenga abantu ukuba abasambi. Na kuba, mu 2007, bakasabankanya ababombesha kabili aba nsansa baletungulula amasambililo ya Baibolo 6,500,000 cila mweshi!
3 Lelo bakasabankanya bamo tabatala abatungululapo isambililo lya Baibolo. Bambi limbi napapita imyaka apo batungulwilepo isambililo. Mafya nshi nalimo ayegatucilikila ukutungulula isambililo? Bushe kuti twapwisha shani ayo mafya? Kabili tunonkelamo shani nga twaesha na maka ukumfwila ifunde Yesu atupeele ilya kuti: “E ico kabiyeni, kalengeni aba nko shonse ukuba abasambi”?—Mat. 28:19.
Amafya Ayengalenga Ukuti Twilasekelela
4, 5. (a) Bushe abantu abengi mu fyalo fimo bankulako shani ilyo balebashimikila? (b) Mafya nshi ayo bakasabankanya bakwata mu fyalo fimbi?
4 Mu fyalo fimo abantu balatemwa ukupoka impapulo shesu kabili balomfwa bwino ukusambilila Baibolo na ifwe. Abena Kristu abaupana aba ku Australia ababombelepo mu Zambia pa nshita inono balembele ukuti: “Ala mukwai ifyo balanda pa calo ca Zambia fya cine. Abena Zambia balomfwa bwino sana ukusambilila Baibolo. Ala kuti mwaipakisha ukushimikila mu misebo! Abantu baleileta fye, e lyo bamo bena baleipusha nga natukwata bamagazini abo balefwaya.” Nomba line mu mwaka umo, bamunyinefwe mu Zambia batungulwile amasambililo ya Baibolo ukucila pali 200,000, kanshi nga kupendela pali kasabankanya umo umo, ninshi kasabankanya umo aletungulula amasambililo ukucila pali limo.
5 Nomba mu fyalo fimbi bakasabankanya nalimo kuti cabakosela ukushalika impapulo no kutungulula amasambililo ya Baibolo lyonse. Mulandu nshi? Ilingi line, abantu tabasangwa pa mayanda ilyo bakasabankanya baya mu kushimikila, e lyo abo basanga limo tababika amano ku fya mapepo. Limbi bakuliile mu ndupwa ishishaleya ku mapepo nelyo limbi balileka ukupepa pa mulandu wa bumbimunda ubwaba mu mipepele ya bufi. Abantu abengi balabacusha kuli bakacema ba bufi kabili bali abapaswa. (Mat. 9:36) Ukwabula no kutwishika aba musango yo kuti batampa ukusengauka ukulanda pali Baibolo.
6. Bushe mafya nshi bakasabankanya bamo nalimo bengakwata?
6 Bakasabankanya bamo aba cishinka bakwata ubwafya bumbi ubulenga ukuti belasekelela. Nangu cingati kale bali abacincila mu mulimo wa kulenga abantu ukuba abasambi, pali ino nshita balafilwa ukubombesha pa mulandu wa kulwalilila nelyo ubukalamba. Tontonkanyeni na pa mafya yambi ayo twingakwata fwe bene. Ku ca kumwenako, bushe mumona kwati tamwafikapo ukulatungulula amasambililo ya Baibolo? Nalimo kuti mwaumfwa nga filya Mose aumfwile ilyo Yehova amutumine ukuyalanda na Farao. Mose atile: “Iye mwe Yehova, ine nshilanda bwino, ukufuma fye ku kale ukufika na nomba.” (Ukufu. 4:10) Ubwafya bumbi mwenso wa kuti nalimo tukalafilwa ukutungulula amasambililo. Kuti twasakamana ukuti umuntu takabe umusambi pantu tatwaishiba ukusambilisha bwino. Pa kuti ica musango yu cikacitika, limbi kuti twasalapo ukukanatungulula amasambililo. Bushe kuti twapwisha shani aya mafya?
Pekanyeni Umutima
7. Cinshi calelenga Yesu ukushimikila?
7 Ico mulingile ukubalilapo ukucita, kupekanya umutima. Yesu atile: “Ifyaisula mu mutima wa muntu, no kulanda e fyo alanda.” (Luka 6:45) Icalelenga Yesu ukushimikila, ni co alebika sana amano ku bantu. Ku ca kumwenako, ilyo amwene ukuti abaYuda banankwe balitalwike kuli Lesa, “abomfwilile uluse.” Aebele abasambi bakwe ukuti: “Umulimo wa kulobolola ukalamba . . . Lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.”—Mat. 9:36-38.
8. (a) Finshi tufwile ukulatontonkanyapo? (b) Finshi twingasambilila ku fyo umusambi wa Baibolo umo alembele?
8 Ilyo tulebomba umulimo wa kulenga abantu ukuba abasambi, kuti cawama ukulatontonkanya sana pa fyo twanonkelamo pa mulandu wa kuti umuntu umo aleisa mu kutusambilisha Baibolo. E lyo muletontonkanya na pa bantu abo mwingakumanya ilyo muleshimikila na pa fyo bakanonkelamo ilyo bakomfwa imbila nsuma tubila. Umwanakashi umo alembele kalata ku maofeshi ya ba Nte ayaba mu calo ekalamo ukuti: “Ndefwaya ukumweba ifyo ntasha ifi ba Nte besa mu kunsambilisha pa mwandi. Nalishiba ukuti limo kuti batendwa pantu ndepusha sana amepusho kabili lyonse balakokola sana ukucila ifyo twaumfwana. Lelo balantekanishisha kabili balafwaisha ukunsambilisha ifyo basambilila. Ndatasha sana Yehova na Yesu pa kwishibana na ba bantu.”
9. Bushe Yesu aletontonkanya pali finshi, kabili kuti twamupashanya shani?
9 Kwena te bantu bonse basumine ukuba abasambi ba kwa Yesu. (Mat. 23:37) Bamo balitendeke ukumukonka lelo papitile fye inshita iinono bafililwe ukusumina isambilisho lyakwe kabili “balekele ukwenda nankwe.” (Yoh. 6:66) Lelo Yesu tatampile ukutontonkanya ukuti filya bamo bakeene ukusumina isambilisho lyakwe ninshi ifyo alesambilisha tafyacindeme. Nangu cingati imbuto ishingi isho abyele tashamenene, Yesu abikile fye amano ku fisuma ifyo alecita. Alimwene ukuti amabala yalibuutile ico yali ni nshita ya kuseepa kabili aleba ne nsansa sana ukubombako umulimo wa kuseepa. (Belengeni Yohane 4:35, 36.) Mu nshita ya kuti tulelolesha pa mushili apo imbuto shishamena, bushe na ifwe tatulingile ukubika amano ku fyo twingaseepa mu ncende iyo tushimikilamo? Natulande pa fyo twingatwalilila ukubika amano ku fingafumamo ilyo tuleshimikila?
Muleba no Buyo bwa Kutendeka Amasambililo Ilyo Muleshimikila
10, 11. Finshi mwingacita pa kuti mutwalilile ukulasekelela ilyo muleshimikila?
10 Shibulimi alabyala imbuto pa kuti akeselobolola ifisabo. E cimo cine na ifwe, tufwile ukuba no buyo bwa kutendeka amasambililo ilyo tuleshimikila. Lelo, bushe kuti mwacita shani nga ca kuti lyonse mulashimikila nomba musanga fye abantu abanono pa mayanda nelyo nga tamusanga abo mwashimikileko ilyo mwabwelelamo? Kwena ica musango yu nga cacitika kuti mwafuupuka. Nomba bushe mufwile ukuleka ukushimikila ku ng’anda ne ng’anda? Awe nakalya! Abantu abengi e lyo baleumfwapo imbila nsuma pa muku wa kubalilapo ukupitila muli uyu mulimo wa kushimikila ku ng’anda ne ng’anda uo twabomba pa myaka iingi.
11 Nomba pa kuti mutwalilile ukulasekelela ilyo muleshimikila, mulingile ukulabomfyako inshila na shimbi. Ku ca kumwenako, bushe mwalyesha ukushimikilako mu musebo nelyo ukushimikila abantu pa ncito pa mwabo? Bushe kuti mwashimikila ukubomfya foni nelyo ukupoka amanambala ya mafoni ya bantu abo mwashimikilako kale pa kuti mwingabatumina? Nga mwaba no mute e lyo no kulabomfya inshila shalekanalekana ilyo muleshimikila, mukalaba ne nsansa pantu mukalasanga abantu abakabika amano ku kukutika ku mbila nsuma iya Bufumu.
Ifyo Mwingashipikisha nga ca Kuti Abantu Tabalebikako Amano
12. Finshi twingacita nga ca kuti abantu abengi mu ncende tushimikilamo tabalebikako amano?
12 Nomba tutile abantu baba mu ncende mushimikila tababika amano ku fya mapepo, bushe kuti mwacita shani? Bushe kuti mwatendeka ukulanshanya na bena pa kulanda pa lyashi ilingalenga balafwaisha ukukutika ku fyo mulelanda? Umutumwa Paulo alembeele Abena Kristu banankwe aba mu Korinti ukuti: “Ku baYuda naishileba ngo muYuda . . . Ku bashaba na mafunde naishileba ngo ushaba na mafunde . . . nelyo nshili uwabulwa amafunde ya kwa Lesa.” Cinshi calengele ukuti Paulo alecita ifi? Atile: “Ku bantu bonse mba fye nge fyo bali, pa kuti mu nshila iili yonse mpususheko bamo.” (1 Kor. 9:20-22) Bushe na ifwe te kuti tulande pa malyashi ayo abantu ba mu ncende tushimikila bengatemwa ukukutikako? Abantu abengi abashiya ku mapepo balafwaya sana indupwa shabo ukuba ishaikatana. E lyo limbi balafwaya no kusanga icingalenga baba ne nsansa mu bumi bwabo. Bushe kuti twashimikila imbila nsuma ya Bufumu kuli aba bantu mu nshila iingalenga ukuti balefwaisha ukukutika?
13, 14. Bushe kuti twacita shani pa kuti tulesekelela sana ilyo tulebomba umulimo wa kulenga abantu ukuba abasambi?
13 Bakasabankanya abengi balasekelela ilyo balebomba umulimo wa kulenga abantu ukuba abasambi nangu cingati mu ncende bashimikila abantu abengi tababika amano ku fya mapepo. Bushe bacita shani? Balasambililako ululimi lwa ku calo cimbi. Abena Kristu baupana, abali ne myaka ukucila pali 60, bamwene ukuti mu ncende iyo icilonganino cabo cishimikilamo mwaleikala abaChinese abengi. Munyinefwe atile: “Ici calengele ukuti tusambilile iciChinese.” Atwalilile ukusosa ukuti: “Nangu cingati calekabila ukuti tulepoosa inshita cila bushiku ukusambilila ulu lulimi, ukucita ifi kwalengele ukuti tube ne nsansa pantu twatampile ukutungulula amasambililo ayengi ku baChinese abekala mu ncende tushimikila.”
14 Nangu ni lintu mushingasambilila ululimi lwa ku calo cimbi, nga mwakumanya umuntu uulanda ululimi lumbi kuti mwabomfya akatabo katila Good News for People of All Nations. Na kabili kuti mulepokako impapulo sha mu lulimi ulwa bantu mukumanya. Nomba, kwena cilakabila inshita no kuibikilishako pa kulanshanya na bantu abalanda ululimi lumbi kabili abakwata intambi isho mushaishiba. Lelo, mufwile ukulaibukisha icishinka caba mu Cebo ca kwa Lesa icitila: “Uutanda alefusha no kuseepa akaseepa ifingi.”—2 Kor. 9:6.
Mulimo wa Cilonganino Conse
15, 16. (a) Mulandu nshiumulimo wa kulenga abantu ukuba abasambi wabela mulimo wa cilonganino conse? (b) Mulimo nshi abakalamba babomba?
15 Lelo, umulimo wa kulenga abantu ukuba abasambi taushintilila fye pa muntu umo. Mulimo wa cilonganino conse. Mulandu nshi twingasosela ifyo? Yesu atile: “Nga muletemwana, e lyo bonse bakeshiba ukuti muli basambi bandi.” (Yoh. 13:35) Na kabushe, abasambi ba Baibolo nga basangwa ku kulongana, balomfwa bwino sana ukumona ifyo twatemwana. Umwanakashi umo uusambilila Baibolo alembele ukuti: “Ndomfwa bwino sana ukusangwa ku kulongana. Abantu balisansamuka!” Yesu atile abasanguka abasambi bakwe kuti batampa ukubakaanya kuli balupwa lwabo. (Belengeni Mateo 10:35-37.) Lelo alaile ukuti bakasanga “bamunyina ne nkashi na banyina na bana” mu cilonganino ca kwa Lesa.—Marko 10:30.
16 Bamunyinefwe na bankashi abakalamba balabomba umulimo uwacindama sana mu kwafwilisha abasambi ba Baibolo ukulunduluka. Bacita shani ifyo? Nangu cingati bamo pali aba bakalamba kabili tabakumanisha ukutungulula amasambililo, ifyebo balanda ilyo basukapo pa kulongana filakosha icitetekelo ca bantu bonse abaleumfwako. ‘Ubulungami’ bwabo bulayemfya icilonganino kabili bulalenga ukuti abantu abafumacumi baleisa mu kuteyanya kwa kwa Lesa.—Amapi. 16:31.
Ukupwisha Umwenso
17. Kuti twacita shani pa kuti tuleke ukulamona kwati tatwafikapo ukutungulula amasambililo?
17 Tutile mumfwa kwati tamwafikapo ukutungulula amasambililo, bushe kuti mwacita shani? Mwilalaba ukuti Yehova alyafwile Mose lintu amupeele umupashi wa mushilo, amupeela na munyina Arone uwa kumwafwa. (Ukufu. 4:10-17) Yesu alaile ukuti umupashi wa kwa Lesa wa kulatwafwa ilyo tuleshimikila imbila nsuma. (Imil. 1:8) Na kabili, ilyo Yesu atumine abasambi mu kushimikila, abatumine babili babili. (Luka 10:1) E ico, ukutungulula amasambililo nga kulamwafya, mulelomba umupashi wa kwa Lesa ukuti ulemupeela amano kabili mulebomba no Mwina Kristu munenu uwingamwafwa ukuba abashipa no kumwafwa ukulatungulula amasambililo. Icitetekelo cesu cilakosa nga twaibukisha ukuti Yehova asalile abantu-untu fye, “abanaka aba pano calo,” ukubomba uyu mulimo uukalamba nga nshi.—1 Kor. 1:26-29.
18. Bushe kuti twapwisha shani umwenso wa kuti nalimo tatwakafwe umuntu ukuba umusambi?
18 Kuti twapwisha shani umwenso wa kulamona kwati umuntu takabe umusambi ico tatwaishiba ukusambilisha bwino? Tufwile ukulaibukisha ukuti ukupanga abasambi takwaba ngo kwipika ifya kulya ukwa kuti umuntu fye umo e wingalenga ukuti fiwame nelyo e o bengaseka nga tafiweme. Umulimo wa kulenga abantu ukuba abasambi tawashintilila fye pa muntu umo. Yehova e ubomba umulimo uwacindamisha, e ukulila abantu kuli ena. (Yoh. 6:44) Ifwe na bambi mu cilonganino tulesha na maka yesu ukubasambilisha pa kuti balunduluke. (Belengeni 2 Timote 2:15.) E lyo umusambi na o afwile ukulacita ifyo alesambilila. (Mat. 7:24-27) Umuntu nga aleka ukusambilila Baibolo, kwena te kuti tumfwe bwino. Tulesubila ukuti abasambi ba Baibolo bakasalapo ukucita icalungama, lelo ifwe umo umo “tukalubulula kuli Lesa.”—Rom. 14:12.
Kuti Twanonkelamo Shani?
19-21. (a) Tunonkelamo shani mu kutungulula amasambililo ya Baibolo? (b) Bushe Yehova amona shani bonse ababombako umulimo wa kushimikila?
19 Ukutungulula amasambililo kulalenga ukuti tulebika amano ku kufwaya Ubufumu intanshi. Na kabili, kulalenga icine caba mu Cebo ca kwa Lesa ukulambatila sana mu mitima yesu kabili kulalenga twacishiba bwino. Mulandu nshi ukutungulula amasambililo kucitila ifi? Painiya we shina lya kuti Barak alondolola ukuti: “Ukulatungulula amasambililo kulatupatikisha ukulabelenga sana Icebo ca kwa Lesa. Ilyo nshilatendeka ukusambilisha umuntu umbi, lyonse mfwaya nashininkisha ukuti ifyo nalaya mu kusambilisha fya cine.”
20 Bushe nga tamuletungulula isambililo ninshi imilimo yenu ya fye kuli Lesa? Awe nakalya! Yehova alicindamika sana fyonse ifyo tucita ilyo tumulumbanya. Bonse ababombako umulimo wa kushimikila ‘babombela pamo na Lesa.’ Lelo, ukutungulula amasambililo kulalenga tulesekelela sana nga tulemona uko Lesa alemesha imbuto twalimbile. (1 Kor. 3:6, 9) Painiya we shina lya kuti Amy atile: “Nga ndemona uko umusambi alelunduluka, ala ndatasha sana Yehova pa kumomfya ukupeela uyo muntu ubupe ubwacindamisha, e kutila ishuko lya kwishiba Yehova no kwisakwata umweo wa muyayaya.”
21 Ukulaesha na maka ukutendeka no kulatungulula amasambililo ya Baibolo kukalenga tulebika amano ku kubomba umulimo Lesa atupeela pali ino nshita no kukosha isubilo lya kwisapusuka impela ya cino calo no kwingila mu calo cipya. Yehova nga aletwafwa, kuti twa-afwa na bantu abakutika kuli ifwe. (Belengeni 1 Timote 4:16.) Ala mwandini ico kuti calenga ukuti tulesekelela nga nshi!
Bushe Muleibukisha?
• Mafya nshi yengalenga bamo ukulafilwa ukutungulula amasambililo ya Baibolo?
• Kuti twacita shani nga abantu abengi mu ncende tushimikila tababika amano ku fya mapepo?
• Tunonkelamo shani mu kutungulula amasambililo ya Baibolo?
[Amepusho]
[Ifikope pe bula 9]
Bushe mulabomfyako inshila na shimbi ilyo muleshimikila pa kuti mulesanga abantu abafwaisha ukusambilila?